केन्द्र-निर्देश
केन्द्र सरकार ह जम्मों राज्य अउ केन्द्रसासित प्रदेस मन ले अस्पताल म देवइया सेवा अउ सुविधा के कीमत ल प्रमुख रूप ले देखाय बर केहे हे। ए बारे म स्वास्थ्य सचिव पुण्य सलिला श्रीवास्तव ह जम्मों राज्य अउ केन्द्रसासित प्रदेस मनके मुख्य सचिव मन ल चिट्ठी लिखे हे। ओमन किहीन कि स्वास्थ्य सेवा के दर स्पष्ट रूप ले प्रदर्सित करे म मरीज अउ उंखर परिवार वाले मन ल इलाज के संभावित खरचा के पता चल सकही।
इही बीच, केन्द्र सरकार ह कैंसर रोधी दवई म लाभ ल अधिकतम मूल्य के तीस प्रतिसत तक सीमित करे के फइसला लेहे। केन्द्र ह सर्वोच्च न्यायालय ल एखर जानकारी दीन। न्यायालय ह दवई क्षेत्र म दवई के कीमत के समीक्षा करे के निरदेस दे रिहीन।
शिवराज चौहान-राष्ट्रीय सम्मेलन
केन्द्रीय कृषि अउ किसान कल्याण मंत्री शिवराज सिंह चौहान ह किहीन हे कि कृषि विकास बर जिला स्तर म नियोजन अउ आने-आने मंत्रालय के बीच तालमेल जरूरी हे। श्री चौहान ह प्रधानमंत्री धन-धान्य कृषि योजना अउ आयोजित राष्ट्रीय सम्मेलन म ए बात कहिन। ओमन किहीन कि योजना के खाका जिला कलेक्टर मन ह जमीनी परिस्थिति ल ध्यान म रखके तैयार करे हे। ओमन बतईन कि प्रधानमंत्री धन-धान्य कृषि योजना के तहत अइसन सौ जिला मन ल प्राथमिकता दे गेहे।
यूपीआई-एमडीआर
यूपीआई म ग्राहक ले व्यापारी मनके बीच दू हजार रूपिया ले जादा के लेनदेन उपर यूपीआई मर्चेंट डिस्काउंट रेट देवारी के बाद लागू करे जाही। नेशनल पेमेंट्स कॉपार्रेशन ऑफ इंडिया-एनपीए ह सोशल मीडिया पोस्ट म बतईन कि यूपीआई अउ सेवा संचालन समिति ह त्योहारी मौसम मन ल राखत हुए ए फइसला लेहे। रिपोर्ट म केहे गेहे कि एखर तारीख के सूचना अलग ले दे जाही।
होम्योपैथी-सरकारी कॉलेज
छत्तीसगढ़ म होम्योपैथी के पढ़ाई बर पहिली सरकारी कॉलेज नवा रायपुर म सुरू होही। राष्ट्रीय आयोग ह उपरवारा स्थित यूनिवर्सिटी कॉलेज ऑफ होम्योपैथी म बी.एच.एम.एस. के तिरसठ सीट म प्रवेस के सशर्त मंजूरी दे देहे। एही सैक्षणिक सत्र म यहां दाखिला सुरू होही। कॉलेज के जम्मों तिरसठ सीट म नीट के मेरिट ले प्रवेस दे जाही। एमा न्यूनतम पन्द्रह प्रतिशत सीट अखिल भारतीय कोटा बर होही। बाकी काउंसलिंग ले भरे जाही। अभी आयुष पाठ्यक्रम बर काउंसिलिंग चलत हे।
स्वास्थ्य मंत्री श्याम बिहारी जायसवाल ह किहीन हे कि प्रदेस के पहिली सरकारी होम्योपैथी कॉलेज ल प्रवेस के मंजूरी मिलना आयुष चिकित्सा सिक्षा के विस्तार के दिसा म बड़ बिसेस कदम हवय।
मुख्य सचिव-सीएम हेल्पलाइन
मुख्य सचिव विकासशील ह सीएम हेल्पलाइन म दर्ज सिकायत के गंभीरता ले निराकरण करे के निरदेस देहे। मुख्य सचिव के पगरइति म आज मंत्रालय म राज्य स्तरीय उच्च अधिकारी मने समीक्षा बइठका आयोजित करे गीस। बइठका म मुख्य सचिव ह बतईन कि सीएम हेल्पलाइन म अब तक राज्य म करीबन दू लाख सिकायत दर्ज करे जा चुके हे। बइठका म अवइया धान खरीदी बर नीति तियार करे अउ जल जीवन मिशन ले जुड़े नीति के शेष बिन्दु ल समय म पूरा करे के बारे म गोठबात करे गीस।
बायोसेफ्टी लेवल-3 प्रयोगशाला
रायपुर के इंदिरा गांधी कृषि विश्वविद्यालय परिसर म अत्याधुनिक बायोसेफ्टी लेवल-थ्री प्रयोगशाला स्थापित करे गेहे। मुख्यमंत्री विष्णुदेव साय ह किहीन हे कि ए प्रयोगशाला छत्तीसगढ़ म उच्च स्तरीय जैव-सुरक्षा अनुसंधान के नवा दिसा देके संगेसंग वैज्ञानिक नवाचार अउ संक्रामक रोग के रोकथाम के क्षेत्र म महत्वपूर्ण भूमिका निभाही। ए प्रयोगशाला के माध्यम ले संक्रामक रोगजनक के पहिचान, उंखर वैज्ञानिक अध्ययन, वैक्सीन अउ इलाज संबंधी अनुसंधान अउ उन्नत तकनीक के विकास ल बढ़ावा मिलही।
