मंत्रिमंडल-फैसला
केन्द्रीय मंत्रिमंडल ह एकीकृत परिवहन अउ लॉजिस्टिक्स प्राधिकरण के गठन ल मंजूरी देहे। नई दिल्ली म आज केन्द्रीय मंत्रिमंडल के बइठका के बाद पत्रकार मन ल जानकारी देवत सूचना अउ प्रसारण मंत्री अश्वनी वैष्णव ह किहीन कि एखर ले परिवहन अउ लॉजिस्टिक्स क्षेत्र म अनुसंधान, योजना, मूल्यांकन, निगरानी अउ प्रभाव आंकलन ल मजबूती मिलही। ओमन किहीन कि देस के सकल घरेलू उत्पाद करीबन सात ले आठ प्रतिशत के दर ले बाढ़त हे अउ एखर संग लॉजिस्टिक्स के मांग सरलग बाढ़त हे। श्री वैष्णव ह किहीन कि ए बाढ़त मांग ल पूरा करे बर देसभर म कतकोन राजमार्ग, रेलवे लाइन, जलमार्ग, हवाई अड्डा अउ नवा बंदरगाह बनाय जात हे। एकीकृत परिवहन अउ लॉजिस्टिक प्राधिकरण दस बछर के बेरा ल ध्यान म राखत राष्ट्रीय परिवहन मास्टर प्लॉन तियार करही।
केन्द्रीय मंत्रिमंडल ह छोटे अउ मध्यम उद्यमी मन म निवेस खातिर दस हजार करोड़ रूपिया के स्मॉल एंड मीडियम एंटरप्राईजेस ग्रोथ फंड के स्थापना ल मंजूरी देहे।
सहकारिता सम्मेलन
छत्तीसगढ़ के बस्तर म पहिली घांव राष्ट्रीय सहकारिता सम्मेलन आठ अउ नौ अक्टूबर के जगदलपुर म होही। केन्द्रीय सहकारिता मंत्रालय कोति ले होवइया ए सम्मेलन म पन्द्रह राज्य के सहकारिता सचिव अउ चौदह ठिन राज्य के पंजीयक भाग लीही। सम्मेलन के अगुवई केन्द्रीय सहकारिता विभाग के सचिव आशीष कुमार भूटानी करही।
सम्मेलन म बहुउद्देशीय प्राथमिक कृषि साख समिति अउ दुग्ध सहकारी समिति के गठन, समिति के कम्प्यूटरीकरण, डिजिटल सेवा, भंडारण क्षमता बढ़ाय अउ सहकारी बैंकिंग ल मजबूत करे के संबंध म गोठबात होही। समिति कोति ले खातू बांटे अउ बहुराज्यीय सहकारी संस्था मनके संग मेलजोल म घलो गोठबात होही। अवइया तीन महीना बर कार्ययोजना तियार करे जाही। ए दउरान अधिकारी मन बस्तर के सहकारी समिति, लघु वनोपज अउ जनजातीय सहकारी संस्था के दउरा करही।
मुख्यमंत्री-सिंगापुर
सिंगापुर के एनर्जी कैपिटल ग्लोबल कंपनी छत्तीसगढ़ म एआई-रेडी डेटा सेंटर कैंपस म करीबन इकचालीस हजार सात सौ पचास करोड़ रूपिया के निवेस करही। सिंगापुर म राखे गे प्रथम सिंगापुर इंडिया नेटवर्क फॉर ग्रोथ फोरम म मुख्यमंत्री विष्णुदेव साय के अगुवई म गे छत्तीसगढ़ के प्रतिनिधिमंडल ल तिरालीस हजार दू सौ पचास करोड़ रूपिया के प्रत्यक्ष विदेसी निवेस के प्रतिबद्धता मिलीस। एमा छत्तीसगढ़ म सौ मेगावॉट क्षमता के एआई रेडी डेटा सेंटर कैंपस बनाय जाही। छत्तीसगढ़, भारत सरकार के विदेस मंत्रालय के नामांकन म ए फोरम म सहभागिता करत रिहीस।
विश्व आवास दिवस
