प्रधानमंत्री-यूपीएससी शताब्दी समारोह
प्रधानमंत्री नरेंद्र मोदी ह किहीन हे कि देस ‘रिफॉर्म एक्सप्रेस‘ म तेजी ले आगू बाढ़त हे अउ परीक्षा आयोजित करइया संस्था मन ल घलो अइसन सुधार उपर काम करना चाही, जेखर देस ल जरूरत हे। आज नई दिल्ली के भारत मंडपम म संघ लोक सेवा आयोग-यूपीएससी के सताब्दी समारोह ल संबोधित करत हुए श्री मोदी ह किहीन हे कि परीक्षा ल सिरिफ एक आयोजन नइ मानना चाही, बल्कि ए युवा मन के भविष्य ले जुड़े हे।
प्रधानमंत्री ह किहीन हे कि यूपीएससी के सौ साल के यात्रा म पीढ़ि, सरकर, तकनीक अउ सिलेबस बदले हे, फेर ए संस्था उपर भरोसा पहिली जइसन ही अटूट बने हुए हे।
प्रधानमंत्री-रबी फसल
प्रधानमंत्री नरेंद्र मोदी ह किहीन हे कि सरकार ह देसभर के किसान मन के आय बढ़ाय के संगेसंग उंखर हित के रक्षा बर हर संभव कोसिस करत रइही। सोसल मीडिया पोस्ट म श्री मोदी ह किहीन हे कि सरकार ह बछर दू हजार सत्ताईस-अट्ठाईस मार्केटिंग सीजन बर रबी फसल मनके न्यूनतम समर्थन मूल्य म बढ़ोत्तरी ल मंजूरी दे देहे। ओमन किहीन कि ए फइसला ले ए सुनिश्चित हो गेहे कि देसभर के लाखों किसान मन ल उंखर उपज के उचित मूल्य मिलही।
महानदी जल विवाद-बैठक
केंद्रीय गृह मंत्री अमित शाह के पगरइती म छत्तीसगढ़ अउ ओडिसा के बीच लंबा बेरा ले चलत महानदी जल विवाद ल सुलझाय बर आज नई दिल्ली म एक बिसेस बइठका आयोजित करे जावत हे। ए बइठका म छत्तीसगढ़ के मुख्यमंत्री विष्णुदेव साय अउ ओडिसा के मुख्यमंत्री मोहन चरण माझी सामिल होवत हे।
दिल्ली रवाना होय के पहिली मुख्यमंत्री श्री साय ह रईपुर म पत्रकार मन ले गोठबात करत किहीन हे कि दूनों राज्य के मुख्यमंत्री मन ह केंद्रीय जल आयोग ल लिखित रूप ले आस्वस्त करे हे कि दूनों प्रदेस मनके व्यापक हित ल ध्यान म राखत आयोग कोति ले गे फइसला, निरनय दूनों राज्य सरकार ल मान्य होही।
मुख्यमंत्री ह अवइया सिंगापुर प्रवास के संबंध म किहीन कि सिंगापुर बिजनेस फेडरेसन डहार ले आयोजित सिंग फोरम म छत्तीसगढ़ ल सहभागी बने के मउका मिले हे। ए प्रदेस बर खुसी के बात हे।
रिफॉर्म उत्सव-वीजीपीपी
छत्तीसगढ़ म काली दू अक्टूबर ले ‘रिफॉर्म उत्सव‘ के संग विकसित ग्राम पंचायत योजना तियार करे के प्रक्रिया सुरू होही। जन योजना अभियान के संग एकीकृत रूप ले आयोजित होवइया ए अभियान म ग्रामसभा मन ल गांव के विकास के प्राथमिकता तय करे अउ योजना मन उपर सीधा संवाद के प्रमुख मंच बनाय जाही। ग्रामीण मन ले उंखर जरूरत, बिकास के कमी, उपलब्ध संसाधन अउ जरूरी काम उपर सुझाव लेके इही मन ल ग्राम पंचायत के अवइया विकास योजना म सामिल करे जाही।
