ब्रिक्स-शिखर सम्मेलन
भारत के अध्यक्षता म नई दिल्ली के भारत मंडपम म आज ले अट्ठारवां ब्रिक्स सिखर सम्मेलन सुरू हो गेहे। सम्मेलन के उद्घाटन सत्र ल संबोधित करत हुए प्रधानमंत्री नरेंद्र मोदी ह किहीन कि पाछू बीस बछर म ब्रिक्स ह वैश्विक मंच म अपन अलग पहिचान बनाय हे, जेमा ए शिखर सम्मेलन ह एक ऐतिहासिक पड़ाव हे।
प्रधानमंत्री ह किहीन कि भारत के ब्रिक्स अध्यक्षता ह जन केंद्रित अउ मानवता ल प्राथमिकता देके बिचार उपर केंद्रित हे। ओमन किहीन कि लचीलापन, नवाचार, सहयोग अउ स्थिरता निर्माण ह भारत के जरूरी प्राथमिकता रहे हे। एखर तहत ब्रिक्स सहयोग ल आम लोगन ले सीधा जोड़े उपर बिसेस बल दे गेहे। श्री मोदी ह बतइन कि ए दउरान करीब तीस सहर म साढ़े तीन सौ ले जादा बइठका करे गीस।
प्रधानमंत्री ह किहीन कि ब्रिक्स ह कोनो के खिलाफ नइ हवय। ओमन जादा सदस्य वाले अउ सबो ल जोड़त हुए वैश्विक शासन व्यवस्था के जरूरत उपर जोर दीन। श्री मोदी ह वैश्विक शासन बर दस सूत्रीय कार्ययोजना के प्रस्ताव घलो रखिन अउ किहीन कि संयुक्त राष्ट्र सुरक्षा परिसर म सुधार ल अब अउ टाले नइ जा सके। ओमन किहीन कि दक्षिण के देस मन ल नियम बनाय म जरूरी भूमिका मिलना चाही।
दू दिन तक चलइया ए वैश्विक सम्मेलन म विकाससील अउ बाढ़त हुए अर्थव्यवस्था वाले ग्यारा ठन देस सामिल होवत हे। एमा ब्राजील, रूस, भारत, चीन, दक्षिण अफ्रीका, मिस्त्र, इथियोपिया, इंडोनेशिया, ईरान, सऊदी अरब अउ संयुक्त अरब अमीरात ह सामिल हे। ब्रिक्स सम्मेलन के ए दारी के थीम हे ‘लचीलापन, नवाचार, सहयोग और स्थिरता के लिए निर्माण।
मुख्यमंत्री-छत्तीसगढ़ ओलंपिक संघ
मुख्यमंत्री विष्णुदेव साय ह किहीन हे कि प्रदेस म खेल अधोसंरचना के विस्तार करे के संग खिलाड़ी मन ल राष्ट्रीय अउ अंतरराष्ट्रीय स्तर के प्रतियोगिता बर तियार करे उपर बिसेस जोर दे जावत हे। मुख्यमंत्री ह आज रईपुर म छत्तीसगढ़ ओलंपिक संघ के एग्जीक्यूटिव बॉडी मीटिंग अउ जनरल काउंसिल मीटिंग ल संबोधित करत हुए किहीन कि खेल प्रतिभा ल आगू बढ़ाय बर संसाधन अउ मउका के कमी नइ होही। ओमन किहीन कि खेल ह युवा मन म अनुशासन, आत्मविस्वास, टीम भावना अउ सकारात्मक ऊर्जा विकसित करे के सशक्त माध्मय हवय। मुख्यमंत्री ह प्रदेस के आने-आने खेल संघ मन ल उद्योग समूह ले जोड़े के बात किहीन। ओमन किहीन कि छत्तीसगढ़ ओलंपिक संघ अउ राज्य सरकार के बीच अच्छा समन्वय स्थापित करे जाही। जशपुर के पंडरापाठ म लगभग पच्चीस करोड़ रूपिया के लागत ले तीरांदाजी अकादमी के स्थापना करे जावत हे। उहें, बस्तर अउ सरगुजा ओलंपिक के आयोजन ह क्षेत्र के प्रतिभा ल आगू आय के मउका देहे।
बइठका म चालीसवां नेशनल गेम्स के आयोजन ल छत्तीसगढ़ म कराय के बारे म घलो गोठबात होइस।
दंतेवाड़ा वार्तालाप
सूचना और प्रसारण मंत्रालय के पत्र सूचना कार्यालय याने-पीआईबी रईपुर कोति ले दंतेवाड़ा म वार्तालाप कारीकरम के आयोजन करे गीस। ए कारीकरम म बस्तर सांसद महेश कश्यप ह सामिल होइन। ए मउका म ओमन किहीन कि दंतेवाड़ा सहित जम्मो बस्तर संभाग ल नसा मुक्त अउ स्वच्छ बनाय बर सामूहिक प्रयास के जरूरत हे। ओमन ‘‘नसामुक्त युवा फॉर विकसित भारत-संकल्प अभियान‘‘, राष्ट्रीय पोषण माह अउ ठोस अपसिष्ट प्रबंधन ल स्वस्थ अउ विकसित समाज के निर्माण ले जुड़े जरूरी बिसय बतात हुए जन जागरूकता के संग सामूदायिक भागीदारी उपर जोर दीन।
उहें, महिला और बाल विकास विभाग के जिला कारीकरम प्रबंधक रविकांत ध्रुव ह राष्ट्रीय पोषण माह के जरूरी प्राथमिकता के संग पोषण आहार अउ प्रधानमंत्री मातृ वंदना योजना के जानकारी दीन।
राज्यपाल-दीक्षांत समारोह
