प्रधानमंत्री-रोजगार मेला
प्रधानमंत्री नरेंद्र मोदी ह आज बीसवां रोजगार मेला म वीडियो कान्फ्रेंसिंग के माध्यम ले आने-आने सरकारी विभाग म इंक्यावन हजार ले जादा नवा भर्ती होय युवा मन ल नियुक्ति पत्र बांटिन। ए मउका म श्री मोदी ह किहीन कि केंद्र सरकार ह पाछू कुछेक बछर ले युवा मन ल अवइया चुनौती बर जरूरी कौशल अउ मउका उपलब्ध कराय उपर सरलग धियान देवत हे।
प्रधानमंत्री ह किहीन कि सरकार ह प्राइेवट क्षेत्र म रोजगार के मउका ल तेजी ले बढ़ाय बर घलो काम करत हे। ओमन किहीन कि भारत ह पाछू कुछेक बछर म करीब चालीस ठन देस के संग मुक्त व्यापार समझौता करे हे, जेखर ले देस के युवा मन बर अवसर के नवा कपाट खुलत हे।
प्रधानमंत्री ह किहीन कि भारत ह आज दुनिया के तीसरा सबले बड़का स्टार्टअप इको सिस्टम हवय। ओमन किहीन कि मान्यता प्राप्त स्टार्टअप मन म करीब आधा ह टियर-2 अउ टियर-3 सहर मन म हे। श्री मोदी ह किहीन कि गांव, कस्बा अउ छोटे सहर के युवा ह देस के नवा अर्थव्यवस्था ल आगू बढ़ाय म जरूरी भूमिका निभावत हे।
सुनइया मन ल बतादन कि ए बीसवां रोजगार मेला ह देस के पैंतालीस जघा म आयोजित करे गीस। नवनियुक्त युवा मन वित्त, रेल, गृह, स्वास्थ्य और परिवार कल्याण अउ रक्षा समेत भारत सरकार के आने-आने मंत्रालय अउ विभाग म कार्यभार संभालही।
रोजगार मेला-छत्तीसगढ़
ऐति, रईपुर के पंडित दीनदयाल उपाध्याय सभागार म राखे गे रोजगार मेला म केंद्रीय राज्य मंत्री तोखन साहू ह आने-आने सरकारी विभाग अउ संगठन म नवा भर्ती होय एक सौ पच्चीस अभ्यर्थी मन ल नियुक्ति पत्र प्रदान करीन। ए मउका म केंद्रीय राज्य मंत्री ह चुने गे सबो युवा मन ल बधई अउ सुभकामना देवत हुए किहीन कि ए नियुक्ति पत्र ह सिरिफ रोजगार के मउका नइ हे, फेर देस सेवा, जिम्मेदारी अउ विकसित भारत के निर्माण म भागीदारी के नवा संकल्प घलो हवय।
प्रधानमंत्री-अंतरराष्टीय सम्मेलन
प्रधानमंत्री नरेंद्र मोदी ह किहीन हे कि प्रति व्यक्ति कारबन उर्त्सजन म भारत के योगदान दुनिया के औसत के आधा ले भी कम हवय। आज नई दिल्ली म ‘पर्यावरण और जलवायु गतिसीलता का भविष्य‘ बिसय उपर अंतरराष्ट्रीय सम्मेलन के उद्घाटन करत हुए श्री मोदी ह ए बात किहीन। ओमन किहीन कि पाछू बारह बछर म भारत ह पर्यावरण ले जड़े हर क्षेत्र म सुघ्घर तरक्की करे हे। श्री मोदी ह किहीन कि पर्यावरण संरक्षण बर भारत ह आने देस के संग मिलके सरलग काम करत हे। ओमन किहीन कि हमन दुनिया ल संग लेके पर्यावरण सुरक्षा के नवा मापदंड स्थापित करत हे।
कैंसर-कॉन्क्लेव
