दंतेवाड़ा-राष्ट्रीय पुरस्कार
केन्द्र सरकार के महत्वाकांक्षी प्रधानमंत्री कृषि धन-धान्य योजना के प्रभावी क्रियान्वयन बर दक्षिण बस्तर दंतेवाड़ा जिला ल देसभर म ‘‘सर्वश्रेष्ठ जिला’’ के प्रतिष्ठित राष्ट्रीय पुरस्कार ले सम्मानित करे गेहे। नई दिल्ली म राखे गे राष्ट्रीय कृषि सम्मेलन अउ पुरस्कार वितरण समारोह म केंद्रीय कृषि अउ किसान कल्याण मंत्री शिवराज सिंह चौहान ह दंतेवाड़ा जिला ल ए सम्मान प्रदान करीन। जिला डहार ले कलेक्टर देवेश कुमार धु्रव अउ उप संचालक कृषि सूरज कुमार पंसारी ह ए पुरस्कार ल ग्रहण करीन।
मुख्यमंत्री विष्णुदेव साय अउ कृषि मंत्री रामविचार नेताम ह ए उपलब्धि म अपन खुसी जाहिर करत किसान, जिला प्रसासन अउ कृषि विभाग के अधिकारी-कर्मचारी मन ल बधई दीन हे।
प्रधानमंत्री-युवा संबोधन
प्रधानमंत्री नरेन्द्र मोदी ह किहीन कि भारत के युवा मन म दुनिया के बाढ़त चुनौती के सुघ्घर समाधान देके क्षमता हे। चेन्नई म जयगोपाल गरोड़िया हिन्दू विद्यालय के स्वर्ण जयंती समारोह म ओमन किहीन कि दुनिया आज नवा चुनौती के हल खोजत हे अउ ओमन ल पूरा विश्वास हे कि भारत के युवा मन ह ऐमा अपन बड़े भूमिका निभा सकत हे। प्रधानमंत्री ह किहीन कि ए दौर युवा मनके हे। उंखर नवा-नवा विचार अउ कड़ा मेहनत भारत के संगेसंग दुनिया के भविष्य ल घलो तय करही।
वित्तीय समावेशन
केंद्रीय वित्त मंत्रालय के वित्तीय सेवा विभाग डहार ले वित्तीय समावेसन के प्रमुख योजना के फायदा समाज के आखिरी व्यक्ति तक पहुंचाए के उद्देस्य ले इक्कीस अक्टूबर ले इकतीस दिसंबर तक विसेस संतृप्ति अभियान चलाए जाही। ऐमा जिला के सबों ग्राम पंचायत अउ नगरीय निकाय म विसेस सिविर के आयोजन करे जाही। सिविर म प्रधानमंत्री जन-धन योजना म नवा बैंक खाता खोले के संगेच प्रधानमंत्री जीवन ज्योति बीमा योजना, प्रधानमंत्री सुरक्षा बीमा योजना अउ अटल पेंसन योजना के अंतर्गत पात्र लोगन मनके नामांकन करे जाही।
राष्ट्रीय डाक सप्ताह
भारतीय डाक विभाग डहार ले राष्ट्रीय डाक सप्ताह के तहत आज फिलाटेली दिवस मनाए जावत हे। फिलाटेली दिवस के मउका म छत्तीसगढ़ डाक परिमंडल डहार ले पिक्चर पोस्ट कार्ड जारी करे गीस। छत्तीसगढ़ डाक परिमंडल चीफ पोस्टर मास्टर जनरल प्रणव कुमार ह बतइन कि राष्ट्रीय डाक सप्ताह के तहत डाक परिमंडल के सबों संभागीय कार्यालय म कतकोन कारीकरम आयोजित करे जात हे।
राष्ट्रपति-दौरा
