केन्द्रीय मंत्रिमंडल-एमएसपी/पीएम धारा
केन्द्रीय मंत्रिमंडल के आर्थिक कार्य समिति ह आज विपणन सत्र दू हजार सत्ताईस-अट्ठाईस बर जम्मों अनिवार्य रबी फसल के न्यूनतम समर्थन मूल्य-एमएसपी म बढ़ोतरी ल मंजूरी देहे। मंत्रिमंडल के बइठका के बाद सूचना अउ प्रसारण मंत्री अश्विनी वैष्णव ह कहिन कि ए निर्णय किसान मन ल ओखर उपज के लाभकारी मूल्य सुनिश्चित करे बर ले गेहे।
श्री वैष्णव ह बतईन कि मंत्रिमंडल के पीएम धारा योजना ल घलो मंजूरी देहे। एखर ले अंतराराज्यीय पारेषण प्रणाली मजबूत होही अउ राज्य मनके संघरा केन्द्रसासित प्रदेस म एक सौ पैंतीस गीगावाट तक नवीकरणीय ऊर्जा के पारेषण संभव हो सकही।
मंत्रिमंडल-निर्णय
मुख्यमंत्री विष्णुदेव साय के अध्यक्षता म आज मंत्रालय म होय राज्य मंत्रिपरिषद के बइठका म कई ठिन महत्वपूर्ण निर्णय ले गीस। मंत्रिपरिषद ह प्रदेस के सासकीय महाविद्यालय मन म लागू अतिथि व्याख्याता नीति म प्रशासकीय अनुमोदन के बाद जारी संशोधित नीति के अनुमोदन करे हे। बइठका के बाद पत्रकार मन ले चर्चा करत उपमुख्यमंत्री अरूण साव ह बतईन कि संशोधित नीति म स्पष्ट करे गेहे कि मेरिट सूची म एके श्रेणी के दू अभ्यर्थी मनके अंक सामान होय के स्थिति म छत्तीसगढ़ के मूल निवासी अभ्यर्थी ल वरीयता दे जाही। संघरा अनुभव बर निर्धारित अधिकतम तीस अंक के अंतर्गत अब सासकीय महाविद्यालय के संगेसंग राजकीय विश्वविद्यालय म एक सैक्षणिक सत्र म न्यूनतम पांच महीना अध्यापन कार्य पूरा करे म पांच अंक दे जाय के प्रावधान करे गेहे।
एक ठिन दूसर फइसला म मंत्रिपरिषद ह पूर्व अग्निवीर सैनिक मन ल राज्य के सिविल सेवा के तृतीय श्रेणी पद मन म दस प्रतिशत आरक्षण देके प्रावधान के तहत छत्तीसगढ़ लोक सेवा पूर्व अग्निवीर सैनिक भर्ती नियम के अनुमोदन करे हे। एखर तहत पुलिस विभाग म आरक्षक, वन अउ जलवायु परिवर्तन विभाग म वनरक्षक अउ जेल विभाग म जेल प्रहरी के पद म पूर्व अग्निवीर मन ल आरक्षण के फायदा मिलही।
मंत्रिपरिषद ह मुख्यमंत्री डहार ले फिल्म ‘‘हनुमान अंश‘‘ ल टैक्स फ्री करे जाय के घोषणा के परिपालन म जीएसटी के समतुल्य राशि के प्रतिपूर्ति सिनेमाघर मन ल दे जाय के आदेश के अनुसमर्थन करे हे।
नगर पालिका/त्रिस्तरीय पंचायत चुनाव
छत्तीसगढ़ राज्य निर्वाचन आयोग ह नगर पालिका अउ त्रिस्तरीय पंचायत के अवइया दिसंबर महीना म होवइया आम अउ उपचुनाव बर निर्वाचन नामावली तियार करे के संबंध म पुनरीक्षण कार्यक्रम जारी कर देहे। राज्य निर्वाचन आयुक्त अजय सिंह ह बतईन कि नगर पालिका आम चुनाव बर कुल चार सौ सत्रह पद बर चुनई होही। एमा भिलाई, भिलाई-चरौदा, रिसाली अउ बीरगांव नगर पालिक निगम के महापौर पद सामिल हे। एखर अलावा तेरह ठिन नगरीय निकाय के अध्यक्ष अउ चार सौ पद बर घलो आम चुनई होही।
