बारिश
प्रदेस म पाछू तीन दिन ले होवत लगातार बरसा ले जनजीवन अस्त-व्यस्त हो गेहे। बस्तर संभाग समेत राज्य के कई ठन नदी-नाला उफान म हे। राजधानी रायपुर म स्थित खारून नदी म पूल के उपर ले पानी बोहावत हे। प्रशासन ह तीर-तखार के गांव वाला मन ल अलर्ट जारी कर देहे।
बस्तर म इंदिरावती नदी खतरा के निसान ले उपर बोहावत हे। उहें, बाढ म फंसे लोगन मन ल सुरक्षित स्थान म पहुंचाय जात हे। स्थानीय प्रशासन मुस्तैदी के संग बाढ़ पीड़ित मन के सहायता म लगे हुए हे। ओमन ल खाद्य अउ चिकित्सा सामग्री उपलब्ध कराय जात हे। बाढ़ के सेति रायपुर-जगदलपुर राष्ट्रीय राजमार्ग समेत सुकमा अउ बीजापुर मार्ग म आवागमन प्रभावित होय हे।
ओति, धमतरी जिला म स्थित गंगरेल बांध के सबो गेट काली ले खोल दे गेहे। बांध ले पानी छोड़े के सेति महानदी समेत दूसर नदी मनके जल स्तर तेजी ले बाढ़त हे।
दुरूग जिला म शिवनाथ नदी घलो उफान म हे। जेखर सेति कई इलाका मन म बाढ़ जइसन हालात बन गेहे। शिवनाथ नदी के तीर बने एनीकट मन के उपर ले करीब दस ले बारह फीट पानी बोहावत हे। दुरूग कलेक्टर अभिजीत सिंह ह आज शिवनाथ नदी म स्थित गणेश प्रतिमा विसर्जन स्थल के निरीक्षण करे के बाद शिवनाथ नदी म प्रतिमा विसर्जन उपर फिलहाल रोक लगा देहे। उहें, नगर सेना अउ एसडीआरएफ के टीम ह कुम्हारी क्षेत्र के परसदा गांव समेत आने-आने जघा मन म बाढ़ म फंसे दू सौ ले जादा लोगन मनके रेस्क्यू करे हे।
इही बीच, स्कूल शिक्षा मंत्री अउ दुरूग सहर विधायक गजेन्द्र यादव ह दुरूग म आज बाढ़ अउ जलभराव के स्थिति के जायजा लीन। ओमन बतइन कि सामान्य परिस्थिति मन म शिवनाथ नदी म करीब दस हजार क्यूसेक पानी बोहावत हे। जबकि, अभी करीब साठ हजार क्यूसेक तक पानी पहंुच गे हे। एखरे सेति बाढ़ के स्थिति बन गेहे। श्री यादव ह बतइन कि बाढ़ के स्थिति ल देखत हुए प्रशासन अलर्ट मोड म हे। पुलगांव के तेरह परिवार मन ल सुरक्षित बाहर निकाल ले गेहे।
राजिम म घलो त्रिवेणी संगम के जलस्तर तेजी ले बाढ़त हे। राजिम बस स्टैंड म चार फीट तक पानी भर गेहे। उहें, निचली बस्ती मन म पानी भरे के सेति लोगन मन ल सुरक्षित जघा म पहुंचाय गीस।
जांजगीर-चांपा जिला म महानदी के जल स्तर बाढ़े ले महानदी-शबरी सेतु ले आवागमन बंद हो गेहे। पुलिस ह तीर-तखार के क्षेत्र म अलर्ट जारी करे देहे। मउका म डीडीआरएफ के टीम तैनात हे।
