प्रधानमंत्री-इंडिया मोबाइल कांग्रेस
प्रधानमंत्री नरेन्द्र मोदी आज नई दिल्ली म इंडिया मोबाइल कांग्रेस के दसवां संस्करण के उद्घाटन करीन। ए बेरा म प्रधानमंत्री ह कहिन कि इंडिया मोबाइल कांग्रेस मंच ह भारत म दूरसंचार क्षेत्र अउ डिजिटल कनेक्टिविटी के विकास ल देखे हे। ओमन कहिन कि आज फाइव-जी कनेक्टिविटी देस के हर जिला म पहुंच चुके हे। एखर संचालन बर आज पांच लाख पचास हजार ले जादा बेस स्टेसन हे। श्री मोदी ह कहिन कि सरकार लगभग पच्चीस करोड़ पढ़ईया लइका मन ल आने-आने डिजिटल अउ ऑनलाइन सिक्षा मंच ले जोड़े के प्रयास करत हे।
सहकार से समृद्धि वर्कशॉप
जगदलपुर म आज ले ‘‘सहकार से समृद्धि‘‘ राष्ट्रीय वर्कशॉप के सुरूआत होइस। केन्द्रीय सहकारिता मंत्रालय डहार ले आयोजित दू दिवसीय ए सम्मेलन ल संबोधित करत हुए केन्द्रीय सहकारिता विभाग के सचिव डॉक्टर आशीष कुमार भूटानी ह कहिन कि सहकारिता के सार्थकता तभे सिद्ध होही, जब एखर प्रभाव जमीनी स्तर म आखिरी छोर तक दिखाई दीही। ओमन ह देसभर म दू लाख नवा बहुउद्देशीय प्राथमिक कृषि साख समिति-पैक्स के स्थापना, उंखर डिजिटलीकरण, कॉमन सर्विस सेंटर के रूप म बदलाव अउ विश्व के सबले बड़का अनाज भंडारण योजना ल सरलग लागू करे के जरूरत बतईन। संगेसंग ओमन ह नाबार्ड एन.सी.डी.सी. अउ एन.डी.डी.बी. जइसन बड़का संस्था के सहयोग ले पैक्स के विविधिकरण इलेक्ट्रिक मोबिलिटी जइसन आधुनिक क्षेत्र म नवा अवसर तलासे अउ सहकारी बैंक के व्यवस्था के पारदर्सी अउ अच्छा वित्तीय प्रबंधन बर जोर दीन।
ए सम्मेलन म छत्तीसगढ़ के मुख्य सचिव विकासशील वर्चुअली जुड़ीन। ओमन ह बतईन कि छत्तीसगढ़ म अब तक पांच सौ ले जादा नवा बहुउद्देशीय प्राथमिक कृषि साख समिति के गठन हो चुके हे। डेयरी, मछली पालन अउ लघु वनोपज के क्षेत्र म घलो इही तर्ज म काम करे जावत हे।
महतारी वंदन योजना
मुख्यमंत्री विष्णुदेव साय ह आज दुर्ग म होय ‘‘सेवा सेतु‘‘ कार्यक्रम म महतारी वंदन योजना के बत्तीसवां किश्त के रूप म प्रदेस के सड़सठ लाख ले जादा माईलोगिन मनके खाता म छह सौ बत्तीस करोड़ रूपिया ले जादा के रासि अंतरित करीन। कार्यक्रम म मुख्यमंत्री ह आने-आने योजना के हितग्राही मन ल चेक, प्रमाण पत्र, प्रधानमंत्री आवास के चाबी अउ आयुष्मान कार्ड प्रदान करीन। ए बेरा म दुर्ग जिला म आने-आने विकास काम के लोकार्पण अउ सिलान्यास करे गीस।
नाना पाटेकर-निधन
बॉलीबुड के दिग्गज अभिनेता पाटेकर के आज बिहनिया गोवा स्थित उंखर घर म दिल के दौरा पड़े ले पचहत्तर बछर के उमर म निधन होगीस। नाना पाटेकर हिन्दी अउ मराठी सिनेमा के जाने-माने अभिनेता म सामिल रिहीन।
प्रधानमंत्री नरेन्द्र मोदी ह नाना पाटेकर के निधन म दुख जतावत हुए सोसल मीडिया पोस्ट म कहिन कि बहुत कम कलाकार म ओ गहराई, अलग पहिचान अउ दमदार मौजूदगी रहिथे, जेन नाना पाटेकर म रिहीस। श्री मोदी ह कहिन कि श्री पाटेकर ह हर किरदार म अपन अलग पहिचान बनाय हे, जेला कतकोन पीढ़ी तक याद राखे जाही।
मतदाता-विशेष अभियान
