बस्तर-दिव्यांगजन सिविर
बस्तर संभाग के दिव्यांगजन मन ल कृत्रिम अंग अउ सहायक उपकरण देवाय खातिर जगदलपुर अउ दंतेवाड़ा म सिविर राखे जाही। उपमुख्यमंत्री विजय शर्मा ह अधिकारी मन ल सबो जरूरी व्यवस्था बेरा म तय राखे के निरदेस देहे। जगदलपुर के खेल कैंपस म पांच ले सात अक्टूबर तक सिविर लगही, जेमा बस्तर, नारायणपुर, कोंडागांव अउ कांकेर के दू हजार नौ सौ ले जादा चुने गे हितग्राही सामिल होही। उहें, दंतेवाड़ा म पंद्रह ले सत्रह अक्टूबर तक पुलिस लाइन परिसर म सिविर लगाय जाही। सिविर म दंतेवाड़ा, सुकमा अउ बीजापुर के आठ सौ छियालिस झिन हितग्राही मन ल मसीन दे जाही। ए दउरान नक्सल मारकाट अउ आईईडी बिस्फोट ले प्रभावित दिव्यांगजन मनके पुनर्वास म बिसेस धियान दे जाही। उहें, सिविर म निसुल्क अवई-जवई अउ भोजन के व्यवस्था रइही।
उपमुख्यमंत्री श्री शर्मा ह ग्रामसभा के माध्यम ले गंवई मनके सुरक्षा के सत्यापन करके उंहा ल आईईडी मुक्त ग्राम घोसित करे सोझ तेजी ले काम करे खातिर निरदेस घलो दीन।
भाजपा बैठक
रईपुर स्थित प्रदेस भाजपा कार्यालय कुशाभाऊ ठाकरे परिसर म आज भारतीय जनता पार्टी के प्रदेस पदाधिकारी मनके बइठका होइस। ए बइठका म प्रदेस अध्यक्ष किरण सिंह देव वर्चुअल रूप म जुड़िन। ए बइठका म नवा बने प्रदेस महामंत्री कर्मवीर सिंह, निवर्तमान प्रदेस महामंत्री पवन साय अउ निवर्तमान क्षेत्रीय संगठन महामंत्री अजय जामवाल संग पार्टी के बड़का पदाधिकारी सामिल होइन। बइठका बाद पत्रकार मन ले चर्चा करत सांसद संतोष पांडे ह बतइन कि ए बइठका म सेवा संकल्प अभियान के समीक्षा करे गीस।
एखर पहिली, काली जशपुर म भाजपा के नवा बने प्रदेस संगठन महामंत्री कर्मवीर सिंह के पहिली घांव छत्तीसगढ़ आना होइस। ए दउरान श्री सिंह ह जिला पदाधिकारी अउ कार्यकर्ता मन ले संगठन के गतिविधि उपर गोठबात करीन।
सेवा संकल्प अभियान
सेवा संकल्प अभियान के तहत महिला अउ बाल विकास मंत्री लक्ष्मी राजवाड़े ह सूरजपुर जिला के गांव कटिंदा म गंवई के मनखे मन ले जनसंवाद करीन। ओमन ओखर मनके मन के समस्या सुनिन अउ अधिकारी मन ल तुरते निराकरण के निरदेस दीन। श्रीमती राजवाड़े ह मुनगा के पउधा रोपके सुपोषण के आरो दीन। ओमन हरेक घर म मुनगा लगाय अउ स्थानीय पौष्टिक खाद्य पदार्थ ल भोजन म सामिल करे के आह्वान करीन।
उहें, गांव चंद्रमेढ़ा म नसामुक्त भारत अभियान के चलत जवान लइका अउ आने मनखे मन ल नसा पानी ले दूर रेहे खातिर सपथ देवाइन। संगे ए जवान लइका मन ल पढ़ई-लिखई, खेल अउ नवाचार के जरिया राष्ट्र निरमान म योगदान देके अपील करीन।
सेवा फर्स्ट-इनोवेशन चैलेंज
सेवा संकल्प अभियान के चलत छत्तीसगढ़ के पढ़इया लइका सोध करइया, स्टार्टअप एसएसएनई अउ नवाचार करइया मनके प्रतिभा अउ नवा बिचार ल आगू बढ़ाय के उद्देस्य ले सेवा फर्स्ट ईनोवेसन चैलेंज के आयोजन करे जात हे। इनोवेशन चैलेंज के तहत दस ठिन प्रमुख क्षेत्र मन म सत्रह अक्टूबर तक नवाचार आधारित समाधान मंगाय गेहे। इनोवेशन चैलेंज बर पांच करोड़ रूपिया के पुरस्कार रासि निर्धारित करे गेहे।
रेलवे स्वच्छता-पखवाड़ा
रईपुर रेल मंडल म एक अक्टूबर ले पंद्रह अक्टूबर तक स्वच्छता पखवाड़ा मनाय जात हे। एखर चलत तीन अक्टूबर ले पंाच अक्टूबर तक मुख्य अउ जादा यात्री के अवई-जवई वाले टेसन अउ रेलवे प्रतिष्ठान जघा मन म बिसेस सफाई अभियान चलाय जात हे। ए अभियान म प्लेटफॉर्म फुट ओवर ब्रिज, वेटिंग हाल, सीढ़िया अउ पार्किंग जघा के साफ-सफाई करे जात हे। सार्वजनिक सौचालय जघा ल सेनेटाइज करे के संगे नाली मन ले कचरा निकाले उपर घलो बिसेस धियान दे जात हे। यात्री मनले कचरा ल डस्टबिन म डाले के संगेसंग रेलवे टेसन जघा ल साफ रखे खातिर अपील करे गेहे।
मुख्यमंत्री-ग्रामीण बस योजना
