आयुर्वेद दिवस
आयुष मंत्रालय आज देसभर म ग्यारहवां आयुर्वेद दिवस मनावत हे। मंत्रालय ह केहे हे कि भारत अउ विश्व भर म आयुर्वेद संस्थान अउ एखर ले जुड़े लोगन समारोह म भाग लेवत हे। मंत्रालय ह बताय हे कि ए समारोह आयुर्वेद ले जुड़े हितधारक मन ल संघ लाही अउ जानकारी के अदला-बदला के संग जुराव अउ मंच मिलही।
प्रधानमंत्री नरेंद्र मोदी ह आज आयुर्वेद दिवस के मउका म देसवासी मन ल सुभकामना देत किहीन कि आयुर्वेद सिरिफ उपचार के पध्दति नोहय, भलुक स्वस्थ्य अउ संतुलित जीवनसैली के प्रभावी माध्यम हरय। ओमन लोगन ले ए विरासत ल अउ मजबूती संग अपनाय के संकलप लेके आह्वान करीन।
रक्तदान महाकुंभ
मुख्यमंत्री विष्णुदेव साय ह किहीन हे कि आयुर्वेद भारत के प्राचीन ज्ञान परंपरा के अमूल्य धरोहर हे। राज्य सरकार आधुनिक स्वास्थ्य सेवा संग आयुर्वेद योग अउ प्राकृतिक चिकित्सा ल बढ़ावा देवत हे। मुख्यमंत्री आज रईपुर के सरदार बलबीर सिंह जुनेजा इंडोर स्टेडियम म सेवा संकल्प अभियान म आयुर्वेद सेवा सम्मेलन रक्तदान महाकुंभ अउ जांच सिविर ल संबोधित करत रिहीन। रक्तदान महाकुंभ म तीन हजार छै सौ ले जादा माई लोगन मन पंजीयन कराइन। एके दिन म एक हजार ले जादा महिला मनके रक्तदान के पहल ल गोल्डन बुक ऑफ वर्ल्ड रिकॉर्ड म दरज करे गीस। आयोजन म करीबन ढाई हजार यूनिट रक्तदान के लक्ष्य राखे गे रिहीस। मुख्यमंत्री ह बतइन कि प्रोजेक्ट दधिचि म इकतीस झिन लोगन मन देहदान के संकल्प लीन। कारीकरम म स्वास्थ्य मंत्री श्याम बिहारी जायसवाल घलो मौजूद रिहीन।
आयुष्मान भारत
आयुष्मान भारत योजना के आज आठ बछर पूरा होय म प्रधानमंत्री नरेंद्र मोदी ह किहीन हे कि एखर ले देस के साठ करोड़ लोगन ल पंाच लाख रूपिया तक के स्वास्थ्य सुरक्षा मिले हे, जउन एला दुनिया के सबले बड़े हेल्थकेयर स्कीम बनाथे। आयुष्मान भारत के सबो लाभार्थी मन ल सुभकामना देवत श्री मोदी ह सोसल मीडिया प्लेटफॉर्म म एक्स म ए पोस्ट लिखिन कि आठ बछर पहिली आयुष्मान भारत के सुरूआत ए सोच संग करे गे रिहीस कि हरेक भारतीय ल बने स्वास्थ्य सुबिधा मिल सकय।
भाजपा-प्रदेश प्रभारी
भारतीय जनता पार्टी ह देसभर के सबो राज्य म संगठनात्मक जिम्मेवारी बर प्रभारी अउ सह प्रभारी मनके नियुक्ति कर देहे। छत्तीसगढ़ म पूर्व केंद्रीय मंत्री स्मृति ईरानी ल प्रदेस प्रभारी के जिम्मेवारी सौंपे गेहे। उहें, सिध्दार्थ शंभू ल सह प्रभारी बनाय गेहे। एखर पहिली, नीतिन नबीन छत्तीसगढ़ भाजपा के प्रदेस प्रभारी के जिम्मेवारी संभालत रिहीन।
अइसने, पत्थलगांव विधायक अउ रायगढ़ के पूर्व सांसद गोमती साय ल गुजरात भाजपा के सह प्रभारी अउ छत्तीसगढ़ खनिज विकास निगम के अध्यक्ष अउ पूर्व विधायक सौरभ सिंह ल झारखंड प्रदेस भाजपा के सह प्रभारी बनाय गेहे।
