मुख्यमंत्री ओडिशा प्रवास
मुख्यमंत्री विष्णुदेव साय ह किहीन हे कि छत्तीसगढ़ अउ ओडिसा के बीच लंबा बेरा ले चलत महानदी जल विवाद के बहुत जल्दी समाधान निकले के उम्मीद हरय। श्री साय ह काली भुवनेश्वर म ओडिसा के मुख्यमंत्री मोहन चरण मांझी ले ओखर निवास म भेंट करीन। ए दउरान दूनों मुख्यमंत्री मन आपसी सहयोग, विकास अउ जन कल्याण समेत आने-आने बिसय उपर चर्चा करीन। मुख्यमंत्री श्री साय ह बतइन कि केंद्र सरकार के सहयोग अउ दूनों राज्य के सकारात्मक पहल ले महानदी जल विवाद के समाधान के दिसा म सकारात्मक वातावरण बने हे।
मुख्य सचिव-कलेक्टर बैठक
प्रदेस म ए दिन म ‘सेवा संकल्प अभियान‘ संचालित करे जात हे। ए सिलसिला म मुख्य सचिव विकाससील ह आज मंत्रालय ले जम्मो जिला के कलेक्टर मन संग वीडियो कॉन्फ्रेंसिंग के जरिया अभियान के तहत संचालित गतिविधि मनके समीक्षा करीन। मुख्य सचिव ह जिला कलेक्टर अउ अधिकारी मन ल निरदेस दीन कि जिला म अभियान के गतिविधि ल प्रभावी ढंग ले आयोजित करत जादा ले जादा मनखे, स्वयं सेवी संस्था अउ सामाजिक संगठन के भागीदारी सुनिश्चित करे जाय। मुख्य सचिव ह कलेक्टर मनले किहीन कि जिला म ब्लाक अउ तहसील स्तर म आयोजित होवइया सिविर मन म लोगन मन ल भागीदार बनाके ओमन के समस्या के तुरते निराकरण करे जाय। ओमन किहीन कि ए सिविर म केंद्रशासन के चिन्हाय छब्बीस प्रमुख योजना मन ल सामिल करे जाना हे।
सेवा संकल्प अभियान
सेवा संकल्प अभियान के तहत छत्तीसगढ़ के आने-आने जिला म सेवा, स्वच्छता अउ जन कल्याण के संदेस दे जात हे। एखर तहत महिला अउ बाल विकास विभाग डहार ले प्रदेसभर के आंगनबाड़ी केंद्र मन म पच्चीस सितंबर ले छै अक्टूबर तक ‘आंगन मिलन सेवा‘ कारीकरम राखे जाही। स्वास्थ्य अउ परिवार कल्याण विभाग के समन्वय ले आयोजित ए पहल के उद्देस्य आंगनबाड़ी केंद्र ले जुड़े महतारी, लइका, महिला अउ समुदाय ल पोषण, स्वास्थ्य अउ महिला कल्याण योजना के जानकारी ले जोडे़ के संग जनभागीदारी ल मजबूत करना हे।
इही कड़ी म खैरागढ़ जिला म काली बाईस सितंबर ले पंद्रह अक्टूबर तक बाजार अउ महाविद्यालय मन म संगीतमय अउ नुक्कड़ नाटक राखे जाही। उहें, कोंडागांव म विद्यार्थी मन चित्रकला, भाषण अउ नाटक के माध्यम ले सेवा, स्वच्छता अउ विकसित भारत के संदेस दीन। अंबिकापुर के घोघरा जलासय म जन प्रतिनिधि, ग्रामीण अउ विभागीय कर्मचारी मन श्रमदान अउ पउधा रोपन करके जल संरक्षण अउ स्वच्छता के सामूहिक सपथ लीन।
सेवा संकल्प अभियान-कैप्सूल
प्रधानमंत्री नरेंद्र मोदी के सार्वजनिक जीवन म पच्चीस बछर पूरा होवत हे। उंखर ए यात्रा ‘‘जन सेवा से देस सेवा‘‘ के मंत्र अउ सरलग समर्पन ल परिभाषित करत हे, जउन आज घलो जारी हे।
