मुख्यमंत्री-बैंडमिंटन अकादमी
मुख्यमंत्री विष्णुदेव साय ह किहीन हे कि छत्तीसगढ़ म खेल प्रतिभा मन ल निखारे अउ खिलाड़ी मन ल राष्ट्रीय अउ अंतर्राष्ट्रीय स्तर म तियार करे के उद्देश्य ले विश्व स्तरीय खेल सुविधा के विस्तार करे जावत हे। श्री साय ह ए बात आज रईपुर म सेंध लेक सिटी अउ इलेशियम क्लब्स के संघरा घोषणा अउ अनुबंध हस्ताक्षर समारोह ल संबोधित करत हुए कहिन।
मुख्यमंत्री ह बतईन कि बैंडमिंटन खिलाड़ी अउ प्रसिक्षक पद्म भूषण पुलेला गोपीचंद ह नवा रईपुर म बैडमिंटन अकादमी सुरू करही। एखर ले प्रदेस के खिलाड़ी मन ल आधुनिक सुविधा के संगेसंग उच्च स्तरीय प्रसिक्षण मिल सकही।
मुख्यमंत्री-साइबर जागरूकता
मुख्यमंत्री विष्णुदेव साय ह कहिन हे कि साइबर अपराध ले बचाव बर जन-भागीदारी जरूरी हे अउ साइबर जागरूकता ल जनआंदोलन बनाना होही। रईपुर म साइबर जागृति अभियान अउ ट्रैफिक हैकाथॉन के सम्मान समारोह म ओमन किहीन कि सात हफ्ता के ए अभियान के दउरान एक करोड़ सत्तर लाख लोगन तक जागरूकता के संदेस पहुंचीस। ए दउरान पांच लाख ले जादा कार्यक्रम करे गीस। मुख्यमंत्री ह किहीन कि साइबर जागरूकता अभियान अवइया समय म घलो जारी रइही।
विकल्प शुक्ला-निधन
आकाशवाणी रईपुर के समाचार प्रभाग के उप निदेशक विकल्प रंजन शुक्ला के आज ह्दयघात ले निधन होगे। श्री शुक्ला ह मंझनिया पीठ दरद के सिकायत करीन, जेखर बाद ओमन ल स्थानीय अस्पताल म ले जाय गीस, जिहां डॉक्टर मन तुरते ह्दय रोग के इलाज के परामर्स दीन। एखर बाद रईपुर के एक ठिन निजी अस्पताल म ओमन ल भर्ती कराय गीस। बड़ दुख के बात हे कि डॉक्टर मनके जम्मों परसास के बाद भी श्री शुक्ला ल बचाय नइ जा सकीस। श्री शुक्ला के परिवार म उंखर पत्नी अउ दू झिन बेटी हवय। श्री शुक्ला के अंतिम संस्कार काली बिहनिया दस बजे रईपुर के राजेन्द्र नगर मुक्तिधाम म करे जाही।
भारतीय सूचना सेवा के बछर उन्नीस सौ तिरानवे बैच के अधिकारी श्री शुक्ला ह छत्तीसगढ़ म सार्वजनिक प्रसारण के बड़का स्तंभ रिहीन। समाचार संचालन अउ रिपोर्टिंग म योगदान ह असाधारण रिहीस। श्री शुक्ला के पहिली नियुक्ति पत्र सूचना कार्यालय-पीआईबी दिल्ली म होय रिहीस। ओमन दूरदर्शन अउ आकाशवाणी समेत अब्बड़ अंकन मीडिया इकाई म काम करीन। ओमन भोपाल म घलो अपन सेवा दीन अउ कैरियर के आखिरी पच्चीस बछर ल रईपुर म बितईन। अपन पूरा कैरियर म ओमन सार्वजनिक प्रसारण के बड़का नाम रिहीन। अपन उछाह, सूझ-बूझ अउ मीठ स्वभाव बर चिन्हे जाने वाले श्री शुक्ला ह छत्तीसगढ़ म सरकारी अधिकारी, पत्रकार अउ मीडिया ठउर म जाना-माना अउ सम्मानित अधिकारी रिहीन। आकाशवाणी परिवार ह विकल्प रंजन शुक्ला के सोक संतप्त परिवार बर गहरा दुख जतावत हे।
राज्यपाल रमेन डेका, मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह समेत राजीनीतिक अउ पत्रकारिता जगत ह विकल्प रंजन शुक्ला के निधन म बड़ दुख प्रकट करे हे। राज्यपाल ह अपन सोक संदेस म कहिन हे कि श्री शुक्ला ह आकाशवाणी छत्तीसगढ़ के माध्यम ले प्रादेशिक समाचार अउ समसामयिक कार्यक्रम के संपादन अउ संचालन म जरूरी भूमिका निभईन।
उहंें, मुख्यमंत्री विष्णुदेव साय ह अपन सोक संदेस म किहीन कि श्री शुक्ला के मीडिया अउ जनसंचार के क्षेत्र म लंबा सेवा, ईमानदारी अउ सहज-सरल व्यक्तित्व ह सदा सुरता राखे जाही। ओमन के निधन ह छत्तीसगढ़ के मीडिया जगत बर अइसना क्षति हे, जेन ह भरे नइ जा सकय।
छत्तीसगढ़ विधानसभा के अध्यक्ष डॉक्टर रमन सिंह ह श्री शुक्ला के निधन ल बड़ पीड़ा अउ स्तब्ध करने वाला बतईन।
