अंतर्राष्ट्रीय जल सप्ताह
उपराष्ट्रपति सी.पी. राधाकृष्णन ह आज नई दिल्ली म नौवां भारत अंतर्राष्ट्रीय जल सप्ताह के उद्घाटन करीन। ए मउका म ओमन जल के सही उपयोग अउ संरक्षण उपर जोर दीन। संगेसंग ओमन जल प्रबंधन बर जादा मदद अउ समन्वित दृष्टकोण के जरूरत उपर जोर दीन। उपराष्ट्रपति ह कहिन कि पानी हमर जीवन बर अनमोल हे। ओमन किहीन कि भावी पीढ़ी ल पानी के कीमत समझना होही।
केन्द्रीय जल शक्ति मंत्री सी.आर. पाटिल ह किहीन कि सरकार देस के हर लोगन मन ल सुरक्षित अउ पर्याप्त पेयजल उपलब्ध कराय बर प्रतिबद्ध हे। ओमन किहीन कि जल सुरक्षा विकसित भारत-दू हजार सैंतालीस के नींव हे।
अमित शाह राष्ट्रीय सम्मेलन
केंद्रीय गृह मंत्री अमित शाह ह आज नई दिल्ली म राज्य अउ केंद्रशासित प्रदेश मन म मादक पदार्थरोधी कार्यबल के मुखिया मनके तीसर राष्ट्रीय सम्मेलन के सुभारंभ करीन। दू दिन के ये सम्मेलन के उद्देश्य मादक पदार्थ मनके परेसानी ले भावी पीढ़ी मन ल सुरक्षा दे उपर विचार विमर्श करना हे। ए सम्मेलन म छत्तीस राज्य अउ केंद्रशासित प्रदेश मनके मादक पदार्थरोधी कार्य बलके मुखिया भाग लेवत हे। सम्मेलन के विसय हे – सामूहिक संकल्प साझा दायित्व
सम्मेलन म स्वापक नियंत्रण दू हजार छब्बीस-उनतीस के निर्धारित लक्ष्य ल प्राप्त करे म कार्यबल के भूमिका उपर गोठबात करे जाही। संगेसंग मादक पदार्थ मनके आपूर्ति मांग अउ ओखर ले होवइया नुकसान म कमती करे म केंद्र सरकार के उपाय ल अउ मजबूत करे के दिसा म उपयुक्त नीती अपनाय उपर ध्यान दे जाही।
ए मउका म गृहमंत्री ह स्वापक नियंत्रण ब्यूरो के नवा वेबसाइट के घलो शुभारंभ करीन।
व्याख्याता भर्ती-विज्ञान
लोक सिक्षक संचालनालय ह स्कूल सिक्षा विभाग के तहत व्याख्याता के आठ सौ चौव्वन पद पर भर्ती के विज्ञापन जारी कर देहे। ए भर्ती कुल आठ बिसय मन बर करे जाही। ऐमा सबसे जादा पद हिन्दी, अंग्रेजी अउ संस्कृति बिसय म हे। ए तीनों बिसय म कुल तीन सौ साठ पद भरे जाही। भर्ती परीक्षा के आयोजन छत्तीसगढ़ कर्मचारी चयन मंडल-सीजी.एस.एस.बी अउ व्यापमं डहार ले करे जाही। व्यापमं ह भर्ती के संभावित परीक्षा तारीख उनतीस नवंबर तय करे हे।
जनजातीय आयोग-भ्रमण
राष्ट्रीय अनुसूचित जनजाति आयोग के टीम छत्तीसगढ़ म जनजातीय समुदाय मनले जुड़े आने आने मामला मनके जमीनी स्थिति जाने बर चार जिला मनके दौरा म हे। बीस ले पच्चीस सितंबर तक आयोग के टीम रायपुर, सक्ति, जशपुर अउ कंाकेर जिला म जनजातीय आवासीय छात्रावास के अचानके जांच, गांव घूम-घूमके अउ समुदाय के लोगन ले सीधा गोठबात करत हे।