मुख्यमंत्री ग्रामीण बस योजना के एक बछर पूरा हो गेहे। चार अक्टूबर दू हजार पचीस के जगदलपुर ले सुरू होय ए योजना के माध्यम ले आज बस्तर अउ सरगुजा संभाग के तेरह ठिन जिला मन म एक सौ छै चुने गे रद्दा मन म एक सौ सात ठिन बस ल चलाय जात हे। ए बस मन ले अइसन साढ़े आठ सौ गंवई जघा तक बस सेवा पठोय जात हे, जिंहा आगू ए सहूलियत नइ रिहीस।
चावल वितरण
प्रदेस के रासन कार्डधारी हितग्राही मन ल अब पंद्रह अक्टूबर तक दू महिना के चांउर दे जाही। एखर बर एक अक्टूबर ले ऑनलाइन पोर्टल खोल दे गेहे। रासन दुकानदार मन ल ए बारे म आदेस जारी हो गेहे। कोर पीडीएस प्रणाली के चलत हितग्राही मन सहर के कोनो भी रासन दुकान ले चांउर ले सकत हे। खाद्य संचालनालय डहार ले सबो खाद नियंत्रक अउ खाद्य अधिकारी मन ल निरदेस दे गे हे कि ओमन अपन-अपन जिला म रासन दुकान ल नवा समय-सीमा के जानकारी पठोवय।
एखर पहिली, राज्य सरकार ह सितंबर-अक्टूबर महिना के चांउर बांटे खातिर तीस सितंबर तक के बेरा तय राखे रिहीस।
तेंदुआ-रेस्क्यू
महासमुंद जिला म कोमाखान थाना क्षेत्र के झिटकी गांव म एक ठिन घर-कुरिया म हुरहा अमाके हमला करइया तेंदुआ ल वन विभाग के टीम ह पकड़ लेहे। महासमुंद के वन मंडल अधिकारी ह बतइन कि तेंदुआ ल सुरक्षित ओखर प्राकृतिक रेहे के जघा म छोड़े जाही। ए तेंदुआ के हमला ले आठ झिन मनखे घायल होय हे। एमा ले तीन झिन के हालत गंभीर हे।
डॉक्टर स्टाइपेंड-खंडन
सोसल मीडिया म डॉक्टर मन के स्टाइपेंड अउ मानदेय-वेतन म बढ़ोत्तरी संबंधी निकले कथित आदेस ल लेके चिकित्सा, शिक्षा विभाग ह खंडन करे हे। विभाग ह स्पष्ट करे हे कि ए आदेस ह पूरा तरह ले फर्जी अउ एआई ले तियार करे गेहे। एला वास्तविक सरकारी आदेस झन माने जाय।
इंहा ए बतादन कि सोसल मीडिया म वायरल एक ठिन आदेस म सरकारी मेडिकल कालेज के जूनियर रेजिडेंट, प्रदर्सक अउ स्वास्थ्य विभाग के अंतर्गत पदस्थ चिकित्सा अधिकारी मन ल हर महिना तिहत्तर हजार एक सौ बावन रूपिया देबर अउ संसोधित रासि एक नवंबर ले प्रभावसील होय के दावा करे गेहे।
साइबर जागृति अभियान लघु फिल्म
रायगढ़ पुलिस के साइबर जागृति अभियान के चलत राखे गे लघु फिल्म प्रतियोगिता के काली समापन होइस। ए मउका म वित्त मंत्री ओपी चौधरी ह जवान लइका मनले साइबर एम्बेस्डर बनके परिवार अउ समाज ल साइबर अपराध ले बांचे खातिर जागरूक करे के आह्वान करीन। संकल्प-साइबर क्राइम मुक्त छत्तीसगढ़ थीम उपर राखे गे ए प्रतियोगिता म ग्यारा राज्य के पैंतीस ठिन जिला मन ले एक सौ बैंसठ ठिन फिलिम मिले हे।
कोडिंग हैकाथॉन
रईपुर म राष्ट्रीय प्रौद्योगिकी संस्थान-एनआईटी के ट्यूरिंग क्लब ऑफ प्रोग्रामर्स डहार ले दू दिन वाले कोडिंग हैकाथॉन ‘कोड उत्सव टेन प्वाइंट ओ‘ सुभारंभ करीन। सेवा संकल्प अभियान के तहत ‘सेवा फर्स्ट इनोवेसन चैलेंज‘ म देसभर के इकचालीस ठिन टीम भाग लेवत हे। एमा भाग लेवइया मन अट्ठाईस घंटा के हैकाथॉन म वास्तविक समस्या मनके तकनीकी समाधान अउ कार्यसील प्रोटोटाइप तियार करही।
अउ अब थोरकुन समाचार सार म –
– छत्तीसगढ़ व्यावसायिक परीक्षा मंडल व्यापम डहार ले आज दू पाली म राज्य पात्रता परीक्षा राखे गे रिहीस। पहिली पाली के परीक्षा बिहनिया दस बजे ले सवा ग्यारा बजे तक अउ दूसर पाली के परीक्षा ह मंझनिया दू बजे ले संझा सवा चार बजे तक होइस।
– बलरामपुर जिला के बरियो पुलिस ह खुखरी गांव के रखैतपारा म सब्जी बारी म लगाय गे गांजा के एक सौ बारह ठिन पउधा बरामद करे हे, जेखर कीमत करीबन साढ़े तीन लाख रूपिया बताय गेहे। ए मामला म पुलिस ह एक झिन मनखे ल गिरफ्तार करे हे।
अउ
– दुरूग जिला के जामुल थाना क्षेत्र म तरिया म नहाय बेरा बूड़े ले जवान लइका के लास ल एसडीआरएफ के टीम ह बरामद कर लेहे।