शिवराज चौहान-कृषि सम्मेलन
केन्द्रीय कृषि मंत्री शिवराज सिंह चौहान ह किहीन हे कि सरकार डहार ले किसान मनके फसल के उचित कीमत देवाय म काम करे जात हे। एमा फसल कांटे के बाद प्रबंधन, भंडारण अउ बेचे के बढ़िया व्यवस्था सामिल हे। श्री चौहान ह आज नई दिल्ली म राष्ट्रीय कृषि सम्मेलन के दूसरइया दिन किहीन कि राहेर, उड़द, अउ मसूर के न्यूनतम समर्थन कीमत-एमएसपी म खरीदे के रूपरेखा तियार करे जाही। ओमन किहीन कि किसान मन ल अड़तालीस घंटा के भीतर भुगतान करे के व्यवस्था करे जाही।
श्री चौहान ह किहीन कि भारत ह अंतर्राष्ट्रीय मुक्त व्यापार समझौता ले उभरत नवा बाजार के फायदा उठाही, जेखर ले देस के कृषि फसल, फल, साग-सब्जी अउ खाय-पीये के जिनीस मन ल बाजार मन ले जोड़े जाही।
रामविचार नेताम/शिवराज चौहान-मुलाकात
राज्य के कृषि मंत्री रामविचार नेताम ह नई दिल्ली म केन्द्रीय कृषि मंत्री शिवराज सिंह चौहान ले मुलाकात करीन। ए दउरान श्री चौहान ह नेताम ल छत्तीसगढ़ म राष्ट्रीय कृषि विकास योजना अउ कृषि उन्नति योजना के तहत करीबन एक सौ बयासी करोड़ रूपिया के दूसरइया मद के रासि ल जारी करे के जानकारी दीन। ए रासि ले राज्य म कृषि ले जुड़े कई ठिन विकास काम ल आगू बढ़ाय जाही।
मुख्यमंत्री-यूथ कॉन्क्लेव
रायपुर के इंदिरा गांधी कृषि विश्वविद्यालय म काली ले ‘‘यूथ इनोवेशन अउ एंटर प्रन्योर शिप कॉन्क्लेव‘‘ के आयोजन करे जावत हे। तीन दिन के ए कार्यक्रम के दूसरइया दिन आज मुख्यमंत्री विष्णुदेव साय ह राज्यभर ले आय विद्यार्थी, युवा अउ उद्यमिता मन ले गोठबात करीन। ओमन किहीन कि युवा मन सिरिफ रोजगार खोजइया नो हे, भलूक अपन कौसल, नवाचार अउ उद्यमिता के जोर म रोजगार के नवा अवसर पैदा करयं। ओमन किहीन कि युवा शक्ति, नवाचार अउ स्टार्टअप के भागीदारी ले विकसित छत्तीसगढ़ के संकलप ल साकार करे बर पड़ही।
मुख्यमंत्री ह बतईन कि राज्य सरकार ह युवा मन ल उद्यमिता के क्षेत्र म आगू बाढ़े बर ‘‘मुख्यमंत्री स्टार्टअप अउ निपुण योजना म काम करत हे। एखर बर पांच सौ करोड़ रूपिया के प्रावधान राखे गेहे।
ए मउका म मुख्यमंत्री ह इंदिरा गांधी कृषि विश्वविद्यालय परिसर म नवा बनाय गे सुभाष चंद्र बोस बायोटेक्नोलॉजी इन्क्यू-बेशन सेंटर के अवलोकन करीन। ओमन किहीन कि ए सेंटर के खुले ले प्रदेस अउ देस ल फायदा मिलही।
प्रगति-50 योजना
भारत सरकार के आवासन अउ सहरी कार्य मंत्रालय ह छत्तीसगढ़ के रायपुर अउ बिलासपुर ल ‘‘प्रगति-फिफ्टी‘‘ योजना म सामिल करे हे। केन्द्रीय आवासन अउ सहरी कार्य मंत्री मनोहर लाल खट्टर ह आज वीडियो कॉन्फ्रेंसिंग के माध्यम ले ए योजना के सुरूआत करीन। ए कार्यक्रम म उपमुख्यमंत्री अरूण साव ह राजनांदगांव ले ऑनलाइन जुड़ीन। मुख्यमंत्री श्री साय अउ उपमुख्यमंत्री अरूण साव ह ‘प्रगति-फिफ्टी‘‘ योजना म सामिल होय के सेती रईपुर अउ बिलासपुर नगर निगम के स्वच्छता मित्र के संगेसंग सहरवारी मन ल बधाई दीन हे।
