सेवा संकल्प अभियान
प्रधानमंत्री नरेन्द्र मोदी के जनसेवा के पच्चीस साल पूरा होय के मउका म आज ले भारतीय जनता पार्टी डहार ले ‘सेवा संकल्प अभियान‘ सुरू करे गेहे। अवइया महीना के सत्रह तारीख तक चलइया ए अभियान के पहिली दिन आज ‘सेवा दिवस‘ के रूप म मनाय जात हे। आज देसभर म रक्तदान सिविर लगाय गेहे। भाजपा के राष्ट्रीय अध्यक्ष नितिन नबीन ह नई दिल्ली म पार्टी मुख्यालय म रक्तदान सिविर के उद्घाटन करीन।
‘‘सेवा संकल्प अभियान‘‘ के पहिली दिन आज छत्तीसगढ़ के जम्मों जिला मन म ‘‘आशीर्वाद का दीया‘‘ कार्यक्रम चलाय जात हे। ए दउरान सरकारी भवन, पंचायत भवन, स्कूल, आंगनबाड़ी केन्द्र अउ ग्राम पंचायत मन म दीया जलाय जात हे। उहें, प्रधानमंत्री आवास योजना, स्वच्छ भारत मिशन ग्रामीण, राष्ट्रीय ग्रामीण आजीविका मिशन के संगेसंग कतकोन सरकारी योजना के हितग्राही मनके घर म घलो दीया जलाय जात हे।
ऐति, मुख्यमंत्री विष्णुदेव साय ह रईपुर स्थित महादेव घाट म आशीर्वाद का दिया महाआरती कार्यक्रम म सामिल होही, जेखर बाद ओमन तेलीबांधा तालाब के तीर मरीन ड्राईव म घलो ‘आशीर्वाद का दिया‘ कार्यक्रम म भाग लीहीं।
अभियान के तहत नमो सेवा गाथा, आंगन का उत्सव, सेवा ज्योति यात्रा, सेवा मेरा योगदान, सेवा सेतु अभियान, विकसित भारत संकल्प यात्रा के संगेसंग कतकोन आयोजन होही।
प्रधानमंत्री-जन्मदिन शुभकामना
प्रधानमंत्री नरेन्द्र मोदी ल जन्मदिन के मउका म देस-बिदेस ले सुभकामना मिलत हे। राष्ट्रपति द्रौपदी मुर्मु, उपराष्ट्रपति सीपी राधाकृष्णन अउ सूचना प्रसारण मंत्री अश्विनी वैष्णव के संगेसंग कतकोन बड़का नेता मन ह ओमन ल जनमदिन के सुभकामना देहे।
प्रदेस के मुख्यमंत्री विष्णुदेव साय ह सोशल मीडिया प्लेटफॉर्म म प्रधानमंत्री ल जनम दिवस के बधाई देवत उंखर लंबा उमर अउ बढ़िया स्वास्थ्य के कामना करे हे।
त उहें, प्रधानमंत्री ह जम्मांे सुभकामना उपर आभार व्यक्त करत किहीन कि हरेक आशीर्वाद देस के जनता के सेवा करे के उंखर संकलप ल अउ जादा मजबूत बनावत हे।
विश्वकर्मा-जयंती
संसार के पहिली वास्तुकार अउ सृजन-निर्माण के देवता भगवान विश्वकर्मा के आज जयंती हरय। ए मउका म प्रदेश के जम्मों जिला मन म कतकोन कार्यक्रम चलत हे।
प्रधानमंत्री नरेन्द्र मोदी ह विश्वकर्मा जयंती के मउका म लोगन मन ल सुभकामना दे हवय। ओमन किहीन कि विकसित अउ आत्म निर्भर भारत के संकलप ल पूरा करे म कारीगर अउ कुशल मजूर मनके मेहनत बढ़ महत्व राखथे।
ऐति, रईपुर स्थित लोकभवन म आज विश्वकर्मा जयंती के मउका म राज्यपाल रमेन डेका ह भगवान विश्वकर्मा के पूजापाठ करके प्रदेस के खुसहाली के कामना करीन।