‘रिफॉर्म उत्सव‘ के दउरान ग्राम सभा मन म वीबी-जीरामजी योजना के तहत एक सौ पच्चीस दिन रोजगार के गारंटी, पंद्रह दिन म रोजगार, समय म मजदूरी भुगतान, तीन सौ पचहत्तर अनुमेय काम म ले गांव के जरूरत के मुताबिक काम के चयन, आजीविका संवर्धन, ग्रामीण अधोसंरचना अउ आने-आने योजना मनके अभिसरण के संगेच लखपति दीदी योजना, आजीविका गतिविधि जइसन बिसय म गांव वाले मन ले संवाद होही।
जल जीवन मिशन
छत्तीसगढ़ म जल जीवन मिसन के तहत हर घर जल रिपोर्टेड गांव मन म काली दू अक्टूबर, गांधी जयंती म जल अर्पन कारीकरम आयोजित करे जाही। अइसन गांव, जिंहा पेयजल योजना के काम पूरा होगे हे अउ पंद्रह दिन के सफल ट्रायल रन पूरा हो गेहे, उंहा ए योजना ल निर्धारित हैंडओवर प्रोटोकॉल के चलत ग्राम पंचायत अउ समुदाय ल संचालन बर सौंपे जाही।
जल जीवन मिसन के संचालन ह सबो कलेक्टर मन ल जरूरी सत्यापन, प्रमाणीकरण अउ दस्तावेजीकरण बेरा म पूरा करे के निरदेस देहे। योजना मन ले जुड़े संबंधित प्रगति, पूर्णता प्रमाण-पत्र, जल गुणवत्ता जांच अउ रखरखाव जुड़े जानकारी जल जीवन मिसन के पोर्टल म घलो दरज करे जाही।
आत्मानंद विद्यालय-भर्ती विज्ञापन
प्रदेस म स्वामी आत्मानंद उत्कृष्ट अंग्रेजी माध्यम विद्यालय म एक हजार आठ सौ बारह संविदा पद मन म भर्ती बर ऑनलाइन आवेदन के काम आज ले सुरू हो गेहे। अभ्यर्थी इक्कीस अक्टूबर तक आवेदन कर सकहीं। ए पद म भर्ती कम्प्यूटर आधारित चयन परीक्षा-सीबीटी के माध्यम ले करे जाही। भर्ती काम ल लेके स्कूल शिक्षा विभाग ह आवेदन अउ परीक्षा के संभावित तारीख घलो जारी कर देहे।
बस्तर ओलंपिक-पंजीयन
बस्तर ओलंपिक के तीसर संस्करण बर पंजीयन के काम आज ले सुरू हो गेहे, जउन तीस अक्टूबर तक जारी रइही। तीन चरण म होवइया प्रतियोगिता मनके विकासखंड स्तर म आयोजन एक ले तेरह नवंबर के बीच होही। बस्तर ओलंपिक म ग्यारा खेल म प्रतियोगितो आयोजित करे जाही। जूनियर वर्ग म चौदह ले सत्रह बछर के बालक-बालिकाएं अउ सीनियर वर्ग म महिला अउ पुरूष भाग ले सकहीं।
बस्तर ओलंपिक के आयोजन ल लेके मुख्यमंत्री विष्णुदेव साय ह किहीन हे कि बस्तर क्षेत्र म प्रतिभा के कमी नइ हे। जरूरत सिरिफ मउका अउ उचित मंच उपलब्ध कराय के हे।
खादी सम्मेलन
काली दू अक्टूबर के राष्ट्रपिता महात्मा गांधी के जयंती हरय। ए मउका म रईपुर के पंडित दीनदयाल उपाध्याय ऑडिटोरियम म प्रदेस स्तरीय खादी सम्मेलन ग्रामोद्योग विकास प्रदर्सनी के आयोजन करे जाही। कारीकरम के पगरइती ग्रामोद्योग अउ स्कूल शिक्षा मंत्री गजेन्द्र यादव करहीं। ए मउका म राज्य मंत्रिमंडल के सदस्य, सांसद, विधायक अउ खादी ग्रामोद्योग ले जुड़े आने-आने संस्थान मन अउ संगठन के प्रतिनिधि मौजूद रइही।
