ग्रामसभा
छत्तीसगढ़ समेत देसभर म आज बिसेस ग्रामसभा के आयोजन करे गीस। ग्रामीण विकास मंत्रालय के अनुसार ए बिसेस ग्रामसभा मन के संग ही जन योजना अभियान-सबकी योजना सबका विकास के घलो सुरूआत होइस। ए ग्रामसभा म गांव मनके भावी विकास के कार्ययोजना तियार करे गीस। बिसेस ग्रामसभा के दउरान रिफॉर्म उत्सव के आयोजन घलो करे गीस। प्रदेस के आने-आने ग्राम पंचायत मन म राखे गे बिसेस ग्राम सभा म गंवई मनके भावी विकास के कार्ययोजना तियार करे गीस। एखर माध्यम ले विकसित भारत-जीरामजी योजना के तहत विकसित ग्राम पंचायत प्लान तियार करे के प्रक्रिया घलो सरू होइस।
महात्मा गांधी-जयंती
कृतज्ञ देस आज राष्ट्रपिता महात्मा गांधी अउ पूर्व प्रधानमंत्री लालबहादुर शास्त्री के जयंती म ओमन ल श्रध्दांजलि अर्पित करत हे। ए मउका म देसभर के म आने-आने कारीकरम के आयोजन करे जात हे। राष्ट्रीय राजधानी दिल्ली म महात्मा गांधी के समाधि राजघाट म सर्वधर्म प्रार्थना सभा के आयोजन करे गीस।
राष्ट्रपति द्रौपदी मुर्मू, उपराष्ट्रपति सी.पी.राधाकृष्णन, प्रधानमंत्री नरेंद्र मोदी, लोकसभा अध्यक्ष ओम बिड़ला समेत कई झिन गणमान्य मनखे मन राजघाट म महात्मा गांधी ल श्रध्दांजलि दीन।
राष्ट्रपति ह किहीन कि दुनिया के कई जघा मन म चलत युध्द अउ संघर्ष के माहौल म गांधी जी के सांति अउ अंहिसा के संदेस पहिली ले कहीं जादा प्रासंगिक हो गेहे। उहें, प्रधानमंत्री ह किहीन हे कि सब युग म बापू के आदर्स मानवता बर पथ प्रदर्सक बने रइही।
एती राजधानी रईपुर म घलो सेवा संकल्प अभियान के तहत नसा मुक्त भारत के संकल्प के संग पद यात्रा निकाले गीस। एमा सामिल होके राज्यपाल रमेन डेका ह नागरिक मन ल नसा मुक्त समाज के निर्माण के संदेस दीन। ए पदयात्रा टाउन हाल ले सुरू होके अंबेडकर चौक पहुंचिस। पदयात्रा म सांसद बृजमोहन अग्रवाल, विधायक पुरंदर मिश्रा अउ सुनील सोनी समेत कई झिन दूसर जनप्रतिनिधि अउ आम नागरिक सामिल होइन। ए मउका म राज्यपाल ह गांधी जी अउ शास्त्री जी की प्रतिमा म फूलमाला अर्पित करके ओमन ल श्रध्दांजलि अर्पित करीन।
उहें, राज्यपाल ह आज स्वच्छ भारत अभियान के तहत लोकभवन परिसर के बाहिर साफ-सफाई करके स्वच्छता के संदेस दीन। अभियान के दउरान लोकभवन के अधिकारी अउ कर्मचारी मन घलो साफ-सफाई करीन।
अइसने, मुख्यमंत्री विष्णुदेव साय ह आज नई दिल्ली स्थित छत्तीसगढ़ सदन म राष्ट्रपित महात्मा गांधी अउ पूर्व प्रधानमंत्री स्वर्गीय लालबहादुर शास्त्री के जयंती के मउका म पुष्प अर्पित करके ओमन ल श्रध्दापूर्वक नमन करीन। मुख्यमंत्री ह गांधी जी अउ शास्त्री जी के सुरता करत किहीन कि ओमन के जीवन अउ आदर्स हमन ल जन कल्याण, सुशासन अउ राष्ट्रसेवा के रद्दा म सरलग आगू बढ़े के प्रेरणा देथे।
