मन की बात
प्रधानमंत्री नरेंद्र मोदी ह किहीन हे कि पाकिस्तान म आंतकी ठिकाना म सेना के सर्जिकल स्ट्राइक ह दुनिया के आगू भारत के आतंक रोधी नीति के एक नवा उदाहरण दीन हे। आकाशवाणी ले ‘‘मन की बात‘‘ कारीकरम म ओमन किहीन कि देस काली अट्ठाईस सितंबर के ए स्ट्राइक के दसवां वर्षगांठ मनाही। ओमन किहीन कि दुनिया ए देख के हैरान रहि गे रिहीस कि आतंकवाद के खिलाफ सर्जिकल स्ट्राइक बर कोन कीसम ले बहादुर भारतीय सैनिक मन नियंत्रण रेखा पार करे रिहीन। प्रधानमंत्री ह किहीन कि जनगणना के पहिली चरण करीबन सबो राज्य म पूरा हो गेहे अउ बत्तीस करोड़ ले जादा परिवार के आंकड़ा दरज करे गेहे। श्री मोदी ह लोगन ले ऑनलाइन पोर्टल म जानकारी देके अपील करीन हे अभी तक दू करोड़ साठ लाख ले जादा लोगन मन मोबाइल ले अपन व्योरा दरज करीन हे।
प्रधानमंत्री ह बतइन कि देसभर म नसा मुक्त युवा अभियान हाले म सुरू होय हे। ओमन किहीन कि नसा मुक्त युवा अउ विकसित भारत के संकल्प ल आगू बढ़ाय बर सबो ल जुरमिल के काम करे बर पड़ही। ओमन यहू किहीन कि सितंबर के महिना कुपोषण ले लड़ई ल समर्पित हवय।
मन की बात-हर घर मुनगा अभियान
प्रधानमंत्री नरेंद्र मोदी ह आज ‘मन की बात‘ कारीकरम म छत्तीसगढ़ म राज्य सरकार कोति ले चलाय जात ‘हर घर मुनगा-घर घर मुनगा‘ अभियान के बात करीन। एखर उद्देस्य हरेक घर तक मुनगा के पउधा अमराय के संगेसंग एखर पोषण संबंधी महत्ता कोति लोगन ल जागरूक करना हे। मुख्यमंत्री विष्णुदेव साय ह आज कांकेर जिला के अंतागढ़ के एकलव्य विद्यालय परिसर म प्रधानमंत्री नरेंद्र मोदी के मासिक रेडियो कारीकरम मन की बात कारीकरम ल सुनिन।
ए मउका म मुख्यमंत्री ह प्रधानमंत्री कोति ले छत्तीसगढ़ के ‘घर घर मुनगा-हर घर मुनगा‘ अभियान बताय जाय म प्रधानमंत्री बर आभार जतइन हे।
उहें, महिला अउ बाल विकास मंत्री लक्ष्मी राजवाड़े ह दिल्ली विमानतल म ‘मन की बात‘ कारीकरम ल सुनिन। ए बेरा म ओमन किहीन कि प्रधानमंत्री कोति ले छत्तीसगढ़ के अभियान के संबंध म बताना प्रदेस बर उछाह अउ प्रेरणा के बिसय हरय। एखर ले आंगनबाड़ी कार्यकर्ता, स्व-सहायता समूह अउ पोषण अभियान ले जुड़े लोगन ल अपन मेहनत, परयास अउ बड़े स्तर तक अमराय म बढ़ावा मिलही।
निर्वाचन आयोग-बीएलओ
निर्वाचन आयोग ह केहे हे कि बिसेस गहन पुनरीक्षण-एसआईआर के दउरान जउन मनखे मन ल नोटिस जारी करे गेहे उंखर घर म बूथ स्तर के अधिकारी बीएलओ जाके जरूरी दस्तावेज इकट्ठा करही। बीएलओ ह पाछू ए दस्तावेज ल ई.सी.आई.एन.ई.टी. प्लेटफॉर्म म अपलोड करही। ए फइसला नई दिल्ली म आयोग के बइठका म ले गीस। आयोग ह स्पष्ट करे हे कि अइसन मनखे मन ल मतदात पंजीकरण अधिकारी सुनवाई बर नइ बलाही।