राज्यपाल रमेन डेका ह आज रईपुर स्थित एक निजी विश्वविद्यालय के तीसरइया दीक्षांत समारोह म मुख्यअतिथि के रूप म सामिल होइन। एमा उन्नीस विद्यार्थी मन ल स्वर्ण अउ सोलह विद्यार्थी मन ल रजत पदक दे गीस। उहें, स्नातकोत्तर अउ स्नातक स्तर उपर पांच सौ चार विद्यार्थी मन ल उपाधि प्रदान करे गीस। ए मउका म राज्यपाल ह किहीन हे कि आर्टिफिसियल इंटेलीजेंस ह आज के जरूर हे, फेर ओतके उपयोग होना चाही, जतना मानुस समाज के हित म जरूरी हे।
राष्ट्रीय लोक अदालत
प्रदेस के सबो जिला अउ व्यवहार न्यायालय म आज राष्ट्रीय लोक अदालत के आयोजन करे गीस। लोक अदालत के माध्यम ले बैंक प्रकरण, चेक बाउंस, बिजली बिल, टेलीफोन बिल, मोटर दुर्घटना दावा प्रकरण, पारिवारिक अउ बर बिहाव के विवाद के संगेसंग सिविल अउ आने-आने प्रकरण के आपसी सहमति ले निपटारा करे गीस।
यूसीसी-बैठक
प्रदेस म समान नागरिक संहिता याने यूसीसी बर राज्य स्तरीय बड़का समिति के दू दिनी परामर्स बइठका रईपुर म होइस। ए बइठका म समिति के सदस्य एम.के. राउत के अगुवई म समान नागरिक संहिता ले जुड़े अभी के नियम-कानून के जानकारी दे गीस। बइठका म गोंडी धर्म संस्कृति संरक्षण समिति ह आदिवासी समाज के जुन्ना परंपरा अउ सांस्कृतिक चिन्हारी ल बचाय बर आदिवासी समुदाय ल ए समान नागरिक संहिता के दायरा ले अलग राखे के बिनती करीन। उहें, राज्य अल्पसंख्यक आयोग के अध्यक्ष अमरजीत सिंह छाबड़ा ह लैंगिक समानता, बेटा-बेटी ल संपत्ति म बराबर के अधिकार अउ विवाह-तलाक के खच्चित पंजीयन समेत अब्बड़ अकन सुझाव दीन।
नदी-शव बरामद
जांजगीर-चांपा जिला म हसदेव नदी म काली बोहाय तीन झन छात्र मन ले एक के शव बरामद हो गेहे। फेर दू झन के तलास जारी हे। नगर सैनिक अउ गोताखोर दल ह आज एक छात्र के शव बरामद कर लीन। एसडीआरएफ के टीम ह ए तलासी अभियान म जुटे हे, जेमा ड्रोन के मदद घलो ले जावत हे। सुनइया मन ल बतादन कि बेलासपुर के एक कालेज के आठ झन छात्र-छात्रा मन पिकनिक मनाय बर देवरी गे रिहीन, ंिजंहा सेल्फी लेहे के दउरान एक छात्र नदिया म गिरगे ओला बचाय बर दू झन अउ नदी म कूद गे, फेर तीनों छात्र गहरा पानी म डूब गीन।
ऐति, दुरूग जिला के सेलूद-भाठापारा स्थित तांदुला नहर म आज बिहनिया तेरह बछर के कबड्डी खिलाड़ी सुभम यादव ह पानी के तेज बहाव म बोहागे। घटना के जानकारी मिलतेच एसडीआरएफ अउ स्थानीय प्रशासन के टीम ह सुभम यादव के तलास म जूट गेहे। रईपुर के रहइया ए खिलाड़ी ह सेलूद म राखे गे कबड्डी प्रतियोगिता म भाग ले बर आय रिहीस।
जिले की चिट्ठी
आकासवाणी रईपुर के प्रादेशिक समाचार एकांश, डहार ले प्रस्तुत कार्यक्रम “जिले की चिट्ठी“ के प्रसारण काली संझा छह बजके पांच मिनट ले छह बजके दस मिनट तक करे जाही। ए कार्यक्रम ल छत्तीसगढ़ के सबो आकाशवाणी केन्द्र एके संघरा रिले करही। ए दारी के अंक म आपमन ‘‘दुरूग’’ जिला के गतिविधि के बारे म जानकारी सुनिहा।
सिम्स-स्वीकृति
बिलासपुर स्थित छत्तीसगढ़ आयुर्विज्ञान संस्थान-यानी सिम्स के उन्नीस स्नातकोत्तर चिकित्सा पाठ्यक्रम मन के नवीनीकरण ल अभी के सैक्षणिक सत्र बर राष्ट्रीय आयुर्विज्ञान आयोग के स्नातकोत्तर आयुर्विज्ञान शिक्षा बोर्ड ह अस्थाई मंजूरी देहे। एखर संग एमडी अउ एमएस पाठ्यक्रम मनके कुल इंक्यानवे सीट म भर्ती के अनुमति मिले हे। एमा एमडी के चौदह पाठ्यक्रम के उनहत्तर अउ एमएस के पांच पाठ्यक्रम के बाईस ठन सीट सामिल हे।
स्वाइन फ्लू
छत्तीसगढ़ म पाछू चौबीस घंटा के दउरान स्वाइन फ्लू के तीस मरीज के पुष्टि होय हे। एमा सबले जादा तेरह झन मरीज रईपुर म पाय गेहे। उहें, दुरूग अउ बेमेतरा म छै-छै झन मरीज मिले हे। प्रदेस म अब तक स्वाइन फ्लू के कुल चार सौ सात मरीज मिल चुके हे।