राष्ट्रपति-बस्तर प्रवास
राष्ट्रपति द्रौपदी मुर्मु ह छत्तीसगढ़ के जनजातीय लोक संस्कृति, परंपरा अउ प्रसिद्ध बस्तर दशहरा के मुरिया दरबार म सामिल होही। खबर के मुताबिक राष्ट्रपति ह मुख्यमंत्री विष्णुदेव साय के नेवता म तेईस अक्टूबर के जगदलपुर म होवइया बस्तर दशहरा के मुरिया दरबार म सामिल होय बर उंखर नेवता ल स्वीकार कर लेहे। राष्ट्रपति ल मुख्यमंत्री के नेवता चिट्ठी ल केन्द्रीय राज्यमंत्री तोखन साहू, संस्कृति अउ पर्यटन मंत्री राजेश अग्रवाल के संगेसंग बस्तर सांसद महेश कश्यप ह सौंपीन।
सुप्रीम कोर्ट-निर्देश
सर्वोच्च न्यायालय ह केन्द्र सरकार अउ केन्द्रीय माध्यमिक सिक्षा बोर्ड-सीबीएसई ल कक्षा छठवीं के एसो विद्यार्थी मन ल कक्षा सातवीं के विद्यार्थी मन जइसन तीन ठन भासा नीति ले छूट दे म विचार करे के निरदेस दीन हे। मुख्य न्यायाधीश न्यायमूर्ति सूर्यकांत, न्यायमूर्ति जॉयमाल्य बागची अउ वी. मोहना के पीठ ह केन्द्र सरकार अउ सीबीएसई डहार ले उपस्थित सॉलिसिटर जनरल तुषार मेहता अउ अतिरिक्त सॉलिसिटर जनरल ऐश्वर्या भाटी ले किहीन कि ओमन कक्षा छठवीं के विद्यार्थी मन ल घलो उही छूट देवय, जउन कक्षा सातवीं, आठवीं अउ नौवीं के विद्यार्थी मन ल छूट दे गेहे।
मुख्यमंत्री-राहत शिविर
मुख्यमंत्री विष्णुदेव साय ह बतईन कि राज्य म कुछ दिन पहिली होय बरसा ले पांच सौ इकहत्तर ठन गांव मनके बाईस हजार ले जादा लोगन मन ल प्रभावित होय हे। प्रभावित होय परिवार मन ल एक सौ तिहत्तर ठन राहत सिविर के माध्यम ले राहत दे जात हे। अब तक सोलह हजार मनखे मन ल सुरक्षित निकाले गेहे। मुख्यमंत्री ह अधिकारी मन ल बाढ़ ले होय नकसान के आंकलन करके आरबीसी छह-चार के तहत प्रभावित मन ल जल्दी ले जल्दी मुआवजा रासि देके निरदेस देहे। श्री साय ह काली सुकमा अउ जगदलपुर के बाढ़ प्रभावित क्षेत्र मनके दउरा करीन। ओमन राहत सिविर मन म भोजन, पानी अउ स्वास्थ्य सुविधा के जानकारी लीन। उहें, मुख्यमंत्री ह प्रभावित होय परिवार मन ल मुख्यमंत्री राहत कोष ले दस-दस हजार रूपिया के सहायता रासि देके घोसना घलो करीन।
उहें, ओडिशा के नबरंगपुर म इंद्रावती नदी के उपरी हिस्सा म जलस्तर के बाढ़े ले बांध के गेट खोले के बाद जगदलपुर म इंद्रावती नदी के जलस्तर म बढ़ोतरी देखे गेहे। उहें, बाढ़ के पानी ह खतरा के निसान ले करीबन साढ़े नौ फीट उपर चलत हे। बस्तर कलेक्टर आकाश छिकारा ह नदिया तीर के गांव अउ बस्ती म रहइया लोगन मन ल राहत सिविर म जाय के अपील करीन हे।
स्क्रैप चोरी-सीबीआई
