मुख्यमंत्री-सिंगापुर
मुख्यमंत्री विष्णुदेव साय राज्य म निवेस के नवा संभावना ल बिस्तार देय के मंसा ले आज तीन दिन के दउरा म सिंगापुर पहुंचिन। उंहा, पहुंचे म भारत के उच्चायुक्त डॉ. शिल्पक अंबुले ह मुख्यमंत्री श्री साय के सुवागत करिन। भारत सरकार के बिदेस मंत्रालय डाहर ले पहिली एस.आई.एन.जी फोरम म सहभागिता बर छत्तीसगढ़ ल नामित करे गेहे। सिंगापुर बिजनेस फेडरेसन डहार ले आयोजित ए अंतर्राष्ट्रीय मंच म छत्तीसगढ़ ल अपन उपलब्धि, बिकास के अपार संभावना अउ निवेस के आकर्षक मउका मन ल वैश्विक निवेसक मन के आगु प्रस्तुत करे के मउका मिलही।
मुख्यमंत्री श्री साय एस.आई.एन.जी फोरम म छत्तीसगढ़ के डहार ले अगुवई करहीं। फोरम के दउरान आयोजित सी.ई.ओ. राउंड टेबल म ओमन सिंगापुर के परमुख निवेसक अउ उद्योग जगत के प्रतिनिधि मन ले गोठबात करही। ए दउरान परदेस म निवेसक मन के संभावना अउ आने-आने क्षेत्र के मउका मन ल परमुखता ले राखे जाही।
मन की बात-12 वर्ष
प्रधानमंत्री नरेंद्र मोदी के मासिक रेडियो कारीकरम ‘मन की बात‘ ल आज 12 बछर पूरा होगे। ए कारीकरम के पहिली प्रसारण आजे के दिन 3 अक्टूबर बछर 2014 के विजयादसमी के दिन होय रिहीस। हालेच म प्रधानमंत्री ह ए कारीकरम के एक सौ अड़तीसवीं कड़ी म देसवासी मन ल संबोधित करिन।
बतादन कि ‘मन की बात‘ कारीकरम के जरिया ले प्रधानमंत्री ह देसवासी मन ले सोज्झे संवाद करथंे। ए कारीकरम ह देस के आने-आने हिस्सा के उपलब्धि अउ सामाजिक बदलाव के कहानी ल आगु लानथे। ‘मन की बात‘ कारीकरम म कतकोन सामाजिक मुद्दा ल लोगन तक पहुंचाय के संगे ओमन ल जनभागीदारी ले जोड़े म घलो अहम भूमिका निभाय हे।
इंटरनेशनल ट्रेड लॉ समिट
रईपुर के हिदायतुल्लाह राष्ट्रीय विधि विश्वविद्यालय इंटरनेशनल ट्रेड लॉ समिट काली ले सुरू हो गेहे। तीन दिन के सम्मेलन के बिसय-‘विश्व व्यापार संगठन-डब्ल्यूटीओ के तहत होने वाले व्यापार से संबंधित अंतर्राष्ट्रीय कानून‘ राखे गेहे।
उद्घाटन सत्र ल संबोधित करत हिदायतुल्लाह राष्ट्रीय विधि विश्वविद्यालय के कुलपति प्रोफेसर डॉ. वी.सी. विवेकानंद ह किहीन कि-व्यापार सिरिफ वस्तु अउ सेवा के आदान-प्रदान तक सीमित नइये, भलुक एहा अंतर्राष्ट्रीय संबंध म सहयोग ल बढ़ावा देके माध्यम घलो आय। ओमन ऑनलाइन कारोबार, कृत्रिम बुध्दि अउ पर्यावरणीय उपाय के संगेसंग वैश्विक मूल्रू वृध्दि जइसन चुनौती के बीच बहुपक्षीय बेपार बेवस्था ले मजबूत करे जरूरत बतइन।
कारीकरम के मुख्य अतिथि-प्रदेस के उद्योग अउ विमानन विभाग के निदेसक प्रभात मलिक ह किहीन कि-अंतर्राष्ट्रीय बेपार नियम के प्रभाव राज्य अउ उद्योग मनके संगेसंग नागरिक मन तक घलो पहुंचथे। ओमन पढ़इया लइका अउ सोधकर्ता मन ले छत्तीसगढ़ ले जुड़े अंतर्राष्ट्रीय बेपार के संभावना उपर अध्ययन करे के आह्वान करिन।