महानदी जल विवाद
छत्तीसगढ़ अउ ओडिसा के बीच महानदी जल विवाद के समाधान के संबंध म काली नई दिल्ली म केंद्रीय गृह अउ सहकारिता मंत्री अमित शाह के अध्यक्षता म उच्च स्तरीय बइठका होइस। बइठका म मुख्यमंत्री विष्णुदेव साय अउ ओडिसा के मुख्यमंत्री मोहन चरण माझी ह महानदी ले जुड़े आने-आने बिसय उपर चर्चा करीन। श्री साय ह किहीन हे कि महानदी दूनों राज्य ल जोड़ने वाला जीवन धारा हरय अउ एखर समाधान सहयोग, विस्वास अउ सहमति ले होना चाही। दूनों राज्य के बीच तकनीकी अउ राजनीतिक स्तर म संवाद जारी रखे उपर जोर दे गीस।
गांजा-बरामद
जशपुर पुलिस ह मिर्चा के बोरी के आड़ म गांजा तस्करी के एक मामला के खुलासा करे म सफलता पाय हे। मउका ले करीबन दू करोड़ रूपिया अनुमानित कीमत के गांजा के संग दू झिन आरोपी ल गिरफ्तार करे गेहे। पुलिस के ऑपरेसन आघात के तहत ए कारवाई करे गीस। पुलिस के अनुसार लावाकेरा चेकिंग बैरियर म जांच के दउरान मिरचा के बोरी के नीचे लुकाके राखे गे गांजा बरामद करे गीस।
‘‘सांईश्योर न्यूट्रिशन कार्यक्रम‘‘
लइका मनके पोषण अउ स्वास्थ्य ले बेहतर बनाय के उद्देस्य ले प्रदेस म ‘‘साईंश्योर न्यट्रिशन कारीकरम‘‘ के पायलट प्रोजेक्ट के सुरूआत करे गेहे। श्री सत्य साईं अन्नपूर्णा ट्रस्ट के सहयोग ले संचालित ए प्रोजेक्ट के सुभारंभ शिक्षा मंत्री गजेन्द्र यादव ह रईपुर जिला के तीन शासकीय विद्यालय म करीन। ए कारीकरम के पहिली चरण म लगभग पांच सौ लइका मन ल निसुल्क पोषण सहयोग दे जाही। ए पायलट प्रोजेक्ट ले नवीन प्राथमिक शाला नवागांव, प्राथमिक अउ मीडिल स्कूल परसदा के संघरा शासकीय विद्यालय छेरीखेड़ी के लइका मन लाभांवित होही।
सर्वधर्म प्रार्थना सभा
राष्ट्रपिता महात्मा गांधी अउ पूर्व प्रधानमंत्री लालबहादुर शास्त्री के जयंती के मउका म भारत स्काउट्स अउ गाइड्स छत्तीसगढ़ डहार ले आज रईपुर म राज्य स्तरीय सर्वधर्म प्रार्थना सभा के आयोजन करे गीस। कारीकरम म शिक्षा मंत्री अउ भारत स्काउट्स अउ गाइड्स छत्तीसगढ़ के अध्यक्ष गजेन्द्र यादव मुख्य अतिथि के रूप म सामिल होइन। अध्यक्षता सांसद अउ संस्था के प्रदेस उपाध्यक्ष लक्ष्मी वर्मा ह करीन। ए मउका म शिक्षा मंत्री ह ‘‘प्रयास‘‘ अउ ‘‘तारूण्य वार्ता‘‘ पुस्तक के विमोचन करीन। कारीकरम म आने-आने जिला के स्काउट्स अउ गाइड्स ल सम्मानित घलो करे गीस।
रेलवे-स्वच्छता पखवाड़ा
दक्षिण पूर्व मध्य रेलवे रईपुर रेल मंडल डहार ले स्वच्छता पखवाड़ा के तहत आने-आने थीम उपर स्वच्छता गतिविधि राखे जात हे। इही कड़ी म आज राष्ट्रपिता महात्मा गांधी के जयंती के मउका म ओमन ल श्रध्दांजलि देत स्वच्छत भारत दिवस मनाय गीस। ए मउका म अधिकारी अउ कर्मचारी मन श्रम दान ले रेलवे परिसर म साफ-सफाई करे के संकल्प लीन। कारीकरम म मंडल रेल प्रबंधक दयानंद समेत दूसर वरिष्ठ अधिकारी अउ कर्मचारी मौजूद रिहीन।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ ए बखत ‘ठोस अपशिष्ट प्रबंधन नियम-दू हजार छब्बीस म केंद्रित रइही। एखर प्रसारण काली 03 अक्टूबर के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया 9 बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
