केंद्रीय गृहमंत्री-यूसीसी
केंद्रीय गृहमंत्री अमित शाह ह किहीन हे कि 21 ठिन राज्य मन म भाजपा के नेतृत्व वाला एन.डी.ए. सरकार ह दू हजार उनतीस ले पहिली समान नागरिक संहिता-यू.सी.सी. लागू करही। मुंबई म पत्रकार मन ले गोठबात करत ओमन किहीन कि कतकोन राज्य मन म यू.सी.सी. लागू हो चुके हे अउ उनला विस्वास हे कि दू हजार उनतीस ले पहिली भाजपा-एन.डी.ए. शासित जम्मो 21 ठिन राज्य मन म एला लागू कर दे जाही। श्री शाह ह किहीन कि तीन तलाक ल खतम कर दे गे हवय। जेखर ले मुस्लिम माईलोगिन मन ल समान अधिकार मिले हवय। ओमन किहीन कि सरकार ह पांच दसक ले चले आवत नक्सलवाद ल घलो खतम कर देहे।
दिव्यांगजन-नौकरी आरक्षण
दिव्यांगजन बर सरकारी नौकरी म आरक्षण के दायरा बढ़ाय गे हवय। राज्य सरकार ह पहिली दफा कई ठिन अइसन पद मन ल दिव्यांग आरक्षण के दायरा म सामिल करीस हे, जउन ह अब तक चिन्हित नइ रिहीस। एमा शिक्षा, आईटी, जनसंपर्क, रोजगार, कृषि, तकनीकी शिक्षा, हथकरघा अउ पर्यावरण क्षेत्र सामिल हरय। नवा सूची म स्कूल शिक्षा विभाग के उपसंचालक, प्राचार्य, स्पेसल एजुकेटर, आईटी, कंम्प्यूटर साइंस के उप अभियंता, जी.आई.एस. मैनेजर जइसन पद हवय। नियुक्ति ले पहिली राज्य मेडिकल बोर्ड ले शारीरिक दक्षता परीक्षण अउ दिव्यांगता प्रमाण पत्र के जांच कराना जरूरी हवय।
मुख्यमंत्री-ब्रिक्स सम्मेलन
मुख्यमंत्री विष्णुदेव साय ह किहीन हे कि प्रधानमंत्री नरेंद्र मोदी के नेतृत्व म भारत के वैश्विक मंच म एखर भूमिका सरलग मजबूत होय हे। ओमन किहीन कि बछर दू हजार छब्बीस म भारत ल ब्रिक्स के अध्यक्षता मिलना अउ अट्ठारवां ब्रिक्स शिखर सम्मेलन के मेजबानी करना देस के बाढ़त वैश्विक प्रतिष्ठा अउ नेतृत्व क्षमता के प्रमाण हरय। मुख्यमंत्री ह किहीन कि भारत विकाससील देस अउ ग्लोबल साउथ के आकांक्षा ल वैश्विक मंच म मजबूती ले आगू रखत हवय। श्री साय ह किहीन कि भारत के बाढ़त वैश्विक भूमिका ले निवेस, प्रौद्योगिकी, नवाचार, अउ रोजगार के नवा अवसर घलो बनत हवय।
गणेश चतुर्थी
छत्तीसगढ़ समेत जम्मों देसभर म आज ले गणेस चतुर्थी के परब बड़ श्रद्धा अउ उछाह के संग मनाए जावत हे। बुद्धि, विवेक अउ सौभाग्य-समृद्धि के गणपति जी के दस दिन के उत्सव आज ले सुरू होके चतुर्थी तक चलही। राजधानी रईपुर समेत प्रदेस के जम्मों जिला मन म भगवान गणेश के मूर्ति बइठाय जावत हे। जघा-जघा ढोल-नंगाड़ा अउ ‘‘गणपति बप्पा मोरिया‘‘ के जयकारा के संग गणेश के मूर्ति ल सार्वजनिक पंडाल अउ घर मन म बैठाय जावत हे।