आवासन अउ सहरी कार्य राज्यमंत्री तोखन साहू काली नई दिल्ली के विज्ञान भवन म राखे गे विश्व आवास दिवस समारोह म माईपहुना के रूप म संघरीन। ए बेरा म श्री साहू ह किहीन कि घर सिरिफ बनाय के बिसय नो हे, भलूक सुरक्षा, सम्मान, मउका अउ बने जीवन ले जुड़े बिसय हरय। ओमन बतईन कि प्रधानमंत्री आवास योजना-अर्बन अउ प्रधानमंत्री आवास योजना-अर्बन टू प्वाइंट-ओ म एक करोड़ पच्चीस लाख ले जादा घर मंजूर करे जा चुके हे। एमा ले एक करोड़ ले जादा घर माईलोगिन के नाव म हवय। ओमन किहीन कि आवास के मतलब सिरिफ घर देवाना नो हे। पानी, साफ-सफाई, अवई-जवई के सुविधा, बने स्वास्थ्य अउ सिक्षा जइसन जरूरी सुविधा सुनिश्चित करना हे।
रोजगार-मेला
सेवा संकल्प अभियान म रईपुर म सात अउ आठ अक्टूबर के राज्य स्तरीय रोजगार मेला लगाय जाही। रोजगार विभाग कोति ले ए मेला बूढ़ापारा क बलबीर सिंह जुनेजा इंडोर स्टेडियम म राखे जात हे। ए मेला म माईपहुना मुख्यमंत्री विष्णुदेव साय होही। उहें, विधानसभा अध्यक्ष डॉक्टर रमन सिंह कार्यक्रम के अगुवई करही। मुख्य कार्यक्रम आठ अक्टूबर के दस बजे बिहनिया सुरू होही। रोजगार मेला ले प्रदेस के युवा मन ल प्राईवेट क्षेत्र म रोजगार बर जोड़े जाही। युवा मन ल आने-आने क्षेत्र अउ प्रतिष्ठान म मौजूद रोजगार के जानकारी मिलही अउ उंखर योग्यता अउ कौशल के मुताबिक मउका मिलही। रोजगार विभाग ह युवा मन ले जादा ले जादा संख्या म रोजगार मेला म संघरके मौजूद मउका के फायदा उठाय के अपील करीन हे।
विशेष कार्यक्रम
आकाशवाणी केन्द्र, रईपुर कोति ले ‘‘जन सेवा से देस सेवा‘‘ म बिसेस कार्यक्रम के श्रृंख्ला प्रसारित करे जात हे। इही कड़ी म आज संझा सात बजे ईज ऑफ डूइंग बिजनेस म उद्योग संचालनालय के उप संचालक अमय त्रिपाठी ले लेगे भेंटवार्ता के प्रसारण करे जाही। ए कार्यक्रम ल छत्तीसगढ़ स्थित आकाशवाणी के सबो केन्द्र रिले करही।
अंबिकापुर-हजरत निजामुद्दीन एक्सप्रेस
अंबिकापुर-हजरत निजामुद्दीन एक्सप्रेस ट्रेन अब हफ्ता म एक दिन के जगह दू दिन चलही। अंबिकापुर रेलवे स्टेसन ले आज द्वितीय साप्ताहिक ट्रेन ल सांसद चिंतामणी महाराज ह हरियर झंडी देखाके रवाना करीन। ए दउरान ओमन यात्री मन ल भेंट करके सुखद यात्रा के सुभकामना दीन। अंबिकापुर-हजरत निजामुद्दीन एक्सप्रेस के संचालन अब हरेक मंगलवार अउ बिरस्पत के करे जाही। ए ट्रेन अंबिकापुर ले बिहनिया साढ़े सात बजे निकलही। उहें, लहुटत बेरा ए ट्रेन हरेक इतवार अउ मंगलवार के रतिहा ग्यारह बजे हजरत निजामुद्दीन ले निकलही।
परिवहन कार्यालय-लोकार्पण
परिवहन मंत्री केदार कश्यप ह काली बलौदाबाजार जिला के गांव परसाभदेर म नवा बने जिला परिवहन कार्यालय भवन के लोकार्पण करीन। ए बेरा म ओमन किहीन कि परिवहन विभाग के सेवा ल डिजिटल करे जात हे। अवइया बेरा म लोगन गाड़ी संबंधी जरूरी काम घर बइठे पूरा कर सकही। ए मउका म राजस्व मंत्री टंकराम वर्मा ह किहीन कि जिला म जल्दीच आधुनिक वाहन टेस्टिंग सुविधा करे जाही।