बिसेस अतिथि प्रोफेसर डॉ. जेम्स जे. नेडुमपारा ह किहीन कि-बेपार ल मानवाधिकार, पर्यावरण संरक्षण अउ श्रम परिस्थिति जइसे सामाजिक-आर्थिक मुद्दा ले अलग करके नइ देखे जा सकय।
बतादन कि सम्मेलन के दउरान आने-आने देस मन के संग लागू बेपार बेवस्था के भविष्य उपर घलो गोठबात करे गिस।
खादी-छूट
जम्मो देस म खादी के उत्पाद मन उपर बिसेस छूट के अभियान सुरू करे गेहे। ए छूट गांधी जयंती के मउका म काली ले सुरू होइस, जउन सोलह नवंबर तक रइही। केंद्रीय सूक्ष्म, लघु अउ मध्यम उद्यम मंत्रालय के अनुसार ए दउरान खादी के उत्पाद मन उपर बीस प्रतिसत तक अउ ग्रामोद्योग ले जुुड़े उत्पाद मन उपर दस प्रतिसत तक के छूट दे जाही।
जन सेवा से देस सेवा-कैप्सूल
प्रधानमंत्री नरेंद्र मोदी सार्वजनिक जीवन म पच्चीस बछर पूरा करत हे। उंखर ए यात्रा ‘‘जन सेवा ले देस सेवा‘‘ के मंत्र अउ सरलग समर्पण ले परिभाषित रेहे हे, जउन आज घलो जारी हे।
‘‘जन सेवा ले देस सेवा‘‘ के इही कड़ी म बिसेस श्रृंखला के तहत आज के अंक म हमन आपमन ल बैंंिकंग सेक्टर क्लीनअप के बारे म बताबो।
छत्तीसगढ़ म सहकारी बैंकिंग बेवस्था ल जादा पारदर्सी अउ सुरक्षित बनाय बर कतकोन अहम कदम उठाय जावत हे। सरकार के जोर हे कि बैंकिंग बेवस्था म वित्तीय गड़बड़ी उपर प्रभावी ढंग ले रोक लगय। सरकार के अनुसार अइसन मामला म आर्थिक अपराध अन्वेसन ब्यूरो अउ प्रवर्तन निदेसालय जइसन एजेंसी मनके स्तर म घलो जांच करे जावत हे।
बाइक रैली-स्वागत
सेवा संकल्प अभियान के तहत ‘जन सेवा से राष्ट्र सेवा‘ के पच्चीस वर्ष के संदेस ल लेके निकले वडनगर-वाराणसी सेवा यात्रा के बाइक रैली मनेन्द्रगढ़-चिरमिरी-भरतपुर जिला म पहुंचिस। घुटरीटोला गांव म कृषि मंत्री रामविचार नेताम अउ स्वास्थ्य मंत्री श्याम बिहारी जायसवाल ह रैली के सुवागत करिन। ए मउका म स्वच्छ भारत मिसन ग्रामीण के तहत स्वच्छता के क्षेत्र म बढ़िया कारज करइया लोगन मन ल स्वच्छता कीट अउ प्रशस्ति पत्र देके सम्मानित करे गिस। सेवा संकल्प अभियान के तहत आयोजित कारीकरम सरकारी योजना मनके घलो जानकारी दे गिस।
बालिका शौचालय
राष्ट्रपिता महात्मा गांधी के जयंती के मउका म धमतरी जिला के कुरूद विकासखंड के ग्राम पंचायत धूमा म ‘‘मेरी बेटी मेरा अभिमान‘‘ अभियान के तहत पहिली बालिका सौचालय के उद्घाटन करे गिस। एखर निरमान ‘‘बिकसित भारत- रोजगार अउ आजीविका गारंटी मिसन ग्रामीण‘‘ योजना के तहत करे गिस। गुलाबी रंग ले सजे नवा सौचालय के उद्घाटन के बेरा नान्हे नोनी लइका मन घलो हाथ म तख्ती लेके स्वच्छता, सुरक्षा अउ बेटी मन के सम्मान के संदेस दीन।
सड़क निर्माण-मंजूरी