छत्तीसगढ़ म छूट हुए मतदाता मनके सत्यापन अउ पहिली घांव अउ युवा मतदाता के नामांकन बर विशेष अभियान जारी हे। भारत निर्वाचन आयोग के निरदेस म बूथ लेवल अधिकारी घर-घर म जाके मतदाता मनके सत्यापन करत हे। पात्र पाय जाय म फॉर्म-छह के जरिया ले नामांकन के सुविधा दे जाही। एखर बर बूथ स्तर म विशेष शिविर घलो लगाय जाही। रैन बसेरा, मजदूर कॉलोनी, बेघर अउ छूटे लोगन मन बर घलो सिविर कराय जाही। कक्षा नौवीं ले बारहवीं तक के लइका मन बर सिक्षा संस्थान म इलेक्टोरल लिटरेसी क्लब के जरिया ले नवा मतदाता मनके पंजीयन के काम करे जात हे। पात्र मनखे ई.सी.आई. नेट मोबाइल ऐप, मतदाता सेवा पोर्टल या अपन बीएलओ के जरिया ले आवेदन कर सकत हे। सहायता बर टोल फ्री नंबर – एक नौ पांच सून्य म संपर्क करे जा सकत हे।
मुख्यमंत्री-सेवा के रंग
मुख्यमंत्री विष्णुदेव साय ह कहिन हे कि प्रधानमंत्री नरेन्द्र मोदी के सार्वजनिक जीवन के पच्चीस बछर सेवा, सुशासन अउ जनकल्याण ल समर्पित रेहे हे। श्री साय काली रायपुर म ‘‘सेवा के रंग, राष्ट्र के संग‘‘ समारोह म सामिल होइन। ए बेरा म ‘‘नमो सेवा गाथा‘‘ लाइट अउ साउंड सो के जरिया ले प्रधानमंत्री के जीवन यात्रा देखाय गीस। मुख्यमंत्री ह कहिन कि विकसित भारत के संग विकसित छत्तीसगढ़ के निर्माण म हरेक मनखे के भागीदारी जरूरी हे।
विशेष कार्यक्रम
आकाशवाणी केन्द्र, रायपुर डहार ले ‘‘जन सेवा से देश सेवा‘‘ के तहत विशेष कार्यक्रम के श्रृंखला प्रसारित करे जावत हे। इही कड़ी म आज संझा सात बजे ‘‘वन डिस्ट्रिक्ट वन प्रोडक्ट‘‘ म उद्योग संचालनालय के सहायक संचालक कुमुद मिश्रा ले लेगे भेंटवार्ता के प्रसारण करे जाही। ए कार्यक्रम ल छत्तीसगढ़ स्थित आकाशवाणी के सबो केन्द्र रिले करही।
भूमि उपयोग-नियम
छत्तीसगढ़ सरकार ह जमीन उपयोग यानी लैंड यूज ले जुड़े उन्नीस सौ चौरासी के पुराना नियम म बदलाव करे हे। नवा नियम ल राजपत्र म प्रकासित कर दे गेहे। एखर उद्देश्य जमीन उपयोग के प्रक्रिया ल जादा सरल, स्पष्ट अउ लचीला बनाना हे। संसोधित नियम म आने-आने प्रकार के जमीन के उपयोग बर कामकाज ल देखाय गेहे।
हत्या-फांसी सजा
सूरजपुर म फास्ट ट्रैक कोर्ट ह आज मां-बेटी के हत्या के मामला म तीन दोसी मन ल फांसी के सजा सुनाय हे। उहें, एक आने आरोपी ल उम्रकैद के सजा सुनाय गेहे। मामला के सुनवाई न्यायाधीश आनंद प्रकाश वारियाल के फास्ट ट्रैक कोर्ट म होइस। ए मामला दू अक्टूबर दू हजार चौबीस के हे। आरोपी मन ह पुलिस विभाग म पदस्थ हेड कॉन्टेबल के पत्नी अउ बेटी के हत्या कर दे रिहीन।
केमिकल फैक्ट्री-आग
भिलाई के औद्योगिक क्षेत्र म आज बिहनिया एक केमिकल फैक्ट्री म भीषण आग लग गीस। आग के चपेट म केमिकल ले भरे पचास ले जादा ड्रम अउ दू टैंकर आग गीस। जानबा के अनुसार फैक्ट्री परिसर म वेल्डिंग के काम चलत रिहीस। इही दउरान निकले चिंगारी के केमिकल के संपर्क म आय ले आग लगे के बात कहे जात हे। करीब पांच फायर ब्रिगेड गाड़ी के मदद ले आगी म काबू पाय के प्रयास करे जात हे।
महिला-टी-20 मैच