राष्ट्रपति द्रौपदी मुर्मू अवइया बाईस अउ तेईस अक्टूबर के छत्तीसगढ़ दउरा म आही। ए दउरान ओमन ह रायपुर म लोकभवन अउ बूढ़ापारा के बलवीर सिंह जुनेजा इंडोर स्टेडियम म राखे गे कारीकरम म भाग लिही। संगेसंग श्रीमती मुर्मू जगदलपुर म होवइया मुरिया दरबार अउ बस्तर दसहरा के मउका म राखे गे सार्वजनिक कारीकरम म सामिल होही।
राष्ट्रपति के ए दउरा के तियारी ल लेके आज लोकभवन म राज्यपाल के सचिव डाक्टर सी.आर. प्रसन्ना के अध्यक्षता म बइठका होइस। जेमा राष्ट्रपति के दउरा के संबंध म करे जाने वाला बेवस्था के समीक्षा करे गीस अउ अधिकारी मन ल जरूरी निरदेस दे गीस।
आरपीएफ-स्थापना दिवस
रेलवे सुरक्षा बल-आरपीएफ के बयालीसवां स्थापना दिवस समारोह आज रायपुर के रेलवे वर्कसॉप ग्राउंड म आयोजित करे गीस। ए मउका म आयोजित होवइया परेड म आरपीएफ के अनुसासन, साहस, समर्पण अउ परिचालन क्षमता के प्रदर्सन करे गीस। संगेसंग, आधुनिक सुरक्षा तकनीक उपर आधारित प्रदर्सनी के माध्यम ले रेलवे सुरक्षा व्यवस्था ल मजबूत बनाए बर करे जावत तकनीकी नवाचार अउ डिजिटल पहल ल प्रदर्सित करे गीस। समारोह के दउरान आरपीएफ के अधिकारी अउ जवान मन ल उंखर विसिष्ट सेवा, सराहनीय काम अउ उत्कृष्ट योगदान बर प्रतिष्ठित पदक प्रदान करे गीस। ऐमा विसिष्ट सेवा बर तीन ठिन राष्ट्रपति पुलिस पदक, सराहनीय सेवा बर तीस ठिन पुलिस पदक अउ बछर दू हजार चौबीस म एक झिन रेल यात्री के जीवन बचाए खातिर एक जीवन रक्षा पदक सामिल हे। समारोह म आरपीएफ के महानिदेसक सोनाली मिश्रा संघरा रेलवे अउ पुलिस के बड़े अधिकारी मन सामिल होइन। पत्रकार मन ले गोठबात करत सोनाली मिश्रा ह रेलवे सुरक्षा ल लेके करे जावत उपाय के बारे में जानकारी दीन।
आरपीएफ के आने-आने टुकड़ी मन डहार ले मार्चपास्ट निकाले गीस। कारीकरम म दक्षिण पूर्व मध्य रेलवे के महाप्रबंधक तरूण प्रकाश, रायपुर डीआरएम दयानंद संघरा आरपीएफ अउ दूसर विभाग के अधिकारी मन सामिल होइन।
शिक्षक भर्ती-संशोधन
राज्य सरकार के स्कूल सिक्षा विभाग के अंतर्गत सहायक सिक्षक भर्ती – दो हजार छब्बीस के विज्ञापन म जरूरी संसोधन करे गेहे। लोक सिक्षण संचालनालय डहार ले उच्च न्यायालय के निर्णय के परिपालन म सुद्धि पत्र जारी करके दिव्यांग अभ्यर्थी मन बर पात्रता ले जुड़े प्रावधान म बदलाव करे गेहे। ऐमा दृष्टिबाधित, श्रवण बाधित अउ सेरेब्रल पाल्सी श्रेणी के दिव्यांग अभ्यर्थी मन ल घलो ऑनलाइन आवेदन करे के मउका दे जाही। ऑनलाइन आवेदन के तिथि अलग से जारी करे जाही।