त उहें, मुख्यमंत्री विष्णुदेव साय ह रईपुर स्थित मुख्यमंत्री निवास म भगवान विश्वकर्मा के पूजापाठ करीन। ए दउरान मुख्यमंत्री ह प्रदेस के श्रमवीर, शिल्पकार, कारीगर, अभियंता, तकनीशियन अउ उद्योग के संगेसंग निर्माण क्षेत्र ले जुड़े जम्मों लोगन मन ल विश्वकर्मा जयंती के सुभकामना दीन।
श्रमिक सम्मेलन
विश्वकर्मा जयंती के मउका म आज रईपुर म होय राज्य स्तरीय श्रमिक सम्मेलन म मुख्यमंत्री ह सामिल होइन। ए मउका म मुख्यमंत्री ह श्रमिक मन बर तीन ठिन बड़का घोषणा करीन। ओमन किहीन कि सहर मन म रोजगार खोजे बर आय मजूर मन ल रूके बर बने ढंग ले श्रमिक सुविधा केन्द्र दे जाही। उहें, मुख्यमंत्री ह पंजीकृत श्रमिक मनके अवई-जवई ल सरल बनाय अउ उंखर आर्थिक रहन-सहन ह ठीक-ठाक होय एखर बर ई-बाईक सहायता योजना सुरू करे अउ असंगठित क्षेत्र के रिक्शा चालक मन ल ई-रिक्शा बिसाय बर दे जात सहायता रासि ल बढ़ाके एक लाख रूपिया करे के घोषणा करीन।
कार्यक्रम के दउरान मुख्यमंत्री ह एक लाख तिरालीस हजार ले जादा श्रमिक मनके खाता म इंक्यावन करोड़ बत्तीस लाख रूपिया ले जादा के सहायता रासि अंतरित करीन। ओमन श्रमिक कल्याण योजना के हितग्राही मन ल सहायता रासि अउ जिनीस घलो बांटीन। उहें, सौ झिन श्रमिक दीदी मन ल ई-रिक्शा के चाबी दीन।
पीएम विश्वकर्मा योजना
पीएम विश्वकर्मा योजना के आज तीन बछर पूरा होगे हे। प्रधानमंत्री नरेन्द्र मोदी ह बछर दू हजार तेईस म आजे के दिन ए योजना के सुरूआत करे रिहीन। ए योजना करीगर अउ शिल्पकार मन ल बड़का पैकेज देवाथे। पीएम विश्वकर्मा योजना के तहत अब तक तीस लाख ले जादा लाभार्थी मनके पंजीकरण हो चुके हे। उहें, करीबन साढ़े चौबीस लाख विश्वकर्मा मन ल बुनियादी कौशल प्रशिक्षण दे जा चुके हे। ए योजना के तहत छह लाख ले जादा विश्वकर्मा मन ल एक लाख रूपिया तक के करजा सिरिफ पांच प्रतिशत के ब्याज म दे जाथे।
सेमीकॉन इंडिया-शुभारंभ
प्रधानमंत्री नरेन्द्र मोदी ह आज नई दिल्ली के यशोभूमि परिसर म सेमीकॉन इंडिया के सुभारंभ करीन। तीन दिन तक चलइया ए सम्मेलन भारत म सहयोग, निवेस, नवाचार अउ प्रतिभावान मन ल बढ़ावा देना हे। ए मउका म प्रधानमंत्री ह किहीन कि एक कोति हमर अर्थव्यवस्था तेजी ले आगू बाढ़त हे। उहें, दूसर तरफ भारत उपर पूरा विश्व के भरोसा घलो बाढ़े हे।
प्रधानमंत्री ह किहीन कि चुनौती वाले वैश्विक माहौल के बाद भारत ह सात दशमलव आठ प्रतिशत के विकास दर हासिल कर लेहे। ओमन किहीन कि भारत ह सेमी कंडक्टर उद्योग बर पसंद वाले बनाय के दिसा म हरसंभव प्रयास करत हे।
स्वच्छता ही सेवा अभियान
‘‘स्वच्छता ही सेवा‘‘ अभियान आज ले पूरा देस म सुरू होगे हे। एसो के ए अभियान के बिसय हे – ‘‘स्वच्छता म सहभागिता, स्वच्छ भारत-विकसित भारत‘‘। एसो ए अभियान पांच प्रमुख स्तंभ म केन्द्रित रइही, जेमा साफ-सफाई वाले चिन्हारी जघा, सार्वजनिक जगह मनके कायाकल्प, स्वच्छ पाठशाला-स्वच्छता के लिए युवा, सफाई मित्र सुरक्षा अउ सम्मान शिविर, स्वच्छता बर जनभागीदारी अउ स्वच्छता ले समृद्धि सामिल हे।
