प्रधानमंत्री नरेन्द्र मोदी ह किहीन हे कि स्वामित्व योजना म संपत्ति कारड ले ग्रामीण भारत म ऐतिहासिक बदलाव आही। श्री मोदी ह आज वीडियो कान्फ्रेंसिंग ले स्वामित्व योजना म संपत्ति कारड बांटे के योजना के सुभारंभ करीन। ए मउका म श्री मोदी ह किहीन कि ए योजना करोड़ों देसवासी मनके जिनगी बदले म ‘‘मील के पत्थर‘‘ बनही।
प्रधानमंत्री ह किहीन कि छह लाख बैसठ हजार गांव के लोगन ल चरणबद्ध रूप म संपत्ति कारड दे जाही। एखर ले ओमन ल बैंक ले करजा समेत कतकोन सुभीता मिल सकही। ए मउका म प्रधानमंत्री ह लोगन ले कोरोना वायरस ले बांचे खातिर जरूरी उपाय अपना के सुरक्षित रेहे के संदेस दीन।
तुअर/उड़द दाल-खुदरा मूल्य
केन्द्र सरकार ह उपभोक्ता मनके कल्याण बर राहेर अउ उरीत दार के खुदरा मूल्य म अभी होय बढ़ोतरी ल कमती करे अउ ए दार के आपूर्ति म बढ़वार करे बर प्रयास करे हे। उपभोक्ता कार्य, खाद्य अउ सार्वजनिक वितरण मंत्रालय ह खुदरा मूल्य ल ज्यादा असरदार बनाय बर न्यूनतम समर्थन मूल्य या फेर आरक्षित मूल्य एमा जउन भी कमती होही। ओखर मुताबिक खुदरा मूल्य निश्चित करे बर केहे हे। मंत्रालय ह राज्य ल बछर दू हजार अट्ठारह के खरीफ स्टाॅक बर उनयासी रूपिया किलो अउ बछर दू हजार उन्नीस बर पच्यासी रूपिया किलो खुदरा मूल्य म धुले उरीत दार बेचे बर केहे हे।
गृह मंत्रालय-दुष्कर्म मामला
केन्द्रीय गृह मंत्रालय ह राज्य अउ केन्द्रसासित प्रदेस ल दुष्कर्म मामला घटना के रिपोर्ट के दू महीना के भीतरी जांच पूरा करे बर केहे हे। गृह मंत्रालय ह राज्य अउ केन्द्रसासित प्रदेस ल जारी नवा सलाह म यौन अपराध म मामला के जांच म नजर राखे बर केहे हे, जेखर ले आरोप पत्र म समय के भीतरी कार्रवाई करे जा सकय। गृह मंत्रालय ह केहे हे कि आपराधिक दंड संहिता म संज्ञेय अपराध के मामला म एफआईआर जरूरी रूप ले दरज होना चाही। माईलोगिन मनके खिलाफ यौन उत्पीड़न के अपराध घलो संज्ञेय अपराध म आथे।
मरवाही उपचुनाव-उम्मीदवार
भारतीय जनता पार्टी ह मरवाही विधानसभा उपचुनाव बर डाॅक्टर गंभीर सिंह ल अपन उम्मीदवार बनाय हे। काली नई दिल्ली म पार्टी अध्यक्ष जगत प्रक ाश नड्डा के अगुवई म केन्द्रीय चुनाव समिति के बइठका होईस। बइठका म डाॅक्टर सिंह ल मरवाही ले पार्टी उम्मीदवार बनाय म सहमति बनीस, जेखर बाद उंखर नाव के ऐलान करे गीस।
उहें, ए सीट बर कांग्रेस अउ जनता कांग्रेस छत्तीसगढ़-जे. समेत आने राजनीतिक दल ह अब तक अपन उम्मीदवार मनके नाव के औपचारिक घोषणा नइ करे हे। ए सीट म तीन नवंबर के वोट डारे जाही।
लोकवाणी
मुख्यमंत्री भूपेश बघेल ह किहीन हे कि किसान मन ल न्याय, स्वाभिमान अउ स्वालंबन के जिनगी देना राज्य सरकार के लक्ष्य हवय। मुख्यमंत्री ह आज मासिक रेडियो वार्ता कारीकरम ‘‘लोकवाणी‘‘ के ग्यारहवां कड़ी म ‘‘नवा छत्तीसगढ़ हमर विकास-मोर कहानी‘‘ बिसय म अपन विचार साझा करत ए बात किहीन।
मुख्यमंत्री ह बतईन कि डाॅक्टर खूबचंद बघेल स्वास्थ्य सहायता योजना समेत आने स्वास्थ्य योजना के बने नतीजा मिले के बाद अब प्रदेस म राधाबाई डायग्नोस्टिक सेंटर योजना के सुरूवात करे जात हे। डाॅक्टर खूबचंद बघेल स्वास्थ्य सहायता योजना म नौ महीना म दू लाख इकहत्तर हजार लोगन ल पचास हजार रूपिया तक के इलाज के सुभीता मुफत म दे गेहे। उहें, मुख्यमंत्री विशेष स्वास्थ्य योजना म नौ महीना म तीन सौ पन्द्रह लोगन ल बीस लाख रूपिया तक इलाज के सुभीता मिले हे।
कारीकरम म श्री बघेल ह किहीन कि बस्तर क्षेत्र म बिजली भर नहीं, सिक्षा, स्वास्थ्य अउ रोजगार के सुभीता अमराय गेहे। बस्तर के दूर-दराज क्षेत्र म करीबन बारह हजार घर म बिजली पहुंच गेहे।
