झीरम कांड-फैसला
नेशनल इन्वेस्टिगेशन एजेंसी-एनआईए के जगदलपुर के विशेष अदालत ह आज झीरम कांड के सबो दस झिन दोसी मन ल फांसी के सजा सुनाय हे। विशेष न्यायाधीश अजय सिंह राजपूत ह ए फइसला सुनईन। दोसी मन ल उच्च न्यायालय म अपील करे बर तीस दिन के समय दे गेहे।
खबर के मुताबिक पच्चीस मई बछर दू हजार तेरह म छत्तीसगढ़ के बस्तर जिला के दरभा थाना क्षेत्र के झीरम घाटी म माओवादी मन कोति ले करे गे हमला म कांग्रेस के कतकोन बड़का नेता समेत सत्ताईस झिन के मउत होगे रिहीस। उहें, ए हमला म पैंतीस झिन आने घायल होय रिहीन। ए मामला म एनआईए ह एक सौ पचास ले जादा लोगन उपर एफआईआर दरज करे रिहीस, जेमा ले ग्यारह झिन माओवादी मन ल गिरफ्तार करे गे रिहीस हे। एक आरोपी के सुनवाई के दउरान मउत होगे रिहीस। बांचे दस आरोपी मन ल एनआईए के बिसेस अदालत ह पांच सितंबर के दोसी करार दे रिहीस। ए सबो दोसी मन ल आज फांसी के सजा सुनाय गीस।
निर्वाचन आयुक्त सम्मेलन
नवा रायपुर म आज ले बत्तीसवां अखिल भारतीय राज्य निर्वाचन आयुक्त सम्मेलन सुरू होगे हे। दू दिवसीय ए सम्मेलन के उद्घाटन राज्यपाल रमेन डेका ह करीन। ए मउका म राज्यपाल ह ‘‘छत्तीसगढ़ लोकल बॉडी इलेक्शन ईयर बुक‘‘ के पहिली संस्करण के विमोचन करीन। ए किताब म छत्तीसगढ़ म स्थानीय निकाय निर्वाचन के काम, उपलब्धि, नवाचार अउ चुनावी व्यवस्था के महत्ता के जानकारी दे गेहे।
सम्मेलन म बोलत राज्यपाल ह स्थानीय निकाय अउ त्रिस्तरीय पंचायत के चुनई के काम ल जादा मजबूत, साफगोई अउ तकनीकी रूप ले मजबूत बनाय म जोर दीन। ओमन किहीन कि लोकतंत्र के मजबूती म स्थानीय स्वशासी संस्था के महत्ता के भूमिका होथे।
उहें, राज्य निर्वाचन आयुक्त सम्मेलन के उद्देश्य अउ स्थानीय निकाय निर्वाचन ल जादा प्रभावी अउ आधुनिक बनाय बर करे जात प्रयास के संबंध म बतईन।
ए मउका म मुख्य सचिव विकासशील, राज्य निर्वाचन आयोग के सचिव शिखा राजपूत तिवारी समेत आयोग के बड़का अधिकारी मौजूद रिहीन।
एस-एस.एन.ए. मॉडल
प्रदेस म स्टेट सिंगल नोडल एजेंसी-एस/एस.एन.ए. मॉडल ल राज्य योजना म लागू करे जाही। एखर ले योजना बर जारी होवइया रकम के साफगोई सुरक्षा अउ प्रभावी उपयोग सुनिश्चित होही। ए नवा व्यवस्था के उद्देश्य राज्य पोषित योजना लेनदेन ल जादा परभावी बनाना हे।
मुख्यमंत्री विष्णुदेव साय ह किहीन हे कि ए बेवस्था के सुरू होय ले योजना के रकम आने-आने बैंक खाता म पड़े रेहे के जघा जरूरत के बेरा सोझे हितग्राही तक पहुंचही। एखर ले जनकल्याणकारी योजना के फायदा जादा प्रभावी ढंग ले लोगन तक अमराय म मदद मिलही।
स्वच्छता ही सेवा अभियान
