प्रधानमंत्री सेमीकॉन इंडिया
प्रधानमंत्री नरेन्द्र मोदी काली सोलह सितंबर के नई दिल्ली के यशोभूमि म पांचवा सेमीकॉन इंडिया-दू हजार छब्बीस के उद्घाटन करही। एमा चालीस ले जादा देस मनके छह सौ ले जादा प्रदर्शक, तीन सौ अंतर्राष्ट्रीय कंपनी अउ प्रतिभागी हिस्सा लीहीं। सेमीकॉन इंडिया भारत के प्रमुख सेमीकंडक्टर सम्मेलन अउ प्रदर्शन हरय।
सेवा संकल्प अभियान
छत्तीसगढ़ समेत देसभर म सत्रह सितंबर ले सत्रह अक्टूबर तक देशव्यापी सेवा संकल्प अभियान के आयोजन करे जाही। अभियान के क्रियान्वयन ल लेके उपमुख्यमंत्री अरूण साव ह आज नवा रायपुर म प्रदेस के जम्मों नगर निगम के महापौर, आयुक्त, नगर पालिका अउ नगर पंचायत के अध्यक्ष के संघरा मुख्य नगर पालिका अधिकारी मनके वर्चुअल बइठका लीन। उपमुख्यमंत्री ह अभियान म समाज के जम्मों वर्ग के सहभागिता सुनिश्चित करे उपर जोर दीन।़
एखर पहिली, मुख्यमंत्री विष्णुदेव साय ह प्रदेसवासी मन ले सत्रह सितंबर ले सत्रह अक्टूबर तक आयोजित होवइया ‘‘सेवा संकल्प अभियान‘‘ ले पूरा उछाह अउ आत्मीयता के संग जुड़े के अपील करीन हे। ओमन लोगन मन ले स्वच्छता, पर्यावरण, संरक्षण, जरूरतमंद मनके सहायता अउ जनसेवा के काम म सक्रिय भागीदारी के आह्वान करीन हे। मुख्यमंत्री ह प्रधानमंत्री नरेन्द्र मोदी के जन्मदिन सत्रह सितंबर के संझा सात बजे हर-घर म आशीर्वाद के दिया बारे के अपील करीन।
राज्य निर्वाचन आयुक्त-सम्मेलन
छत्तीसगढ़ राज्य निर्वाचन आयोग डहार ले नवा रायपुर म काली ले दू दिन के अखिल भारतीय राज्य निर्वाचन आयुक्त सम्मेलन के आयोजन करे जाही। बत्तीसवां निर्वाचन आयुक्त सम्मेलन के उद्घाटन राज्यपाल रमेन डेका करही। ए सम्मेलन म आने-आने राज्य के राज्य निर्वाचन आयुक्त, त्रिस्तरीय पंचायत अउ नगरीय निकाय मन ल अउ जादा सशक्त, पारदर्शी, समावेशी, विश्वसनीय अउ सहभागी बनाय उपर विचार-विमर्श करही। सम्मेलन म लोकतांत्रित निर्वाचन बिसय ले जुड़े प्रिंस्टन यूनिवर्सिटी, न्यू जर्सी अउ अमेरिका के अंतर्राष्ट्रीय स्तर के बिसय-बिसेसज्ञ घलो हिस्सा लीहीं।
राज्य निर्वाचन आयुक्त अजय सिंह ह बतईन कि ए सम्मेलन म हैदराबाद अउ बेंगलुरू के बिसेसज्ञ, इलेक्ट्रॉनिक वोटिंग मशीन-ईवीएम के बारे म तकनीकी जानकारी प्रस्तुत करही।
सर्वोच्च न्यायालय-जन सूचना सेवा
सर्वोच्च न्यायालय ह हिन्दी दिवस के मउका म काली ‘जन सूचना सेवा‘‘ सुरू करे के घोषणा करीस। एखर उद्देश्य न्याय व्यवस्था ल जादा समावेशी बनाना अउ लोगन मन बर महत्वपूर्ण न्यायिक फइसला ल समझना आसान बनाना हरय। ए सेवा के अंतर्गत महत्वपूर्ण फइसला अउ आदेस मनके सरल हिन्दी म सार उपलब्ध कराय जाही।
यूपीआई लेनदेन