मुख्यमंत्री विष्णुदेव साय ह स्मृति ईरानी ल छत्तीसगढ़ के प्रदेस प्रभारी अउ सिध्दार्थ शंभू ल सह प्रभारी बनाय जाय म बधई अउ सुभकामना दीन हे।
मॉडिफाइड उड़ान योजना
मॉडिफाइड उड़ान योजना के नवा चरण बर भारत सरकार अउ छत्तीसगढ़ शासन के बीच समझौता होय हे। नई दिल्ली म होय समझौता म छत्तीसगढ़ शासन कोति ले विमानन सचिव, मुकेश बंसल ह दस्तखत करीन। मुख्यमंत्री विष्णुदेव साय ह एला प्रदेस बर महत्ता के फइसला बतइन। ओमन किहीन कि एखर ले छोटे-छोटे सहर अउ दूर-दराज के क्षेत्र म हवई अउ हेली कनेक्टिीविटी के बढ़वार होय के संभावना बाढ़ही, जेखर ले पर्यटन, व्यापार अउ रोजगार ल बढ़ावा मिलही।
राम नामी-सम्मान
बहत्तरवां राष्ट्रीय फिल्म पुरस्कार म छत्तीसगढ़ के ‘राम नामी‘ समुदाय के आस्था परंपरा अउ विरासत म आधारित डाक्यूमेंट्री फिल्म ‘राम नामी‘ ल सर्वश्रेष्ठ डाक्यूमेंट्री के राष्ट्रीय पुरस्कार मिले हे। राष्ट्रपति द्रौपदी मुर्मू ह ए सम्मान काली गुजरात म राखे गे एक समारोह म दीन। ए उपलब्धि म मुख्यमंत्री विष्णुदेव साय ह उछाह जतात सोसल मीडिया पोस्ट म लिखिन कि राम के नांव ल समर्पित ए समुदाय के जीवन सैली अउ सांस्कृतिक परंपरा डॉक्यूमेंट्री फिलिम ‘राम नामी‘ ले देस-दुनिया के आगू देखाय गेहे। मुख्यमंत्री ह किहीन कि ए सम्मान प्रदेस के सुघ्घर सांस्कृतिक परंपरा के बढ़वार बर प्रेरणादायी हे।
सेवा संकल्प-अभियान
सेवा संकल्प अउ स्वच्छता ही सेवा अभियान म आज दुरूग जिला के भिलई म स्वच्छता रैली अउ बिसेस स्वच्छता अभियान राखे गीस। नगर-निगम भिलाई के आने-आने जोन क्षेत्र म निकाले गे रैली ले लोगन ल घर-दुवारी, मुहल्ला अउ तीर-तखार म साफ-सफाई राखे बर जागरूक करे गीस। अभियान के दउरान सार्वजनिक जघा तरिया सबो जघा बिसेस सफाई करे गीस। उहें, दुरूग म आज ले आठ अक्टूबर तक ‘सेवा मेरा योगदान उत्सव‘ मनाय जात हे। नगर पालिक निगम दुरूग कोति ले राखे गे ए उत्सव म सेवा, स्वच्छता, जनभागीदारी अउ पर्यावरण संरक्षण ले जुड़े कतकोन कारीकरम होही। उत्सव म आज ले पच्चीस सितंबर अउ दू ले आठ अक्टूबर तक सहर के आने-आने वार्ड हॉट बाजार, प्रमुख रद्दा अउ सार्वजनिक जघा म बिसेस स्वच्छता अभियान चलाय जात हे।
विशेष कार्यक्रम
आकाशवाणी केंद्र रईपुर कोति ले सेवा संकल्प अभियान म बिसेस कारीकरम के श्रृंखला प्रसारित करे जात हे। ए कड़ी म आज संझा सात बजे ‘‘वोकल फॉर लोकल‘‘ म छत्तीसगढ़ खादी ग्रामोद्योग बोर्ड के अध्यक्ष राकेश पांडे ले लेगे भेंटवार्ता के प्रसारण करे जाही। ए कारीकरम ल छत्तीसगढ़ स्थित आकाशवाणी के सबो केंद्र रिले करही।
अउ अब जानन मौसम के हाल…
