पीएम विकसित भारत संकल्प सभा

प्रधानमंत्री नरेंद्र मोदी ह कीहिन हे कि जनता के भरोसा अउ करोड़ो पार्टी कार्यकर्ता मनके समर्पण उंखर बर सबले बड़े ताकत रेहे हे। नई दिल्ली म आज विकसित भारत संकल्प सभा म श्री मोदी ह कहिन कि ओमन आज बीहनिया श्री विनायक मंदिर जाके देश अउ एक सौ चालीस करोड़ जनता के सुख-समृद्वि बर मानता मानीन। प्रधानमंत्री ह कहिन कि पचीस बछर म जनता ले मिले भरोसा अउ ये दउरान हासिल अनुभव उंखर सबले बड़े पूंजी हरय। ओमन कीहिन कि भारत अब अपन बाढ़त ताकत अउ चुनौती ले निपटे के क्षमता बर चर्चा म हवय। प्रधानमंत्री ह कहिन कि आज देश अपन चुनौति के स्थायी समाधान खोजत हे।

ए मउका म भारतीय जनता पार्टी के राष्ट्रीय अध्यक्ष नितिन नबीन ह किहीन कि प्रधानमंत्री नरेन्द्र मोदी ह समाज के सबले गरीब अउ वंचित वरग के कल्याण ल अपन प्राथमिकता म सबले उपर राखीन।

उपराष्ट्रपति सी.पी. राधाकृष्णन ह सोशल मीडिया पोस्ट म कहिन कि प्रधामंत्री श्री मोदी ह समावेशी विकास के सोच ल देशव्यापी अभियान म बदल देहे। उंहे केंद्रीय गृहमंत्री अमित शाह, रक्षामंत्री राजनाथ सिंह, अउ लोकसभा अध्यक्ष ओम बिरला ह प्रधानमंत्री ल जनसेवा के पचीस बछर पूरा करे म बधई दीन हे।

सेवा ज्योति यात्रा

प्रधानमंत्री नरेंद्र मोदी के जनसेवा अउ सुशासन के पचीस बछर पूरा होय म आज छत्तीसगढ़ म भारतीय जनता पार्टी के सबो सांगठनिक जिला म एक संघरा सेवा ज्योति यात्रा निकाले गीस। मुख्यमंत्री विष्णुदेव साय रायपुर के इंदिरा गांधी कृषि विश्व विद्यालय के कृषि मंडपम ले सेवा ज्योति यात्रा अउ विकसित भारत संकल्प सभा कार्यक्रम म संघरीन। ए मउका म मुख्यमंत्री ह प्रदेश के जिला मुख्यालय समेत अड़तीस ठिन जगा म सेवा ज्योति संकल्प चौक बनाय के घोषणा करीन। ओमन रायपुर के तेलीबांधा चौक ल घलो सेवा ज्योति संकल्प चौक के रूप म विकसित करे के बात कहिन। श्री साय ह कहिन कि ये संकल्प चौक जनसेवा राष्ट्रनिर्माण अउ विकसित भारत के संकल्प के प्रतीक बनही।

कार्यक्रम म मुख्यमंत्री जन प्रतिनिधि अउ नागरिक मन ल विकसित भारत अउ विकसित छत्तीसगढ़ के निर्माण म अपन भागीदारी निभाय के संकल्प देवाय गीस। एखर बाद ओमन हाथ म मशाल लेके सेवा ज्योति यात्रा के अगवई करीन अउ बाईक रैली ल हरियर झंडी देखाके रवाना करीन।

कार्यक्रम म बोलत मुख्यमंत्री ह कहिन कि मुख्यमंत्री अउ प्रधानमंत्री के रूप म नरेंद्र मोदी के सरलग सेवाकाल के आज पचीस बछर पूरा होवत हे। ये पचीस बछर के यात्रा जनसेवा सुशासन विकास अउ राष्ट्रहित बर समर्पण के यात्रा हे।