केन्द्र सरकार ह केहे हे कि बैंक दू हजार रूपिया तक के यूनिफाइड पेमेंट इंटरफ्रेस-यूपीआई लेनदेन अउ रूपे डेबिट कार्ड ले भुगतान उपर कोनों भी सुल्क नइ लगा सकय। वित्त मंत्रालय ह यूपीआई लेनदेन म सुल्क ले जुड़े नियम मन ल स्पष्ट करे बर भुगतान अउ निपटान प्रणाली अधिनियम के अंतर्गत ए बदलाव मन ल अधिसूचित करे हे। मंत्रालय ह केहे हे कि ए नियम ग्राहक अउ छोटे व्यापारी दूनों झन बर समान रूप ले लागू होही।
विशेष अभियान-पोर्टल
जम्मों सरकारी कार्यालय मन म स्वच्छता ल पूरा तरह ले लागू करे बर दू अक्टूबर ले बिसेस अभियान सुरू होही। ए अभियान इकतीस अक्टूबर तक चलही। केन्द्रीय लोक शिकायत अउ पेंशन मंत्री डॉक्टर जितेन्द्र सिंह काली नई दिल्ली म ए अभियान के प्रगति के निगरानी बर समर्पित ऑनलाइन वेबपोर्टल लांच करही। अभियान म ई-वेस्ट के प्रभावी संग्रह, ओला अलग-अलग करे अउ ओखर निपटारा उपर घलो बल दे जाही।
इंजीनियर दिवस
आज राष्ट्रीय इंजीनियर दिवस हरय। ए दिवस हर साल पन्द्रह सितंबर के भारत के महानतम इंजीनियर म ले एक मोक्षगुंडम विश्वेश्वरैया के जयंती के उपलक्ष्य म मनाय जाथे। प्रधानमंत्री नरेन्द्र मोदी ह अपन संदेस म इंजीनियर मन ल राष्ट्र निर्माण के कर्मयोगी बतईन। श्री मोदी ह किहीन कि एम. विश्वेश्वरैया एक अइसन व्यक्तित्व रिहीन, जेखर राष्ट्र निर्माण के दूरदृष्टि नागरिक मन ल हमेशा प्रेरित कर रइही।
दूरदर्शन स्थापना दिवस
भारत के राष्ट्रीय लोक सेवा प्रसारक दूरदर्शन आज अपन सड़सठवां स्थापना दिवस मनात हे। ए लोक सेवा प्रसारण के सुरूआत बछर उन्नीस सौ उनसठ म ऑल इंडिया रेडियो के अंतर्गत एक ठिन प्रायोगिक टेलीविजन सेवा के रूप म होय रिहीस। दूरदर्शन आज अपन बेहतर सेवा जइसे – सैटेलाइट अउ डायरेक्ट टू होम सर्विस के जरिया शत-प्रतिशत आबादी तक पहुंचने वाला माध्यम हरय। वर्तमान म दूरदर्शन के पैंतीस ठिन सैटेलाइन चैनल अउ छियासठ स्टूडियो केन्द्र हवय। एमा चौबीस ले जादा भाखा अउ आने-आने बोली म कार्यक्रम प्रसारित करे जाथे।
चक्रधर समारोह
रायगढ़ जिला म काली ले इकतालीसवां अंतर्राष्ट्रीय चक्रधर समारोह शुरू होगे हे। ए समारोह के शुभारंभ राज्यपाल रमेन डेका ह करीन। चौदह ले तेईस सितंबर तक रामलीला मैदान म आयोजित होवइया समारोह म देस-प्रदेस के प्रसिद्ध कलाकार मन संग स्थानीय प्रतिभा घलो गायन, वादन, नृत्य अउ लोककला के प्रस्तुति देवत हे। आज संझा कथक, राजस्थानी फोक, कुचिपुड़ी नृत्य, तबला वादन, पंडवानी अउ भजन गायन पेस करे जाही।
शुभारंभ के मउका म राज्यपाल ह किहीन कि चक्रधर समारोह महाराजा चक्रधर सिंह के कला साधना अउ सांस्कृतिक विरासत ल नवा पीढ़ी तक पहुंचाय के महत्वपूर्ण माध्यम हरय। ए मउका म राज्यपाल ह कलाकार मनके सम्मान घलो करीन।
‘डीपी वर्ल्ड नवा रायपुर ओपन‘