उहें, दक्षिण पूर्व मध्य रेलवे के बिलासपुर मंडल म घलो आज ले ‘‘स्वच्छता ही सेवा‘‘ अभियान के सुरूआत होगे। अभियान के तहत मंडल डहार ले एक अक्टूबर ले पन्द्रह दिन के स्वच्छता पखवाड़ा राखे जाही। ए दउरान कतकोन स्वच्छता ले जुड़े कार्यक्रम होही।
सीजीपीएससी-सूचना
छत्तीसगढ़ लोक सेवा आयोग-सीजीपीएससी ह राज्य सेवा परीक्षा-दू हजार पच्चीस के मुख्य परीक्षा पास करइया अभ्यर्थी मनके होवइया इंटरव्यू अउ दस्तावेज सत्यापन के कार्यक्रम ल स्थगित कर देहे। ए प्रक्रिया बीस सितंबर ले एक अक्टूबर तक होना रिहीस। नवा तारीख के घोषणा बाद म करे जाही।
आयु सीमा-छूट
राज्य सरकार के अलावा निगम-मंडल, नगर सैनिक मनके संगेसंग आने सेवा मन बर अरजी करे के राखे गे अधिकतम आयु सीमा ल अड़तीस साल ले बढ़ाके पैंतालीस साल कर दे गेहे। ए बारे म सामान्य प्रसासन विभाग के सचिव मुकेश कुमार बंसल कोति ले जम्मों विभागाध्यक्ष, राजस्व मंडल अध्यक्ष, संभागायुक्त, कलेक्टर अउ जिला पंचायत सीईओ ल चिट्ठी जारी कर दे गेहे। एमा राज्य सासन के फइसला के हवाला देवत आवेदक मन ल पहिली म करे गे सेवा के आयु संबंधी कोनो उपरहा फायदा नइ मिलही। ए निरदेस गृह-पुलिस विभाग के सेवा मन बर लागू नइ होवय।
यूपीआई-स्पष्टीकरण
केन्द्र सरकार ह केहे हवय कि एक मनखे ले दूसर मनखे ल करे गे यूपीआई लेनदेन मुफ्त म रइही। संगी मन ल भेजे, दुकान म भुगतान करे या क्यूआर कोड स्कैन करके लेनदेन उपर कोनों प्रकार के पइसा नइ लगय। सरकार के मुताबिक यूपीआई क्यूआर कोड के माध्यम ले हरेक महीना एक लाख तक के कमई करइया विक्रेता मन उपर कोनों प्रकार के पइसा लगय। रूपे डेबिट कार्ड ले जुड़े यूपीआई लेनदेन घलो मुफ्त रइही।
सूत्र के मुताबिक करीबन छियानवे प्रतिशत लोगन मन डहार ले व्यापारी मन ल करे गे यूपीआई लेनदेन अप्रभावित रइही। उहें, दू हजार रूपिया ले जादा के सिरिफ बड़का व्यापारी मनके लेनदेन उपर शून्य दशमलव चार प्रतिशत के एमडीआर लागू होही, जेखर भुगतान व्यापारी मन ल करना होही।
छोटे व्यापारी मनके बीच यूपीआई लेनदेन ल बढ़ावा दे बर समर्पित कोष बनाय जाही।
जीएसटी विभाग-भर्ती प्रक्रिया
राज्य कर जीएसटी विभाग ह बयालीस वाणिज्यिक कर निरीक्षक मनके भर्ती ल रद्द करत उंखर मनके डिमोशन करके ओमन ल मूल पद म पदस्थ करे गेहे। ए आदेस राज्यकर आयुक्त पुष्पेंद्र कुमार मीणा डहार ले जारी करे गेहे। भर्ती प्रक्रिया रद्द करे के संग विभाग ह आसन्न न्यायालयीन प्रक्रिया ल ध्यान म राखत छत्तीसगढ़ उच्च न्यायालय म कैविएट घलो दायर कर देहे।