ए चुनाव मन बर वोटर लिस्ट एक अक्टूबर दू हजार छब्बीस के संदर्भ तिथि के आधार म तियार करे जात हे। निर्वाचन नामावली के प्रारंभिक प्रकाशन तेईस अक्टूबर के करे जाही। एखर बाद दावा आपत्ति मंगाय जाही। दावा आपत्ति के निराकरण के बाद अवइया तीस नवंबर के निर्वाचक नामवली के आखिरी प्रकाशन करे जाही।
सेवा संकल्प यात्रा/युवा संवाद
रायपुर म काली सेवा संकल्प यात्रा अउ युवा संवाद कार्यक्रम राखे गीस। ए मउका म मुख्यमंत्री विष्णुदेव साय ह गुजरात के वडनगर अउ बस्तर संभाग ले पहुंचे बाईस रायडर्स केे स्वागत करीन। ओमन किहीन कि सेवा संकल्प यात्रा युवा मन ल सेवा, सामाजिक सरोकार अउ राष्ट्र निर्माण ले जोड़े के माध्यम हरय। यात्रा के दउरान स्वच्छता, नशामुक्ति, टीबी मुक्त भारत अउ पर्यावरण संरक्षण बर जागरूकता के संदेस दे जात हे। मुख्यमंत्री ह किहीन कि बस्तर म सांति अउ विकास के वातावरण मजबूत होय हे। अब उहां के लइका डॉक्टर, इंजीनियर, सेना अउ सिविल सेवा म जाय के सपना देखत हे।
रिफॉर्म उत्सव-वीजीपीपी
छत्तीसगढ़ म दू अक्टूबर ले रिफॉर्म उत्सव के संग विकसित ग्राम पंचायत योजना तियार करे के प्रक्रिया सुरू होही। जन योजना के अभियान के संघरा एकीकृत रूप ले आयोजित होवइया ए अभियान म ग्राम सभा ल गांव के विकास के प्राथमिकता तय करे अउ योजना उपर सीधा संवाद के प्रमुख मंच बनाय जाही। ग्रामीण मन ले ओमन के जरूरत, विकास के कमी, उपलब्ध संसाधन अउ जरूरी काम मन बर सुझाव लेके एला ग्राम पंचायत के अवइया विकास योजना म सामिल करे जाही।
सुप्रीम कोर्ट-कैंसर दवा
सर्वोच्च न्यायालय ह निजी अस्पताल मन कोति ले कैंसर के दवा उपर लगाय जात अत्यधिक मुनाफा उपर चिंता जतात एला अन्याय बतईन अउ जम्मों दवा मन उपर एक समान सोलह प्रतिशत मार्जिन लागू करे के वकालत करीन। न्यायाधीश विक्रम नाथ अउ संदीप मेहता के पीठ ह कहिन कि ए प्रथा मरीज अउ करदाता मन उपर बोझा डाल सकत हे, बिसेसकर जब इलाज सरकारी योजना के अंतर्गत सामिल करे जाथे।
मुख्यमंत्री-पारस पोर्टल
मुख्यमंत्री विष्णुदेव साय ह पारस पोर्टल के माध्यम ले प्रमुख योजना अउ विकास कार्य के राज्य स्तरीय समीक्षा करीन। ओमन एग्रीस्टैक म जम्मों पात्र किसान मनके शत-प्रतिशत पंजीयन सुनिश्चित करे के निरदेस दीन। श्री साय ह पीएम सूर्य घर मुफ्त बिजली योजना म तेजी लाके जादा ले जादा परिवार ल जोड़े बर किहीन। बाढ़ प्रभावित क्षेत्र म नुकसान के तुरते सर्वे करके पात्र परिवार तक राहत पहुंचाय के निरदेस घलो दीन।
विजय शर्मा-राजनीतिक प्रकरण