टीम नागवंशी, संसारी उरांव, पहाड़ी कोरवा अउ दिहाड़ी कोरबा समुदाय ले जुड़े छेत्र मनम पहुंचके उंखर समस्या अउ सिकायत ले जुड़े अभ्यावेदन घलो लीही। जशपुर म आज अउ काली दू दिन बर टीम डहार ले विसेस रूप ले जनजातीय गांव मनके भ्रमण करे जाही। उंहे कांकेर म चौबीस सितंबर के जनजाति महिला जनप्रतिनिधि मनके सशक्तिकरण उपर संवाद कार्यक्रम होही। एमा पंचायत अउ जिला स्तर के जनप्रतिनिधि मन शामिल होही।
दउरा के आखरी दिन पच्चीस सितंबर के रायपुर म आयोग म लंबित प्रकरण ल लेके संबंधित अधिकारी और प्राधिकारी मनके साथ बैठक होही।
माओवादी डंप-बरामद
बीजापुर जिला म सुरक्षा बल ह भूईंया म लुका के राखे गे एक माओवादी डंप ले बड़ मात्रा म हथियार अउ गोला-बारूद बरामद करे हे। मिले खबर के मुताबिक बेदरे थाना क्षेत्र के लंका-पहाड़ी के जंगल म तलाशी अभियान के दउरान सुरक्षा बल ह एसएलआर-एलएमजी रायफल, इंसास रायफल, तीन सौ पन्द्रह बोर के बंदूक, बीजीएल लांचर, बीजीएल सेल, हैंड ग्रेनेड, कारतूस अउ मैगजीन बरामद करे हे।
उहें, भैरमगढ़ थाना क्षेत्र के आदवाड़ा जंगल ले घलो एके-फोर्टी सेवन रायफल, तीन सौ पन्द्रह बोर के बंदूक समेत जिंदा कारतूस अउ मैगजीन बरामद करे गेहे। मिरतुर अउ भोपालपट्टनम क्षेत्र ले घलो माओवादी सामान बरामद करे गेहे।
आयुर्वेद दिवस
देशभर म काली तेईस सितंबर के ग्यारहवंा आयुर्वेद दिवस मनाय जाही। ए बछर के विसय हे- स्वस्थ भविष्य बर आयुर्वेद । आयुष मंत्रालय ह बताइन हे कि तीस राज्य अउ केंद्रशासित प्रदेश मनम नौ हजार सात सौ ले जादा कार्यक्रम राखे गेहे। आयुर्वेद मंत्रालय ह कहिन हे कि छत्तीसगढ़, उत्तरप्रदेश, महाराष्ट्र अउ मध्यप्रदेश समेत राज्य मनम बने भागीदारी दर्ज करे गेहे।
महिला श्रम बल भागीदारी
महिला श्रम बल भागीदारी दर म सरगुजा ह देस म चौथा अउ रइपुर ह देस के राजधानी मन म एल.एफ.पी.आर अउ डब्ल्यू.पी.आर. दूनों केटेगरी म तीसर स्थान पाय हे। छत्तीसगढ़ के ये उपलब्धि म मुख्यमंत्री विष्णुदेव साय ह खुसी जतावत कहिन हे कि राष्ट्रीय सांख्यिकी कार्यालय के पहिली जिला स्तरीय श्रम बाजार रिपोर्ट म रायपुर अउ सरगुजा के देस के अव्वल जिला मन म जगा बनाना छत्तीसगढ़ बर गौरव के बात हे।
शिक्षा विभाग-पेंशन प्रकरण
स्कूल शिक्षा विभाग ह जम्मों लंबित पेंसन प्रकरण मनके व्यक्तिगत रूप ले जांच करके तीस सितंबर तक निराकरण करे के निरदेस दीन हे। विभाग ह मार्च दू हजार सत्ताईस तक रिटायर होवइया सिक्षक अउ कर्मचारी मनके सेवा पुस्तिका अउ पासबुक ल पहिली ले पूरा करे बर कहिन हे। सेवा पुस्तिका म तनखा निर्धारण के जांच अउ सत्यापन कोष अउ लेखा ले कराय के निरदेस दे गेहे। अक्टूबर दू हजार छब्बीस ले रिटायर होवइया कर्मचारी मनके पेंसन भुगतान आदेस अउ रिटायर बेनिफिट महीनच म जारी करे बर केहे गेहे।
