बारिश
चक्रवात ‘‘अर्नब‘‘ के सेति बस्तर संभाग के संग प्रदेस के कतकोन जिला म पाछू दू तीन दिन ले होवत बरसा के सेति जन-जीवन प्रभावित होय हे। उहें, कतकोन नदी-नाला उफान म हे।
बीजापुर जिला म सरलग बरसा के सेति इंदिरावती के संग कतकोन नदी-नाला के जल स्तर बाढ़ गेहे। बीजापुर ले जगदलपुर ल जोड़ने वाला राष्ट्रीय राजमार्ग क्रमांक-तिरसठ म बंगपाल नदी के पूल के उपर ले पानी बहत हे। जेखर कारण ए रद्दा म अवई-जवई बंद कर दे गेहे। जिला कलेक्टर विश्वदीप ह लोगन मन ले नदिया-नरवा ल पार झन करे के अपील करे हे।
बस्तर जिला के इंदिरावती नदी खतरा के निसान ले लगभग ढाई फीट उपर बहत हे। जिला के सबो नदी-नाला उफान म हे। जेखर कारण बस्तर जिला मुख्यालय के सड़क संपर्क सुकमा, दंतेवाड़ा, बीजापुर अउ कोंडागांव ले टूट गेहे। हमर बस्तर संवाददाता ह बतइन कि राष्ट्रीय राजमार्ग क्रमांक-तीस म पुलिया के उपर ले पानी बहे के कारण अवई-जवई प्रभावित होय हे।
एला देखत हुए जिला कलेक्टर आकाश छिकारा ह सबो अनुविभागीय अधिकारी, तहसीलदार, होमगार्ड, कमांडेंट अउ आने अधिकारी मन ल स्थिति म नजर बनाय राखे के निरदेस दीन। जिला प्रशासन ह इंदिरावती नदी के तटीय क्षेत्र, निचला गांव अउ संवेदनसील बस्ती म मुनादी कराके हाई अलर्ट घोसित कर दे गेहे।
सुकमा जिला के कोंटा म सबरी नदी के जल स्तर सरलग बाढ़त हे। प्रशासन के लोगन मनले नदी अउ निचला इलाका म जाय ले बांचे के अपील करे हे। कांकेर जिला म दूध नदी के जलस्तर बाढ़े ले रद्दा म रूकावट हो गेहे, जेखर ले अवई-जवई प्रभावित होवत हे।
नारायणपुर जिला म माड़ नदी, झिरीमेड़ा नदी अउ कुकूर नदी उफान म हे। नारायणपुर संवाददाता प्रमोद पोटाई ह बतइन कि पूल के उपर ले पानी भरे के सेति अवई-जवई प्रभावित होय हे।
राज्य के मध्य भाग के कतकोन जिला म घलो काली ले बरसा के सिलसिला जारी हे। राजधानी रईपुर अउ भिलाई के संग कतकोन सहर म जादा बरसा के चलत जन-जीवन प्रभावित होय हे। धमतरी स्थित रविशंकर सागर, गंगरेल बांध अउ मूरम सिल्ली बांध लबालब हो गेहे। गंगेरल बंाध के पांच, रेडियल गेट खोल दे गेहे।
सरलग बरसा के चलत गरियाबंद जिला के संपर्क राजधानी रईपुर ले टूट गेहे। राष्ट्रीय राजमार्ग क्रमांक-एक सौ तीस म पैरी अउ सोंढूर म नदी के संगम स्थल पंटोरा म सड़क म पानी आय के सेति ए रद्दा म अवई-जवई बंद हो गेहे। अमल पदार म अट्ठारा लोगन मन ल रैस्क्यू करके सुरक्षित निकाले गेहे।
इही बीच, जादा बरसा के चलत बस्तर, बीजापुर, कोंडागांव, कांकेर, सुकमा, धमतरी अउ गरियाबंद जिला म स्कूल मन म छुट्टी दे दे गेहे। एखर अलावा आज होवइया लइका मनके त्रैमासिक परीक्षा ल घलो रोक दे गेहे।
मुख्यमंत्री विष्णुदेव साय ह भारी बरसा ल देखत हुए सबो जिला कलेक्टर मन ल सतर्क रहे के निरदेस दे हे।