स्वच्छता ही सेवा अभियान काली ले देशभर म सुरू होही, जउन सत्रह अक्टूबर तक चलही। एसो अभियान के बिसय हरय – ‘‘स्वच्छता में सहभाग, स्वच्छ भारत, विकसित भारत‘‘। अभियान म गांधी जयंती दू अक्टूबर के मउका म सहरी, स्थानीय, निकाय अउ सार्वजनिक जघा म बिसेस स्वच्छता अभियान चलाय जाही। एखर संगेसंग एक पेड़ मां के नाम पहल म पौधा रोपण करे जाही। राज्य मन ले अपील करे गेहे कि प्रधानमंत्री नरेन्द्र मोदी के पच्चीस बछर के सार्वजनिक सेवा पूरा होय के मउका म सात अक्टूबर के बिसेस स्वच्छता कार्यक्रम के आयोजन करयं।
सेवा संकल्प अभियान
प्रधानमंत्री नरेन्द्र मोदी के सार्वजनिक जीवन के पच्चीस बछर पूरा होय के मउका म छत्तीसगढ़ समेत देसभर म काली ले सेवा संकल्प अभियान चलाय जाही। ए अभियान सत्रह अक्टूबर तक चलही। अभियान के पहिली दिन काली प्रदेस के सबो जिला म ‘‘आशीर्वाद के दीया‘‘ कार्यक्रम राखे जाही। उहें, काली ले सात अक्टूबर तक प्रदेस के स्कूल मन म विकसित भारत अउ पच्चीस बछर के सेवा यात्रा म चित्रकला अउ भासन प्रतियोगिता होही। एखर संगेसंग नमो सेवा गाथा ले गांव-गांव तक सेवा यात्रा अउ जनकल्याणकारी योजना के संबंध म जानकारी दे जाही।
अभियान म आंगन का उत्सव, कहानी बदलाव की, सेवा ज्योति यात्रा, सेवा मेरा योगदान, सेवा सेतु अभियान विकसित भारत संकल्प यात्रा जल जन सेवा संकल्प, रंगोली राष्ट्र, राष्ट्रीय इनोवेशन चैलेंज अउ जनसेवक महाकुंभ – ‘पंचायत से पार्लियामेंट‘ जइसन आयोजन होही।
यूपीआई लेनदेन
वित्त मंत्रालय ह स्पष्ट करे हे कि मनखे मनके बीच यूपीआई ले कतकोन रकम के लेनदेन म कोनों किसम के सुल्क नइ लगही। मंत्रालय ह केहे हे कि छोटे व्यापारी मन बर शून्य एमडीआर रूपरेखा के तहत दू हजार रूपिया तक लेनदेन मुफ्त म रइही। ए किसम ले मनखे मन ले व्यापारी मन ल करीबन छियानवे प्रतिसत लेनदेन प्रभावित नइ होही। एमडीआर सिरिफ दू हजार रूपिया ले जादा ले विशिष्ट व्यापारी लेनदेन म ही लागू होही।
ईपीएफओ-वेतन सीमा
केन्द्रीय मंत्रिमंडल ह कर्मचारी भविष्य निधि संगठन-ईपीएफओ म वेतन सीमा ल पन्द्रह हजार रूपिया ले बढ़ाके पच्चीस हजार रूपिया महीना कर देहे। मंत्रिमंडल के बइठका के बाद पत्रकार मन संग बोलत सूचना अउ प्रसारण मंत्री अश्विनी वैष्णव ह किहीन कि ए फइसला ले इंक्यावन लाख ले जादा अतिरिक्त कर्मचारी अनिवार्य ईपीएफओ के दायरा म आ जही। एखर ले श्रमिक मन बर सामाजिक सुरक्षा बाढ़ही। सरकार के वार्षिक व्यय करीबन ग्यारह हजार तीन सौ उनतालीस करोड़ रूपिया होय के अनुमान हवय।
सुप्रीम कोर्ट-आरक्षक भर्ती