उपमुख्यमंत्री विजय शर्मा के अध्यक्षता म आज मंत्रालय म राजनीतिक आंदोलन ले जुड़े प्रकरण के वापिसी के संबंध म प्रकरण वापसी समिति के बइठका होइस। बइठका म प्रदेस के आने-आने जिला म दरज राजनीतिक आंदोलन ले जुड़े सोलह प्रकरण मनके लहुटाय के संबंध म चर्चा करे गीस। ए दउरान नौ ठिन प्रकरण के अनुंससा करे गीस। उहें, दू ठिन प्रकरण ल पुनर्विचार बर जिला मन म भेजे गीस। एखर अलावा शेष मामला मन ल राजनीतिक आंदोलन ले नइ जुड़े होय के सेती ओमन ल अस्वीकृत कर दे गीस।
मुख्यमंत्री-परिवहन विभाग
मुख्यमंत्री विष्णुदेव साय ह प्रदेस म सड़क दुर्घटना अउ जनहानि ल न्यूनतम करे बर संबंधित विभाग मन ल मिशन मोड म काम करे के निरदेस दीन हे। मंत्रालय म परिवहन विभाग के उच्च स्तरीय समीक्षा बइठका म श्री साय ह ‘जीरो फेटेलिटी‘ के लक्ष्य बर परिवहन, पुलिस, स्वास्थ्य, लोक निर्माण अउ नगरीय निकाय के समन्वय ले कार्ययोजना तियार करे बर किहीन।
टीबी उन्मूलन
टीबी के खिलाफ छत्तीसगढ़ ल एक बड़का कामयाबी मिले हे। प्रदेस के मनेन्द्रगढ़-चिरमरी-भरतपुर जिला के खड़गवां, सरगुजा जिला के बतौली, कोरिया जिला के सोनहत अउ रायगढ़ जिला के घरघोड़ा विकासखंड ल भारत सरकार कोति ले टीबी मुक्त घोषित करे गेहे। ए जम्मों विकासखंड भारत सरकार डहार ले तय करे गे मानक उपर खरा उतरे हे। ए मानक म जांच के संघरा मरीज मनके पहिचान, उपचार अउ पोषक तत्व देवाना जरूरी होथे।
विशेष कार्यक्रम
आकाशवाणी केन्द्र रायपुर डहार ले सेवा संकल्प अभियान के तहत विशेष कार्यक्रम के श्रृंखला प्रसारित करे जात हे। इही कड़ी म आज संझा सात बजे राष्ट्रीय शिक्षा नीति म दुरूग स्थित हेमचंद यादव विश्वविद्यालय के कुलपति प्रोफेसर संजय तिवारी ले लेगे भेंटवार्ता के प्रसारण करे जाही। ए कार्यक्रम ल छत्तीसगढ़ स्थित आकाशवाणी के जम्मों केन्द्र रिले करही।
चिकित्सक नियुक्ति
छत्तीसगढ़ म स्वास्थ्य विभाग ह पैंतालीस डॉक्टर मनके नियुक्ति करे हे। ए डॉक्टर मनके पदस्थापना सामुदायिक स्वास्थ्य केन्द्र, सिविल अस्पताल अउ जिला अस्पताल स्तर के फर्स्ट रेफरल यूनिट म करे गेहे। राष्ट्रीय स्वास्थ्य मिशन के तहत होय ए नियुक्ति ले स्थानीय स्तर म मरीज मन ल अच्छा अउ समय म उपचार मिल सकही।
हॉकी लीग-चयन ट्रायल
छत्तीसगढ़ हॉकी लीग के पहिली सत्र बर आयोजित चयन ट्रायल म एक सौ तीस खिलाड़ी मन ल शॉटलिस्ट करे गेहे। रईपुर के सरदार वल्लभ भाई पटेल अंतर्राष्ट्रीय हॉकी स्टेडियम म होय दू दिन के ट्रायल म दू सौ तेईस खिलाड़ी मन हिस्सा लीन। अब आठ अक्टूबर के रायपुर म प्लेयर ड्राफ्ट होही। एमा छह फ्रेंचाइजी टीम शॉट लिस्ट खिलाड़ी म ले अपन दल के चयन करही। उपमुख्यमंत्री अरूण साव ह ट्रायल स्थल म पहुंच के खिलाड़ी मनके उछाह बढ़ईन।