नवा रायपुर के शहीद वीरनारायण सिंह अंतर्राष्ट्रीय क्रिकेट स्टेडियम म भारत अउ जिम्बाव्वे के महिला टीम के बीच सोलह, अट्ठारह अउ बीस अक्टूबर के तीन मैच के टी-टवेंटी सीरीज खेले जाही। सीरीज बर प्रसासन ह सुरक्षा, ट्रैफिक, पार्किंग, बिजली, स्वास्थ्य अउ दर्सक मनके सुविधा ल लेके तैयारी पूरा कर लेहे। मुख्य सचिव विकासशील के अध्यक्षता म काली होय उच्च स्तरीय बइठका म मैच के व्यवस्था के समीक्षा करे गीस।
मुख्यमंत्री-तेलीबांधा चौक
मुख्यमंत्री विष्णुदेव साय ह स्पष्ट करे हे कि रायपुर के तेलीबांधा चउक के नाव नइ बदले जावत हे। मुख्यमंत्री ह मीडिया ले चर्चा करत हुए कहिन कि प्रदेस म अड़तीस जघा म ‘‘सेवा ज्योति संकल्प चौक‘‘ विकसित करे जाय के घोषणा करे गेहे। एमा रायपुर के तेलीबांधा चउक घलो सामिल हे। ओमन ह कहिन कि एला लेके कोनों भी भ्रम म नइ रहना चाही। तेलीबांधा चउक के नाव उही रइही। एला केवल ‘‘सेवा ज्योति संकल्प‘‘ के भावना जइसन बनाय जाही
धमकी पर्चा-आरोपी गिरफ्तार
बीजापुर जिला म पुलिस ह मुरदंडा पंचायत के सरपंच, उप सरपंच अउ एक मनखे ल धमकी देवइया परचा फेंके के मामला म दू आरोपी मन ल गिरफ्तार करे हे। पुलिस के अनुसार सात अक्टूबर के मुरदंडा गांव म सात धमकी भरे परचा मिले रिहीस। जांच म आगू अईस कि संदीप मड़कम अउ नागेश बोड़के ह माओवाद के आड़ म डर के माहौल बनाय के उद्देश्य ले ए परचा तियार करके रद्दा म फेंके रिहीन। दूनों के खिलाफ संबंधित धारा म कार्रवाई करे गेहे।
ट्रेन-परिचालन
मध्य रेलवे के मंुबई मंडल म कसारा स्टेसन तीर तीसरइया लाइन परियोजना अउ तकनीकी काम बर ट्रैफिक अउ पावर ब्लॉक ले गेहे। एखर कारण दक्षिण पूर्व मध्य रेलवे ले जुड़े कुछ ट्रेन के अवई-जवई प्रभावित रइही। सोलह अक्टूबर के हावड़ा ले चलइया गीतांजली एक्सप्रेस दूसर रद्दा ले जलगांव, नंदुरबार, वसई रोड अउ ठाणे होवत सीएसएमटी पहुंचही। चौदह ले बाईस अक्टूबर के बीच कुछ ट्रेन देरी ले निकलही।
इही बीच, यात्री मनके सुविधा बर हटिया-लोकमान्य तिलक टर्मिनस तीर तीन फेरा के पूजा स्पेशल ट्रेन घलो चलाय जाही। ए ट्रेन रायगढ़, बिलासपुर, रायपुर, दुर्ग अउ गोंदिया म रूकही।
निकाय चुनाव-समीक्षा
राज्य निर्वाचन आयोग डहार ले नगर पालिका अउ त्रिस्तरीय पंचायत के आम अउ उपचुनाव के संबंध म निर्वाचक नामावली पुनरीक्षण कार्यक्रम जारी करे गेहे। राज्य निर्वाचन आयुक्त अजय सिंह ह आज रायपुर म आयोजित बइठका म सामान्य प्रशासन, नगरीय प्रशासन, विकास, पंचायत अउ ग्रामीण विकास विभाग के खाली पद, आरक्षण अउ परिसीमन के जानबा लीन। संगेसंग निर्वाचन बर जरूरी कामकाज के समीक्षा करीन।
बइठका म बताय गीस कि सारंगढ़-बिलाईगढ़, कोरिया अउ कोंडागांव जिला के नौ ग्राम पंचायत म सरपंच अउ एक सौ छब्बीस पंच के पद म आम चुनई होना हे। उहें, जनपद पंचायत सदस्य के एक, सरपंच के बयानवे अउ पंच के सात सौ इक्कीस पद बर उपचुनाव कराय जाही।
उहें, नगरीय निकाय चुनई के तहत पन्द्रह नगरीय निकाय – जेमा भिलाई-चरौदा, रिसाली, जामुल, बिरगांव, तमनार अउ बड़े करेली घलो सामिल हे। इहां आम चुनई होही। एखर संग बिलाईगढ़ नगर पंचायत म अध्यक्ष पद बर अउ आने-आने निकाय के छह वार्ड म पार्षद के उपचुनाव घलो होही। आयोग डहार ले निर्वाचक नामावली के आखिरी प्रकासन तीस नंवबर के करे जाही।