इही बीच, दक्षिण पूर्व मध्य रेलवे के रायपुर मंडल के अंतर्गत गुण्डरदेही- लाटाबोर के बीच ट्रैक ध्ंासे अउ जलभराव के कारण रेल यातायात प्रभावित होय हे। मंडल रेल प्रबंधक दयानंद समेत अधिकारी मन मउका म पहुंच के स्थिति के जायजा लीन। इंजीनियरिंग विभाग के तकनीकी टीम ह ट्रैक ल दुरूस्त करे म लगे हुए हे। जेखर सेति अंतागढ़-दुरूग-रायपुर के बीच रेल परिचालन रद्द कर दे गेहे।
इही बीच, मुख्यमंत्री विष्णुदेव साय ह राज्य के आने-आने क्षेत्र मन म उत्पन्न बाढ़ अउ जलभराव के स्थिति ले देखत हुए संबंधित जिला मनके कलेक्टर मन ल पूरा सर्तकता के संग राहत अउ बचाव कार्य चलाय के निरदेस देहे।
मानव तस्करी-आरोपी गिरफ्तार
महासमुंद अउ ओडिसा के नुआपाड़ा पुलिस के संयुक्त टीम ह छत्तीसगढ़ अउ ओडिसा के आने-आने जघा म छापा मार के मानव तस्करी के पांच झन आरोपी मन ल गिरफ्तार करे हे। ए दउरान करीब-करीब डेढ़ करोड़ रूपिया नगद अउ नोट गिने के मसीन के संगेसंग दूसर दस्तावेज जब्त करे गेहे। गिरफ्तार आरोपी महासमुंद अउ नुआपाड़ा जिला ले मजदूर मन ल दूसर राज्य म भेजत रिहीन। एखर मन उपर मानव तस्करी के संगेसंग बाल मजदूरी अउ बंधुवा मजदूरी कराय के आरोप हे।
एशियन गेम्स-स्वर्ण पदक
जापान म आयोजित एशियन गेम्स म भारतीय महिला कबड्डी टीम ह ईरान ल हरा के स्वर्ण पदक जीत ले हे। ए टीम म छत्तीसगढ़ के कोरबा जिला के संजू देवी ह उत्कृष्ट प्रदर्सन कर जीत म महत्वपूर्ण भूमिका निभाय हे।
मुख्यमंत्री विष्णुदेव साय ह संजू देवी ल फोन कर ए उपलब्धि बर बधई अउ सुभकामना दीन हे। ओमन संजू देवी के प्रदर्सन के सराहना करत हुए किहीन कि उंखर ए उपलब्धि ले पूरा छत्तीसगढ़ गौरवान्वित हे।
मन की बात
प्रधानमंत्री नरेंद्र मोदी काली बिहनिया ग्यारा बजे आकाशवाणी म प्रसारित होवइया मासिक रेडियो कार्यक्रम ‘मन की बात‘ म देस-विदेस के लोगन मन संग अपन विचार साझा करही। ए एक सौ अड़तीसवां कड़ी के प्रसारण आकाशवाणी अउ दूरदर्शन के सबो नेटवर्क के संगेसंग आकाशवाणी समाचार के वेबसाइट अउ न्यूज ऑन एआईआर मोबाइल ऐप म करे जाही। कार्यक्रम के सीधा प्रसारण आकाशवाणी समाचार, डीडी न्यूज, प्रधानमंत्री कार्यालय अउ सूचना अउ प्रसारण मंत्रालय के यू-ट्यूब चैनल मन म घलो होही। हिंदी प्रसारण के तुरते बाद आने-आने क्षेत्रीय भाषा मन म घलो एखर प्रसारण करे जाही।
आंगन मिलन सेवा
‘‘सेवा संकल्प अभियान‘‘ के तहत प्रदेस भर म काली ले ‘‘आंगन मिलन सेवा‘‘ कारीकरम सुरू हो गेहे। पहलइया दिन राज्य म बाईस सौ ले जादा जघा मन म करीब तेरह हजार गतिविधि मन ल आयोजित करे गीस।
मुख्यमंत्री विष्णुदेव साय मुंगेली जिला के मदकू म आयोजित आंगन मिलन सेवा कारीकरम म सामिल होइन अउ महतारी अउ लइका मन ल पोषण के संदेस दीन। ए मउका म महतारी वंदन योजना अउ प्रधानमंत्री मातृत्व वंदन योजना के लाभार्थी मन बतइन कि योजना ले मिले सहायता रासि ले ओमन अपन अउ परिवार के जरूरत मन ल पूरा कर पावत हे।
