प्रधानमंत्री-सेवा यात्री संवाद
प्रधानमंत्री नरेंद्र मोदी ह किहीन हे कि जीवन के मुख्य उद्देस्य सेवा, हर मनखे म स्वाभाविक रूप ले होना चाही। ओमन ह किहीन कि राजनीति म घलो, उंचा पद म पहुंचे के बाद सेवा ही मार्गदर्सक सिध्दांत रहना चाही। प्रधानमंत्री आज वडनगर ले वाराणसी तक यात्रा करत सेवा यात्री मन ले वीडियो कॉन्फ्रेंसिंग के जरिया ले गोठबात करत रिहीन।
विकसित ग्राम पंचायत योजना
प्रदेस के गांव के सबो विकास बर दू अक्टूबर ले ग्राम सभा के जरिया ले विकसित ग्राम पंचायत योजना तियार के करे के प्रक्रिया सुरू होही। एमा अवइया लोगन मन अपन गांव के जरूरत, समस्या अउ विकास के प्राथमिकता ल तय करे म भागीदारी निभाही। ग्रामसभा म गांव के लोगन मनले मिले सुझाव, स्थानीय संसाधन अउ विकास संबंधी जरूरत के आधार म ग्राम पंचायत के अवइया विकास कार्ययोजना तियार करे जाही।
आंगन मिलन सेवा
‘सेवा संकल्प अभियान‘ के तहत महिला अउ बाल विकास विभाग डहार ले प्रदेसभर के आंगनबाड़ी केंद्र म काली पच्चीस सितंबर ले छै अक्टूबर तक आंगन मिलन सेवा कारीकरम आयोजित करे जाही। स्वास्थ्य अउ परिवार कल्याण विभाग के समन्वय ले होय जात ए पहल के उद्देस्य आंगन बाड़ी केंद्र ले जुड़े माईलोगिन, लइका, माईलोगिन अउ समुदाय ल पोषण, स्वास्थ्य अउ महिला कल्याण योजना के जानकारी ले जोड़ना अउ जनभागीदारी ल मजबूत करना हे।
वित्त मंत्रालय-बैंक
वित्त मंत्रालय ह बतइन हे कि ग्राहक मनके सुविधा बर सबो सार्वजनिक क्षेत्र के बैंक अउ क्षेत्रीय ग्रामीण बैंक रविवार सत्ताईस सितंबर के खुला रइही। मंत्रालय ह किहीन कि ए कदम यूनाइटेड फोरम ऑफ बैंक यूनियंस-यू.एफ.बी.यू. डहार ले अट्ठाईस ले तीस सितंबर तक प्रस्तावित तीन दिन के राष्ट्रव्यापी बैंक हड़ताल के चलत उठाय गेहे। हड़ताल ले पहिली छब्बीस अउ सत्ताईस सितंबर के हफ्ता के आखिरी के छुट्टी घलो हे।
भारतीय रिजर्व बैंक ह सबो बैंक साखा, कार्यालय, एटीएम ले जुड़े साखा अउ करेंसी चेस्ट ल रविवार के पूरा तरीका ले चालू राखेे के मंजूरी देहे। वित्त मंत्रालय ह बतइन कि सरकार अउ बैंक प्रबंधन ह यूनियन मनले प्रस्तावित हड़ताल टाले के अपील करे हे। संगेसंग जरूरी बैंकिंग सेवा मन ल बिना कोनो रूकावट के चालू राखे बर घलो कदम उठाय गेहे।
जूनियर डॉक्टर्स-आंदोलन
जूनियर डॉक्टर्स एसोसिएसन छत्तीसगढ़ ह प्रदेस के शासकीय चिकित्सा महाविद्यालय अउ ओखर ले जुड़े अस्पताल मन म रूके मांग ल लेके आंदोलन के अवइया चरण के घोसना करे हे। संगठन के आह्वान म आज ले प्रदेस के सबो शासकीय चिकित्सा, महाविद्यालय अउ ओखर ले जुड़े अस्पताल मन म ओपीडी सेवा के बहिष्कार करे जात हे। फेर मरीज मन ल असुविधा न हो एखर बर अस्पताल के बाहिर वइसने ओपीडी चालू करके जरूरतमंद मरीज मन ल डॉक्टर मनले परामर्स देवाय जात हे।