मौसम विभाग ह अवइया चौबीस घंटा के दउरान दक्षिण छत्तीसगढ़ के कुछेक जिला म भारी बरसा के चेतावनी देहे। मौसम विभाग ह सुकमा बर भारी बरसा के रेड अलर्ट जारी करे हे। उहें, बस्तर, दंतेवाड़ा, बीजापुर, गरियाबंद अउ धमतरी म आरेंज अलर्ट जारी हे। मौसम विज्ञानी डॉक्टर गायत्रीवाणी ह बतइन कि पश्चिम मध्य अउ उत्तर पश्चिम बंगाल के खाड़ी के उपर बने अवदाब चक्रवात म बदल के आज रतिहा विशाखापट्टनम अउ ओडिसा के गोपालपुर तट ले टकराही। एखर परभाव ले अवइया दू-तीन दिन म प्रदेस म मानसून गतिविधि बाढ़े के संभावना हे। अवदाब के आगू बढ़े म मध्य छत्तीसगढ़ के कुछेक जिला रईपुर, दुरूग, बिलासपुर म घलो भारी बरसा के आसार हवय। एखर संगेसंग हवा गरेर अउ गाज गिरे के आसंका जताय गेहे।
ओपन जेल
दुरूग के केंद्रीय जेल म ओपन करेक्शनल इंस्टीट्यूशन-ओ.सी.आई सुरू करे गेहे। एखर सुभारंभ काली जेल महानिदेसक हिमांशु गुप्ता ह करीन। ए मउका म जेल अधीक्षक मनीष संभाकर समेत जेल विभाग के अधिकारी-करमचारी अउ कैदी मौजूद रिहीन। ए खुली जेल म तीस कैदी मन ल रखे जाही। ए बंदी दिन म आने-आने काम बर जेल परिसर ले बाहिर जा सकही अउ संझाकुन वापिस जेल लहुटही। ए संबंध म राज्य शासन ह इक्कीस सितंबर के अधिसूचना जारी करे रिहीस।
रोजगार मेला
प्रदेस के युवा मन ल रोजगार देवाय बर सात अउ आठ अक्टूबर के रईपुर के बलबीर सिंह जुनेजा इंडोर स्टेडियम म राज्य स्तरीय रोजगार मेला लगाय जाही। दू दिवसीय ए मेला म तकनीकी अउ गैर तकनीकी क्षेत्र म आठ हजार ले जादा पद म भर्ती ले जाही। ए आयोजन म मुख्यमंत्री विष्णुदेव साय माई पहुना होही, जउन युवा ई-रोजगार पोर्टल ले ए संबंध म अउ जानकारी लेके संगेसंग रोजगार मेला बर पंजीयन करा सकत हे।
पोषण माह
प्रदेस म राष्ट्रीय पोषण माह म ‘बच्चों की थाली, हम सबकी जिम्मेदारी‘ अउ ‘हमारी आंगनबाड़ी, हमारी जिम्मेदारी‘ के संदेस के संग पोषण अउ स्वच्छता ल लेके जागरूकता अभियान चलाय जात हे। महिला अउ बाल विकास विभाग कोति ले यूनिसेफ के मदद ले प्रदेस के सबो आंगनबाड़ी केंद्र म लइका मन ल गरम ताजा पौष्टिक अउ बने भोजन देवाय बर समुदाय के भागीदारी बढ़ाय म जोर दे जात हे। पोषण माह के दउरान आंगनबाड़ी केंद्र म सुघ्घर रंग-बिरंगा थारी, पोषण मेला, स्वच्छता अभियान अउ आने जागरूकता वाले काम करे जात हे।
राष्ट्रीय मानसिक स्वास्थ्य
मानसिक स्वास्थ्य सेवा के गुणवत्ता अउ पहुंच बने बनाय खातिर रईपुर म दू दिवसीय राज्य स्तरीय राष्ट्रीय मानसिक स्वास्थ्य कार्यसाला लगाय गीस। स्वास्थ्य सेवा के संचालक संजीव कुमार झा के अगुवई म राखे गे कार्यसाला म प्रदेस के सबो जिला ले करीबन दू सौ प्रतिभागी मन भाग लीन। कार्यसाला म जिला मानसिक स्वास्थ्य कारीकरम के समीक्षा करे गीस। कार्यसाला म बिसेसज्ञ मन ह आत्महत्या के चेतावनी संकेत के पहिचान, मनोवैज्ञानिक प्राथ्मिक मदद, मादक पदार्थ सेवन ले जुड़े समस्या के पहिचान अउ नसा मुक्ति सेवा के जानकारी दीन।