आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री-कृषि कानून
प्रधानमंत्री नरेन्द्र मोदी ह किहीन कि कृषि संबंधित कानून, खेती अउ किसनहा मन बर नवा अवसर लावत हे। एखर ले किसान मनके भूमिका अन्नदाता ले उद्यमी के हो जही। प्रधानमंत्री ह जन नेता पद्म भूषण डाॅक्टर बालासाहेब विखे पाटिल के आत्मकथा के वीडियो कान्फ्रेंसिग करके उद्घाटन करीन। ए बेरा म  प्रधनमंत्री ह किहीन कि स्थानीय अर्थव्यस्था के माॅडल अउ स्थानीय उद्यमी मनके माध्यम ले देस ल आगू बढ़ाय जाही।
केन्द्र कृषि कानून-छत्तीसगढ़ बैठक
केन्द्र सरकार डहार ले पारित करे गे कृषि संसोधन विधेयक ले छत्तीसगढ़ म किसान, मजूर अउ गरीब वर्ग उपर पड़े वाले प्रभाव म गोठबात बर राज्य मंत्रिमंडलीय हाईपावर कमेटी के काली रईपुर म एक ठिन बइठका होईस।
कृषि मंत्री रविन्द्र चैबे के अध्यक्षता म आयोजित करे गे ए बइठका म आने-आने बिसय उपर गोठबात करे गीस कि कृषि संसोधन विधेयक ले किसान मनके हित के रक्षा बर राज्य म नवा कानून बनाय जाय के स्थिति म कोन प्रकार के प्रावधान के जरूरत होही। ए बइठका म श्री चैबे ह किहीन कि ए संसोधित कृषि कानून ले अगर प्रदेस के धान खरीदी के बेवस्था प्रभावित होथे, त नवा कानून बनाके किसान मनके धान खरीदे के बेवस्था करे जाही। संगेसंग ए बात उपर घलो जोर दे गीस कि किसनहा मन ल उंखर मनके फसल के बिक्री म कोनो प्रकार के परेसानी झन होवय।
सरोज पांडेय-कृषि विधेयक
दूसर कोति, राज्यसभा सांसद सरोज पांडेय ह किहीन कि केन्द्र सरकार ह कृषि सुधार विधेयक ल पारित करके देसभर के किसान मन ल समृद्ध अउ सशक्त बनाय बर अच्छा पहल करे हे। सुश्री पांडेय ह दुरूग जिला के भोथली अउ अछौटी गांव के किसनहा मन ले गोठबात करीन। ए बेरा म ओमन किसान हित म पारित ए संसोधित कानून ल लेके कांग्रेस अउ आने विपक्षी दल डहार ले दुष्प्रचार अउ किसान मन ल भ्रमित करे आरोप लगाईन हे। संगेसंग किसनहा मनके फसल न्यूनतम समर्थन मूल्य म खरीदे के प्रक्रिया पहिली जइसन जारी राखे के जानकारी घलो दीन।
उच्चतम न्यायालय-नीट परीक्षा
उच्चतम न्यायालय ह चिकित्सा शिक्षा पाठ्यक्रम बर होय वाले राष्ट्रीय पात्रता अउ प्रवेस परीक्षा-नीट के परिणाम ए महीना के सोलह तारीख के जारी करे के आदेस दीन हे। न्यायालय ह कोरोना महामारी नियंत्रण वाले क्षेत्र म रहइया जम्मों छात्र मन बर काली नीट परीक्षा कराय के आदेस दीन हे, जउन मन एखर पहिली होय वाले परीक्षा म सामिल नइ हो पाय रिहीन।
मरवाही-उपचुनाव
छत्तीसगढ़ प्रदेश कांग्रेस कमेटी ह मरवाही विधानसभा उपचुनई बर क्षेत्र प्रभारी, प्रभारी मंत्री अउ सेक्टर प्रभारी के सूची ल जारी कर दीन हे। कांग्रेस प्रवक्ता विकास तिवारी ह बतईन कि मरवाही विधानसभा ल चार ठिन वर्ग म बांटे गेहे। एमा मरवाही के उत्तर क्षेत्र के प्रभारी उत्तम वासुदेव अउ प्रभारी मंत्री गुरू रूद्र कुमार ल बनाय गेहे। उहें, दक्षिण क्षेत्र के प्रभारी के रूप म विधायक शैलेष पांडेय अउ प्रभारी मंत्री डाॅक्टर प्रेमसाय सिंह टेकाम ल बनाय गेहे। गौरेला क्षेत्र के प्रभार अर्जुन तिवारी अउ प्रभारी मंत्री मोहम्मद अकबर ल सौंपे गेहे। अइसने, पेण्ड्रा क्षेत्र के प्रभारी मोहित केरकेट्टा अउ प्रभारी मंत्री कवासी लखमा ल बनाय गेहे। ए चार ठिन सेक्टर के तहत अवइया बूथ म प्रभारी मनके नियुक्ति घलो कर दे गेहे।