आयोग ह केहे हे कि एसआईआर के दउरान जिंखर नांव छूट गेहे अउ ओहा अपन नांव सामिल करवाना चाहत हे, त संबंधित मतदाता पंजीकरण अधिकारी तीर अर्जी दे सकत हे। मुख्य निर्वाचन अधिकारी, जिला निर्वाचन अधिकारी अउ मतदाता पंजीकरण अधिकारी ए मतदाता मनके नामांकन बर तुरते बिसेस अभियान सुरू करही। आयोग ह दावा आपत्ति दाखिल करे के बेरा तीस अक्टूबर तक बढ़ा देहे।
उहें, नोटिस दावा अउ आपत्ति के निपटान के बेरा घलो तीस नवंबर तक बढ़ा दे गेहे।
बारिश
छत्तीसगढ़ म काली ले बरसा थिराइस हे। जेखर ले स्थिति धीरे-धीरे सामान्य होवत हे। पाछू दिन होय सरलग बरसा के सेति कतकोन नदिया के जल स्तर बाढ़े रिहीस। नदिया के तीर-तखार के क्षेत्र अउ सहर-नगर के निचली बस्ती मन म अभी घलो जलभराव के स्थिति बने हे। जांजगीर-चांपा जिला के शिवरीनारायण क्षेत्र म कई ठिन गांव बाढ़ ले प्रभावित हे। शिवरीनारायण म सबरी सेतु म छै फीट उपर महानदी के पानी बोहात हे। काली मंझनिया ले पूल म अवई-जवई बंद हे। सुरक्षा ले देखत उंहा सुरक्षा बल तैनात करे गेहे। क्षेत्र के तीर-तखार के कई ठिन गांव म महानदी के पानी भर गेहे। एला देखत शिवरीनारायण अउ खरौद म राहत सिविर लगाय गेहे। जिला के कलेक्टर जन्मेजय महोबे अउ पुलिस अधीक्षक विजय पांडे ह बाढ़ के जायजा लीन।
उहें, बस्तर के डोंगाघाट म बाढ़ म फंसे अट्ठारा झिन ल वायु सेना के हेलीकॉप्टर ले सुरक्षित निकाले गीस। बस्तर के इंद्रावती नदिया अभी घलो खतरा के निसान ले उपर बोहात हे। जिला म बयालीस ठिन राहत सिविर लगाय गेहे, जेमा करीबन अड़तालीस सौ लोगन राहत हे।
अइसने, रईपुर जिला के पथरीडीह म बाढ़ म फंसे चौदह झिन ल एनडीआरएफ के टीम ह रेस्क्यू करके सुरक्षित जघा म पहुंचाइन। जिला के कलेक्टर डॉक्टर गौरव सिंह ह आज बाढ़ प्रभावित क्षेत्र अउ राहत सिविर के जांच करके बेवस्था ले देखिन। ओमन किहीन कि बाढ़ प्रभावित कोनो भी मनखे ल परेसानी नइ होना चाही। संगेसंग एखर ले जुड़े अधिकारी मन ल प्रभावित क्षेत्र म होय नकसान के आंकलन करे के निरदेस देत किहीन कि पात्र प्रभावित मन ल नियमानुसार क्षतिपूर्ति रासि दे जाही।
मुख्यमंत्री-प्रेसवार्ता
मुख्यमंत्री विष्णुदेव साय ह आज भाजपा प्रदेस कार्यालय कुशाभाऊ ठाकरे परिसर म पत्रकारवार्ता म लोकसभा म विपक्ष के नेता राहुल गांधी कोति ले मुख्य चुनाव आयुक्त ज्ञानेश कुमार उपर आरोप लगाय जाय के आलोचना करीन हे। मुख्यमंत्री ह किहीन कि भारत के चुनाव आयोग के दुनिया भर म साख हे। ओखर निष्पक्ष चुनावी कामकाज म सवाल उठाना विपक्ष के हतासा के प्रतीक हे।
विश्व पर्यटन दिवस