राष्ट्रपति द्रौपदी मुर्मू, प्रधानमंत्री नरंेद्र मोदी, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह गणेश चुतर्थी के मउका म जम्मो देस समेत प्रदेसवासी मन ल बधई अउ अपन सुभकामना दीन हवय। प्रधानमंत्री ह सोसल मीडिया म संस्कृत म सुभाषितम साझा करत कामना करीन हे कि ए पवित्र तिहार जम्मो मनखे मनके जीवन म नवा ऊर्जा अउ उछाह लावय।
तीज
सुहागिन मनके पवित्र तिहार हरतालिका तीज आज प्रदेसभर म बड़ श्रध्दा भक्ति अउ उछाह के संग मनाय जावत हे। छत्तीसगढ़ म एला तीजा के रूप म मनाय जाथे। ए मउका म माईलोगिन मन भगवान शिव अउ माता पार्वती के पूजा अर्चना कर पति के लंबा उमर, सुघ्घर स्वास्थ्य अउ सुखी दंापत्य जीवन के कामना खातिर व्रत राखथे।
हिन्दी दिवस
देसभर में आज हिन्दी दिवस मनाय जावत हे। 1949 म इही दिन संविधान सभा ह देवनागरी लिपि म लिखे गे हिन्दी ल देस के अधिकारिक भाषा के रूप म अपनाए रिहीस। आज जम्मों दुनिया म सबले जादा बोले जाने वाला भाषा म एक ठिन भाषा हिन्दी हवय अउ 52 करोड़ ले जादा लोगन मन के पहिली भाषा हवय।
केंद्रीय गृह और सहकारिता मंत्री अमित शाह ह आज महाराष्ट्र के नवी मुंबई म छठवां अखिल भारतीय राजभाषा सम्मेलन के दउरान राजभाषा गौरव अउ राजभाषा कीर्ति पुरस्कार प्रदान करीन। श्री शाह ह हिन्दी दिवस के उद्घाटन सत्र ल घलो संबोधित करीन।
छत्तीसगढ़ के मुख्यमंत्री विष्णुदेव साय ह प्रदेसवासी मन ल हिन्दी दिवस के सुभकामना दीन हे। अपन संदेस म ओमन किहीन हे कि प्रदेस में हिन्दी के संरक्षण अउ संवर्धन के संग सिक्षा ल मातृभाषा ले जोड़े के परयास करे जात हे।
मुख्यमंत्री-निर्देश
मुख्यमंत्री विष्णुदेव साय ह अंबिकापुर के खरसिया चौक के खराब सड़क के वीडियो वायरल होय म संज्ञान लेवत सरगुजा कलेक्टर अजीत वसंत ले दूरभाष म गोठबात करीन अउ सड़क ल तुरते सुधारे के निरदेस दीन। मुख्यमंत्री ह खरसिया चौक के सड़क के गड्ढा मन ल भरे, समतलीकरण अउ पानी निकले के बेवस्था दुरूस्त करे ल किहीन हे। ओमन जादा यातायात वाला जघा मन म पुलिस अउ यातायात विभाग के समन्वय ले सुरक्षित अउ निर्बाध अवई-जवई सुनिश्चित करे के निरदेस दीन।
मुख्यमंत्री ह जम्मों जिला कलेक्टर मन ल निर्माणाधीन सड़क के सरलग निगरानी करे अउ जरूरत पड़े म निरीक्षण करे बर किहीन हे। ओमन निरदेस दीन कि मानसून के दउरान क्षतिग्रस्त अउ निर्माणाधीन सड़क मन ल अवागमन लायक बनाय राखे जाय अउ दुर्घटना के आसंका वाला जघा मन म चेतावनी संकेतक अउ बैरिकेडिंग जइसन सुरक्षात्मक उपाय करे जाय।
मुख्यमंत्री-जापान प्रतिनिधिमंडल
मुख्यमंत्री विष्णुदेव साय ले आज रईपुर स्थित मुख्यमंत्री निवास म जापान के एहिमे यूनिवर्सिटी ले आय 17 सदस्यीय छात्र मनके प्रतिनिधिमंडल ह मुलाकात करीन। भारत-जापान इंटर एक्सचंेज कारीकरम के चलत तीन दिवसीय सैक्षणिक भ्रमण म छत्तीसगढ़ पहुंचे पढ़इया लइका मन ले मुख्यमंत्री ह गोठबात करीन। ए दउरान भारत-जापान के ऐतिहासिक अउ सांस्कृतिक संबंध, बौध्द विरासत, शिक्षा, अनुसंधान, तकनीकी नवाचार अउ स्टार्टअप समेत आने-आने मुद्दा मन उपर गोठबात होइस।