वीबी – जीरामजी-समिति
छत्तीसगढ़ म विकसित भारत – जीरामजी योजना के क्रियान्वयन बर मुख्य सचिव के पगरइति म राज्य स्तरीय संचालन समिति गठित करे जाही। ए समिति म बीस ले जादा विभाग के सचिव के संग बिसय बिसेसज्ञ, तकनीकी अउ सोध संस्थान के प्रतिनिधि अउ केन्द्र सरकार के एक नामित सदस्य सामिल होही। प्रस्तावित समिति म पंचायत अउ ग्रामीण विकास विभाग के भारसाधक सचिव उपाध्यक्ष अउ विकसित भारत – जीरामजी के आयुक्त सदस्य सचिव होही। समिति के बइठका साल म कम ले कम दू बखत होही। जरूरत पड़े म अध्यक्ष बिसेस बइठका घलो बुला सकही। समिति के प्रमुख सिफारिश मन ल दर्ज करे अउ सार्वजनिक करे के तरीका घलो अध्यक्ष तय करही।
खाद्य आयोग-बैठक
नवा रायपुर म काली छत्तीसगढ़ राज्य खाद्य आयोग के समीक्षा बइठका होइस। आयोग के अध्यक्ष संदीप शर्मा के पगरइति म राखे गे बइठका म राष्ट्रीय खाद्य सुरक्षा अधिनियम म गोठबात करे गीस। ए दउरान ओमन सार्वजनिक वितरण प्रणाली-पीडीएस, पूरक पोषण आहार योजना, प्रधानमंत्री पोषण शक्ति योजना अउ सासकीय आश्रम अउ छात्रावास म रियायती दर म प्रदाय खाद्यान्न योजना के वर्तमान स्थिति के समीक्षा करीन। ए दउरान पात्र हितग्राही तक खाद्यान्न अउ पोषण योजना के लाभ प्रभावी ढंग ले पहुंचाय अउ वितरण व्यवस्था म पारदर्सिता अउ जवाबदेही सुनिश्चित करे उपर जोर दे गीस।
दुर्घटना
छत्तीसगढ़ ले जमशेदपुर जावत एकेच परिवार के तीन झिन लोगन के सड़क हादसा म मउत होगे। उहें, दू झिन लोगन गंभीर रूप ले घायल होगे हे। ए हादसा झारखंड के पश्चिमी सिंहभूम जिला के कुदापी डाउन के तीर ओ बेरा होइस, जब कार अउ ट्रेलर के बीच टक्कर होगीस। टक्कर अतका जोरदरहा रिहीस कि कार के परखच्चा उड़ गे अउ मउका म तीन झिन लोगन के मउत होगे। स्थानीय लोगन मनके मदद ले हादसा म घायल दू झिन लोगन मन ल अस्पताल म भर्ती कराय गेहे।
ऐति, दंतेवाड़ा जिला के सिटी कोतवाली थाना क्षेत्र म काली पर्यटक मन ल ले जावत एक ठिन बस कटेकल्याण रोड म जारम घाट के तीर अनते-तनते होके पलट गे। ए हादसा म दस लोगन घायल होगे हे, जउन मन ल इलाज बर जिला अस्पताल म भर्ती कराय गेहे।
टी-20 क्रिकेट मैच
नवा रायपुर के शहीद वीर नारायण सिंह अंतर्राष्ट्रीय क्रिकेट स्टेडियम म सोलह अक्टूबर ले भारत अउ जिम्बाब्वे के बीच महिला टी-ट्वेंटी क्रिकेट मैच खेले जाही। सीरीज खेले बर दूनों टीम रायपुर पहुंच गेहे। खबर के मुताबिक भारत अउ जिम्बाब्वे के महिला टीम के बीच सोलह, अट्ठारह अउ बीस अक्टूबर के टी-ट्वेंटी क्रिकेट मैच खेले जाही।
हवाई सेवा
बिलासपुर ले कोलकाता के बीच हवाई सेवा पच्चीस अक्टूबर ले एक घांव फेर सुरू होवत हे। ए रूट म हफ्ता म दू दिन सीधा उड़ान के सुविधा मिलही। उहें, बिलासपुर-प्रयागराज फ्लाइट घलो हफ्ता म एक दिन जारी रइही। लंबा बेरा ले एखर मांग करे जात रिहीस। उड़ान सेवा के दुबारा सुरू होय ले यात्री मन ल राहत मिले के उम्मीद हे।
कोंडगांव-जल स्त्रोत सुधार
सेवा संकल्प अभियान म कोंडागांव जिला के कोसा गांव जलाशय म जल स्त्रोत जांच अउ सुधार कार्यक्रम आयोजित करे गीस। ए दउरान जल संसाधन विभाग के अधिकारी मन डहार ले कैचमेंट क्षेत्र, बांध, सीपेज क्षेत्र अउ नगर के तकनीकी निरीक्षण करे गीस। संगेसंग जनभागीदारी ले जलाशय परिसर म साफ-सफाई अउ संरक्षण संबंधी काम करे गीस।