बतादन कि कांग्रेस ह डाॅक्टर के.क.े ध्रुव ल अपन उम्मीदवार बनाय हे। त उहें, भाजपा ह डाॅक्टर गंभीर सिंह ल अउ जनता कांग्रेस छत्तीसगढ़-जे ह अमित जोगी ल अपन उम्मीदवार घोषित करे हे। ए उपचुनई बर तीन नवंबर के वोट डारे जाही।
मुख्यमंत्री-पोल्ट्री इंडस्ट्री
मुख्यमंत्री भूपेश बघेल ह ए भरोसा दिलाईन हे कि राज्य म पोल्ट्री व्यवसाय ल बढ़ावा दे खातिर हरसंभव मदद दे जाही। रायपुर के अपन निवास कार्यालय म छत्तीसगढ़ पोल्ट्री फार्म एसोसिएसन प्रतिनिधिमंडल ले गोठबात करत हुए मुख्यमंत्री ह किहीन कि प्रदेस म मुर्गीपालन अउ मछलीपालन के व्यवसाय म अच्छा संभावना हे, जेला देखत हुए जवान लइका मन ल ए सिखाय बर प्रसिक्षण दे जाही।
जीएसटी-बैठक
केन्द्रीय वित्त मंत्री निर्मला सीतारमण ह किहीन कि केन्द्र ह ओ सबो राज्य ल ऋण ले म मदद करही, जउन जीएसटी, राजस्व नुकसान के भरपाई बर प्रस्तावित उधारी विकल्प अपनाना चाहत हे। कोविड महामारी के सेती राज्य के जीएसटी क्षतिपूर्ति के उपाय उपर जादातर राज्य अउ केन्द्रसासित प्रदेस के वित्त मंत्री मन सहमत हवय।
नई दिल्ली म काली जीएसटी परिषद के तिरालीसवां बइठका के बाद वित्त मंत्री ह बतईन कि इक्कीस ठिन राज्य अउ केन्द्रसासित प्रदेस ह उधार ले के विकल्प म सहमति दीन हे। फेर, एखर उपर अभी सबो झन के सहमति बनाय जाना हे। ओमन यहू बतईन कि परिषद ह ओ सबो राज्य मन ले गोठबात करके विवाद ल खतम करे के प्रयास करही, जउन चाहत हे कि केन्द्र ह उधार लेके उंखर मनके नुकसान के भरपाई करय।
उहें, ए बइठका म छत्तीसगढ़ के प्रतिनिधित्व वाणिज्य कर मंत्री टी.एस. सिंहदेव ह करीन। वीडियो कान्फ्रेंसिंग के माध्यम ले बइठका म सामिल होके श्री सिंहदेव ह केन्द्रीय वित्त मंत्री ले आग्रह करीन कि कोरोना महामारी के सेती आय आर्थिक परिस्थिति ल ध्यान म राखत केन्द्र सरकार खुद करजा लेके राज्य मन ल उंखर मनके हिस्सा के जीएसटी क्षतिपूर्ति के रासि जारी करय। ओमन यहू किहीन कि एखर बर राज्य ल बाध्य नइ करे जाना चाही।
विद्युत गृह
छत्तीसगढ़ स्टेट पावर जनरेशन कंपनी के ताप विद्युत गृह म सबले जादा बिजली उत्पादन के कीर्तिमान ल रचत हुए एक घांव फेर देसभर म पहिली स्थान पाय हे। ए जानकारी भारत सरकार के अधीन कार्यरत् केन्द्रीय विद्युत प्राधिकरण सी.ई.ए. के सितंबर महीना म जारी करे गे एक ठिन प्रतिवेदन उपर आधारित हे। एखर अनुसार सितंबर महीना म कंपनी के विद्युत गृह ह सत्तर दशमलव पांच-एक प्रतिसत प्लांट लोड फैक्टर पी.एल.एफ. दर्ज करे गेहे, जउन ह देसभर के तैंतीस ठिन स्टेट पावर सेक्टर के ताप विद्युत गृह के डहार ले अर्जित पी.एल.एफ. के तुलना म सबले जादा हे।
मुख्यमंत्री भूपेश बघेल ह घलो पावर कंपनी के ए उपलब्धि बर खुसी जताईन हे।
कोरोना-समाचार