सर्वोच्च न्यायालय ह छत्तीसगढ़ के दू हजार ले जादा आरक्षक भर्ती के उम्मीदवार मनके पक्ष म फइसला सुनावत राज्य सरकार के बिसेस अनुमति याचिका खारिज कर देहे। ए मामला बछर दू हजार सत्रह म जारी दू हजार दू सौ उनसठ आरक्षक मनके भर्ती ले जुड़े हे। जेमा प्रतीक्षा सूची के प्रावधान ल लेके गजब दिन ले विवाद चलत रिहीस। एखर पहिली सत्रह नवंबर दू हजार पच्चीस के अपन आदेस म सर्वोच्च न्यायालय ह सैंतालीस झिन सफल उम्मीदवार मनके पद ल सुरक्षित राखे गे निरदेस जारी करे रिहीन।
श्रमिक सम्मेलन
भगवान विश्वकर्मा जयंती के मउका म काली रईपुर के सरदार बलबीर सिंह जूनेजा इंडोर स्टेडियम म राज्य स्तरीय श्रमिक सम्मेलन राखे जाही। ए सम्मेलन म मुख्यमंत्री विष्णुदेव साय माईपहुना के रूप म संघरही। उहें, कार्यक्रम के अगुवई श्रम मंत्री लखन लाल देवांगन करही। कार्यक्रम म प्रदेस के श्रमवीर मनके सम्मान करे जाही।
इही बीच, श्रम विभाग ह स्वर्गीय रामानुज प्रताप सिंहदेव स्मृति श्रम यशस्वी पुरस्कार बर श्रमिक अउ संस्था मन ले पांच अक्टूबर तक अरजी मंगाय हे। ए पुरस्कार बर चुने गे श्रमिक या संस्था ल दू लाख रूपिया के इनाम अउ प्रमाण पत्र दे जाही। एखर बर श्रमिक अउ संस्था श्रम विभाग के वेबसाइट ले ऑनलाइन अरजी दे सकत हे।
कृषि धन धान्य योजना
दंतेवाड़ा जिला ह प्रधानमंत्री कृषि धन धान्य योजना ल बने ढंग ले चलाय म देसभर ले चुने गे सौ जिला म पांचवां स्थान पाय हे। एखर ले दंतेवाड़ा, छत्तीसगढ़ के राष्ट्रीय स्तर के टॉप-टेन म जगह बनइया एक मात्र जिला बन गेहे। जिला म योजना के प्रमुख संकेतक के शत-प्रतिशत डिजिटल लेनदेन, मिलेट्स अउ पारंपरिक फसल ल बढ़ावा, जैविक खेती, जल संरक्षण अउ सूक्ष्म सिंचाई के संगेसंग एफपीओ अउ महिला स्व-सहायता समूह के भागीदारी ल ए उपलब्धि के मुख्य आधार बताय गेहे।
कृषि मंत्री-निर्देश
कृषि मंत्री रामविचार नेताम ह हरदी बीजा बांटे म कथित गड़बड़ी के सिकईत ल गंभीरता ले लेवत तुरते जांच के निरदेस दीन हे। ओमन कृषि उत्पादन आयुक्त ल मामला के जांच करके रिपोर्ट दे बर केहे हे। जांच म हल्दी बीजा के प्रमाणीकरण, टैग, लॉट अउ एक्सपायरी डेट, आपूर्ति दर, किसान मन ल तय मात्रा म सामग्री मिले अउ भुगतान के जांच करे जाही। श्री नेताम म किहीन कि गड़बड़ी पाय जाय म दोसी मनके खिलाफ नियमानुसार कड़ा कार्रवाई करे जाही।
अउ अब जानन मौसम के हाल…
प्रदेस म अभी भारी बरसा के आसार नइ हे। मौसम विभाग के मुताबिक राज्य के आने-आने जघा म अवइया दू-तीन दिन म अधिकतम तापमान म दू ले तीन डिग्री के बढ़वार हो सकत हे। बीस सितंबर ले राज्य म मानसूनी गतिविधि एक घांव फेर बाढ़ के संभावना हे।