एलपीजी-आधार प्रमाणीकरण
केंद्र सरकार ह एसो 1 अक्टूबर ले सब्सिडी वाला घरेलू एलपीजी रिफिल बर बायोमेट्रिक आधार प्रमाणीकरण अनिवार्य कर देहे। पेट्रोलियम अउ प्राकृतिक गैस मंत्रालय के बयान म केहे गिस कि-घरेलू एलपीजी ग्राहक मन ल तय खुदरा ब्रिकी मूल्य अउ लागू सब्सिडी उपर रिफिल बुक कराय बर बायोमेट्रिक आधार प्रमाणीकरण पूरा करे बर परही। एखर ले सुनिश्चित होही कि सब्सिडी वाला एलपीजी सिरिफ वास्तविक अउ जरूरतमंद परिवार तक ही पहुंचय।
मुख्यमंत्री-मुलाकात
ओडिसा प्रवास के दउरान मुख्यमंत्री विष्णुदेव साय ह आज भुवनेश्वर म ओडिसा के मुख्यमंत्री मोहन चरण माझी ले भेंट करिन। ए मउका म दूनों मुख्यमंत्री के बीच छत्तीसगढ़ अउ ओडिसा के आपसी सहयोग, बिकास अउ जन कल्याण ले जुड़े आने-आने बिसय उपर गोठबात होइस। ए दउरान श्री साय ह किहीन कि- छत्तीसगढ़ अउ ओडिसा पड़ोसी राज्य होय के संगेसंग सामाजिक, सांस्कृतिक अउ ऐतिहासिक रूप ले घलो एक-दूसर ले जुड़े हें। दूनों राज्य के सीमा इलाका म रहइया लोगन के बीच घलो आत्मीय संबंध हे।
वीबी-जीरामजी योजना
विकसित भारत-रोजगार अउ आजीविका गारंटी मिसन ग्रामीण यानी वीबी-जीरामजी योजना के तहत अनुमेय कारज के संख्या 318 ले बढ़ाके 375 कर दे गेहे। पंचायत अउ ग्रामीण विकास मंत्री विजय शर्मा ह एखर सेती खुसी जतावत किहीन कि एखर ले बिकास कारज ल गति मिलही। ए योजना के तहत 375 अनुमेय कारज ल 4 श्रेणी अउ 30 उप-श्रेणी म बेवस्थित करे गेहे, जेमा 68 प्रकार के व्यक्तिगत कारज, 99 प्रकार के मरम्मत अउ रख-रखाव ले जुड़े कारज के संग समूह अउ सामुदायिक उपयोग ले जुड़े कारज सामिल हे। अनुमेय कारज के जानकारी हर ग्रामीण तक आसानी ले पहुंचय एखर बर राज्य म क्यूआर कोड घलो जारी करे गेहे।
श्री शर्मा ह बतइन कि- छत्तीसगढ़ सरकार ह योजना के प्रभावी क्रियान्वयन बर एसो के बजट म 4 हजार करोड़ रूपिया के प्रावधान करे हे। वीबी-जी-राम-जी योजना के तहत अकुसल श्रमिक मनके मजदूरी दर 261 रूपिया ले बढ़ाके 300 रूपिया प्रतिदिन करे गेहे।
मिशन अमृत-उद्यान
‘‘मिशन अमृत टू प्वाइंट ओ‘‘ के तहत प्रदेस के अहिवारा, मुंगेली अउ कांकेर म करीबन सात करोड़ उनतंीस लाख रूपिया के लागत ले आधुनिक उद्यान विकसित करे जाही। मुख्यमंत्री विष्णुदेव साय ह किहीन हे कि-ए उद्यान मन ले सहर मन म हरियाली बाढ़े के संग नागरिक मन ल बढ़िया सुविधा वाला सार्वजनिक जघा मिलही। ए तीनों उद्यान म 8 हजार ले जादा पउधा घलो लगाय जाही। संगेसंग लइका मन बर खेले बर जघा, खेल उपकरण, नागरिक मन बर खुला जिम, पाथवे अउ बइठे के जघा संग आराम करे के बेवस्था घलो करे जाही।