सेवा अउ सुशासन के इही सोच ले प्रेरित होके सरकार ह बछर-दू हजार सैंतालीस तक विकसित भारत बनाय के लक्ष्य ल हासिल करे के दिसा म आगू बाढ़त हे।
आज के बिसेस श्रृंखला ‘‘सेवा संकल्प अभियान‘‘ म हमन आपमन ल आकांक्षीय जिला मन म स्वास्थ्य, शिक्षा बुनियादी सुविधा अउ आजीविका के क्षेत्र म करे जात परयास ल बताबो।
नीति आयोग के आकांक्षीय जिला कारीकरम के तहत प्रदेस के दस जिला सामिल हे। एमा बस्तर, बीजापुर, दंतेवाड़ा, कांेडागांव, कोरबा, महासमुंद, नारायणपुर, राजनांदगांव, सुकमा अउ उत्तर-बस्तर, कांकेर सामिल हे।
स्कूल-अवकाश
छत्तीसगढ़ के स्कूल मन म अवइया तिहार अउ शीतकालीन छुट्टी ल लेके स्कूल शिक्षा विभाग ह अवकास के घोसना कर देहे। विभाग कोति ले जारी आदेस के अनुसार दसहरा, देवारी अउ सीतकालीन अवकास बर कुल पंद्रह दिन के छुट्टी निर्धारित करे गेहे। जारी आदेस के मुताबिक ए बछर दसहरा अवकास सत्रह अक्टूबर ले इक्कीस अक्टूबर तक रइही। अइसने, देवारी अवकास छै नवंबर ले दस नवंबर तक निर्धारित करे गेहे। ए बछर दसहरा अउ देवारी दूनों तिहार म स्कूल मन म पांच-पांच दिन के छुट्टी रइही। उहें, साल के आखिरी म सीतकालीन छुट्टी चौबीस दिसंबर ले अट्ठाईस दिसंबर तक रइही।
जूनियर डॉक्टर-हड़ताल स्थगित
स्वास्थ्य मंत्री श्याम बिहारी जायसवाल के संग होय बइठका म प्रदेस के जूनियर डॉक्टर मन आज ले प्रस्तावित अनिश्चित कालीन हड़ताल फिलहाल स्थगित कर देहे। जेडीए ह कहे हे कि सात दिन के अवधि म मांग ल लेके लोक तांत्रिक तरीका ले विरोध जारी रइही। एखर तहत डॉक्टर ब्लैक रिबन प्रोटेस्ट कैंडल मार्च, रैली अउ सांतिपूर्ण प्रदर्सन करही। संगठन के कहना हे कि मरीज मन ल कोनो तरह के परेसानी झन होवय। एला धियान म राखत हड़ताल ल आगू बढ़ाय गेहे।
बीजापुर-डंप बरामद
बीजापुर जिला के भैरमगढ़ थाना क्षेत्र म पुलिस ह आत्मसमर्पित माओवादी मन ले मिले सूचना के आधार म ग्राम उतला के जंगल म जमीन के अंदर लुकाय गे डंप जब्ती करे हे। माओवादी मनके ए डंप ले एक ठिन एके सैंतालीस रायफल, एक ठिन तीन सौ पंद्रह बोर रायफल, एक ठिन सिंगल सार्ट रायफल अउ एक ठिन नौ एमएम पिस्टल समेत एक सौ ले जादा जिंदा कारतूस अउ दू ठिन एके सैंतालीस मैंग्जीन मिले हे।
परिवहन निगम-अनुकंपा नियुक्ति
छत्तीसगढ़ सरकार ह विघटित परिवहन निगम के दिवंगत कर्मचारी मनके आश्रित परिजन मन ल अनुकंपा नियुक्ति देके दिसा म अहम निरनय लेहे। प्रदेस म पहिली विघटित परिवहन निगम के दिवंगत कर्मचारी मनके आश्रित सदस्य ल आने-आने कारण के सेति लंबा बेरा ले अनुकंपा नियुक्ति नइ दे जा सके हे। सामान्य प्रसासन विभाग के अधिकारी मन ह बतइन कि उच्च न्यायालय डहार ले नवा नीति बनाय के संबंध म दे गे निरदेस अउ प्रभावित परिवार के भलाई ल धियान म राखत एक ठिन सात सदस्यीय अंतर्विभागीय समिति के गठन करे गेहे। ए समिति एक महिना के अंदर अपन रिपोर्ट सरकार ले सौंपही।
