केन्द्रीय मत्स्य पालन, पशुपालन अउ डेयरी राज्यमंत्री डाॅक्टर संजीव कुमार बालयान ह केन्द्र सरकार डहार ले पारित करे गे कृषि संसोधन विधेयक ल किसान अउ खेती-किसानी बर फायदा के बताय हे। आज रायपुर म आयोजित एक पत्रकारवार्ता म श्री बालयान ह किहीन कि किसान मन ल अधिकार हे कि ओमन अपन उत्पादन देस के कोन्हों भी भाग म बेच सकथे। ए विधेयक मनके संबंध फसल के न्यूनतम समर्थन मूल्य अउ मंडी मन ल बंद करे ले नइ हे। श्री बालयान ह किहीन कि सबो फसल के न्यूनतम समर्थन मूल्य म खरीदी मंडी मन म जारी रही। ए विधेयक ले किसान मन ल इंस्पेक्टर राज ले मुक्ति मिलही।
छत्तीसगढ़ के गोठ करत श्री बालयान ह किहीन कि प्रदेस के मुख्यमंत्री भूपेश बघेल समर्थन मूल्य म धान के खरीदी जल्दी सुरू करे। ओमन किहीन कि कृषि विधेयक मन म किसान मन ल तीन दिन के भीतर बेचे गे फसल के भुगतान करे के प्रावधान हे।
मुख्यमंत्री-समीक्षा
मुख्यमंत्री भूपेश बघेल ह किहीन कि महिला मनके खिलाफ होवइया अपराध के मामला म लापरवाही करइया अधिकारी अउ कर्मचारी मनके खिलाफ सख्त कार्रवाई करे जाही। मुख्यमंत्री ह आज रायपुर स्थित अपन निवास कार्यालय म गृह विभाग के कामकाज के समीक्षा करीन।
बैठक म मुख्यमंत्री ह पुलिस महानिदेशक ले किहीन कि महिला अपराध मनके रोकथाम बर राज्य स्तर म सरलग माॅनिटरिंग अउ समीक्षा करे जाय। एखर बर एस.ओ.पी. बनाय जाय अउ पुलिस मुख्यालय महिला मनके खिलाफ होवइया अपराध के सीधा समीक्षा करें। ओमन किहीन कि सबो जिला म ए अपराध के रोकथाम बर विशेष जांच दल घलो गठित करे जाय। मुख्यमंत्री ह बैठक म सियान मनके सहयोग बर सुरू होवइया समर्पण अभियान बर घलो अपन सहमति दीन हे।
बैठक म बताय गीस कि प्रदेश म डायल-112 के माध्यम ले लगभग 14 लाख जरूरतमंद नागरिक मन ल पुलिस अउ चिकित्सा सुविधा उपलब्ध कराय गेहे।
एखर पहिली, मुख्यमंत्री ह महिला संबंधी अपराध के विवेचना म लापरवाही बरतइया वाड्रफनगर के एस.डी.ओ.पी. धु्रर्वेश जायसवाल अउ रघुनाथ नगर के थाना प्रभारी जाॅन प्रदीप लकड़ा ल तत्काल प्रभाव ले निलंबित कर दीस।
रेलवे-विशेष रेलगाड़ी
रेल मंत्रालय ह तिहार मनके बेरा होवइया भीड़-भाड़ ल देखत 196 जोड़ी त्यौहार विशेष रेलगाड़ी चलाय के फइसला लेहे। ए विशेष रेलगाड़ी इही महीना के 20 तारीख ले 30 नवंबर के बीच चलाय जाही। रेल मंत्रालय ह किहीस कि ए तिहार विशेष रेलगाड़ी मनके किराया विशेष रेलागाड़ी मनके किराया के बराबर होही। रेल मंत्रालय ह किहीन कि आंचलिक रेलवे अइसन रेलगाड़ी के समय-सारिणी पहिली ले अधिसूचित करही। त्यौहार विशेष रेलगाड़ी मन ले कुछु के संचालन रोज होही अउ कुछु रेलगाड़ी मनके संचालन सप्ताह के निर्धारित दिन म होही।
जेईई-एडवांस
इंजीनियरिंग काॅलेज मन म भर्ती बर जे.ई.ई. एडवांस परीक्षा-2020 म जउन उम्मीदवार कोरोना संक्रमित होय के सेती सामिल नइ हो पाय रिहीस, ओमन अवइया साल म एमा फिर से सामिल हो सकथे।
भारतीय प्रौद्योगिकी संस्थान मनके संयुक्त प्रवेश बोर्ड ह काली एक ठिन बैठक म कोविड ग्रस्त होय म भर्ती परीक्षा म सामिल नइ होवइया उम्मीदवार मन ल एक दरी अउ परीक्षा दे बर मौका देके फइसला लेहे। संयुक्त प्रवेश बोर्ड ह यहू निर्णय लेहे कि ए उम्मीदवार मन ल जेईई मुख्य परीक्षा-2021 पास करे बर नइ पड़े अउ ओमन ल 2020 के जे.ई.ई. एडवांस परीक्षा बर सफल पंजीयन के आधार म ही 2021 के जे.ई.ई. एडवांस म सोझे सामिल होय के अनुमति होही।