मुख्यमंत्री-अग्र महाकुंभ
मुख्यमंत्री विष्णुदेव साय ह काली अंबिकापुर म दू दिन के ‘‘अग्र महाकुंभ‘‘ के सुभारंभ करिन। ए मउका म मुख्यमंत्री ह किहीन कि राज्य के औद्योगिक नीति ले प्रदेस म निवेस अउ रोजगार ले नवा गति मिलत हे। अब तक करीबन 8 लाख 23 हजार करोड़ रूपिया ले जादा के निवेस प्रस्ताव आ चुके हे। बतादन कि कारीकरम के दउरान मुख्यमंत्री ह 11 अक्टूबर के अग्रसेन जयंती के मउका म प्रदेस म सरकारी छुट्टी के घोसना करिन।
अरूण साव-निर्देश
उपमुख्यमंत्री अउ लोक निर्माण मंत्री अरूण साव ह राष्ट्रीय राजमार्ग संगे प्रदेस के जम्मो जर्जर सड़क अउ पुल-पुलिया के मरम्मत पंद्रह अक्टूबर तक पूरा करे कि निरदेस दीन हे। श्री साव ह काली लोक निर्माण विभाग के मुख्य अभियंता, अधीक्षण अभियंता अउ कार्यपालन अभियंता मनके बइठका लेके प्रदेसभर के सड़क अउ पुलिया मनके स्थिति के समीक्षा करिन। ओमन अवइया 2-3 दिन म अधिकारी मन ल अपन-अपन इलाका के भ्रमन करके स्थिति के जायजा लेेय बर घलो किहीन। संगेसंग सेवा संकल्प अभियान के दउरान ‘‘स्वच्छता ही सेवा‘‘ के तहत लोक निर्माण विभाग के सबो कार्यालय म साफ-सफाई करे के निरदेस देइन हे।
जीएसटी-छापा
सेंट्रल जीएसटी के टीम ह आज दुरूग जिला के कुम्हारी म एक ठन गुटखा फैक्ट्री म छापा मारिस। ए बेरा जीएसटी टीम ह दू ठन मसीन अउ करीबन 30 बोरा गुटखा जब्त करे हे।
मिले जानकारी ले सेंट्रल जीएसटी के टीम ल कुम्हारी के स्टेसन चौक इलाका म अवैध रूप ले गुटखा बनाय के खबर मिले रिहीस हे। ओखरे आधार म आज बिहनिया अधिकारी मन छापा मार के गोदाम के भीतर राखे सबो जिनिस अउ मसीन के जांच करिन।
संस्कृति विभाग-आवेदन
संस्कृति विभाग डहार ले 12 ठन राज्य स्तरीय अउ एक ठन राष्ट्रीय सम्मान बर प्रविष्टी आमंत्रित करे गेहे, जेमा कला, साहित्य, संस्कृति अउ सामाजिक क्षेत्र म बड़का योगदान देवइया मन निर्धारित प्रारूप म पांच अक्टूबर तक आवेदन कर सकत हें। चयनित प्रतिभा मन ल छत्तीसगढ़ राज्य स्थापना दिवस के मउका म आयोजित राज्य अलंकरण समारोह म सम्मानित करे जाही। संस्कृति विभाग ह पात्र कलाकार, साहित्यकार, सांस्कृतिक कर्मी अउ आने-आने प्रतिभा मनले निर्धारित प्रारूप म अपन प्रविष्टि ल पंजीकृत डाक ले भेजे के आग्रह करे हे। ये सम्मान के नियमावली अउ आवेदन के प्रारूप विभाग के वेबसाइट म उपलब्ध हे।
आकाशीय बिजली-मौत