प्रदेस म सड़क अउ पुल-पुलिया के निरमान बर राज्य शासन ह छै सौ बहत्तर करोड़ रूपिया के चौबीस ठन कारज के निविदा ल मंजूरी दे देहे। एमा नवा सड़क अउ पुलिया निरमान के संगे मौजूदा सड़क के चौड़ीकरण, बिजली बेवस्था अउ सौंदर्यीकरण कारज सामिल हें। लोक निरमान विभाग ह एखर ले जुड़े अधिकारी मन ल चयनित निरमान एजेंसी मन बर कार्य आदेस जारी करके निरमान कारज ल झटकुन सुरू करे के निरदेस देइस हे।
एखर संगे, मुख्यमंत्री विष्णुदेव साय ह निरमान कारज म गुनवत्ता के संगेसंग तय बेरा म पूरा करे के निरदेस देइन हंे।
कांग्रेस नेता-समन
कोल लेवी मामला म ईओडब्ल्यू ह कांग्रेस नेता अउ भिलाई नगर विधायक देवेन्द्र यादव, पूर्व विधायक चंद्रदेव राय, रामगोपाल अग्रवाल, आईएएस जयप्रकाश मौर्य अउ दिपेश टांक के संग नौ झन ले जादा लोगन ल समन जारी करे हे। ए सबो झन ल पांच अक्टूबर के बिसेस अदालत म पेस होय के निरदेस दे गेहे। ईओडल्ब्यू ह इही दिनय मामला म फाइनल चार्जसीट पेस करे के घलो तियारी म हे। ए सबो झन ल एफआईआर म आरोपी बनाय गे रिहीस, फेर जादा झन के गिरफ्तारी नइ होय रिहीस। एजेंसी के अनुसार जांच के बेरा पुख्ता सबूत मिले के बाद अब आरोप पत्र पेस करे जावत हे।
दुर्घटना
कोरिया जिला के सांवारावा गांव म काली रतिहा पिकअप अउ आटो के बीच जोरदार टक्कर होइस। ए हादसा म तीन झन माईलोगन के मउत होगे। उहें, बारह झन घायल हो गिन। हादसा के बाद पिकअप चलइया मउका ले फरार होगे। मिले जानकारी ले आटो म करीबन पंद्रह लोगन सवार रिहीन अउ ए सबो झन बिलारो गांव, दसगात्र कारीकरम म सामिल होके अपन गांव करहीपारा छिंदिया लहुटत रिहीन। इही बेरा बीच रद्दा म पिकअप ह जोरदार टक्कर मार दिस। घटना के बाद घायल मन ल पटना के सामुदायिक स्वास्थ्य केंद्र म भर्ती कराय गेहे।
जिले की चिट्ठी
प्रादेसिक समाचार एकांश, आकाशवाणी रइपुर डहार ले प्रस्तुत कारीकरम ‘जिले की चिट्ठी‘ के प्रसारण काली संझा छै बज के पांच मिनट ले छै बज के दस मिनट तक करे जाही। ए कारीकरम ल छत्तीसगढ़ के जम्मों आकाशवाणी केंद्र एके संघरा रिले करहीं। ए दारी के अंक म ‘‘सक्ती‘‘ जिला के गतिविधि के बारे म जानकारी दे जाही।
अउ अब पेस हे मौसम के हाल…
छत्तीसगढ़ ले अब मानसून के बिदा होय के संकेत मिलत हे। मौसम विभाग के अनुसार ए दारी के मानसून म, जम्मो प्रदेसभर म सौ प्रतिसत ले जादा बरसा होइस हे, जउन पाछू दस बछर के आंकड़ा के अनुसार सामान्य ले जादा हे।
बलरामपुर जिला म सबले जादा एक सौ पैंसठ प्रतिसत बरसा दर्ज करे गिस। उहें, कुल बरसा म नारायणपुर जिला सबले आगू रिहीस। ंिजंहा ए दारी कुल एक सौ बहत्तर सेंटीमीटर दर्ज करे गिस।
उहें, मानसून बिदा के परिस्थिति के बीच मौसम बिज्ञानी मन अवइया चौबीस घंटा के दउरान प्रदेस म फेर मौसम सुष्क रेहे के संभावना जतइन हें।