छत्तीसगढ़-पुरस्कार
आर्थिक रूप ले कमजोर वरग अउ निम्न आय वरग के परिवार मन ल कीफायती आवास देवाय के उत्कृष्ट कार्यप्रणाली खातिर भारत सरकार के आवासन अउ सहरी कार्य मंत्रालय ह छत्तीसगढ़ ल राष्ट्रीय स्तर म इनाम देहे। विश्व पर्यावास दिवस के मउका म आज नई दिल्ली के विज्ञान भवन म राखे गे समारोह म केंद्रीय आवासन अउ सहरी कार्य राज्य मंत्री तोखन साहू ह छत्तीसगढ़ ल ए पुरस्कार दीन। राज्य कोति ले नगरीय प्रशासन अउ विकास विभाग के प्रमुख सचिव सोनमणि बोरा अउ राज्य सहरी विकास अभिकरण के मुख्य कार्यपालन अधिकारी सुमीत अग्रवाल ह ए सम्मान लीन।
मुख्यमंत्री विष्णुदेव साय अउ उपमुख्यमंत्री अरूण साव ह ए उपलब्धि बर नगरीय प्रशासन विकास विभाग अउ नगरीय निकाय के सबो झन ल बधई दीन हे। मुख्यमंत्री ह किहीन कि राज्य सरकार के परयास हरय कि कोनो भी पात्र परिवार पक्का आवास मिले ले झन छुटय।
मुख्यमंत्री-सिंगापुर
मुख्यमंत्री विष्णुदेव साय ह सिंगापुर दउरा के दूसर दिन सिंग फोरम के मंच म उद्योग जगत के प्रतिनिधि मन संग गोठबात करीन अउ ओमन ल छत्तीसगढ़ म निवेस बर न्योता दीन। ओमन किहीन कि छत्तीसगढ़ अब खनिज अउ पारंपरिक उद्योग तक सीमित नोहय, भलुक तकनीक नवाचार अउ वैश्विक निवेस खातिर आगू आवत हे। श्री साय ह किहीन कि सरकार निवेसक मन ल मन मुताबिक नीतिगत वातावरण अउ जरूरी मदद देवाय बर प्रतिबध्द हवय।
मुख्यमंत्री विष्णुदेव साय ह सिंगापुर के मंडाई वाइल्ड लाइफ रिजर्व ल देखिन। ओमन किहीन कि इंहा के अनुभव के आधार म छत्तीसगढ़ म घलो इको टूरिज्म के अइसन मॉडल विकसित करे जा सकत हे, जेमा संरक्षण के संग पर्यटन अउ रोजगार आगू बढ़ही।
राष्ट्रीय चिंतन-शिविर
केंद्रीय सड़क परिवहन अउ राजमार्ग मंत्री नितिन गडकरी ह आज गुजरात के नर्मदा म राष्ट्रीय ंिचंतन सिविर के सुभारंभ करीन। केंद्रीय सड़क अउ राष्ट्रीय राजमार्ग मंत्रालय कोति ले राखे गे सिविर म केंद्रीय सड़क परिवहन अउ राजमार्ग राज्य मंत्री हर्ष मल्होत्रा अउ छत्तीसगढ़ के लोक निर्माण मंत्री अरूण साव सामिल होइन। दू दिवसीय सिविर के आयोजन ‘‘गति सक्ति से प्रगति‘‘ थीम म करे गेहे। चिंतन सिविर के पहिली दिन आज आने-आने सत्र म पीएम गति सक्ति के क्रियान्वयन, भूमिअधिग्रहण म तेजी अउ संबंधित रकम के प्रभावी उपयोग जइसन बिसय म गोठबात करे गीस।
मतदाता पंजीकरण-विशेष अभियान
भारत निर्वाचन आयोग के निरदेस के मुताबिक छुटे अउ नवा पात्र युवा मतदाता मनके पंजीकरण बर प्रदेस म एक बिसेस अभियान चलाय जाही। ए काम बीएलओ घर-घर जाके करही। निर्वाचन आयोग ह पात्र नागरिक मन ले किहीन हे कि ओमन मतदाता सूची म अपन पंजीयन सुनिश्चित करय। मतदाता सूची म अपन पंजीयन कराय बर ईसीआई नेट मोबाइल ऐप या वेबसाइट वोटर्स डॉट ईसीआई डॉट जीओवी डॉट इन ले फॉर्म छै म ऑनलाइन अर्जी कर सकत हे।