आज विश्व पर्यटन दिवस हरय। कंेंद्रीय संस्कृति अउ पर्यटन मंत्री गजेन्द्र सिंह शेखावत ह किहीन कि अब पर्यटन रोजगार स्थानीय अर्थव्यवस्था अउ विकास के एक मजबूत आधार बनत हे। ओमन किहीन कि देस के समृध्द विरासत अउ संस्कृति युवा मन बर नवा मउका के जरिया बनना चाही।
सेवा संकल्प अभियान-कैप्सूल
प्रधानमंत्री नरेंद्र मोदी सार्वजनिक जीवन म पच्चीस बछर पूरा करत हे। उंखर ए यात्रा ‘‘जन सेवा से देश सेवा‘‘ के मंत्र अउ सरलग समर्पण ले आज भी चलत हे। सेवा अउ सुशासन के अइसन सोच ले प्रेरित होके सरकार बछर दू हजार सैंतालीस तक विकसित भारत के लक्ष्य ल पाय बर सरलग काम करत हे।
मिसन लाईफ-लाईफ स्टाइल फॉर एनवायरमेंट छत्तीसगढ़ म ए परयास ल स्कूल, संस्था अउ जन भागीदारी ले आगू बढ़ाय जात हे। स्कूल म विद्यार्थी मन ल पर्यावरण संरक्षण ले जोड़े गेहे।
आंगन मिलन कार्यक्रम
‘सेवा संकल्प अभियान‘ म आज दुरूग जिला के भिलई के आंगन बाड़ी केंद्र म आंगन मिलन कारीकरम राखे गीस। कारीकरम म केंद्रीय महिला अउ बाल विकास राज्य मंत्री सावित्री ठाकुर संघरीन। कारीकरम म बोलत ओमन किहीन कि आंगन बाड़ी कार्यकर्ता, सहायिका अउ आसा कार्यकर्ता प्रधानमंत्री के सेवा संकल्प के भावना के मुताबिक समर्पन के संग काम करत हे। राज्य मंत्री ह किहीन कि अभी पोषण माह के दउरान गर्भवती माईलोगिन, नोनी अउ कमती वजन कुपोषित लइका मन बर पुष्टई जिनिस के महत्ता के संबंध म जागरूकता बर एला चलाय जात हे। ओमन माईलोगिन मन ले अपील करीन कि अपन तीर-तखार के आने महिला मन ल घलो पोषण, स्वच्छता अउ शासन के आने-आने योजना कोति जागरूक करीन।
कारीकरम के दउरान बने सेवा अउ आंगन बाड़ी केंद्र म मदद बर आंगनबाड़ी कार्यकर्ता मन ल सम्मानित करे गीस। ए बेरा म मिलेट्स ले तियार करे गे कतकोन व्यंजन के प्रदर्सनीय लगाय गीस अउ लइका मन बर न्योता भोज राखे गीस।
अपन दुरूग दउरा के दउरान केंद्रीय राज्य मंत्री ह सखी वन स्टाप सेंटर के जांच करत उंहा के बेवस्था अउ सेवा ल देखिन।
हत्या
राजधानी रईपुर के माना के डूमरतराई क्षेत्र म एक मनखे ह कथित रूप ले अपन घर-गोसई अउ दू नाबालिक लइका उपर चाकू ले हमला कर दीस। हमला म तीनों के मउत होगे। पुलिस के मुताबिक घटना के बाद आरोपी ह कथित रूप ले अपन उपर घलो चाकू ले वार करीस, जेमा ओहा गंभीर रूप ले घायल होगे।
आरोपी-गिरफ्तार
लॉरेंस बिस्नोई गैंग के नांव ले कांग्रेस नेता आनंद कुकरेजा ल धमकी देके मामला म पुलिस ह दू झिन आरोपी ल गिरफ्तार करे हे। एमा पूर्व महापौर एजाज ढेबर के भतीजा सोएब ढेबर अउ होटल के एक करमचारी सामिल हे। तेलीबांधा पुलिस ए मामला के जांच करत हे।