प्रधानमंत्री-रोजगार मेला
बीसवां रोजगार मेला के जरिया ले प्रधानमंत्री नरेन्द्र मोदी ह काली 19 सितंबर के छत्तीसगढ़ के संग देसभर के 51 हजार के जादा युवा मन ल नियुक्ति पत्र बांटहीं।
प्रधानमंत्री ह वीडियो कॉन्फ्रेंस ले जुड़ के चयनित अभ्यर्थी मन ल संबोधित करहीं। ऐती प्रधानमंत्री के संबोधन के प्रसारण बर रइपुर के पंडित दीनदयाल उपाध्याय सभागार म कारीकरम आयोजित करे जाही। ए मउका म केंद्रीय राज्यमंत्री तोखन साहू ह आने-आने सरकारी विभाग अउ संगठन के नव-नियुक्त अभ्यर्थी मन ल नियुक्ति पत्र बांटहीं।
बीसवां रोजगार मेला के आयोजन काली देसभर के पैंतालीस जघा म करे जाही।
इंडिया इंडस्ट्रियल फेयर
लघु उद्योग भारती डहार ले रइपुर म ‘इंडिया इंडस्ट्रियल फेयर-2026’ के आयोजन करे जावत हे। साईंस कालेज मैदान म मुख्यमंत्री विष्णुदेव साय ह आज तीन दिवसीय मेला के सुभारंभ करीन। मुख्यमंत्री ह आने-आने राज्य ले आए करीबन तीन सौ उद्यमी, निवेसक अउ औद्योगिक प्रतिनिधि मन ल छत्तीसगढ़ म निवेस के लाभ उठाए बर नेवता देहे।
मुख्यमंत्री क किहीन कि छत्तीसगढ़ भविष्य के उद्योग मन के नवा केन्द्र डहार बाढ़त हे। ओमन किहीन कि राज्य सरकार के फोकस भविष्य के उद्योग मन हे अउ ए प्रदेस सेमीकंडक्टर ले लेके ग्रीन एनर्जी तक भविष्य के उद्योेग मनके नवा गंतव्य बनत हे।
कारीकरम ल उपमुख्यमंत्री अरूण साव, उद्योग मंत्री लखनलाल देवांगन अउ लघु उद्योग भारती के राष्ट्रीय संगठन मंत्री प्रकाश चंद्र गुप्त घलो संबोधित करीन।
सेवा संकल्प अभियान
‘सेवा संकल्प अभियान’ के तहत काली प्रदेसभर म एक करोड़ पचास लाख ले जादा ‘आसीर्वाद के दीया’ जलाए गीस। प्रधानमंत्री नरेन्द्र मोदी के सार्वजनिक जीवन के पच्चीस बछर पूरे के सेती अउ उंखर जन्मदिन के मउका म आयोजित ए कारीकरम म माईलोगिन, युवा, किसान, श्रमिक, पढ़इया लइका अउ आम लोगन सामिल होइन। राजधानी रइपुर के संगे आने-आने जिला के मंदिर, सार्वजनिक जघा अउ भाठा म अब्बड़ संख्या म दीया बारे गीस।
ए मउका म मुख्यमंत्री विष्णुदेव साय राजधानी रइपुर के महादेवघाट म महाआरती अउ आसीर्वाद के दीया कारीकरम म सामिल होइन। ए दउरान खारून नदी के घाट म सवा लाख दीया जलाए गीस।
ओती, बिलासपुर जिला म आयोजित आने-आने कारीकरम म करीबन दस लाख अउ बस्तर जिला म सात लाख ले जादा आसीर्वाद के दीया जलाए गीस।
इही अभियान के तहत गौरेला-पेण्ड्रा-मरवाही जिला के देवरगांव के मल्हनिया जलासय म ‘जल जन सेवा संकल्प’ कारीकरम के आयोजन करे गीस। ए दउरान जागरूकता रैली निकालके तीर-तखार के इलाका म साफ-सफई करे गीस।
सेवा संकल्प अभियान
‘सेवा संकल्प अभियान’ के तहत आज छत्तीसगढ़ म ‘पीएम जन-मन’ योजना ले आए सकारात्मक बदलाव अउ उपलब्धि ले अवगत कराबो।
प्रधानमंत्री जनजातीय आदिवासी न्याय महाअभियान यानी पीएम जन-मन योजना ले छत्तीसगढ़ म दूरिहा-दूरिहा जगह म रहइया लोगन मन ल पक्का घर, साफ पानी, बिजली अउ सड़क जइसन सुविधा मिलत हे। नवंबर 2023 ले सुरू होय ए अभियान के उद्देश्य विसेस रूप ले कमजोर जनजाति समूह मन के परिवार तक बुनियादी सुविधा पहुंचाना हे। ए सुविधा मनके संग छत्तीसगढ़ म वन उपज ले जुड़े कारज मन ल बढ़ावा दे बर वन-धन विकास केन्द्र मन ले स्थानीय उत्पाद ल बाजार ले जोड़े के उदिम करे जावत हे। एखर ले लोगन ल रोजगार के संग आर्थिक आत्मनिर्भरता घलो मिलत हे।
एआई कॉन्क्लेव