रोजगार-मेला

सेवा संकल्प अभियान म रईपुर म आज ले दू दिवसीय राज्य स्तरीय रोजगार मेला लगाय जात हे। रोजगार विभाग कोति बलबीर सिंह जूनेजा इंडोर स्टेडियम म लगे ए मेला के मुख्य कार्यक्रम काली आठ अक्टूबर के बिहनिया दस बजे ले सुरू होही। ए कार्यक्रम म मुख्यमंत्री विष्णुदेव साय माईपहुना होही। उहें, विधानसभा अध्यक्ष डॉक्टर रमन सिंह अगुवई करही। रोजगार मेला ले प्रदेस के युवा मन ल रोजगार के जानकारी मिलही अउ योग्यता अउ कौशल के मुताबिक एमा ओमन ल मउका घलो मिलही।

मुख्यमंत्री-सिंगापुर प्रवास

मुख्यमंत्री विष्णुदेव साय अपन तीन दिन के सिंगापुर दउरा के बाद आज भिन्सरहा रईपुर लहुट अईन हे। माना विमानतल म पत्रकार मन ले गोठबात करत मुख्यमंत्री ह बतईन कि अपन दउरा के दउरान ओमन निवेसक मन ल छत्तीसगढ़ आय के नेवता दीन हे। उहें, कतकोन निवेसक मन ह प्रदेस म उद्योग लगाय बर अपन मंसा जतईन।

एखर पहिली काली सिंगापुर यात्रा के आखिरी दिन मुख्यमंत्री के अगुवई म कौसल विकास अउ निवेस के क्षेत्र म कई ठिन महत्ता के समझौता करे गीस। मुख्यमंत्री ह पन्द्रह ले जादा वैश्विक कंपनी के प्रतिनिधि मन ले निवेस के संभावना उपर गोठबात करीन। ए दउरा के दउरान छत्तीसगढ़ ल मिले एफडीआई निवेस प्रस्ताव के रकम तिरालीस हजार छह सौ करोड़ रूपिया तक पहुंच गेहे।

विशेष कार्यक्रम

आकाशवाणी केन्द्र, रईपुर कोति ले ‘‘जन सेवा से देस सेवा‘‘ म बिसेस कार्यक्रम के श्रृंखला प्रसारित करे जात हे। इही कड़ी म आज संझा सात बजे नीम कोटेड यूरिया म इंदिरा गांधी कृषि विश्वविद्यालय के प्रोफेसर डॉक्टर ललित श्रीवास्तव ले लेगे भेंटवार्ता के प्रसारण करे जाही। ए कार्यक्रम ल छत्तीसगढ़ स्थित आकाशवाणी के सबो केन्द्र रिले करही।

सहकारिता सम्मेलन

जगदलपुर म काली अउ परन दिन आठ अउ नौ अक्टूबर के राष्ट्रीय सहकारिता सम्मेलन आयोजित करे जाही। केन्द्रीय सहकारिता मंत्रालय कोति ले राखे गे सम्मेलन म पन्द्रह राज्य के सहकारिता सचिव अउ चौदह ठिन राज्य के पंजीयक भाग लीही। सम्मेलन के अगुवई केन्द्रीय सहकारिता विभाग के सचिव आशीष कुमार भूटानी करही।

सम्मेलन म बहुउद्देशीय प्राथमिक कृषि साख समिति अउ दुग्ध सहकारी समिति के गठन, समिति के कम्प्यूटरीकरण, डिजिटल सेवा, भंडारण क्षमता बढ़ाय अउ सहकारी बैंकिंग ल मजबूत करे उपर गोठबात होही।

वीबीजी रामजी कार्य

केंद्र सरकार ह विकसित भारत रोजगार अउ आजीविका गारंटी मिशन ग्रामीण अधिनियम म काम के सूची अधिसूचित कर देहे। नवा ग्रामीण कार्य ढंाचा म कुल तीन सौ पचहत्तर काम ल अनुमत करे गेहे। ग्रामीण विकास मंत्रालय ह बताय हे कि नवा सूची म पहिली के ढंाचा म सामिल दू सौ छियासठ काम के तुलना म एकतालिस प्रतिशत के बढ़वार होय हे।