शिक्षा मंडल लोक सेवा गारंटी
छत्तीसगढ़ माध्यमिक शिक्षा मंडल के कतकोन महत्वपूर्ण सेवा ल लोक सेवा गारंटी अधिनियम म समयबध्द करे गेहे। नवा बेवस्था म डूप्लीकेट माइग्रेसन प्रमाण पत्र अउ अंकसूची जारी करे के सेवा बर साठ दिन के समय-सीमा तय करे गेहे। उहें, उत्तर पुस्तिका के पुनर्गणना, पुर्नमूल्यांकन अउ फोटोकापी ले जुड़े सेवा घलो साठ दिन के भीतरी देवाय जाही। स्कूल शिक्षा मंत्री गजेन्द्र यादव ह किहीन हे कि राज्य सरकार के परयास हवय कि पढ़इया लइका मन ल जरूरी दस्तावेज खातिर सरकारी कार्यालय के चक्कर लगाय बर झन पड़य।
भाजपा सेवा ज्योति यात्रा
रईपुर के प्रदेस भाजपा कार्यालय म सेवा संकल्प अभियान के प्रांतीय समीक्षा बइठका राखे गीस। एमा प्रदेस संगठन महामंत्री कर्मवीर सिंह समेत पार्टी के कतकोन बड़का नेता मौजूद रिहीन। बइठका के दउरान अभियान के प्रभारी यशवंत जैन ह बतइन कि सात अक्टूबर के छत्तीसगढ़ के सबो नब्बे विधानसभा क्षेत्र म सेवा ज्योति यात्रा निकाले जाही।
बस्तर-दिव्यांगजन शिविर
बस्तर संभाग म नक्सल हिंसा अउ आईईडी बिस्फोट ले प्रभावित दिव्यांगजन मन ल कृत्रिम अंग अउ सहायक उपकरण देवाय बर आज ले जगदलपुर म निसुल्क दिव्यांग सहायता सिविर लगाय गेहे। धरमपुरा के क्रीडा परिसर म राखे गे ए सिविर म बस्तर, कोंडागांव, नारायणपुर अउ कांकेर जिला ले तीन हजार आठ सौ ले जादा जरूरतमंद मन ल कृत्रिम अंग अउ सहायक उपकरण दे जाही। सुभारंभ कारीकरम म मौजूद उपमुख्यमंत्री विजय शर्मा ह आईईडी ब्लास्ट के सिकार ग्रामीण संतोष पोयाम कर्तव्य के दउरान घायल होय पुलिस जवान राकेश कुमार यादव अउ घासीराम मांझी के संबंध म बिसेस रूप ले बतइन कि ओमन अब कृत्रिम अंग के मदद ले बिना काखरो सहारा के चले बर तियार हवय।
उहें, सिविर ल वर्चुअल रूप ले संबोधित करत मुख्यमंत्री विष्णुदेव साय ह ए आयोजन ल दिव्यांगजन मनके सम्मान, आत्मनिर्भरता अउ सशक्तिकरण बर उठाय गे बड़े कदम बतइन। ए सिविर जिला प्रशासन अउ समाज कल्याण विभाग के मेलजोल ले भगवान महावीर विकलांग सहायता समिति जयपुर एनएसई फाउंडेसन अउ भारतीय जैन संघटना कोति ले जुरमिल के चलाय जात हे। अभियान के दूसर चरण म बस्तर संभाग के बांचे जिला दंतेवाड़ा, बीजापुर अउ सुकमा बर पंद्रह ले सत्रह अक्टूबर तक दंतेवाड़ा म सिविर लगाय जाही।
‘जन सेवा से देश सेवा‘
प्रधानमंत्री नरेंद्र मोदी सार्वजनिक जीवन म पच्चीस बछर पूरा करत हे। उंखर ए यात्रा जन सेवा ले देस सेवा के मंत्र अउ सरलग समर्पण ले परिभाषित रेहे हे जउन आज घलो चलत हे। सेवा अउ सुशासन के इही सोच ले प्रेरित होके सरकार बछर दू हजार सैंतालीस तक विकसित भारत के लक्ष्य ल पाय बर सरलग काम करत हे।
