सर्वोच्च न्यायालय-एमडीआर
सर्वोच्च न्यायालय ह दू हजार रूपिया ले जादा के यूपीआई लेन देन म मर्चेंट डिकाउंट रेट-एमडीआर लागू करे के केंद्र सरकार के फइसला उपर रोक लगाय ले मना कर देहे। ए पइसा पंद्रह अक्टूबर ले प्रभावी होही। न्यायालय ह केंद्र सरकार, भारतीय रिजर्व बैंक अउ आने प्रतिवादी मनले जवाब मांगे हे अउ चार हफ्ता के अंदर जवाब दाखिल करे के निरदेस दीन। न्यायालय ह किहीन कि ए मुद्दा कानून ले जादा तकनीकी हे।
केंद्र सरकार डहार ले पेस होय अपर सॉलिसीटर जनरल एन. वंेकटरामन ह पीठ ल बतइन कि भुगतान गेटवे के छियानवे प्रतिसत उपयोगकर्ता एखर ले मुक्त रइही।
बाढ़-राहत शिविर
छत्तीसगढ़ म बाढ़ प्रभावित क्षेत्र म राहत अउ बचाव काम चलत हे। प्रशासन ह पानी भरे वाला जघा ले लोगन मन ल सुरक्षित निकाल के राहत सिविर म पहुंचाइन हे। प्रभावित लोगन मन ल जरूरी समान देके संग दवई घलो दे जावत हे।
इही बीच, मुख्यमंत्री विष्णुदेव साय ह आज सुकमा म बाढ़ प्रभावित क्षेत्र के दउरा करके स्थिति के जायजा लीन। ओमन प्रभावित परिवार ले मिलके उंखर हालचाल जानिन अउ राहत सिविर म खाना, पानी, स्वास्थ्य के संग जरूरी व्यवस्था के निरीक्षण करीन। मुख्यमंत्री ह बाढ़ ले मकान मन ल होय नुकसान के जल्दी आंकलन करके मुआवजा देके निरदेस अधिकारी मन ल दीन। संगेसंग घरेलू समान के नुकसान ले प्रभावित परिवार ल मुख्यमंत्री राहत कोष ले दस-दस हजार के अतिरिक्त सहायता घलो देके बात किहीन।
उहें, वित्त मंत्री श्री चौधरी ह आज रायगढ़ विधानसभा क्षेत्र के बाढ़ प्रभावित गांव बोरिदा, ठेंगागुरी अउ तोरा पहुंचके गांव के लोगन मन ले मुलाकात करीन अउ बाढ़ ले होय परिस्थिति के जायजा लीन। श्री चौधरी ह किहीन कि शासन-प्रशासन के टीम लगातार राहत अउ बचाव के काम म जुटे हे। ओमन ह अधिकारी मन ल प्रभावित लोगन मन बर खाना, साफ पानी, दवई, स्वास्थ्य सुविधा अउ आने जरूरी व्यवस्था सुनिश्चित करे के निरदेस दीन।
राज्यपाल-यूथ कॉन्क्लेव
राज्यपाल रमेन डेका ह किहीन हे कि युवा मन ल सिरिफ नौकरी पाय े बारे म नइ सोचना चाही, बल्कि अपन बिचार ल उद्यम म बदले के साहस घलो रखना चाही। राज्यपाल आज रईपुर स्थित इंदिरागांधी कृषि विश्वविद्यालय परिसर म छत्तीसगढ़ के युवा मन म नवाचार, उद्यमिता विकास अउ प्रौद्योगिकी के व्यासायिकरण ल बढ़ावा देके उद्देस्य ले आयोजित तीन दिवसीय ‘‘यूथ इनोवेशन और एंटरप्रेन्योरशिप कॉन्क्लेव‘‘ के सुभारंभ समारोह ल संबोधित करत रिहीन। ए बेरा म ओमन ह विश्व विद्यालय म स्थापित सुभाषचंद्र बोस बायो टेक्नोलॉजी इन्क्यूबेशन सेंटर के लोकार्पण घलो करीन। तीस सितंबर तक होवइया ए कॉन्क्लेव म छत्तीसगढ़ के संग देसभर ले पंद्रह सौ ले जादा युवा मन सामिल होवत हे।