दुघर्टना
बालोद जिला म राष्ट्रीय राजमार्ग क्रमांक-तीस म आज होय एक सड़क हादसा म छै युवक मनके मउत होगिस। उहें, सात आने युवक घायल हो गेहे। ए हादसा मरकाटोला घाट तीर ओ समय होइस, जब सड़क किनारे डीजे साउंड सिस्टम ले बंधे पिकअप गाड़ी ले ट्रक ह टक्कर मार दीस। ए टक्कर अतना भीषण रिहीस के पिकअप गाड़ी बहुत जादा क्षतिग्रस्त होगिस। उहें, ट्रक सड़क म पलट गीस।
जिला के अतिरिक्त पुलिस अधीक्षक चंद्रकांत गवर्ना ह बतइन कि पिकअप गाड़ी म दस युवक बइठे रिहीन, जेमा ले दू युवक के मउका म ही मउत होगिस। उहें, तीन युवक मन ह इलाज के दउरान दम तोड़ दिन। ओमन ह बतइन कि पांच युवक के इलाज चलत रिहीन। दुर्घटना के कारण कुछ समय तक ए रास्ता म अवई-जवई घलो प्रभावित रिहीस।
विशेष कार्यक्रम
आकाशवाणी केंद्र रईपुर डहार ले सेवा संकल्प अभियान के तहत बिसेस कारीकरम के श्रृंखला प्रसारित करे जात हे। इही कड़ी म आज संझा सात बजे ‘‘तीन तलाक कानून‘‘ म छत्तीसगढ़ राज्य वक्स बोर्ड के अध्यक्ष सलीम राज ले लेगे भेंटवार्ता के प्रसारण करे जाही। ए कारीकरम ल छत्तीसगढ़ स्थित आकाशवाणी के सबो केंद्र रिले करही।
माओवादी सामग्री-बरामद
कोंडागांव जिला के पुंगारपाल थाना क्षेत्र म सुरक्षाबल मन ह माओवादी डहार ले डंप करे गे विस्फोटक समान बरामद करे हे। ए कारवाई आत्मसमर्पित माओवादी मनके निसानदेही म नक्सल सेल, डीआरजी, बस्तर फाइटर्स अउ बीडीएस के संयुक्त टीम ह करीन। आलवाड़ के जंगल-पहाड़ी क्षेत्र म तलासी के दउरान चार किलो वजन के एक पाईप बम, एक इलेक्ट्रानिक डेटोनेटर, अट्ठारा पेंसिल बैटरी, एक कुकर अउ विस्फोट समान बरामद करे गेहे।
गांजा-बरामद
महासमुंद जिला के बसना थाना क्षेत्र म पुलिस अउ एंटी-नारकोटिक्स टास्क फोर्स-ए.एन.टी.एफ. के संयुक्त टीम ह एक कार ले एक सौ बत्तीस किलो गांजा बरामद करीन। जब्त गांजा के कीमत करीब छैंसठ लाख रूपिया बताय गेहे। ए मामला म पुलिस ह दू आरोपी ल गिरफ्तार करे हे। पूछताछ म आरोपी मन ह बतइन कि गांजा ल ओड़िसा ले पूणे ले के जावत रिहीस।
उहें, बलरामपुर पुलिस ह ओड़िसा ले बिहार ले जावत रिहीस एक सौ नौ किलो ले जादा गांजा बरामद करीन। पुलिस ह गांजा तस्करी के आरोप म बिहार निवासी एक मनखे ल गिरफ्तार करे हे। पुलिस के अनुसार पिकअप गाड़ी ले गांजा के सौ पैकेट मिलिस, जेखर अनुमानित कीमत पचास लाख रूपिया ले जादा हे।
इंटर्न डॉक्टर-स्टाईपेंड
राज्य सरकार ह इंटर्न डॉक्टर मनके महिना के स्टाइपेंड बढ़ाय के फइसला लेहे। इंटर्न डॉक्टर मन ल हर महिना पचीस हजार रूपिया के स्टाइपेंड दे जाही। बाढ़े होय शिष्यवृत्ति एक अक्टूबर ले लागू होही। ए संबंध म चिकित्सा शिक्षा विभाग डहार ले आदेस जारी करे दे गेहे।