लोकवाणी म मुख्यमंत्री ह बस्तर क्षेत्र के विकास खातिर प्रस्तावित कई ठन आने परियोजना के संबंध म जानकारी दीन। मुख्यमंत्री ह किहीन कि वन अधिकार पत्र के दावा ल खारिज करके जउन अन्याय करे गे रिहीस। हमन ओखर उपर कार्रवाई के फइसला लेन अउ तय करे रेहेन कि समीक्षा के बाद बड़ पैमाना वन अधिकार पट्टा दे जाही। निरस्त दावा म चालीस हजार ले जादा लोगन ल व्यक्तिगत पट्टा दे गेहे।
कारीकरम के बेरा आने-आने योजना के हितग्राही मन ल मुख्यमंत्री के संग गोठबात करके अपन अनुभव बतईन।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह आज संझा साढ़े सात बजे आकाशवाणी रायपुर ले प्रसारित विशेष कारीकरम ‘‘हमर ग्राम सभा‘‘ म दूर-दराज के क्षेत्र म बैंकिंग सुभीता देवावत बैंक सखी के संबंध म विस्तार ले जानकारी दीही। ए कारीकरम ल मीडियम वेव नौ सौ इक्यासी किलोहर्ट्ज म सुने जा सकत हे, जउन ल प्रदेस स्थित आकाशवाणी के जम्मों केन्द्र एक संघरा रिले करही।
एम. नितिन नागरकर-कोरोना सावधानी अपील
अखिल भारतीय आयुर्विज्ञान संस्थान-एम्स रायपुर के निदेशक डाॅक्टर एम. नितिन नागरकर ह लोगन मन ले कोरोना संक्रमण ले बांचे खातिर जरूरी सावधानी राो के अपील करीन हे।
पंजीयन-नियम
जमीन के ई-रजिस्ट्री के काम ल सरल बनाय अउ एमा लगइया बेरा ल कमती करे बर पंजीयन विभाग ह एक ठिन नवा कानून लागू करे हे। एखर मुताबिक अब प्रापर्टी के कीमत के पांच फीसदी स्टाम्प पेपर खरीदे के बादे रजिस्ट्री बर आॅनलाइन अपाईनमेंट मिलही।
महानिरीक्षक पंजीयन अउ मुद्रांक धर्मेश साहू ह बतईन कि ई-पंजीयन प्रणाली म ए बात आगू आवत हे कि अपाईनमेंट जादा हवय, फेर रजिस्ट्री कमती होवत हे। संगेसंग अब पोर्टल म रतिहा के जघा बिहनिया आठ बजे ले अपाईनमेंट देके सुरूवात करे जाही अउ अवइया पन्द्रह दिन बर आॅनलाइन अपाईनमेंट ले जा सकही।
अपहरण
राजनांदगांव जिला के सोमनी थाना क्षेत्र म एक ढाबा चलइया के बेटा ल अज्ञात लोगन मन अगुवा कर लेहे। अइसन संका जताय जात हे कि फिरौती खातिर एखर अपहरण करे गेहे।
पुलिस के मुताबिक काली ढाबा चलइया के बेटा ढाबा म रिहीस। रतिहा नौ बजे कुछेक लोगन गाड़ी म बइठ के पहुंचीन अउ ओला जबरन गाड़ी म बईठार के फरार होगे। अगुवा करइया मन ह फोन करके पचास लाख रूपिया के फिरौती मांगे हे। पुलिस मामला के जांच सुरू कर देहे।
कांकेर घटना-एसआईटी
कांकेर म पत्रकार मन संग होय घटना के जांच रिपोर्ट के परीक्षण करके कार्यवाही बर बस्तर रेंज के पुलिस महानिरीक्षक सुंदरराज पी. ह एसआईटी के घटना करे हे। एमा जगदलपुर के अतिरिक्त पुलिस अधीक्षक ओ.पी. शर्मा, कांकेर के उप पुलिस अधीक्षक आकाश मरकाम अउ कांकेर के उप निरीक्षक राजेश राठौर ल सदस्य बनाय गेहे।
सतनाम-संदेश यात्रा
राजधानी रईपुर म आज सतनाम संदेश यात्रा के सुरूवात होईस। एखर समापन डोंगरगढ़ म होही। सतनाम पंथ के जगत गुरू रूद्रकुमार के अगुवई के जेल रोड के सतनाम सदन ले ए यात्रा सुरू करे गीस, जेखर जगह-जगह सुवागत करे गीस। सतनाम संदेश यात्रा के उद्देश्य समाज म सिक्षा, स्वास्थ्य अउ रोजगार बर लोगन ल जागरूक करना हे अउ बाबा गुरू घासीदास के संदेश ल लोगन तक अमराना हे।
मौसम
मौसम विभाग ह अवइया चैबीस घंटा म प्रदेस म एक-दू जघा गरज-चमक संग गाजा गिरे अउ भारी बरसा होय के चेतावनी देहे। मौसम विज्ञान केन्द्र के मुताबिक पश्चिम मध्य बंगाल के खाड़ी म एक अवदाब बने हे। अवइया चैबीस घंटा म एखर प्रभाव ले प्रदेस के दक्षिण क्षेत्र म भारी बरसा हो सकत हे।