भिलाई स्टील प्लांट ले करीबन ढाई सौ टन लोहा चोरी करे के मामला के जांच ल सीबीआई डहार ले करे जाही। ए संबंध म राज्य सरकार ह अधिसूचना जारी कर देहे। ए मामला म पुलिस ह अब तक इक्कीस झिन आरोपी मन ल गिरफ्तार करे हे।
खबर के मुताबिक भिलाई स्टील प्लांट ले लोहा चोरी के मामला ह आगू आय के बाद पुलिस के टीम ह अकलोरडीह खदान पारा के एक ठन निजी कंपनी के परिसर ले करीबन ढाई सौ टन लोहा स्क्रैप बरामद करे रिहीन। जांच म आसंका जताय गे रिहीस कि भिलाई स्टील प्लांट ले स्क्रैप निकाले बर डस्ट लेगइया गाड़ी के इस्तेमाल करे जावत रिहीस।
विशेष कार्यक्रम
आकाशवाणी केन्द्र रायपुर डहार ले सेवा संकल्प अभियान के तहत विशेष कार्यक्रम प्रसारित करे जात हे। इही कड़ी म आज संझा सात बजे ले सात बजके पन्द्रह मिनट तक अटल इनोवेशन मिशन उपर भिलाई के सरकारी कन्या उच्चतर माध्यमिक विद्यालय के प्राचार्य संगीता सिंह बघेल अउ अटल टिंकरिंग लैब के प्रभारी रीतू हांडा ले गे भेंटवार्ता के प्रसारण करे जाही। ए कार्यक्रम ल छत्तीसगढ़ के जम्मों आकाशवाणी केन्द्र ह एके संघरा रिले करही।
संजू देवी-प्रोत्साहन राशि
मुख्यमंत्री विष्णुदेव साय ह एशियन गेम्स के स्वर्ण पदक विजेता भारतीय महिला कबड्डी टीम के सदस्य अउ छत्तीसगढ़ के संजू देवी ल इंक्यावन लाख रूपिया के प्रोत्साहन रासि देके घोसना करीन। संजू देवी ह मुख्यमंत्री निवास म श्री साय ले भेंट करीन। जापान म होय एशियन गेम्स के फाइनल मैच म भारत ह ईरान ल हराके स्वर्ण पदक जीते रिहीन। संजू देवी ह कोरबा जिला के रहइया हरय
जूनियर डॉक्टर-स्वास्थ्य मंत्री
छत्तीसगढ़ जूनियर डॉक्टर्स एसोसिएशन के प्रतिनिधिमंडल ह काली स्वास्थ्य मंत्री श्याम बिहारी जायसवाल ले भेंट करीन अउ अपन मांग उपर चर्चा करीन। प्रतिनिधिमंडल डहार ले डॉक्टर मनके मानदेय, अनुबंध राशि, अनुबंधित सेवा अवधि अउ उच्च अध्ययन बर अनापत्ति पत्र के कामकाज ले जुड़े बिसय उपर गोठबात करे गीस। स्वास्थ्य मंत्री ह किहीन हे कि जम्मों मांग उपर सासन स्तर म विचार करे जाही अउ उचित मांग उपर नियम अनुसार फइसला ले जाही।
अउ अब थोरकुन समाचार सार म –
– मुख्यमंत्री विष्णुदेव साय के अगुवई म काली बिहनिया साढ़े ग्यारह बजे ले मंत्रालय म राज्य मंत्रिपरिषद के बइठका राखे जाही।
– जशपुर जिला म आज बिजली पोल शिफ्टिंग के दउरान करंट के चपेट म आय ले दू झिन मजदूर के मउत होगे। उहें, पांच झिन आने मजदूर मन झुलस गेहे।
– आयकर विभाग ह आयकर रिटर्न दाखिल करे आखिरी तारीख इकतीस अक्टूबर ले बढ़ाके इक्कीस नवंबर तक कर देहे।
– राज्य सरकार ह राज्य प्रशासनिक सेवा के एक सौ पच्चीस अधिकारी मनके ट्रांसफर करे हे।
अउ
– गौरेला-पेण्ड्रा-मरवाही जिला म पाछु दिन होय भारी बरसा के सेती छब्बीस सितंबर के स्थगित करे गे तिमाही परीक्षा ल अब एक अक्टूबर के करे जाही।