मतदाता पुनरीक्षण कार्यक्रम
भारत निर्वाचन आयोग के निर्देश के अनुसार छत्तीसगढ़ म विशेष संक्षिप्त मतदाता पुनरीक्षण कार्यक्रम सुरू करे गेहे। मुख्य निर्वाचन पदाधिकारी रीना बाबा साहेब कंगाले ह बतईन कि मतदाता सूची के पुनरीक्षण 01 जनवरी 2021 के स्थिति म कराय जात हे। ए सूची के अंतिम प्रकाशन 15 जनवरी 2021 तक कराय जाही। ए कार्यक्रम के तहत अइसे युवा मतदाता जिखर उमर 01 जनवरी 2021 तक 18 बछर के हो जही, ओमन ए मतदाता सूची म अपन नाव जोड़ा सकथे। एखर बर युवा मतदाता भारत निर्वाचन आयोग के वेबसाइट ‘‘नेशनल वोटर सर्विस पोर्टल‘‘ म आॅनलाईन आवेदन कर सकथे।
जारी कार्यक्रम के अनुसार 16 नवंबर विस्तृत मतदाता सूची के प्रकाशन करे जाही। एखर बाद 16 नवंबर ले 15 दिसंबर के बीच दावा आपत्ति प्रस्तुत करे जा सकथे।
कोरोना समाचार
कोरोना संक्रमण काल म रायपुर जिला के होम आइसोलेशन सिस्टम दूसर जिला मन बर उदाहरण साबित होवत हे। जिला म अब तक 12 हजार 171 मरीज होम आइसोलेशन के समय पूरा करके स्वस्थ होगे हे। जिला के ए.डी.एम. विनीत नंदनवार के निर्देश म रायपुर जिला कलेक्ट्रेट म होम आइसोलेशन कंट्रोल रूम बनाय गेहे, जउन चैबीस घंटा संचालित रहिथे। बिना लक्षण वाले मरीज मनके रिपोर्ट पाॅजिटिव आय के बाद ओमन ल होम आइसोलेशन ऐप के माध्यम ले आॅनलाइन फाॅर्म भरे के बाद नोडल अधिकारी मनके माध्यम ले घर तक दवाई पहुंचाय जात हे। एखर बाद काउंसलर ह मरीज मन ल समय-समय म फोन करत रहिथे अउ उंखर सेहत के जानकारी लेथे। तबीयत ज्यादा खराब होय म ए मरीज मन ल कोविड केयर सेंटर म भर्ती कराय जाथे।
अइसने, राजनांदगांव जिला म बिना लक्षण के मरीज मनके संख्या ल बाढ़त देख के होम आइसोलेशन म मरीज मनके उपचार के व्यवस्था कराय जात हे। एखर बर जिला स्तरीय कंट्रोल रूम दिग्विजय स्टेडियम म बनाय गेहे।
रजनी रजक-कोरोना सावधानी अपील
इही बीच, छत्तीसगढ़ के प्रसिद्ध लोकगायिका अउ नारी शक्ति सम्मान ले सम्मानित रजनी रजक ह लोगन मन ले कोरोना संक्रमण ले बचाव बर जरूरी सावधानी बरते के अपील करे हे।
व्यवहार न्यायाधीश-मुख्य परीक्षा
छत्तीसगढ़ लोक सेवा आयोग डहार ले आयोजित करे गे व्यवहार न्यायाधीश मुख्य परीक्षा-2019 के अंतर्गत होय लिखित परीक्षा के परिणाम घोषित कर दे गेहे। लिखित परीक्षा परिणाम आयोग के वेबसाइट डब्ल्यू.डब्ल्यू.डब्ल्यू. डाॅट पीएससी डाॅट सीजी डाॅट जीओवी डाॅट इन म देखे जा सकथे।
लोक सेवा आयोग ले मिले जानकारी के अनुसार व्यवहार न्यायाधीश के 39 पद बर 21 सितंबर 2020 के मुख्य परीक्षा आयोजित करे गे रिहीस। मुख्य परीक्षा के आधार म साक्षात्कार बर 127 अभ्यर्थी मनके चयन होय रिहीस। साक्षात्कार के तिथि अलग से घोषित करे जाही।
संक्षिप्त समाचार
अउ अब थोरकुन समाचार सार म-
– राजभवन म आज होवइया गृह विभाग के बैठक स्थगित कर दे गीस। गृहमंत्री ताम्रध्वज साहू के क्वारेंटीन होय के सेती बइठका स्थगित करे गीस।
– महासमुंद जिला के बसना विकासखंड म पुलिस ह आईपीएल क्रिकेट मैच म सट्टा खेलाय के आरोप म आठ लोगन मन ल गिरफ्तार करे हे। इंखर मन करा ले करीबन साढ़े आठ लाख रूपिया के सट्टा-पट्टी अउ दस मोबाइल जब्त करे गेहे।
– रायगढ़ जिला के भूपदेवपुर थाना क्षेत्र म मांड नदी म रेती के अवैध खनन करे के मामला म पुलिस ह ग्यारह वाहन मन ल जब्त करे हे।
अउ
– जांजगीर-चांपा जिला के सक्ती थाना क्षेत्र म पुलिस ह चोरी के तीन मोटर साइकिल के संग छह आरोपी मन ल गिरफ्तार करे हे।