पर्यटन-चेंदरू पुरस्कार
पर्यटन विभाग ह ग्रामीण पर्यटन के क्षेत्र म बने काम करइया मनखे अउ संस्था ल प्रोत्साहित करे खातिर ‘‘ चेन्दरू राज्य ग्रामीण पर्यटन पुरस्कार‘‘ के घोषणा करे हे। एमा चुने गे मनखे या संस्था ल एक लाख रूपिया के नगद रकम अउ प्रमाण पत्र दे जाही।
पर्यटन अउ संस्कृति मंत्री राजेश अग्रवाल ह किहीन कि राज्य सरकार के प्रचास हवय कि पर्यटन के फायदा सिरिफ मुख्य पर्यटन के जघा तक सीमित झन हरय, भलूक दूर-दराज के गांव अउ जनजातीय क्षेत्र तक पहुंचय। ओमन किहीन कि गांव म पर्यटन ले उहां के युवा, माईलोगिन, स्व-सहायता समूह, कारीगर मन बर आजीविका अउ स्व-रोजगार के नवा मउका तियार करे जाही। ए पुरस्कार बर छत्तीसगढ़ टूरिज्म बोर्ड कोति ले अरजी मंगाय जाही। चुने गे विजेता अउ संस्था के अगुवई करइया मन ल राज्योत्सव के मउका म सम्मानित करे जाही।
गौधाम स्थापना-मंजूरी
पशुधन विकास विभाग ह गौधाम योजना म प्रदेस म चालीस अउ नवा गौधाम बनाय के मंजूरी देहे। एमा सरगुजा, अंबिकापुर, बिलासपुर, सारंगढ़-बिलाईगढ़, रईपुर, दुरूग, बेमेतरा, नारायणपुर अउ जशपुर जिला म गौधाम बनाय जाही। एमा गौवंशीय पशु मन बर शेड, पानी, बिजली समेत मवेसी मनके सुरक्षा अउ देखभाल ले जुड़े जरूरी सुभीता सामिल हे।
दुर्घटना
कोरबा जिला काली तेज रफ्तार ट्रेलर ह दू फटफटी सवार मन ल एक संघरा टक्कर मार दीस। ए हादसा म तीन झिन के मउत होगे। उहें, एक आने मनखे घायल होगे हे। ए घटना बाकीमांेगरा थाना क्षेत्र म खदान रोड तीर होइस। जानकारी के मुताबिक दूनों फटफटी म दू-दू झन बइठे रिहीन। इही बेरा तेजी ले आवत ट्रेलर ह दू गाड़ी ल अपन चपेट म ले लीस।
उहें, राजनांदगांव जिला के ढेलकाडीह चउक म पाछु संझा तेजी ले आवत गाड़ी के चपेट म आय ले एक झिन सिक्षिका के मउत होगे अउ दू छात्रा घायल होगे। तीनों स्कूल छुटे के बाद बस के अगोरा करत रिहीन। पुलिस ह गाड़ी ल जब्त करके ड्राईवर ल हिरासत म ले लेहे।
बारिश/बाढ़-राहत शिविर
छत्तीसगढ़ म अभी हाले म होय भारी बरसा अउ बाढ़ ले प्रभावित उनचार हजार ले जादा लोगन ल सुरक्षित जघा म अमराय गेहे। सरकार कोति ले दे गे जानकारी के मुताबिक प्रभावित लोगन मन बर एक सौ बावन राहत सिविर बनाय गेहे, जिहां करीबन बारह हजार लोगन के रेहे अउ खाय-पीये के व्यवस्था करे गेहे। बाढ़ ले प्रदेस के बाईस ले जादा जिला प्रभावित होय हे। सुकमा अउ बस्तर म सबले जादा प्रभाव पड़े हे। राज्य सरकार ह जनहानि, पशु हानि, मकान अउ फसल नकसान बर दू करोड़ सोलह लाख रूपिया ले जादा के सहायता रासि मंजूर करके बांटे हे।