सरगुजा-पोषण माह
सरगुजा जिला के लखनपुर विकासखंड के लहपटरा गांव म पोषण माह के तहत विशेष जागरूकता कार्यक्रम राखे गीस। केन्द्रीय संचार ब्यूरो, अंबिकापुर डहार ले राखे गे ए कार्यक्रम म माईलोगिन अउ लइका मन ल संतुलित आहार, स्वास्थ्य अउ स्वच्छता बर जागरूक करे गीस। ए दउरान मेहंदी, रंगोली अउ स्वस्थ शिशु प्रतियोगिता आयोजित करे गीस। लोक कलाकार मन ह गीत अउ सांस्कृतिक प्रस्तुति के माध्यम ले पोषण अउ स्वच्छता के संदेस दीन।
विशेष-कार्यक्रम
आकाशवाणी केन्द्र रायपुर डहार ले सेवा संकल्प अभियान के तहत विशेष कार्यक्रम के श्रृंखला प्रसारित करे जावत हे। इही कड़ी म आज संझा सात बजे नवा श्रम संहिता म क्षेत्रीय भविष्यनिधि आयुक्त गौरव डोगरा ले लेगे भेंटवार्ता के प्रसारण करे जाही। ए कार्यक्रम ल छत्तीसगढ़ स्थित आकाशवाणी के जम्मों केन्द्र रिले करही।
बीएसपी हादसा
भिलाई स्टील प्लांट के ब्लास्ट फर्नेंस क्रमांक-छै म आज बीहनिया हादसा म एक ठेका श्रमिक के मउत होगे। हादसा करीबन साढ़े आठ बजे स्लैग साइड म पुशर कार म काम करे पकिे दउरान होइस। मृतक विनोद कुमार पुशर कार म कपलिंग बेल्ट लगाय के काम करत रीहिस हे इही दउरान पुशर काम अचानक चालू होगे, जेखर चपेट म आके वो गंभीर रूप ले घायल होगे। हादसा के कारण के जाचं करे जावत हे।
खिलाड़ी चयन ट्रायल
खेल अउ युवा कल्याण विभाग डहार ले रायपुर जिला म संचालित गैर आवासीय खेल अकादमी म प्रवेश अउ प्रवेश के नवीनीकरण बर तेईस अउ चौबीस सितंबर के चयन ट्रायल के आयोजन करे जाही। एमा भाग लेवइया इच्छुक खिलाड़ी काली तेइस सितंबर के रायपुर के कोटा स्थित स्वामी विवेकानंद स्टेडियम म बीहनिया सात बजे ले ग्यारा बजे तक पंजीयन करा सकत हे।
विभाग के अधिकारी मन ह बताइन हे कि गैर आवासीय बालक-बालिका तीरंदाजी अउ बालिका मनके फुटबॉल बर ट्रायल काली कोटा स्थित स्वामी विवेकानंद स्टेडियम अउ तीरंदाजी एरिना म होही। उंहे गैर आवासीय बालक बालिका हॉकी अउ एथलेटिक्स बर ट्रायल चौबीस सितंबर के स्वामी विवेकानंद स्टेडियम अउ हॉकी स्टेडियम म आयोजित करे जाही। चयन ट्रायल म राज्य के खिलाड़ी अउ आने आने राज्य मनके तेरा ले सतरा बछर उमर के खिलाड़ी मन सामिल हो सकत हे।
खेल विभाग-कार्रवाई
बिलासपुर के बहतराई स्थित खेलो इंडिया स्टेट ऑफ एक्सीलेंस म खिलाड़ी मनके खाना के गुणवत्ता ले मिले सिकायत उपर खेल अउ युवा कल्याण विभाग ह कार्रवाई सुरू करे हे। विभाग ह संबंधित सहायक संचालक अउ भोजन प्रदायक फर्म ल नोटिस जारी कर चौबीस घंटा म जवाब मांगे हे। उहें, मामला के जांच बर दू अधिकारी मनके समिति गठित करे गेहे। जांच रिपोर्ट के आधार म आगू के कार्रवाई करे जाही।