प्रधानमंत्री ब्रिक्स-सम्मेलन
प्रधानमंत्री नरेंद्र मोदी ह किहीन कि ब्रिक्स म ग्लोबल साउथ के देस मनके विस्वास ह बाढ़े हे। ब्रिक्स शिखर सम्मेलन के आज दूसर अउ आखिरी दिन भागीदार देस मनके मुख्य सत्र म श्रीमेादी ह किहीन कि ब्रिक्स के भीतर विकसित समाधान के फायदा ल विकाससील देस मनके जरूरत मुताबिक ढाले के संगे दे घलो जाही।
प्रधानमंत्री ह किहीन कि छोटे उदीम वाले मन ल ज्ञान वित्त अउ नवा बाजार ले जोड़े बर ब्रिक्स एमएसएनई सहयोग पोर्टल राखे के पहल के प्रस्ताव राखे गीस। ओमन बतइन कि सहर भीतरी सुघ्घर तौर-तरीका ल साझा करे के सहूलियत बर ‘ब्रिक्स अर्बन मोबेलिटी हब‘ बनाय गेहे।
ओमन यहू बतइन कि स्मार्ट ग्रिड अउ ऊर्जा भंडारण बर ब्रिक्स डिजीटल उत्कृष्टता केंद्र के स्थापना करे गेहे। उहें, ब्रिक्स नेटवर्क ऑन डिजीटलएग्रीकल्चर किसान मनके जरूरत पूरा होही।
प्रधानमंत्री आवास योजना
राज्य सरकार ह प्रधानमंत्री आवास योजना-सहर म निवास के वैधता के कट-ऑफ तिथि ल एकतीस अगस्त दू हजार पंद्रह ले बढ़ाके एकतीस अगस्त दू हजार चौबीस कर देहे। एखर ले पाछू नौ बछर ले सहर म रहवइया पात्र परिवार घलो योजना के लाभ ले सकही। नगरीय निकाय मन ल संसोधित प्रावधान मुताबिक नवा हितग्राही मनके चिन्हारी, सत्यापन अउ आवास आवंटन के कारवाई पंद्रह दिन भीतरी तय राखे के निरदेस दे गेहे।
मुख्यमंत्री-बेमेतरा
मुख्यमंत्री विष्णुदेव साय आज बेमेतरा म शिक्षक सम्मान समारोह अउ कई ठिन बिकास काम मनके भूमिपूजन, सिलान्यास अउ लोकार्पण कारीकरम म सामिल होइन। ए मउका म मुख्यमंत्री ह बेमेतरा जिला के एक सौ तिरासी करोड़ ले जादा के विकास योजना मनके आने-आने काम के लोकार्पण अउ भूमिपूजन करीन। मुख्यमंत्री ह किहीन कि सड़क, स्वास्थ्य, पिये के पानी अउ गांव-गंवई के विकास ले जुड़े ए काम ह जन सुविधा ल मजबूत करे के संगे बेमेतरा के विकास ल नवा गति देहे।
मुख्यमंत्री-संज्ञान
मुख्यमंत्री विष्णुदेव साय ह बीजापुर के एकलव्य आवासीय विद्यालय म पढ़इया नोनी मन संग होय दुर्व्यवहार के सिकइत उपर धियान देवत कलेक्टर अउ पुलिस अधीक्षक ल मामला के गंभीरता ले जांच करके नियम अनुसार कड़ा कारवाई के निरदेस देहे। मुख्यमंत्री ह किहीन हे कि लइका मनके सुरक्षा अउ गरिमा ले कोनो तरह के समझौता नइ करे जाही। दुर्व्यवहार उत्पीड़न या डरवाय धमकाय के सिइकत मिलते ही तुरते कार्रवाई करे जाय अउ दोषी मनखे मन ल कोनो भी हाल म छोड़े झन जाय। मुख्यमंत्री ह सबो जिला कलेक्टर अउ पुलिस अधीक्षक मन ल बालिका छात्रावास आश्रम अउ आवासीय विद्यालय मनके रोजिना निरीक्षण करे के संगे सुरक्षा व्यवस्था के समीक्षा करे के निरदेस दीन।
इही बीच, बीजापुर जिला के भोपाल पट्टनम थाना जघा म नाबालिक पढ़इया नोनी ले छेड़छाड़ के इही मामला म एक झिन शिक्षक के खिलाफ पॉक्सो एक्ट के चलत अपराध दर्ज करे गेहे।
चक्रधर-समारोह
रायगढ़ के रामलीला मैदान म काली चौदह सितंबर ले एक चालीसवां अंतरराष्ट्रीय चक्रधर समारोह के आयोजन करे जाही। दस दिन वाले ए समारोह म शास्त्रीय नृत्य, पंडवानी, लोकसंगीत, भजन अउ गजल समेत कई ठिन सांस्कृतिक प्रस्तुति होही। समारोह म पद्मश्री कविता कृष्णमूर्ति, अनुज शर्मा, भारती बंधु अउ इंडियन आइडल फेम अमित साना समेत देसभर के नामी कलाकार मन प्रस्तुति देही।
सेवा संकल्प अभियान
‘सेवा संकल्प अभियान‘ ल लेके छत्तीसगढ़ म जोरदरहा तियारी चलत हे। एक महिना तक चलइया ए अभियान ल सत्रह सितंबर ले सत्रह अक्टूबर तक राखे जाही। ए अभियान के पहिली दिन सत्रह सितंबर के प्रदेस के सबो जिला मन म दीया जलाय के कारीकरम होही। एखर चलत धमतरी म करीबन दस लाख दीया बारे जाही। मुख्य आयोजन रूद्री के रूद्रेश्वर महादेव मंदिर अउ महानदी घाट म होही। राजस्व अउ जिला प्रभारी मंत्री टंकराम वर्मा ह प्रदेसवासी मन ले दीया जलाके ए अभियान म सहभागी बने के अपील करे हे।