प्रदेस म बीते चौबीस घंटा के दउरान दू जघा गाज गिरे ले चार लोगन के मउत होगे। उहें, पांच झन आने लोगन झुलस गिन।
पहिली, घटना जांजगीर जिला के महुदा गांव हे, जिंहा गाज गिरे ले तीन लोगन के मउत हो गिस। उहें, चार झिन आने लोगन झुलस गिन। ए सबो झन बारी म बूता करत रिहीन, ओतकिच बेर पानी गिरे सुरू होय ले कुरिया म जाके रूके रिहीन। इही बेरा कुरियच म गाज गिरे ले हादसा होइस।
दुसरइया घटना अलकतरा के बताय जावत हे। जिहां खेत ले बूता करके लहुटत बेरा गाज गिरे ले एक झन किसान के मउत होगे। उहें, एक झन आने मनखे झुलस गिस।
आयुष स्वास्थ्य शिविर
11वां राष्ट्रीय आयुर्वेद दिवस के मउका म आयुष विभाग डहार ले दंतेवाड़ा के माई दंतेश्वरी मंदिर परिसर म आज ले चार दिन के निसुल्क स्वास्थ्य सिविर के आयोजन करे जावत हे। 23 ंिसतंबर तक चलइया ए सिविर म लोगन के स्वास्थ्य परीक्षण, मुफत म दवा के संग योगाभ्यास, पंचकर्म के तहत नस्य अउ प्राकृतिक चिकित्सा ले जुड़े परामर्स दे जाही।
सेवा संकल्प अभियान-कैप्सूल
प्रधानमंत्री नरेंद्र मोदी के सार्वजनिक जीवन म पच्चीस बछर पूरा होवत हे। उंखर ए यात्रा ‘‘जन सेवा से देस सेवा‘‘ के मंत्र अउ सरलग समर्पन ल परिभाषित करत हे, जउन आज घलो जारी हे।
सेवा अउ सुशासन के इही सोच ले प्रेरित होके सरकार ह बछर-दू हजार सैंतालीस तक विकसित भारत बनाय के लक्ष्य ल हासिल करे के दिसा म आगू बाढ़त हे।
समावेसी बिकास अउ सामाजिक सशक्तिकरण के जरिया ले ए उदिम ह लोगन के जिनगी म बदलाव लानत हे।
आज के बिसेस श्रृंखला ‘‘सेवा संकल्प अभियान‘‘ म हमन आपमन ल श्री अन्न याने मिलेट्स ल बढ़ावा देय बर राज्य सरकार के उदिम ले अवगत कराबो।
छत्तीसगढ़ म पारंपरिक अनाज मन ल बढ़ावा देय बर बछर-दू हजार इक्कीस म छत्तीसगढ़ मिलेट मिसन सुरूआत करे गे रिहीस। मिसन के उद्देस्य खेती ले उपभोग तक मिलेट के मूल्य श्रृंखला ल मजबूत करे बर हे। ए मिसन के तहत राज्य म मुख्य रूप ले कोदो, कुटकी अउ रागी के खेती ल जादा महत्ता दे जावत हे। ए मिसन बर 5 साल म 170 करोड़ रूपिया के बजट के घलो प्रावधान करे गिस।
मिलेट अब सिरिफ खेत तक सीमित नइ हे, भलूक एला पौष्टिक खाद्य पदार्थ अउ मूल्यवर्धित उत्पाद ले जोड़े बर घलो जोर दे जात हे।
श्री अन्न ल बढ़ावा देय के ए उदिम ह किसान मनके आय के नवा अवसर के संगेसंग पौष्टिक अउ जलवायु अनुकूल खेती ल बढ़ावा देय बर घलो महत्वपूर्ण हे। छत्तीसगढ़ म मिलेट्स मिसन के जरिया ले पारंपरिक फसल मन ल नवा चिन्हारी देय के संगेसंग ओला बाजार ले जोड़े के उदिम जारी हे।