भाजपा-केंद्रीय नेतृत्व बदलाव
भारतीय जनता पार्टी के नेतृत्व ह संगठन म बड़का बदलाव करत कर्मवीर ल छत्तीसगढ़ के नवा प्रदेस संगठन महामंत्री नियुक्त करे हे। ओमन प्रदेस महामंत्री पवन साय के जघा लेंही। पवन साय ल झारखंड के जिम्मेदारी सौंपे गेहे। कर्मवीर बछर दू हजार बाईस ले झारखंड के प्रदेस संगठन महामंत्री के रूप म काम करत रिहीन।
उहें, राष्ट्रीय सह-संगठन महामंत्री शिवप्रकाश ल छत्तीसगढ़ के संग मध्यप्रदेस, आंध्रप्रदेस, महाराष्ट्र अउ गोवा के प्रभार सौंपे गेहे।
किरण सिंह देव-रायपुर
भारतीय जनता पार्टी के प्रदेस अध्यक्ष किरण सिंह देव उपचार के बाद काली दिल्ली ले रईपुर लहुटिन। रईपुर विमानतल म पार्टी पदाधिकारी अउ कार्यकर्ता मन ह उंखर सुवागत करीन। श्री देव ह किहीन कि कार्यकर्ता मनके प्रेम अउ विस्वास उंखर सबले बड़का ताकत हे। ओमन ह सुभकामना बर छत्तीसगढ़ के वासी अउ आने-आने दल के लोगन मनके आभार जतइन। श्री देव ह बतइन कि ओमन अवइया दस दिन तक रईपुर म रहिके फिजियोथेरेपी के कोर्स पूरा करही। एखर बाद ओमन दंतेवाड़ा म मां दंतेश्वरी के दर्सन करही अउ जगदलपुर ले प्रदेस प्रवास सुरू करही।
मुख्यमंत्री विष्णुदेव साय ह घलो उंखर स्वस्थ होके लहुटे म सुभकामना देहे।
नीट पीजी-परिणाम
राष्ट्रीय चिकित्सा विज्ञान परीक्षा बोर्ड ह अपन आधिकारिक वेबसाइट म नीट-पीजी दू हजार छब्बीस के परिणाम घोसित कर देहे। बछर दू हजार छब्बीस-सत्ताईस के प्रवेस सत्र के आने-आने एमडी, एमएस, डीएनबी, डॉक्टर एनबी अउ पीजी मेडिकल डिप्लोमा पाठ्यक्रम म प्रवेस बर तीस अगस्त के देसभर म परीक्षा आयोजित करे गे रिहीस।
बोर्ड के अनुसार कुल दू लाख पैंसठ हजार नौ सौ साठ उम्मीदवार मन ह परीक्षा दे रिहीन। बोर्ड ह बतइन कि उम्मीदवार एक अक्टूबर या ओखर बाद आधिकारिक वेबसाइट ले अपन स्कोर कार्ड डाउनलोड कर सकत हे।
नवोदय विद्यालय-आवेदन
जवाहर नवोदय विद्यालय म अवइया सैक्षणिक बछर बर कक्षा नवमीं अउ ग्यारहवीं म प्रवेस बर आवेदन लेके प्रक्रिया सुरू हो गेहे। आवेदन करे के आखिरी तारीख तीस सितंबर हे। दूनों कक्षा म प्रवेस बर चयन परीक्षा दस अप्रैल के होही। नवमीं के परीक्षा संबंधित जिला के जवाहर नवोदय विद्यालय म होही। ग्यारहवीं म प्रवेस खाली सीट के आधार म दे जाही।
टॉय बैंक-खिलौना दान
सेवा संकल्प अभियान के तहत रइपुर म टॉय बैंक के जरिया ले जरूरतमंद लइका मन बर खिलौना इकट्ठा करे गीस। मुख्यमंत्री विष्णुदेव साय ह टॉय बैंक म खिलौना दान कर अभियान के सराहना करीन अउ लोगन मन ले जादा ले जादा सहभागिता देके अपील करीन।