पूर्व मुख्यमंत्री अउ अखिल भारतीय कांग्रेस कमेटी के महासचिव भूपेश बघेल ह श्री शुक्ला के निधन उपर सोक जतात हुए कहिन हे कि छत्तीसगढ़ के पत्रकारिता म उंखर योगदान ह उल्लेखनीय हवय।
भाजपा के प्रदेस प्रवक्ता संतोष पांडेय ह श्री शुक्ला के निधन ल पत्रकारिता जगत बर अपूरणीय क्षति बताय हे।
रईपुर प्रेस क्लब समेत अब्बड़ अकन साहित्यिक संगठन मन घलो श्री शुक्ला ल श्रद्धांजलि दे हवय।
जिले की चिट्ठी
आकाशवाणी रईपुर के प्रादेशिक समाचार एकांश डहार ले प्रस्तुत कार्यक्रम जिले की चिट्ठी के प्रसारण काली संझा छह बजके पांच मिनट ले छह बजके दस मिनट तक करे जाही। ए कार्यक्रम ल छत्तीसगढ़ के सबो आकाशवाणी केन्द्र एके संग रिले करही। ए दारी के अंक म आपमन ‘‘जांजगीर-चांपा जिला के गतिविधि के बारे म जानकारी सुनिहा।
स्वच्छता अभियान
सूचना अउ प्रसारण मंत्रालय ह दू अक्टूबर ले विशेष स्वच्छता अभियान के छठवां चरण सुरू करे हे। देशभर के छह सौ दस कार्यालय म चलइया ए अभियान के उद्देश्य सरकारी कार्यालय म साफ-सफई बढ़ाय, अटके मामला मन ल कम करे अउ ई-कचरा के सही ढंग ले निपटान करना हे। सूचना और प्रसारण मंत्री अश्विनी वैष्णव ह अधिकारी मन ल निरदेस दीन हे कि अभियान ल मंत्रालय के हर साखा म चलाय जाय अउ एला इकतीस अक्टूबर के बाद घलो सालभर जारी रखय।
प्री-मैट्रिक छात्रावास
बलरामपुर जिला के रामानुजगंज म कृषि मंत्री रामविचार नेताम ह विशेष पिछड़ी पण्डो जनजातीय के विद्यार्थी मन बर तीन ठन प्री-मैट्रिक छात्रावास के उद्घाटन करीन। एमा रामानुजगंज म बालक अउ बालिका छात्रावास अउ डिण्डो म बालक छात्रावास सामिल हे। ए छात्रावास मन ले एक सौ पचास पढ़ईया मन ल पढ़ई के संगेसंग आवासीय सुविधा मिलही। ए मउका कृषि मंत्री ह तेरह आंगनबाड़ी भवन अउ पांच पुलिया के लोकार्पण घलो करीन। संगेसंग आठ ठिन उचित मूल्य सह-गोदाम भवन के भूमिपूजन घलो होइस।
दुर्घटना
रईपुर जिला के खरोरा थाना क्षेत्र म पाछु रतिहा ट्रैक्टर अउ कार के बीच होय टक्कर म एक पुलिसकर्मी समेत दू लोगन के मउका म ही मउत होगे। फेर, एक झिन युवक ह गंभीर रूप ले घायल हे। तीनों युवक तर्रा गांव के रहइया रिहीस। घायल ल कार ले निकाल के अस्पताल पहुंचाय गीस। उहें, हादसा के बाद ट्रैक्टर चालक ह फरार हे।
बस्तर दशहरा
पचहत्तर दिन तक चलइया विश्व प्रसिद्ध बस्तर दशहरा के आज संझा काछन गादी के रसम निभाय जावत हे। ए रसम म जगदलपुर म भंगाराम चौक के काछनगुढ़ी मंदिर के आगू राजपरिवार के सदस्य कमलचंद भंजदेव अउ मां दंतेश्वरी मंदिर के पुजारी ह जुन्ना रियासत कालीन रीति अनुसार विधि-विधान ले पूजापाठ के बाद नोनी लइका ले बस्तर दसहरा मनाय बर आसीष लीहीं।
स्क्वैश चैंपियनशिप
छत्तीसगढ़ रक्वैश एसोसिएशन ह राजधानी रईपुर के बूढ़ापारा म रक्वैश कॉम्प्लेक्स म काली ग्यारह अक्टूबर ले तेरह अक्टूबर तक राज्य स्तरीय जूनियर अउ सब जूनियर स्क्वैश चैंपियनशिप के आयोजन करही। तीन दिनी ए प्रतियोगिता म छत्तीसगढ़ के आने-आने जिला के जुरही। प्रतियोगिता दस आयु वर्ग म होही।
शारदीय नवरात्र
मां शक्ति के आराधना के परब शारदीय नवरात्र काली ले सुरू होही। काली ले नौ दिन तक सबो शक्तिपीठ अउ देवी मंदिर म माता के आने-आने रूप ले बिसेस पूजा-अर्चना करे जाही। मंदिर मन म घट स्थापना के संगेसंग मनोकामना जोत कलश जलाय जाही। उहें, चउक-चउक के पंडाल मन म देवी के मूर्ति घलो स्थापित करे जाही। इही बीच, नवरात्र परब के दउरान डोंगरगढ़ के मां बम्लेश्वरी के दर्सन बर जवइया पदयात्री मनके अवई-जवई बर खास व्यवस्था करे गेहे।