छत्तीसगढ़ खादी अउ ग्रामोद्योग बोर्ड डहार ले काली ले अवइया बछर इकतीस मार्च तक खादी कपड़ा के खरीदी म पच्चीस प्रतिसत के बिसेस छूट दे जाही। ए मउका म ‘‘सेल्फी विद खादी‘‘ अभियान के घलो सुभारंभ करे जाही। प्रदर्सनी म खादी अउ ग्रामोद्योग ले जुड़े उत्पाद, गतिविधि अउ ग्रामीण उद्यमिता के संभावना मन ल प्रदर्सित करे जाही।
आयुष्मान योजना-अस्पताल
आयुष्मान योजना म बड़ जादा जोखिम श्रेणी वाले छत्तीसगढ़ के सत्रह अस्पताल मनके राज्य स्तरीय जांच करे गीस। राष्ट्रीय स्वास्थ्य प्राधिकरण के चिन्हांकन के आधार म जांच दल ह ए अस्पताल मन के निरीक्षण करके ओखर ले जुड़े दस्तावेज मन ल लीन। एमा रईपुर के सात, बिलासपुर के तीन, दुरूग के दू अउ आने-आने जिला के पांच अस्पताल सामिल हे। दस्तावेज मन के विस्तृत जांच के बाद नियमानुसार कार्रवाई करे जाही। अट्ठाईस अउ उनतीस सितंबर के रईपुर के दू अस्पताल उपर योजना ले अलग करे के कार्रवाई घलो करे गीस।
विशेष कार्यक्रम
आकाशवाणी केन्द्र रायपुर डहार ले जन सेवा ले देस सेवा के तहत विशेष कार्यक्रम मनके श्रृंखला प्रसारित करे जावत हे। इही कड़ी म आज संझा सात बजे जल जीवन मिसन म लेगे ए मिसन के अतिरिक्त संचालक ओंकेश चंद्रवंशी ले लेगे भेंटवार्ता के प्रसारण करे जाही। ए कार्यक्रम ल छत्तीसगढ़ स्थित आकाशवाणी के जम्मों केन्द्र रिले करही।
कॉग्निटिव डेटा एनोटेशन सेंटर
बलरामपुर-रामानुजगंज जिला म प्रदेस के पहिली कॉग्निटिव डेटा एनोटेशन सेंटर स्थापित करे जावत हे। एखर उद्देस्य ग्रामीण युवा अउ स्व-सहायता समूह के माईलोगिन मन ल कृत्रिम बुध्दिमत्ता आधारित रोजगार के मउका उपलब्ध कराना हे। सेंटर के स्थापना बर जिला प्रशासन अउ एआई कंपनी के बीच समझौता होय हे। पायलट चरण म दस सीट मनके सेंटर सुरू होगे हे, जिंहा एआई अउ डेटा लेबलिंग के प्रसिक्षण दे जाही।
स्वच्छता अभियान
स्वच्छता ही सेवा अभियान के तहत राष्ट्रीय प्रौद्योगिकी संस्थान-एनआईटी रईपुर डहार ले राजिम म ‘स्वच्छता अभियान‘ चलाय गीस। ए दउरान विद्यार्थी मन ह श्रमदान कर तीर-तखार के क्षेत्र मन के सफाई करीन। ओमन लोगन मन ल कचरा ल अलग करके निर्धारित जघा म निस्तारण करे बर, एकल-उपयोग प्लास्टिक के उपयोग बंद करे अउ खुला म कचरा नइ फेंके के संदेस दीन। ए मउका म विद्यार्थी मन डहार ले स्वच्छता रैली घलो निकाले गीस। उहें, संस्थान के साहित्यिक समिति ‘लिटराटी‘ डहार ले ‘‘स्वच्छता से समृध्दि‘‘ बिसय उपर केंद्रित निबंध लेखन प्रतियोगिता घलो आयोजित करे गीस।