उहंे, प्रमुख सचिव निहारिका बारिक, आयुष विभाग के संचालक राजेन्द्र कुमार कटारा अउ कलेक्टर डॉक्टर गौरव सिंह घलो खिलौना दान करके अभियान म सहभागिता दीन। उंखर संग नब्बे लोगन मन ह टॉय बैंक म खिलौना दान करीन। टॉय बैंक म इकट्ठा खिलौना ल जरूरतमंद लइका मन तीर पहुंचाय जाही।
रोजगार मेला
रईपुर के बलबीर सिंह जुनेजा इंडोर स्टेडियम म सात अउ आठ अक्टूबर के राज्य स्तरीय रोजगार मेला के आयोजन करे जाही। मुख्यमंत्री विष्ण्ुादेव साय के मुख्य आतिथ्य म होवइया ए मेला म तकनीकी अउ गैर तकनीकी क्षेत्र म आठ हजार ले जादा पद म भर्ती करे जाही। रोजगार मेला म सामिल होय के इच्छा राखे वाले अभ्यर्थी राज्य सरकार के अधिकृत रोजगार पोर्टल म ऑनलाइन पंजीयन करा सकत हे। ए दउरान पहिली होवइया रोजगार मेला म चयनित युवा मन ल मुख्यमंत्री नियुक्ति पत्र घलो दिही। जिला प्रशासन ह योग्य युवा मन ले समय म पंजीयन करे के अपील करीन।
बस्तर-दशहरा-डेरी गड़ाई
पचहत्तर दिन तक चलइया विश्व प्रसिध्द बस्तर-दसहरा के तहत आज जगदलपुर स्थित सिरहासार भवन म ‘डेरी गड़ाई‘ के रस्म पूरा होइस। ए रस्म के तहत बस्तर जिला के गांव बिलोरी ले गांव के दू बिसेस लकड़ी के स्तंभ ल लेके सिरहासार भवन पहुंचिन, जेला स्थानीय बोली अउ संस्कृति म डेरी कहे जात हे। एखर बाद सिरहासार भवन म ए लकड़ी के स्तंभ के पांरपरिक मंत्र उपचार अउ पूर्जा अर्चना के बाद स्थापना करे गीस। ए बेरा म सांसद अउ बस्तर दसहरा समिति के अध्यक्ष महेश कश्यप, उपाध्यक्ष बलराम मांझी के संग मांझी-चालकी, नाइक-पाइक, मेम्बर-मेम्बरीन, पुजारी, गायता, सिरहा-गुनिया, पेरमा के संग पारंपरिक मुखिया अउ भक्त मन मौजूद रिहीन।
जानबा के मुताबिक डेरी गड़ाई के रस्म के बाद बस्तर दसहरा बर बड़का दू मंजिला रथ ल बनाय के काम सुरू हो जाथे।
अउ अब पेस मौसम के हाल…
बस्तर संभाग के संग प्रदेस के कतकोन जिला म पाछू चौबीस घंटा ले तेज बरसा होय के जानबा मिले हे। उहें, मौसम विभाग ह बस्तर, सुकमा अउ दंतेवाड़ा जिला बर रेड अलर्ट जारी करे हे।
मौसम विज्ञानी डॉक्टर गायत्री वाणी ह आकाशवाणी समाचार ल बतइन कि चक्रवात ‘अरनव‘ आंध्रप्रदेस तट ल पार करके उत्तर-पश्चिम दिसा डहार ले बाढ़त हे। एखर असर ले अवइया चौबीस घंटा के दउरान दक्षिण छत्तीसगढ़ के सबो जिला म तेज हवा के संग भारी बारिस होही। उहें, रईपुर, दुरूग अउ बिलासपुर जिला के कुछेक जिला म घलो तेज बरसा होय के चेतावनी दे गेहे।
इही बीच, खैरागढ़-छुईखदान-गंडई जिला के झीकादाह गांव म काली खेत म काम करत मजदूर उपर गाज गिर गीस। ए हादसा म एक मजदूर के मउत होगिस। फेर दू आने मजदूर झुलस गीस, जेन मन ल इलाज बर खैरागढ़ के सिविल अस्पताल म भर्ती कराय गेहे।