तीजा-पोरा तिहार
काली तीजा मनाय जाही। छत्तीसगढ़ म तीजा तिहार के अलगहे महत्तम हे। तीजा के दिन माईलोगिन मन अपन गोसइया के लंबा उमर बर भगवान शंकर बिनती बिनोवत निर्जला उपास राखथे। जेखर चलत आज करूभात खाय जाही। जेमा करेला सागे के संगेसंग आनीबानी के रोटी-पीठा बनाके बेटी माई मन ल घरोघर खाय बर बलाय जाथे। उहें, तीजा के बिहान दिन तिजहारिन मन नवा लुगरा पहिरके फरहार, बांसी खाथे।
एखर पहिली, काली नवा रईपुर स्थित मुख्यमंत्री निवास म काली तीजा-पोरा तिहार बर बिसेस कारीकरम राखे गे रिहीस। ए मउका मुख्यमंत्री विष्णुदेव साय ह प्रदेसव्यापी ‘हर घर मुनगा-घर घर मुनगा‘ अभियान के सुभारंभ करीन। ओमन राष्ट्रीय पोषण माह के उद्घाटन बेरा पोस्टर के विमोचन करीन। उहें, महतारी अउ बहिनी मन ल सुपोषण के सपथ देवाइन। ए दउरान मुख्यमंत्री ह सुपोषण रथ ल हरियर झंडा देखाके पठोइन। ए मउका म मुख्यमंत्री निवास ल छत्तीसगढ़ के गंवई-गांव अउ मइके असन सजाय गे रिहीस। लोक कलाकार मन के प्रस्तुति भीतर महतारी अउ बहिनी मन उछाह संग तीजा पोरा के खुसियारी बांटिन।
गणेश चतुर्थी
काली गणेश चतुर्थी घलो हरय। गणपति जी के मूर्ति काली स्थापित करे जाही। राजधानी रईपुर समेत प्रदेसभर म गणेश उत्सव के तियारी जोर-सोर ले चलत हे। सहर अउ गांव कस्बा म जघा-जघा पंडाल मन ल सुघ्घर ढंग ले सजाय जात हे। बाजार म घलो गणेश के मूर्ति पूजापाठ के समान संगे सजावटी जिनिस ल बिसाय बर लोगन मनके रेम लगे हे।
सरगुजा-ओलंपिक
बलरामपुर जिला के राजपुर विकासखंड म सोलह ले उन्नीस सितंबर तक सरगुजा ओलंपिक के आयोजन करे जाही। सोलह सितंबर के एथलेटिक्स स्पर्धा अउ बैडमिंटन प्रतियोगिता होही। उहें, सत्रह सितंबर के कबड्डी, खो-खो, व्हॉलीबॉल अउ बास्केटबाल के कंपीटिसन होही। अट्ठारा अउ उन्नीस सितंबर के फुटबाल के वर्गवार अउ सामूहिक प्रतियोगिता होही। संगे उन्नीस सितंबरेच के माईलोगिन वर्ग के रस्साखींच अउ कराते स्पर्धा होही। इंहा ए बतादन कि सिरिफ ऑनलाइन पंजीकृत होय प्रतिभागी मन एक खेलकूद म भाग ले सकही।
अउ अब पेस हे मौसम के हाल…
मौसम विभाग के मुताबिक दक्षिण छत्तीसगढ़ ले लेके पूर्वी मध्य बंगाल खाड़ी तक एक ठिन कमती दबाव के क्षेत्र बने हुए हे, ते पाय के अवइया चौबीस घंटा के दउरान बस्तर संभाग म एक-दू जघा म जोरदरहा पानी गिर सकत हे। उहें, प्रदेस के आने कई ठिन जघा म थोरबहुत बरसा हो सकत हे। संगे कुछेक जघा म गरजई-चमकई के संगे गाज गिरे के चेतावनी घलो देहे। मौसम विभाग ह यहू बताय हे कि काली चौदह सितंबर ले पानी गिरई कम हो सकत हे।
इही बीच, राजस्व अउ आपदा प्रबंधन विभाग डहार ले निकले रिपोर्ट मुताबिक एक जून ले तेरह सितंबर तक प्रदेस म औसत सामान्य बरसा के निनान्बे दसमलव नौ प्रतिसत आपूर्ति दर्ज करे गेहे।
राष्ट्रीय लोक अदालत
छत्तीसगढ़ म काली राष्ट्रीय लोक अदालत राखे गे रिहीस। ए आयोजन ल उच्च न्यायालय से लेके तालुका स्तर अउ राजस्व न्यायालय म करे गीस।
अउ अब थोरकुन समाचार सार म –
– उपमुख्यमंत्री विजय शर्मा ह कवर्धा स्थित भोरमदेव सहकारी शक्कर उत्पादक कारखाना मर्यादित म सेयरधारी गन्ना किसान मन ल रियायती दर म सक्कर वितरण कारीकरम के सुभारंभ करीन।
– महासमुंद जिला के पिथौरा सिंघोड़ा पुलिस ह नेशनल हाइवे क्रमांक तिरपन म एक ठिन कंटेनर ले साठ लाख तीन हजार कीमत के एक सौ बीस किलो ले जादा गांजा बरामद करे हे।
– बलौदाबाजार-भाटापारा जिला म स्वामी आत्मानंद स्कूल के लोहा के गेट गिरे ले सात बछर के नान्हे लइका के मउत होगे।
अउ
– धमतरी जिला के मॉडमसिल्ली बांध म तेज पानी के धार म बोहाय दू झिन मछुवारा मनके लास आज बरामद कर ले गीस।