मंत्रिपरिषद निर्णय
मुख्यमंत्री विष्णुदेव साय के अध्यक्षता म आज रायपुर म राज्य मंत्रिपरिषद के बइठका होइस। बइठका म मंत्रिपरिषद ह पूर्व अग्निवीर मन बर गृह विभाग म आरक्षण के कुल छत्तीस पद बर उपलब्ध खाली पद के विरूद्ध भर्ती के अनुमति प्रदान करीन। राज्य सासन डहार ले पूर्व अग्निवीर मन बर ए पद म दस प्रतिसत श्रेणीवार आरक्षण कें प्रावधान पहिलीच करे जा चुके हे।
बइठका म मंत्रि परिषद ह छत्तीसगढ़ सासन कार्य आवंटन नियम म संशोधन के प्रस्ताव ल मंजूरी दीन। एखर तहत आदिम जाति विकास विभाग के नाम बदल के जनजातीय कार्य विभाग करे जाही।
मंत्रिपरिषद ह प्रधानमंत्री नरेन्द्र मोदी के सरकार के मुखिया के रूप म पच्चीस बछर पूरा होय म अभिनंदन प्रस्ताव पारित करीन। बइठका के बाद पत्रकार मन ले चर्चा करत मुख्यमंत्री श्री साय ह प्रस्ताव के बारे म जानकारी देवत किहीन कि ए केवल एक उपलब्धि के अवसर नइ हे, बल्कि राष्ट्र प्रथम, जनसेवा, सुशासन, गरीब कल्याण अउ अंत्योदय के सिद्धांत म चले एक असाधारण कर्म यात्रा के ऐतिहासिक पड़ाव हरय।
प्रधानमंत्री धन-धान्य कृषि योजना
प्रधानमंत्री धन-धान्य कृषि योजना के आज एक बछर पूरा होगे हे। ए योजना के सुरूआत पाछु बछर आजे के दिन देस के सौ आकांक्षी कृषि जिला म किसानी ल मजबूत बनाय के उद्देश्य ले करे गे रिहीस। ए योजना के अंतर्गत ग्यारह मंत्रालय अउ विभाग के छत्तीस केन्द्रीय योजना ल एक संग जोड़े गेहे। एखर अलावा राज्य सरकार के योजना अउ निजी क्षेत्र के भागीदारी ल घलो सामिल करे गेहे।
मुख्य सचिव-डिजिटल क्रॉप सर्वे
मुख्य सचिव विकासशील के अध्यक्षता म काली मंत्रालय म डिजिटल क्रॉप सर्वे के प्रगति के समीक्षा बइठका आयोजित करे गीस। बइठका म डिजिटल क्रॉप सर्वे के प्रगति, खसर के जियो रेफरेंसिंग, पॉलीगन निर्माण, फसल के वास्तिविक स्थिति के सत्यापन अउ सर्वे के डेटा के गुणवत्ता सुनिश्चित करे के संबंध म चर्चा करे गीस।
राजस्व सचिव श्म्मी आबिदी ह बतईन कि राज्य म अब तक करीब चौरानवे प्रतिशत डिजिटल क्रॉप सर्वे के काम पूरा होगे हे। मुख्य सचिव ह अधिकारी अउ कलेक्टर मन ल डिजिटल क्रॉप सर्वे के बाचे काम ल दस नवंबर तक पूरा करे के निरदेस दीन। बइठका म मुख्य सचिव ह बतईन कि एक नवंबर ले ग्राम सभा के आयोजन करे जाही। ओमन निरदेस दीन कि ग्राम सभा म डिजिटल क्रॉप सर्वे ले जुड़े प्रकरण के सत्यापन करके ओखर निराकरण करे जाही।
रेलवे-भर्ती विज्ञापन
रेलवे भर्ती बोर्ड ह गैर-तकनीकी श्रेणी म तीन हजार पांच सौ अड़तातीस पद के भर्ती बर विज्ञापन जारी करे हे। एमा मुख्य वाणिज्यिक-सह टिकिट पर्यवेक्षक, मालगाड़ी प्रबंधक, कनिष्ठ लेखा सहायक-सह-टंकक अउ वरिष्ठ क्लर्क-सह-टंकक के पद सामिल हे। ऑनलाइन आवेदन आठ अक्टूबर ले सुरू होगे हे। आवेदन छह नवंबर तक करे जा सकही।
विकल्प शुक्ला-अंतिम संस्कार
आकाशवाणी रायपुर के उप निदेशक समाचार विकल्प रंजन शुक्ला के अंतिम संस्कार आज रायपुर के राजेन्द्र नगर स्थित मुक्तिधाम म करे गीस। अंतिम संस्कार म आकाशवाणी, दूरदर्शन अउ जनसंपर्क विभाग के अधिकारी-कर्मचारी के संग पत्रकारिता ले जुड़े लोगन सामिल होइन। श्री शुक्ला के काली मंझनिया दिल के दौरा पड़े ले निधन होगे रिहीस।
श्री शुक्ला भारतीय सूचना सेवा के बछर उन्नीस सौ तिरानवे बैच के अधिकारी रिहीन। समाचार संचालन अउ रिपोर्टिंग म उंखर अलग योगदान रिहीस। श्री शुक्ला के पहिली नियुक्ति पत्र सूचना कार्यालय दिल्ली म होय रिहीस। ओमन ह दूरदर्शन अउ आकाशवाणी के संग कतकोन मीडिया इकाई म कार्य करीन। ओमन ह सेवा के अंतिम पच्चीस बछर रायपुर म बिताय हे।