नवा रायपुर स्थित फेयरवे गोल्फ एंड कंट्री क्लब रिजॉर्ट म आज ले ‘डीपी वर्ल्ड नवा रायपुर ओपन‘ सुरू होगे हे। प्रोफेशनल गोल्फ टूर ऑफ इंडिया कोति ले राखे गे ए प्रतियोगिता के ट्रॉफी के अनावरण मुख्यमंत्री विष्णुदेव साय ह करीन। ए मउका म भारतीय क्रिकेट टीम के पूर्व कप्तान कपिल देव घलो मौजूद रिहीन। ए प्रतियोगिता म अट्ठारह विदेशी समेत देसभर के एक सौ बत्तीस प्रोफेशनल गोल्फ खिलाड़ी हिस्सा लेवत हे।
जीएसटी-कार्रवाई
राज्य जीएसटी के टीम ह आज बिलासपुर अउ मुंगेली जिला के छह ठिन व्यापारी मनके ठिकाना म छापामार कार्रवाई करीन हे। टीम ह मुंगेली जिला के तीन ठन होटल अउ बिलासपुर म तीन झन व्यापारी मनके प्रतिष्ठान उपर दबिस देके दस्तावेज के जांच करीन। टीम ह मुंगेली जिला के एक होटल म जीएसटी चोरी के आरोप म साठ लाख रूपिया के जुर्माना लगाय हे। उहें, बिलासपुर के व्यापार विहार स्थित थोक मंडी म तीन झन व्यापारी के प्रतिष्ठान म छापामार कार्रवाई करे हे।
नुआखाई
उत्कल समाज डहार ले आज नुआखाई के परब मनाय जात हे। ए दिन नवा धान अउ नवा अन्न ल सबले पहिली ईष्ट देवता ल भोग लगाय जाथे अउ ओखर बाद ग्रहण करे जाथे। ऋषि पंचमी के दिन आयोजित होवइया नुआखाई म उत्कल समाज कोति ले प्रदेसभर म आने-आने कार्यक्रम राखे जात हे।
प्रधानमंत्री नरेन्द्र मोदी ह नुआखाई के मउका म देसवासी मन ल सुभकामना दीन हे। सोशल मीडिया पोस्ट म श्री मोदी ह किहीन कि ए परब म किसान, फसल अउ भाईचारा के भावना के उत्सव मनाय जाथे।
मुख्यमंत्री विष्णुदेव साय ह नुआखाई के मउका म उत्कल समाज के लोगन मन ल सुभकामना दीन हे। मुख्यमंत्री ह किहीन कि नुआखाई समृद्ध कृषि संस्कृति अउ लोक परंपरा ले जुड़े महत्वपूर्ण परब हरय।
4-डी प्रिंटेबल स्मार्ट हाइड्रोजेल
भिलाई स्थित भारतीय प्रौद्योगिकी संस्थान-आईआईटी के सोधकर्ता मन फोर-डी प्रिंटेबल स्मार्ट हाइड्रोजेल विकसित करे हे, जउन गरम करे म अपन आकार बदले के संघरा दूषित पानी ले आने-आने प्रदूषक मन ल हटाय म घलो सक्षम हरय। सोधकर्ता मनके अनुसार ए नवा सोध भविष्य म सॉफ्ट रोबोटिक्स अउ पर्यावरणीय प्रदूषक नियंत्रण के क्षेत्र म उपयोगी हो सकत हे। सोध दल म सुदीप्ता पॉल, प्रियंक सिन्हा, अमूल जैन अउ डॉक्टर संजीब बनर्जी सामिल हे। ए सोध पीयर-रिव्यू वैज्ञानिक जर्नल स्मॉल मैथड्स नाम के पत्रिका म प्रकासित होय हे।
पेंशन अदालत
छत्तीसगढ़ दूसरसंचार परिमंडल डहार ले काली रायपुर म पेंशन अदालत के आयोजन करे जाही। पेंशन अदालत म पेंशनर अउ पारिवारिक पेंशनर मन ले जुड़े आने-आने समस्या अउ लंबित प्रकरण के सुनवाई करे जाही। ए दउरान संबंधित विभागीय अधिकारी अउ पेंशन प्रकरण ले जुड़े अधिकारी मौजूद रइही। पेंशन अदालत के उद्देश्य पेंशनर के सिकायत मनके प्रभावी समाधान सुनिश्चित करना अउ ओमन ल बेहतर पेंशन सुविधा उपलब्ध कराना हरय।