आज हम पूर्वोत्तर भारत के बिकास के संबंध म जानकारी देवत हन। पूर्वोत्तर भारत आज विकास के नवा रफ्तार ले आगू बढ़त हे। प्रधानमंत्री नरेंद्र मोदी के अगुवई म सरकार के लक्ष्य हरय-एक्ट ईस्ट, एक्स फास्ट अउ एक्ट फर्स्ट के संग पूर्वोत्तर ल देस के विकास यात्रा के मजबूत केंद्र बनाना। रद्दा, रेलवे, हवई सेवा अउ जल मार्ग के बिस्तार कर क्षेत्र के कनेक्टिविटी मजबूत करे जावत हे।
संगेसंग, सांति समझौता अउ बेहतर सुरक्षा बेवस्था ले क्षेत्र म बिकास बर अनुकूल माहौल तियार होय हे। सड़क, रेल, डिजिटल नेटवर्क, उद्योग अउ सांति के परयास के संग पूर्वोत्तर भारत अब बिकास अउ समृध्दि के नवा द्वार के रूप म उभरत हे।
रोजगार-मेला
रईपुर के सरदार बलबीर सिंह जुनेजा इंडोर स्टेडियम म सात अउ आठ अक्टूबर के राज्य स्तरीय रोजगार मेला लगाय जाही। ए मेला म करीबन आठ हजार युवा मन ल प्राइवेट क्षेत्र म रोजगार देवाय जाही। एखर बर अभी तक बांसठ ठिन कंपनी अउ प्लेसमेंट एजेंसी ले खाली पद के जानकारी दे गेहे। रोजगार मेला के दूसर दिन मुख्यमंत्री विष्णुदेव साय अउ रोजगार मंत्री गुरू खुशवंत साहेब चुने गे युवा मन ल नियुक्ति पत्र दिही।
गांजा-जब्त
जशपुर पुलिस ह लावाकेरा चैंकिंग बैरियर म टरक ले छै कुंटल बत्तीस किलो गांजा बरामद करे हे। जांच के दउरान बीस बोरा म रखाय करीबन छै सौ पैकेट गांजा मिलिस। ए मामला म गिरफ्तार आरोपी उत्तर प्रदेस के बहराइच के रहवइया हरय। जब्त गांजा के कीमत करीबन तीन करोड़ सोलह लाख रूपिया बताय गेहे।
उहें, बलरामपुर जिला के खुखरी के रखैतपारा म सागभाजी के फसल के आड़ म गांजा के खेती करे जात रिहीस। पुलिस ह दबिस देके एक सौ बारह नग गांजा के पउधा बरामद करे हे। जेखर कीमत करीबन तीन लाख रूपिया बताय जात हे। पुलिस ह एक झिन आरोपी ल गिरफ्तार करे हे।
अउ अब थोरकुन समाचार सार म
– धमतरी जिला के कुरूद म एंटी करप्शन ब्यूरो-एसीबी ह अनुविभागीय राजस्व अधिकारी कार्यालय के एक लिपिक ल दस हजार रूपिया के रिस्वत लेत गिरफ्तार करे हे। पीड़ित ह सिकइत करे रिहीस कि आरोपी ह डायवर्सन के नांव म ओखर तीर ले बीस हजार रूपिया के रिस्वत मांगे रिहीस।
– कवर्धा म आज एक क्लिनिक म खुसर के तेंदुआ ह इलाज कराय बर पहुंचे माईलोगिन ल घायल कर दीस। रिहायसी क्षेत्र म तेंदुआ के पहुंचे ले थोरिक बेर बर अफरा-तफरी मच गे। सूचना मिलतेच वन विभाग के टीम ह मउका म पहुंच के तेंदुआ ल पकड़िन। घायल महिला के इलाज अस्पताल म चलत हे।
अउ
– बलरामपुर जिला के विजय नगर के हायर सेकेंडरी स्कूल के कक्षा म लइका मन उपर मधुमक्खी के झुंड ह हमला कर दीस। ए घटना म करीबन दस झन लइका घायल हो गेहे।