छत्तीसगढ़ म देस के पहिली राज्य स्तरीय एआई कॉन्क्लेव रइपुर म काली आयोजित करे गीस। स्कूल सिक्षा विभाग डहार ले आयोजित ए कॉन्क्लेव म स्कूली सिक्षा के गुणवत्ता म सुधार अउ कृत्रिम बुद्धिमता के उपयोग उपर गोठबात होइस। ए दउरान स्कूल सिक्षा मंत्री गजेन्द्र यादव ह स्कूल छोड़ चुके लइका मन ल दोबारा जोड़े बर ‘लईका चिन्हारी’ ऐप के विमोचन करीन। ए कारीकरम म देस-विदेस के तकनीकी संस्थान अउ विसेषज्ञ मन हिस्सा लीन। कॉन्क्लेव के निष्कर्ष के आधार म प्रदेस म सिक्षा बर व्यापक एआई रोडमैप तियार करे जाही।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ ए दरी ‘शिक्षक दिवस म राष्ट्रपति के हाथों राष्ट्रीय शिक्षक सम्मान ले सम्मानित रइपुर के प्रोफेसर डाक्टर राजीव चौधरी ले लेगे भेंटवार्ता के प्रसारण करे जाही। एखर प्रसारण काली 19 सितंबर के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया 9 बजे ले करे जाही। एला छत्तीसगढ़ के जम्मों आकाशवाणी केंद्र एक संघरा रिले करहीं।
कोयला खदान-नीलामी
कोयला मंत्रालय ह नई दिल्ली म वाणिज्यिक कोयला खदान नीलामी के सोलहवां चरण सुरू कर देहे। ए चरण म छत्तीसगढ़ के संगेसंग नौ ठन आने-आने कोयला उत्पादक राज्य – अरूणाचल प्रदेस, बिहार, झारखंड, मध्यप्रदेस, महाराष्ट्र, ओडिसा, तेलंगाना अउ पश्चिम बंगाल के 25 ठन कोयला ब्लाक के नीलामी करे जावत हे। एमा इक्कीस ठन पूर्ण रूप ले खोजे गे अउ चार ठन आंसिक रूप ले खोजे गे खदान सामिल हें। मंत्रालय म बतइस कि नौ ठन कोयला उत्पादक राज्य मन म अब तक कुल 147 कोयला खदान के नीलामी हो चुके हे।
मुख्य सचिव-बैठक
प्रदेस म अधोसंरचना विकास ल गति अउ भविष्य के जरूरत के अनुरूप मजबूत अउ एकीकृत अधोसंरचना तियार करे के मंसा ले छत्तीसगढ़ इन्फ्रास्ट्रक्चर मिसन के आज मंत्रालय म बइठका होइस। मुख्य सचिव विकास शील के अध्यक्षता म होय ए बइठका म सड़क, ऊर्जा, ट्रांसमिसन, जल, सिंचाई, संचार अउ फाइबर नेटवर्क के संग आने-आने अधोसंरचना के विकास बर कार्ययोजना उपर गोठबात होइस। बइठका म मुख्य सचिव ह प्रदेस के रोड नेटवर्क बर अवइया बीस बछर के मास्टर प्लान तियार करे के निरदेस दीन हे। उहें, लोक निर्माण विभाग ल मिसन के नोडल विभाग बनाय गेहे।
पासपोर्ट सुविधा
विदेस मंत्रालय ह पासपोर्ट संसोधन नियम – 2026 ल अधिसूचित कर देहे। एखर तहत 15 बछर ले कम उमर के लइका मन ल जारी 36 पृष्ठ वाला सामान्य पासपोर्ट अब जारी होय के तारीख ले 5 बछर या फेर लइका के 18 बछर उमर पूरा होय तक वैध रही। ऐमा जउन बेरा पहिली पुरही, उही मान्य होही।
एनटीए-परीक्षा
राष्ट्रीय परीक्षा एजेंसी-एनटीए ह दिसंबर बछर – 2026 ले मार्च 2027 तक आयोजित होवइया परीक्षा मनके प्रस्तावित कारीकरम जारी कर देहे। जेमा इंजीनियरिंग म प्रवेस बर जेईई मेन्स के पहिली चरण अवइया बछर 22 ले 24 जनवरी अउ 28 ले 30 जनवरी के बीच आयोजित करे के प्रस्ताव हे। उहें, यूजीसी नेट के परीक्षा संभावित रूप ले एसो 14 ले 19 दिसंबर के बीच आयोजित करे जाही।
शालेय क्रीडा प्रतियोगिता
जगदलपुर म 26वां राज्य स्तरीय शालेय क्रीडा प्रतियोगिता के काली सांसद महेश कश्यप ह खेल परिसर म सुभारंभ करीन। ऐमा प्रदेस के आने-आने संभाग ले करीबन सात सौ खिलाड़ी अउ कोच सामिल होवत हे। ए प्रतियोगिता म एथलेटिक्स, रग्बी अउ हैंडबाल के स्पर्धा आयोजित करे जावत हे।
रेल हादसा-मौत
सक्ती जिला के सकरेली भाठा गांव म रेल पटरी म बइठ के मोबाइल म गेम खेलत रिहीन दू झन लइका मन मालगाड़ी के चपेट म आ गीन। हादसा म एक झन के मउकाच म मउत होके। उहें, दूसरा ह गंभीर रूप ले घायल हे। बारद्वार पुलिस ह घटना के जांच करत हे।
अउ अब जानव मौसम के हाल-
प्रदेस म काली ले एक दारी फेर पानी गिरे हे संभावना हे। मौसम विभाग के अनुसार आज ले प्रदेस के कतकोन जघा म हल्का ले मध्यम बरसा हो सकथे। उहें, कुछेक जघा गरज-चमक के संग गाज घलो गिरे के चेतावनी दे गेहे। राजधानी रइपुर म आज बिहनिया ले ही बादर छाय रिहीस।