उपमुख्यमंत्री-कबड्डी प्रतियोगिता
उपमुख्यमंत्री अरूण साव ह चांपा के सरस्वती शिशु मंदिर म राखे गे कबड्डी प्रतियोगिता के समापन समारोह म विजेता खिलाड़ी मन ल आज पुरस्कार प्रदान करीन। श्री साव ह जम्मों खिलाड़ी मन ल अवइया अखिल भारतीय स्तर के प्रतियोगिता बर सुभकामना दीन। तीन दिन के प्रतियोगिता म चार प्रांत ले कक्षा छठवीं ले बारहवीं तक के तीन सौ ले जादा खिलाड़ी मन आने-आने वर्ग म अपन प्रतिभा के प्रदर्सन करीन।
विशेष कार्यक्रम
आकाशवाणी केंद्र रईपुर डहार ले सेवा संकल्प अभियान के तहत बिसेस कारीकरम के श्रृंखला प्रसारित करे जात हे। इही कड़ी म आज संझा सात बजे स्टार्टअप इंडिया के तहत जशप्योर ब्रांड के संबंध म युवा वैज्ञानिक अउ बिसेसज्ञ समर्थ जैन ले लेगे भेंटवार्ता के प्रसारण करे जाही। ए कारीकरम ल छत्तीसगढ़ स्थित आकाशवाणी के जम्मों केंद्र रिले करही।
दुर्घटना
बिलासपुर जिला के रतनपुर थाना क्षेत्र म पुड्डु गांव करा पाछू रतिहा दू ठिन तेज रफ्तार मोटर साइकिल के आमने-सामने जोरदरहा भिडंत होगे। हादसा म दू झिन युवक के मउत होगे, जबकि दू झिन दूसर मनखे गंभीर रूप ले घायल हे। जेमन ल इलाज खातिर अस्पताल म भर्ती कराय गेहे।
उहें, बालोद जिला म घलो पाछू रतिहा तेज रफ्तार कार के टक्कर ले बाइक म सवार दू झिन लइका मन के मउत होगे, जबकि एक झिन दूसर गंभीर रूप ले घायल हे। हादसा देवरी थाना क्षेत्र के परसुली गांव करा होइस। हादसा के बाद कार चालक अउ ओखर साथी गाड़ी छोड़के मउका ले फरार हो गेहे।
धोखाधड़ी-आरोपी गिरफ्तार
धमतरी जिला के भखारा पुलिस ह बैंक खाताधारक मनले धोखाधड़ी अउ बड़का रकम के गबन के मामला म एसबीआई ग्राहक सेवा केंद्र के संचालक ल गिरफ्तार करे हे। ए मामला म आरोपी उपर एक करोड़ रूपिया ले जादा के रासि के गबन के आरोप हे। आरोपी कोरा गांव म भारतीय स्टैट बैंक ले अनुबंध के आधार म ग्राहक सेवा केंद्र के संचालन करत रिहीस।
इंडिया इंडस्ट्रियल फेयर
वित्त मंत्री ओपी चौधरी ह किहीन हे कि सरकार लघु उद्योग अउ एमएसएमई ल मजबूत करके विकसित छत्तीसगढ़ के निर्माण के रोडमैप तियार करत हे। रईपुर म राखे गे चौदहवां इंडिया इंडस्ट्रियल फेयर के कारीकरम ल संबोधित करत ओमन राज्य म एमएसएमई, स्टार्टअप, विनिर्माण, निवेस अउ रोजगार ल बढ़ावा देबर अनुकूल औद्योगिक वातावरण तियार करे उपर जोर दीन।