मुख्यमंत्री विष्णुदेव साय ह आज नवा रईपुर म चौथां ‘‘बीएमसी छत्तीसगढ़ कैंसर कॉन्क्लेव‘‘ के सुभारंभ करीन। ए मउका म श्री साय ह कॉन्क्लेव म जुरे बिसेसज्ञ मन ले आग्रह करीन कि ओमन अइसने आधुनिक तकनीक, अनुसंधान अउ उपाय उपर बिचार करय, जेखर ले कैंसर के जल्दी पहिचान हो सकय अउ इलाज ल जादा सस्ता, सरल अउ आम लोगन के पहुंच म लाय जा सकय। ओमन किहीन कि ए परकार के कॉन्क्लेव ह चिकित्सा जगत के अनुभव, सोध अउ नवाचार ल बांटे के जरूरी मंच हवय।
श्री साय ह किहीन कि छत्तीसगढ़ के आधुनिक चिकित्सा सेवा के बड़का केंद्र के रूप म विकसित करे के दिसा म नवा रईपुर म लगभग सौ एकड़ भुईया म पांच हजार बिस्तर क्षमता वाले मेडिसिटी विकसित करे जावत हे। ए परियोजना प्रदेस म बिसेसज्ञ अउ सुपर स्पेस्लिटी चिकित्सा सुविधा के बिस्तार के दिसा म बड़का कदम साबित होही।
कारीकरम म गोठियात हुए स्वास्थ्य मंत्री श्याम बिहारी जायसवाल ह किहीन कि चौथां ‘‘बीएमसी छत्तीसगढ़ कैंसर कॉन्क्लेव‘‘ ह प्रदेस के स्वास्थ्य क्षेत्र बर महत्वपूर्ण मउका हे। देस दुनिया के कैंसर विसेसज्ञ मन ल एक मंच म आके रोकथाम, स्क्रीनिंग, अनुसंधान अउ आधुनिक उपचार पध्दति उपर अपन अनुभव बांटना प्रदेस के स्वास्थ्य सेवा ल अउ जादा प्रभावी बनाय म मददगार होही।
सेवा संकल्प अभियान-कैप्सूल
‘सेवा संकल्प अभियान’ के तहत आज हमन आप मन ल राष्ट्रीय प्राकृतिक खेती मिसन के तहत राज्य म प्राकृतिक खेती ल बढ़ावा देबर करे जावत परयास अउ उपलब्धि के जानकारी देबो।
एखर तहत अब तक चार सौ सड़सठ कलस्टर बनाय गेहे। एमन ले संतावन हजार पांच सौ नब्बे किसनहा मन जुड़े हे अउ पच्चीस हजार छै सौ पांच हेक्टेयर ले जादा क्षेत्र ह प्राकृतिक खेती के दायरा म आ गेहे।
सुप्रीम कोर्ट-अवैध शराब
सर्वोच्च न्यायालय ह सबो राज्य अउ कंेद्रसासित प्रदेस ल अवैध सराब ले होवइया घटना मन ल रोके बर कई ठिन उपाय सुझाय हवय। एमा मेथेनॉल के खरीदी, भंडारण, अवई-जवई के कड़ा निगरानी, लाइसेंस-परमीट के बेरा-बेरा म जांच अउ बड़ संख्या म लोगन के प्रभावित होय के स्थिति ले निपटे बर खास आपदा प्रबंधन व्यवस्था सामिल हे। न्यायालय ह संबंधित राज्य म निसेध कानून मन ल कड़ाई ले लागू करे उपर जोर दीस, जेखर ले अवैध सराब के आपूर्ति अउ मांग दूनों उपर रोक लगाय जा सकय।
जूनियर डॉक्टर-हड़ताल