आरबीआई-साइबर धोखाधड़ी
भारतीय रिजर्व बैंक ह साइबर धोखाधड़ी अउ विवादित लेनदेन म रोक के संबंध म नवा रूपरेखा के मसौदा जारी करीस हे। एखर तहत बैंक जम्मों अकाउंट के बजाय सिर्फ विवादित लेनदेन के रासि उपर ही अस्थायी रूप ले रोक लगा सकही। अइसन तभे करे जा सकही, जब 1 हजार रूपिया या ओखर ले जादा के असामान्य अंतरण के म्यूल अकाउंट या साइबर फ्रॉड ले जुड़े होय के आसंका होही। बैंक मन ल अचानक, ग्राहक के बताय गे प्रोफाइल बर अनुपयुक्त या फेर ज्ञात साइबर-फ्रॉड नेटवर्क ले जुड़े अंतरण के पहिचान करे बर ए.आई.-आधारित लेनदेन के निगरानी प्रणाली इस्तेमाल करना होही। मसौदा निरदेस अगला बछर पहिली अप्रैल ले लागू होवइया हे, फेर बैंक मन एला एखर ले पहिली भी अपना सकत हे।
चक्रधर-समारोह
रायगढ़ के रामलीला मैदान म आज ले 41वां अंतर्राष्ट्रीय चक्रधर समारोह के आयोजन करे जाही। राज्यपाल रमेन डेका ह अब ले कुछेक देर बाद ए समारोह के सुभारंभ करहीं। समारोह के पहिली दिन आज पद्मश्री डॉक्टर उषा बारले के पंडवानी अउ पद्मश्री अनुज शर्मा के लोककला अउ संगीत के प्रस्तुति होही। दस दिन तक चलइया ए समारोह म शास्त्रीय नृत्य, पंडवानी, लोक संगीत, भजन अउ गजल समेत आने-आने सांस्कृतिक प्रस्तुति होही।
खिलौना दान
बलरामपुर जिला म सेवा संकल्प अभियान के तहत आंगनबाड़ी केंद्र के लइका मन बर खिलौना दान अभियान चलाय जाही। जिला म 25 सितंबर ले 7 अक्टूबर तक ‘आंगन मिलन सेवा‘ कारीकरम होही। ए दउरान जिला के जम्मो दू हजार 371 ठिन आंगनबाड़ी केंद्र मन म लइका मन खातिर खिलौना उपलब्ध कराय जाही। कलेक्टर चंदन संजय त्रिपाठी ह जिला म रहइया मनखे मनले अपील करीन हे कि घर म राखे सुरक्षित, स्वच्छ अउ उपयोगी खिलौना जेखर इस्तेमाल नइ होवत हे, ओला तीर के आंगनबाड़ी केंद्र मन म दान करय। इच्छुक मनखे मन नवा खिलौना घलो अपन इच्दा ले उपलब्ध करा सकथे।
साइबर जागृति अभियान
कबीरधाम जिला म साइबर जागृति अभियान के तहत 50 ठिन सरकारी अउ निजी विद्यालय मन म ऑनलाइन साइबर जागरूकता कारीकरम आयोजित करे गीस। साइबर थाना कबीरधाम के डी.एस.पी. प्रशांत देवांगन ह विद्यार्थी अउ शिक्षक मन ल साइबर अपराध जइसन-ठगी, फर्जी सोसल मीडिया प्रोफाइल, ऑनलाइन गेमिंग के जोखिम ले बचाव के जानकारी दीन। ओमन विद्यार्थी मन ल सोसल मीडिया अकाउंट सुरक्षित राखे बर अउ इंटरनेट के सुरक्षित उपयोग करे के उपाय घलो बतइन। कारीकरम म तीन हजार ले जादा विद्यार्थी अउ शिक्षक मन सामिल होइन।