बैंक हड़ताल-स्थगित
आज ले सुरू होवइया तीन दिन के देसव्यापी बैंक हड़ताल स्थगित कर दे गेहे। ऑल इंडिया बैंक एम्प्लॉइज एसोसिएसन-ए.आई.बी.ई.ए. ह एखर पुष्टि करीन हे। ए फइसला इंडियन बैंक्स एसोसिएशन-आई.बी.ए. के संग होय समझौता के बाद ले गीस। ए.आई.बी.ई.ए. ह सोसल मीडिया पोस्ट म बतइन कि हड़ताल ले जुड़े मुद्दा म काली रतिहा आई.बी.ए.अउ यूनाईटेड फोरम ऑफ बैंक यूनियंस के बीच होय बइठका के बाद हड़ताल स्थगित करे के निरनय ले गीस।
सर्जिकल स्ट्राइक-वर्षगांठ
भारत आज सर्जिकल स्ट्राइक के दसवां बछर मनावत हे। अट्ठाईस अउ उनतीस सितंबर दू हजार सोलह के रतिहा सेना ह नियंत्रण रेखा के पार आंतकवादी ठिकाना के खिलाफ लक्षित कार्रवाई करे रिहीन। ए कार्रवाई अट्ठारा सितंबर के होय उरी आतंकी हमला के बाद करे गे रिहीस, जेमा भारतीय अट्ठारा जवान सहीद होय रिहीस। आकाशवाणी म काली प्रसारित ‘मन की बात‘ कारीकरम म प्रधानमंत्री नरेंद्र मोदी ह बछर दू हजार सोलह के सर्जिकल स्ट्राइक ल एक जरूरी पड़ाव बतइन। प्रधानमंत्री ह किहीन कि पाछू एक दसक म आतंकवाद ले निपटे के भारत के तरीका म बदलाव आय हे।
मुख्यमंत्री-सिंगापुर प्रवास
विदेस मंत्रालय के नामांकन म छत्तीसगढ़ के मुख्यमंत्री विष्णुदेव साय तीन ले छै अक्टूबर तक सिंगापुर के दउरा म रइही। ओमन छत्तीसगढ़ के उच्च स्तरीय प्रतिनिधि मंडल के नेतृत्व करही अउ सिंगापुर म होवइया सिंगापुर-इंडिया नेटवर्क वर्क फॉर ग्रोथ-एसआईएनजी फोरम म राज्य के प्रतिनिधित्व करही। ए फोरम सिंगापुर बिजनेस फेडरेसन डहार ले आयोजित करे जात हे। एमा भारत अउ सिंगापुर के वरिष्ठ सरकारी प्रतिनिधि, उद्योग जगत अउ निवेसक हिस्सा लिही। फोरम के जरिया ले दूनों देस के बीच व्यापार अउ निवेस के नवा अवसर उपर चर्चा करे जाही।
मुख्यमंत्री श्री साय फोरम म छत्तीसगढ़ के एमएसएमई, स्टार्टअप अउ रोजगार परख क्षेत्र म निवेस संभावना के अंतरर्राष्ट्रीय निवेसक मनके आगू राखही। संगेसंग राज्य म दीर्घकालिक आर्थिक सहयोग अउ निवेस के अवसर उपर संवाद होही। सिंगापुर प्रवास के दउरान प्रतिनिधि मंडल कौशल विकास, वन्यजीव संरक्षण, उद्यानिकी अउ हरित विकास के क्षेत्र म घलो सहयोग के संभावना उपर चर्चा करीन।
मुख्यमंत्री ह किहीन कि ए यात्रा छत्तीसगढ़ ल वैश्विक साझेदार मन ले जोड़े अउ निवेस, विसेसज्ञता अउ नवाचार के जरिया ले विकास अउ रोजगार के नवा अवसर तियार करे के दिसा म जरूरी मउका हे।
मुख्य सचिव-बैठक