आंगन मिलन सेवा
‘‘सेवा संकल्प अभियान‘‘ के तहत महिला अउ बाल विकास विभाग डहार ले प्रदेस भर के आंगन बाड़ी केंद्र म आज ले ‘आंगन मिलन सेवा‘ कारीकरम आयोजित करे जात हे। पहिली दिन आज रईपुर सहरी क्षेत्र, बस्तर, सरगुजा अउ बिलासपुर म कारीकरम होइस। इंखर बाद निर्धारित तारीख के अनुसार छै अक्टूबर तक कारीकरम करे जाही। हरेक केंद्र म तय करे गे दिन म बिहनिया दस बजे ले मंझनिया तीन बजे तक आयोजन होही। कारीकरम म ‘‘मेरी पौष्टिक थाली‘‘ अउ पौष्टिक व्यंजन प्रदर्सन करे जाही। उहें, स्वास्थ्य जांच, टीकाकरण, स्वस्थ सिसु प्रतियोगिता अउ लइका मनके खेल गतिविधि होही। घर-घर मुनगा, हर घर मुनगा के संदेस के संग पउधा रोपण घलो करे जाही।
अनंत चतुर्दशी
आज अनंत चतुर्दशी हे। एखरे संग आज ले ही छोटे गणेश मूर्ति के विसर्जन के सिलसिला सुरू हो गेहे। भगत मन ह पूजा अर्चना के संग गणेश भगवान ल बिदाई दीन। प्रदेस के कतकोन जघा म आज भंडारा के आयोजन करे गीस।
राज्यपाल रमेन डेका अउ मुख्यमंत्री विष्णुदेव साय ह प्रदेस के लोगन मन ल अनंत चतुर्दशी के बधई अउ सुभकामना दीन।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ ए बखत ‘सेवा संकल्प अभियान‘ के तहत राम मंदिर-सभ्यतागत् चेतना का पुनर्जागरण म केंद्रित रइही। एखर प्रसारण काली 26 सितंबर के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया 9 बजे ले करे जाही। एला छत्तीसगढ़ के जम्मों आकाशवाणी केंद्र एक संघरा रिले करहीं।
चयन ट्रायल
रईपुर के सरदार वल्लभ भाई पटेल अंतरर्राष्ट्रीय हॉकी स्टेडियम म अट्ठाईस अउ उनतीस सितंबर के चयन बर ट्रायल होही। ट्रायल बिहनिया नौ बजे ले सुरू होही। खेल अउ युवा कल्याण विभाग ह चयन प्रक्रिया के अच्छा संचालन समन्वय अउ तकनीकी सहायता बर तीन अधिकारी मन ल जिम्मेदारी सौंपे हे। एमा खेल अधिकारी दीनू प्रसाद पटेल, रईपुर के वरिष्ठ हॉकी प्रसिक्षक रश्मि संध्या एक्का अउ बिलासपुर के वरिष्ठ हॉकी प्रसिक्षक राकेश टोप्पो सामिल हे। चयन के बाद छै टीम के सूची अउ चयन प्रक्रिया के रिपोर्ट खेल संचालनालय ल उपलब्ध कराय जाही।
जानबा के मुताबिक छत्तीसगढ़ हॉकी लीग के पहला सीजन इक्कीस अक्टूबर ले एक नवंबर तक खेले जाही। एमा छै टीम हिस्सा लिही।
राज्य सम्मान-आवेदन
सामाजिक क्षेत्र के संग तेरह विधा म उल्लेखनीय योगदान देवइया प्रतिभा ल राज्य सम्मान ले सम्मानित करे जाही। एखर बर पात्र कलाकार, साहित्यकार, संस्कृति कर्मी ले पांच अक्टूबर तक आवेदन मंगाय गेहे। संस्कृति विभाग डहार ले बारह राज्य स्तरीय सम्मान अउ एक राष्ट्रीय सम्मान दे जाही। चयनित प्रतिभा मन ल छत्तीसगढ़ राज्य स्थापना दिवस के बेरा म होवइया राज्योत्सव के राज्य अलंकरण समारोह म सम्मानित करे जाही।