संगीत महाविद्यालय
लोककला, संगीत अउ संस्कृतिक विरासत ले बढ़ावा देके उद्देश्य ले नवा रायपुर म सासकीय नवीन संगीत महाविद्यालय के सुभारंभ होइस। समारोह म उच्च सिक्षा मंत्री टंकराम वर्मा मुख्य अतिथि अउ तकनीकी शिक्षा मंत्री गुरू खुशवंत साहेब अध्यक्ष के रूप म सामिल होइन।
बिहान-जैविक प्रमाणीकरण
राष्ट्रीय ग्रामीण आजीविका मिशन ‘बिहान‘ के तहत दंतेवाड़ा म गठित मां दंतेश्वरी महिला किसान उत्पादक कंपनी लिमिटेड ल वनोपज बर राष्ट्रीय जैविक उत्पादन कार्यक्रम के अंतर्गत जैविक प्रमाणीकरण प्राप्त होय हे। ए प्रदेस म राष्ट्रीय आजीविका मिशन के तहत गठित पहिली किसान उत्पादक कंपनी हे, जेला वनोपज बर ए प्रमाणन मिले हे।
मुख्यमंत्री-शक्कर कारखाना
मुख्यमंत्री विष्णुदेव साय ह शक्कर कारखाना म गन्ना के खरीदी चार सौ पच्चीस रूपिया प्रति क्विंटल के दर ले लेके फइसला लेहे। उहें, पेरई बछर दू हजार पच्चीस-छब्बीस म ले गे गन्ना के भुगतान घलो बाढ़े रासि ले करे जाही। ए निर्णय मुख्यमंत्री ह भारतीय किसान संघ, छत्तीसगढ़ के प्रतिनिधिमंडल मन ले भेंट करे के बखत लीस। मुख्यमंत्री ह किहीन कि राज्य सरकार किसान मनके आय बढ़ाय अउ खेती ल लाभकारी बनाय बर आगू हे।
शारदीय नवरात्र
मां शक्ति के आराधना के परब शारदीय नवरात्र आज ले सुरू होगे हे। आज ले लेके नौ दिन तक जम्मों शक्तिपीठ अउ देवी मंदिर मन म मां शक्ति के आने-आने रूप के बिसेस पूजापाठ करे जावत हे। मंदिर मन म आज ले मनोकामना ज्योति कलश जलाय जात हे। ऐति, चउक-चउराहा म बने पंडाल मन म माता के मूर्ति स्थापित करे जात हे।
उपराष्ट्रपति सीपी राधाकृष्णन अउ प्रधानमंत्री नरेन्द्र मोदी ह नवरात्रि म देशवासी मन ल सुभकामना दीन। सोशल मीडिया पोस्ट म प्रधानमंत्री ह आसा व्यक्त करीन कि देवी के अशीर्वाद देसवासी मन म धैर्य अउ आत्मविश्वास के भावना ल प्रेरित करही।
छत्तीसगढ़ के राज्यपाल रमेन डेका अउ मुख्यमंत्री विष्णुदेव साय घलो प्रदेसवासी मन ल नवरात्रि परब के बधाई अउ सुभकामना दीन हे।
इही बेरा डोंगरगढ़ के मां बम्लेश्वरी मंदिर म नवरात्रि मेला के बेरा श्रद्धालु मनके सुविधा बर रेलवे ह बिसेस व्यवस्था करे हे। एखर तहत आज ले बीस अक्टूबर तक कुछेक ट्रेन मनके अस्थायी ठहराव डोंगरगढ़ स्टेसन म दे गेहे।
कृषि विवि-काउंसिलिंग
रायपुर स्थित इंदिरा गांधी कृषि विश्वविद्यालय म बीएससी ऑनर्स कृषि के खाली सीट म प्रवेस बर काउंसिलिंग आयोजित करे जात हे। ऑनलाइन पंजीयन अउ दस्तावेज अपलोड करे के आखिरी तारीख काली बारह अक्टूबर हे। कृषि महाविद्यालय रायपुर म पीएटी पास अभ्यर्थी मनके काउंसिलिंग चौदह अक्टूबर के, छत्तीसगढ़ के मूल निवासी अभ्यर्थी मनके पन्द्रह अक्टूबर अउ आने राज्य के अभ्यर्थी मनके सोलह अक्टूबर के बिहनिया नौ बजे ले होही।
अउ अब थोरकुन समाचार सार म –
– विकसित भारत-जी-रामजी योजना के तहत कोरबा जिला के नोनबिर्री अउ दादरकला ग्राम पंचायत म बालिका सौचालय के निर्माण पूरा कर ले गेहे।
– धमतरी म राखे गे तीन दिवसीय जिला स्तरीय ‘निदान-थ्री‘ विशेष सिविर के आज समापन होइस। सेवा संकल्प अभियान के तहत आयोजित ए सिविर म दिव्यांजन मन ल कृत्रिम अंग, व्हीलचेयर अउ श्रवण यंत्र जइसन उपकरण निःशुल्क दे गीस।
अउ
– रायपुर के दाऊ कल्याण सिंह पोस्ट ग्रेजुएट इंस्टीट्यूट अउ रिसर्च सेंटर म डॉक्टर मनके पन्द्रह रिक्त पद म संविदा भर्ती करे जाही। एखर बर काली बारह अक्टूबर के अधीक्षक कार्यालय म वॉक इन इंटरव्यू आयोजित करे जाही।