मुख्य सचिव विकासशील के अध्यक्षता म आज मंत्रालय म राज्य शासन के सबो विभाग मनके भारसाधक सचिव मन के बइठका होइस। बइठका म मुख्य सचिव ह खरीफ विपणन बछर म धान खरीदी बर जरूरी व्यवस्था बेरा म पूरा करे बर किहीन। ओमन लोक स्वास्थ्य यांत्रिकी विभाग ल पेयजन योजना अउ जल संसाधन विभाग ल सहरी अउ औद्योगिक क्षेत्र म जल प्रबंधन बर अच्छा कार्य योजना तियार करे के निरदेस देहे। ओमन ह आने-आने विभाग के खाली पद के जानकारी तीस सितंबर तक कर्मचारी चयन मंडल ल उपलब्ध कराय बर किहीन।
छत्तीसगढ़ मार्केट प्लेस
विश्व पर्यटन दिवस के बेरा म नवा रईपुर म ‘‘संेट्रल इंडिया कनेक्ट छत्तीसगढ़ मार्केट प्लेस‘‘ के आयोजन करे गीस। छत्तीसगढ़ पर्यटन मंडल अउ ट्रैवल ट्रेड एसोसिएसन के संयुक्त तत्वाधान म होय कारीकरम म देस विदेस के टूर ऑपरेटर्स, ट्रैवल एजेंट्स अउ होटल व्यवसाय ले जुड़े प्रतिनिधि मन ह हिस्सा लीन। ए बेरा म पर्यटन अउ संस्कृति मंत्री राजेश अग्रवाल ह किहीन कि आयोजन ले छत्तीसगढ़ के पर्यटन स्थल ल राष्ट्रीय अउ अंतरराष्ट्रीय बाजार ले जोड़े म मदद मिलही। ओमन ह पर्यटन ल रोजगार अउ स्थानीय अर्थव्यवस्था ले जोड़े म जोर दीन। कारीकरम म पर्यटन कारोबारी मनके बीच बीटूबी बइठका होइस अउ व्यावसायिक साझेदारी के संभावना उपर चर्चा करे गीस। ए बेरा म अच्छा काम करइया पर्यटन हितधारक मन ल राज्य स्तरीय पुरस्कार घलो दे गीस।
भगत सिंह-जयंती
देस आज शहीद-ए-आजम भगत सिंह के एक सौ उन्नीसवां जयंती मनावत हे। प्रधानमंत्री नरेंद्र मोदी ह आज स्वतंत्रता सेनानी शहीद भगत ंिसंह के जयंती म ओमन ल श्रध्दांजलि अर्पित करीन। सोसल मीडिया पोस्ट म श्री मोदी ह किहीन कि भगत ंिसंह ह अदम्य साहस अउ वीरता के संग स्वतंत्रता आंदोलन म नवा ऊर्जा के संचार करीन।
गांजा-बरामद
मनेन्द्रगढ़-चिरमिरी-भरतपुर जिला म पुलिस ह दू पिकअप ले नौ कुंटल उन्नीस किलो गांजा जब्त करे हे, जेखर अनुमानित कीमत चार करोड़ उनसठ लाख रूपिया बताय गेहे। गांजा ओडिसा ले मध्यप्रदेस के कटनी ले जाय जात रिहीस। गांजा ल कपड़ा के गट्ठा के बीच छिपाके राखे गे रिहीस, जेखर ले पुलिस के नजर ले बांचे जा सकत हे। फेर बॉर्डर तीर ले पहिली ही पुलिस ल चेकिंग के दउरान कपड़ा के गट्ठा के नीचे गांजा मिलिस। पुलिस ह दू माईलोगिन के संग छै आरोपी मन ल गिरफ्तार करे हे। मामला नागपुर चौकी क्षेत्र के हे।
छत्तीसगढ़ हॉकी लीग
खेल अउ युवा कल्याण विभाग डहार ले प्रदेस म पहिली बार होवइया छत्तीसगढ़ हॉकी लीग बर खिलाड़ी मनके सलेक्सन ट्रायल आज ले रईपुर स्थित सरदार वल्लभ भाई पटेल अंतरराष्ट्रीय हॉकी स्टेडियम म सुरू हो गेहे। आज अउ काली होवइया ट्रायल बर करीब चार सौ युवा मन ह ऑनलाइन रजिस्ट्रेसन कराय हे। एमा ले एक सौ आठ खिलाड़ी मनके चयन करे जाही। चयनित खिलाड़ी मन ल नौ दिन के बिसेस प्रसिक्षण दे जाही। जानबा के मुताबिक छत्तीसगढ़ हॉकी लीग के पहलइया सीजन इक्कीस अक्टूबर ले एक नवंबर तक रईपुर म आयोजित करे जाही।