बतादन कि आंगन मिलन सेवा के माध्यम ले परिवार अउ समुदाय मन ल आंगन बाड़ी केंद्र मन ले जोड़त हुए लइका मन के पोषण ल साझा जिम्मेदारी बनाय उपर जोर दे जात हे।
ग्राम-नाम परिवर्तन
कबीरधाम जिला के ग्राम चंडालपुर के नाम बदल के अब आधिकारिक रूप ले चंदनपुर कर दे गेहे। उपमुख्यमंत्री विजय शर्मा ह गांव के नवा पहिचान बर राजपत्र लेके चंदनपुर पहुंचिन। ए दउरान ओमन ग्रामीण मन ल राजपत्र के प्रति सौंपिन अउ उनला बधाई दीन। ए मउका म उपमुख्यमंत्री ह गांव के विकास कार्य बर करीब बारह लाख रूपिया देके घोसना घलो करीन।
खुली जेल-शुभारंभ
छत्तीसगढ़ के पहिली महिला खुली जेल के सुभारंभ आज पुलिस महानिदेसक जेल हिमांशु गुप्ता ह करीन। केंद्रीय जेल रायपुर म स्थित ए खुली जेल महिला बंदी मनके सुधार, पुनर्वास अउ उनला आत्मनिर्भर बनाय के दिसा म महत्वपूर्ण पहल हरय। ए खुली जेल म पच्चीस झन महिला बंदी मनके रेहे के व्यवस्था करे गेहे। ए जेल के बिसेसता हरय कि इंहा रहइया महिला बंदी ऊंची दीवार अउ पारंपरिक बंद व्यवस्था ले बाहिर निकल के आने-आने रोजगार मूलक गतिविधि मन ले जुड़ सकही। उंखर मन बर जेल करा स्थित परिसर म जेल म निर्मित उत्पाद मनके बिक्री केंद्र संचालित करे जाही। संगेसंग ओखर रूचि अउ कौसल के अनुरूप रोजगार के वैकल्पिक साधन घलो उपलब्ध कराय जाही।
रोजगार-मेला
प्रदेस म अवइया महिना सात अउ आठ अक्टूबर के रायपुर के सरदार बलबीर सिंह जुनेजा इंडोर स्टेडियम म राज्य स्तरीय रोजगार मेला के आयोजन करे जाही। दसवीं-बारहवीं, आईटीआई, डिप्लोमा, इंजीनियरिंग अउ स्नातकोत्तर योग्यताधारी युवा ई-रोजगार पोर्टल के माध्यम ले ऑनलाइन आवेदन कर सकत हे।
जिले की चिट्ठी
आकासवाणी रईपुर के प्रादेशिक समाचार एकांश, डहार ले प्रस्तुत कार्यक्रम “जिले की चिट्ठी“ के प्रसारण काली संझा छह बजके पांच मिनट ले छह बजके दस मिनट तक करे जाही। ए कार्यक्रम ल छत्तीसगढ़ के सबो आकाशवाणी केन्द्र एके संघरा रिले करही। ए बखत के अंक म आपमन ‘‘कबीरधाम’’ जिला के गतिविधि के बारे म जानकारी दे जाही।
मिलिट्री स्कूल-प्रवेश परीक्षा
रक्षा मंत्रालय के अधीन संचालित देस के पांच राष्ट्रीय स्कूल मन म सत्र दू हजार सत्ताईस-अट्ठाईस बर प्रवेस प्रक्रिया सुरू हो गेहे। कक्षा छठवीं अउ नवमीं म दाखिला बर उम्मीदवार बीस अक्टूबर तक ऑनलाइन आवेदन कर सकत हे। एखर बर कॉमन एंटेंªस टेस्ट के आयोजन तेरह दिसंबर के करे जाही।