संसोधन के अनुसार राज्य के सासकीय साला के ई-संवर्ग अउ टी-संवर्ग म सहायक सिक्षक के रिक्त पद के पूर्ति बर छत्तीसगढ़ कर्मचारी चयन मंडल के वेबसाइट म चौबीस जुलाई के विस्तृत विज्ञापन जारी करे गे रिहीस। भर्ती विज्ञापन के संबंध में उच्च न्यायालय में दायर याचिका म नौ अक्टूबर के पारित निर्णय के अनुपालन म संसोधन करे गेहे। संसोधित विवरण के अनुसार सहायक सिक्षक ई-संवर्ग म सात सौ पंचानवे अउ टी-संवर्ग म एक हजार चार सौ संतानवे पद सामिल हे।
माओवादी आत्मसमर्पण
बीजापुर जिला म आज छह झन माओवादी मन ह पुलिस अधीक्षक के आगू आतमसमर्पण करीन हे। ऐमा चार पीपीसीएम अउ दू पार्टी सदस्य रैंक के माओवादी सामिल हे। ए सबों माओवादी मन उपर पैंतीस लाख रूपिया के इनाम रिहीस। ए माओवादी मन ल सासन के पुनर्वास नीति के तहत आर्थिक सहायता, कौसल विकास प्रसिक्षण, आवास, सिक्षा अउ रोजगार ले जुड़े सुविधा देवाय जाही।
राज्यपाल-खिलाड़ी मुलाकात
छत्तीसगढ़ के आने-आने खेल म राष्ट्रीय अउ अंतर्राष्ट्रीय स्तर म सुघ्घर प्रदर्सन कर प्रदेस के गौरव बढ़इया खिलाड़ी मन ह आज लोकभवन म राज्यपाल रमेन डेका ले भेंट करीन। राज्यपाल ह खिलाड़ी मनके उपलब्धि के तारीफ करत किहीन कि उंखर मेहनत, अनुसासन अउ समर्पण युवा मन बर प्रेरणास्रोत हे।
ए मउका म छत्तीसगढ़ श्रम कल्याण मंडल के उपाध्यक्ष किशोर महानंद, अंतर्राष्ट्रीय खिलाड़ी प्रदीप क्षत्री, लखपति सिंदूर, कैलाश सिक्का, सौपी सिक्का अउ मानसी तांडी संघरा दूसर खिलाड़ी मन मौजूद रिहीन।
ई-बस सेवा
प्रदेस के रायपुर, बिलासपुर, दुर्ग-भिलाई अउ कोरबा म प्रधानमंत्री ई-बस सेवा योजना म दू सौ चालीस इलेक्ट्रिक बस चलाए के दिसा म तेजी ले काम करे जावत हे। इही सिलसिला म काली उप मुख्यमंत्री अउ नगरीय प्रसासन मंत्री अरूण साव के मौजूदगी म चारों नगर निगम अउ चयनित एजेंसी चार्टर्ड स्पीड लिमिटेड के बीच कंसेसन एग्रीमेंट म हस्ताक्षर करे गीस। विभाग ह नवंबर महीना म बिलासपुर अउ भिलाई म बीस-बीस इलेक्ट्रिक बस के संचालन सुरू करे के तियारी हे। उपमुख्यमंत्री ह किहीन कि इलेक्ट्रिक बस ले लोगन ल आधुनिक अउ पर्यावरण अनुकूल सार्वजनिक परिवहन के सुविधा मिलही। एखर ले पारंपरिक ईंधन म निर्भरता अउ ध्वनि प्रदूषण ल कम करे म मदद मिलही।
अउ अब पेस है मौसम के हाल-
दक्षिण-पश्चिम मानसून के छत्तीसगढ़ ले विदाई होगे हवय। मौसम विज्ञानी डाक्टर गायत्री वाणी ह बतइन कि उत्तरी-पश्चिमी बंगाल ले पूर्वी-उत्तरप्रदेस तक द्रोणिका बने हे। जेखर असर से अवइया चौबीस घंटा के दउरान उत्तर छत्तीसगढ़ के कतकोन जघा म हल्की ले मध्यम बरसा हो सकत हे।