रायपुर के डाॅक्टर भीमराव अंबेडकर अस्पताल के विशेषज्ञ चिकित्सक डाॅक्टर आर.के. पांडा ह लोगन मन ल आगाह करीन हे कि दशहरा अउ देवारी तिहार के बेरा अगर सावधानी नइ बरते गीस, त कोरोना संक्रमण के खतरा अउ जादा बाढ़ जही। ओमन किहीन कि यूरोप अउ आने देश के रिसर्च म ए बात आगू आईस हे कि ठंडी अउ प्रदूषण बाढ़े ल संक्रमण बाढ़े के स्तर म तेजी आय हे।
ऐति, महासमुंद जिला म कोरोना सघन सामुदायिक सर्वे अभियान ल पन्द्रह अक्टूबर तक आगू बढ़ा देहे। जिला के मुख्य चिकित्सा अउ स्वास्थ्य अधिकारी डाॅक्टर आर.के परदल ह बतईन कि अभू तक साढ़े तीन हजार ले जादा संदिग्ध मरीज मनके पहिचान करके ओखर मनके कोरोना के जांच करे गेहे।
इही बीच, कोरिया जिला कलेक्टर एस.एन. राठौर ह जिला म चलत सामुदायिक सर्वे अभियान के वीडियो कान्फ्रेंसिंग के माध्यम ले समीक्षा करीन। ओमन बतईन कि अभी तक जिला म एक लाख इकतीस हजार ले जादा घर म सर्वें करे जा चुके हे।
उहें, दुरूग जिला म कोरोना संक्रमण के मामला म कमी आय के बाद कचांदूर के चंदूलाल चंद्राकर कोविड केयर सेंटर अउ अस्पताल ल अस्थाई तौर म बंद कर दे गेहे। दू महीना म ए अस्पताल म इलाज के बाद ढाई हजार ले जादा कोरोना मरीज मन ठीक होईन हे।
फूलबासन बाई यादव-कोरोना सावधानी अपील
इही बीच, सामाजिक कार्यकर्ता अउ गैर सरकारी संगठन के संस्थापक पद्मश्री फूलबासन बाई यादव ह लोगन मन ले कोरोना संक्रमण ले बचाव बर जरूरी सावधानी बरते के अपील करे हे।
महुआ-इंग्लैंड
छत्तीसगढ़ म अच्छा महुआ होय के सेती एखर मांग देस म नहीं, बल्कि अब विदेस म होय लगे हे। वन मंत्री मोहम्मद अकबर के मार्गदर्सन म वनवासी मन ल विश्वव्यापी बाजार उपलब्ध कराय के प्रयास के अच्छा परिणाम मिलत हे। फिलहाल बलरामपुर वनमंडल क्षेत्र ले संग्रहित करे गे बीस क्विंटल महुआ के पहिली खेप के बिक्री इंग्लैंड के स्काॅटलैंड यार्ड म दुगुना कीमत म होय हे। महुआ के ए नवा बाजार ल लेके वन विभाग के संगेसंग संग्राहक मन घलो बड़ उत्साहित हवय।
वन मंत्री अउ प्रधान मुख्य वन संरक्षक राकेश चतुर्वेदी ह बतईन कि अवइया  बछर म अउ जादा मात्रा म छत्तीसगढ़ के महुआ ल विदेस म भेजे के तैयारी करे जात हे। बतादन कि ए महुआ के संग्रहण रघुनाथ नगर, धमनी अउ वाड्रफनगर वन परिक्षेत्र के आने-आने गांव ले कराय गे रिहीस।
मौसम
मौसम विभाग ह अवइया चैबीस घंटा म प्रदेस म एक-दू ठन जगह म आकाशीय बिजली गिरे के चेतावनी देहे। उहें, मध्य अउ दक्षिणी छत्तीसगढ़ के कुछु इलाका म पानी गिर सकत हे। जानबा के मुताबिक एक ठिन गहरा अवदाब आंध्रप्रदेश के तट ल पार कर चुके हे, जेखर उत्तर-पश्चिम दिशा म आगू बाढ़े के संभावना हे।
संक्षिप्त समाचार
अउ अब थोरकुन समाचार सार म-
– केन्द्रीय स्वास्थ्य अउ परिवार कल्याण मंत्रालय ह कोरोना महामारी के संगेसंग डेंगू, मलेरिया, मौसमी फ्लू अउ चिकन गुनिया जइसेे संक्रमण के रोकथाम अउ प्रबंधन बर दिसा-निरदेस जारी करे हे।
– कबीरधाम पुलिस ह गांजा तस्करी के मामला म चार झिन मनखे ल गिरफ्तार करे हे। संगेसंग उंखर करे ले करीबन पच्चीस लाख रूपिया के ढाई क्विंटल गांजा घलो बरामद करे गेहे।
अउ
– महासमुंद जिला के सिरपुर क्षेत्र म तीन दंतैल हाथी घुमत हे, जेला देखत हुए उहां रहइया लोगन मन ल बिहनिया अउ संझा के बाद खेत म झन जाय बर केहे गेहे।