विशेष कार्यक्रम
आकाशवाणी केंद्र रईपुर डहार ले ‘‘जन सेवा से देश सेवा‘‘ के तहत बिसेस कारीकरम के श्रृंखला प्रसारित करे जात हे। इही कड़ी म आज संझा सात बजे केंद्र सरकार डहार ले करे गे जीएसटी सुधार उपर पंडित रविशंकर शुक्ल विश्व विद्यालय के अर्थशास्त्र विभाग के अध्यक्ष डॉ. आर. के. ब्रम्हे ले लेगे भेंटवार्ता के प्रसारण करे जाही। ए कारीकरम ल छत्तीसगढ़ स्थित आकाशवाणी के जम्मों केंद्र रिले करही।
ट्रेन-रद्द
नॉन-इंटरलॉकिंग काम के सेति छत्तीसगढ़ ले होके गुजरइया छै ठिन एक्सप्रेस ट्रेन के परिचालन अवइया दिसंबर महिना म प्रभावित रइही। एमा हैदारबाद-रक्सौल अउ तिरूपति-रक्सौल एक्सप्रेस घलो सामिल हे। ए ट्रेन अवइया सात ले सत्रह दिसंबर के बीच रद्द रइही। रेलवे कोति ले यात्री मन ले अपील करे गेहे कि ओमन रवानगी ले पहिली ट्रेन के स्टेटस जांच लेवंय।
उहें, दक्षिण पूर्व रेलवे के चक्रधरपुर मंडल के सीनी-राजखरसावां सेक्सन म ट्रैक नवीनीकरण के चलत चौबीस नवंबर ले अवइया पंद्रह जनवरी तक मेगा ब्लॉक के घोसना करे गेहे।
उपमुख्यमंत्री-खिलाड़ी सम्मान
उपमुख्यमंत्री अरूण साव ह बतइन कि प्रदेस म इक्कीस अक्टूबर ले एक नवंबर तक पुरूष हॉकी लीग के आयोजन करे जाही। लीग के टैगलाइन ‘चलव रे संगी हॉकी खेलबो‘ राखे गेहे। एमा छै टीम हिस्सा लिही, जेखर नामकरण छत्तीसगढ़ के संस्कृति अउ पहिचान के अनुरूप करे गेहे। श्री साव ह अंतर्राष्ट्रीय खेल मनके स्वर्ण पदक विजेता खिलाड़ी मनके सम्मान म बिलासपुर म राखे गे समारोह म ए बात किहीन। ओमन एशियन गेम्स दू हजार छब्बीस म कबड्डी के स्वर्ण पदक विजेता संजू देवी अउ जूनियर हॉकी एशिया कप दू हजार छब्बीस के स्वर्ण पदक विजेता मधु सिदार अउ गीता यादव ल सम्मानित करीन। समारोह म संजू देवी ल इंक्यावन लाख रूपिया के चेक दे गीस।
अउ अब पेस हे मौसम के हाल…
प्रदेस म मानसून के विदाई के संकेत मिले लगे हे। मौसम विभाग के अनुसार अवइया अड़तालीस घंटा के दउरान प्रदेस के कुछेक हिस्सा म दक्षिण-पश्चिम मानसून के लहुटे बर मौसम अनुकूल हो सकत हे। ए बेरा म राज्य म मौसम सूखा रइही अउ कोनो भी जिला म बारिस के संभावना नइ हे। पाछू चौबीस घंटा के दउरान सबले जादा तापमान राजनांदगांव म लगभग चौंतीस डिग्री सेल्सियस दरज करे गीस। उहें, सबले कम न्यूनतम तापमान पेंड्रा रोड म करीबन अट्ठारा डिग्री सेल्सियस रिहीस।