हैण्डलूम कार्यशाला

छत्तीसगढ़ के हैण्डलूम हैण्डीक्राफ्ट अउ वस्त्र उद्योग ले जुड़े उद्यमी अउ संस्था ल निर्यात बर प्रोत्साहित करे अउ उंखर उत्पाद ल वैश्विक बाजार ले जोड़े खातिर आज रायपुर म निर्यात संवर्धन अउ डिजाइन विकास कार्यशाला लगाय गीस। कार्यशाला म हैण्डलूम, हैण्डीक्राफ्ट अउ वस्त्र उद्योग म निर्यात के संभावना वित्तीय सहायता, क्रेडिट गारंटी अउ पारंपरिक डिजाइन ल आधुनिक रूप दे जइसन बिसय म बिसेसज्ञ मन जानकारी दीन।

कार्यशाला म बोलत हथकरघा संघ के अध्यक्ष भोजराज देवंागन ह कहिन कि स्थानीय उत्पाद ल बाजार देवाय के जरूरत हे। उंहे ग्रामोद्योग विभाग के सचिव राजेश सिंह राणा ह कहिन कि छत्तीसगढ़ ले हथकरघा उत्पाद अउ हस्तशिल्प के करीबन सैंतालिस करोड़ रूपिया के निर्यात होय हे। अवइया तीन बछर म एला बढ़ाके सौ करोड़ रूपिया तक पहुंचाय के लक्ष्य राखे गेहे।

माओवादी डंप बरामद

नारायणपुर जिला के अबूझमाड़ म तलाशी अभियान के दउरान पुलिस अउ आईटीबीपी के टीम ह भटबेड़ा छेत्र म माओवादी डंप ले छै प्रेशर कुकर आईईडी अउ एक पाईप बम बरामद करे हे। मउका ले आईईडी बनाय म उपयोग अवइया जीनिस मिले हे सुरक्षा बल ह सबो विस्फोटक ल सुरक्षित रूप ले नष्ट कर दीन।

सोनमणि बोरा- बिलासपुर

नगरीय प्रशासन विभाग के प्रमुख सचिव सोनमणि बोरा ह काली बिलासपुर के संकरी म प्रधानमंत्री आवास योजना म बने घर अउ कोनी म पीएम ई बस सेवा के नवा बने टर्मिनल अउ चार्जिंग स्टेशन के निरीक्षण करीन। बिलासपुर म पीएम ई बस सेवा म पचास वातानुकूलित इलेक्ट्रिक बस बारा ठिन रद्दा म चलाय जाही।

अउ अब जानन मौसम के हाल…

मौसम विभाग के मुताबिक दक्षिण पूर्व मध्यप्रदेश अउ ओखर ले लगे छत्तीसगढ़ के उपर एक चक्रवाती घेरा बने हे, जेखर परभाव ले प्रदेस के मौसम म फेरबदल होवत हे। मौसम विज्ञानी डॉक्टर गायत्री वाणी ह बतईन कि अवइया चौबीस घंटा के दउरान उत्तर अउ मध्य छत्तीसगढ़ के कुछेक जिला म एक-दू जघा हवा गरेर संग छिटपूट बरसा अउ कहूं-कहूं गाज गिरे के आसंका जताय गेहे।

मेडिकल कॉलेज नियुक्ति

रायपुर के पंडित जवाहरलाल नेहरू स्मृति मेडिकल कॉलेज म डॅाक्टर अउ मेडिकल शिक्षक के खाली पद ल भरे के काम सुरू होगे हे। कॉलेज प्रशासन कोति ले सहायक प्राध्यापक, सीनियर रेजिडेंट अउ जूनियर रेजिडेंट के एक सौ बावन खाली पद म संविदा के आधार म नियुक्ति करे जाही। उम्मीदवार मनके चयन इंटरव्यू ले होही, जउन चौदा अक्टूबर के मेडिकल कॉलेज परिसर म राखे जाही। उम्मीदवार जरूरी दस्तावेज संग सोझे इंटरव्यू म शामिल हो सकत हे।