छत्तीसगढ़ जूनियर डॉक्टर्स एसोसिएसन ह स्टाइपेंड अउ वेतन-मानदेय म संसोधन समेत सत्रह ठिन मांग ल लेके चरणबध्द आंदोलन के एलान करे हे। एखरे तहत इक्कीस सितंबर सम्मार ले ओपीडी सेवा के बहिष्कार करे जाही। अगर एखर बाद भी मांग उपर कोनो निरनय नइ होही त, तेईस सितंबर बुधवार ले इमरजेंसी सेवा के घलो बहिष्कार करे के चेतावनी दे गेहे। एसोसिएसन ह किहीस हे कि आंदोलन म एमबीबीएस इंटर्न, पीजी रेजिडेंट, सीनियर रेजिडेंट अउ बॉन्डेट जूनियर रेजिडेंट डॉक्टर सामिल होही।
बैंक हड़ताल
बैंक मन म पांच दिनी कार्य सप्ताह लागू करे अउ आने-आने लंबित मांग ल लेके यूनाइटेड फोरम ऑफ बैंक यूनियंस ह अवइया अट्ठाईस सितंबर सम्मार ले तीन दिनी हड़ताल के आहवान करे हे। सुनइया मन ल बतादन कि संगठन ह काली नवा रईपुर म धरना प्रदर्सन करे रिहीस। जेमा अब्बड़अकन बैंक कर्मचारी अउ अधिकारी मन जुरे रिहीन।
आयुर्वेद दिवस-शिविर
राष्ट्रीय आयुर्वेद दिवस के मउका म दंतेवाड़ा म काली ले चार दिनी मुक्त आयुष स्वास्थ्य सिविर के आयोजन करे जाही। ए सिविर म स्वास्थ्य परीक्षण, निसुल्क दवई वितरण के संगेसंग योगाभ्यास, पंचकर्म ले नस्य चिकित्सा अउ प्राकृतिक चिकित्सा ले जुड़े जानकारी दे जाही। एखर अलावा सिविर म रोग प्रतिरोधक क्षमता अउ स्वास्थ्य संवर्धन के उद्देस्य ले निसुल्का काढ़ा घलो बांटे जाही।
अउ अब पेस हे मौसम के हाल…
प्रदेस म मानूसन एक घांव फेर लहुट आय हे। मौसम विभाग ह अवइया चौबीस घंटा के दउरान प्रदेस के एक-दू जघा म भारी बरसा होय अउ गरजे-लउके के संग गाज गिरे के चेतावनी देहे। विभाग अनुसार उत्तर अंडमान के सागर म बनत सिस्टम के असर ले प्रदेस म नमी आय लगत हे। आज राजधनी रईपुर समेत प्रदेस के कुछेक जघा म हल्का ले मध्यम बरसा होय हे।
इही बीच, राजस्व और आपदा प्रबंधन विभाग कोति ले जारी आंकड़ा के अनुसार प्रदेस म अब तक नौ सौ छियानवे मिलीमीटर ले जादा बरसा दर्ज करे गेहे। सबले जादा बारिस बलरामपुर जिला म अउ सबले कम कांकेर जिला म दर्ज होय हे।
अउ अब थोरकुन समाचार सार म –
– छत्तीसगढ़ उच्च न्यायालय के न्यायाधीश न्यायमूर्ति पार्थ प्रतीम साहू ल राज्य विधिक सेवा प्राधिकरण के कार्यपालक अध्यक्ष बनाय गेहे।
– राष्ट्रीय परीक्षा एजेंसी-एनटीए ह अखिल भारतीय आयुष स्नात्कोत्तर प्रवेस परीक्षा के रिजल्ट घोसित कर देहे। विद्यार्थी मन एनटीए के वेबसाइट उपर लॉगिन करके अपन परिणाम दे सकत हे।
अउ
– छत्तीसगढ़ पुलिस कोति ले चलाय जावत साइबर जागृति अभियान के तहत कोंडागांव जिला के अनंतपुर पुलिस ह ओपन माइक सांस्कृतिक कारीकरम के आयोजन करीस। ए दउरान स्थानीय कलाकार अउ स्कूली विद्यार्थी मन ह नाचगाना, नाटक, भाषण अउ आने-आने विधा के माध्यम ले ऑनलाइन ठगी अउ एखर रोकथाम के बारे म जानकारी दीन।