शिवराज चौहान-सक्ती
केन्द्रीय ग्रामीण विकास अउ कृषि मंत्री शिवराज सिंह चौहान के संगेसंग मुख्यमंत्री विष्णुदेव साय ह काली ग्यारह सितंबर के सक्ती जिला के गांव जेठा म ग्रामीण विकास के कतकोन योजना मनके सुभारंभ करही। ए कार्यक्रम म प्रधानमंत्री आवास योजना-ग्रामीण के तहत दू लाख परिवार मन ल नवा पक्का बने घर म गृह प्रवेस कराय जाही। कार्यक्रम म एआई आधारित जियो टैग सत्यापन अउ सेल्फ जियो टैग प्रणाली, जलधारा मनके पुनर्जीवन बर ‘‘धार अपार‘ अउ ग्रामीण परिवार मनके इंनकम बढ़ाय बर ‘‘सुघ्घर बाड़ी‘‘ अभियान के सुभारंभ होही। राष्ट्रीय ग्रामीण आजीविका मिशन के तहत दू सौ सत्तर नवा इंटीग्रेटेड फार्मिंग क्लस्टर के घलो विमोचन करे जाही। एखर अलावा ‘अथ उद्यम‘ कार्यक्रम के तहत गांव के माईलोगिन मन ल उद्यमिता ले जोड़े बर चैलेंज फंड इवेंट सुरू करे जाही।
कार्यक्रम म लखपति दीदी, ड्रोन दीदी अउ उत्कृष्ट पंचायत प्रतिनिधि मन ल सम्मानित करे जाही। ए दउरान एक सौ बाईस करोड़ रूपिया ले जादा के आने-आने विकास काम के लोकार्पण अउ भूमिपूजन करे जाही।
मुख्यमंत्री-समीक्षा
मुख्यमंत्री ह प्रदेस के जम्मांें जिला मन म हॉस्टल, पीजी, कोचिंग सेंटर, स्कूल अउ बड़का सैक्षणिक भवन मनके तुरते जांच करके सेफ्टी ऑडिट कराय के निरदेस देहे। ओमन किहीन कि जिहां सुरक्षा ले जुड़े कमी आगू आही, उहां तय समय राखके जरूरी सुधार करवाय जाही। मुख्यमंत्री ह आज रईपुर म वीडियो कॉन्फ्रेसिंग के माध्यम ले प्रदेस के जम्मों संभाग आयुक्त, पुलिस महानिरीक्षक, कलेक्टर, पुलिस अधीक्षक अउ बड़का प्रशासनिक अधिकारी मनके उच्च स्तरीय बइठका लीन।
मुख्यमंत्री ह कलेक्टर अउ पुलिस अधीक्षक मन ले किहीन कि ओमन अपन-अपन जिला म खुदे एखर सरलग निगरानी करयं। मुख्यमंत्री ह अधिकारी मन ल अवैध अउ मिलावटी सराब बनाय, बेचे, भंडारण के संगेसंग अवई-जवई वाले गाड़ी मन उपर कड़ा कार्रवाई करे बर किहीन। ओमन आबकारी विभाग, पुलिस अउ जिला प्रशासन ल मिलके बिसेस अभियान चलाय के निरदेस दीन।
राज्यपाल-नशामुक्त अभियान
रईपुर स्थित पंडित रविशंकर शुक्ल विश्वविद्यालय म ‘‘नशा मुक्त युवा-विकसित भारत‘‘ संकल्प अभियान के तहत एक महीना तक चले आने-आने जागरूकता कार्यक्रम मनके आज समापन होइस। समापन कार्यक्रम म कुलाधिपति अउ राज्यपाल रमेन डेका ह मुख्य अतिथि के रूप म सामिल होइन।
न्यायाधीश-शपथ
छत्तीसगढ़ उच्च न्यायालय के मुख्य न्यायधीश कृष्ण राम महापात्रा ह आज बिलासपुर होईकोर्ट म सपथ ग्रहण समारोह म तीन झिन नवा न्यायधीश संतोष शर्मा, सुषमा सावंत अउ सुधीर कुमार ल पद के सपथ देवाइन। एखर नियुक्ति के बाद हाईकोर्ट म जज मनके संख्या तेरह हो गेहे।
स्थानीय अवकाश
सामान्य प्रशासन विभाग ह नुआखाई, महाअष्टमी अउ गोवर्धन पूजा के मउका म स्थानीय अवकाश घोसित करे हे। जारी आदेश के मुताबिक नुआखाई परब बर पन्द्रह सितंबर, महाष्टमी बर उन्नीस अक्टूबर अउ गोवर्धन पूजा बर नौ नवंबर के स्थानीय छुट्टी रइही।
तहसीलदार/नायब तहसीलदार
राजस्व अउ आपदा प्रबंधन विभाग ह प्रदेस के संतावन झिन तहसीलदार अउ नायब तहसीलदार मनके ट्रांसफर करे हे। फेरबदल म प्रदेस के आने-आने जिला म पदस्थ अधिकारी मन ल नवा जिम्मेवारी दे गेहे, जेमा कोरिया, रायगढ़, जशपुर, बिलासपुर, रायपुर, धमतरी, सरगुजा, बालोद, दंतेवाड़ा, महासमुंद के संगेसंग अउ कतकोन जिला के अधिकारी मन सामिल हे।
सेवा संकल्प अभियान
छत्तीसगढ़ म सत्रह सितंबर ले सत्रह अक्टूबर तक प्रदेसव्यापी ‘‘सेवा संकल्प अभियान‘‘ मनाय जाही। पर्यटन अउ संस्कृति मंत्री राजेश अग्रवाल ह नवा रईपुर म ए अभियान के समीक्षा करीन। ए दउरान ओमन बतईन कि संस्कृति विभाग ह प्रदेस म नुक्कड़ नाटक मनके माध्यम ले लोक भाषा म जनकल्याणकारी योजना अउ ओखर ले आय बदलाव के संदेस दीहीं। एक महीना तक चलइया ए कार्यक्रम म ‘‘नमो सेवा गाथा‘‘ अउ ‘‘सरकार आपके द्वार‘‘ जइसन कतकोन कार्यक्रम होही।
लोक शिक्षण संचालनालय-भर्ती
प्रदेस म लोक शिक्षण संचालनालय ह स्वामी आत्मानंद उत्कृष्ट अंग्रेजी माध्यम विद्यालय मन म एक हजार आठ सौ बारह खाली पद ल भरे बर विज्ञापन जारी करे हे। ए पद ल भरे बर योग्य उम्मीदवार मन ले ऑनलाइन अरजी मंगाय गेहे। भर्ती संविदा आधार म होही। भर्ती म व्याख्याता, सिक्षक, प्रधान पाठक के संगेसंग सहायक सिक्षक के आने-आने पद सामिल हे।
कृषि विश्वविद्यालय-अधिमान्यता
रायपुर स्थित इंदिरा गांधी कृषि विश्वविद्यालय ल भारतीय कृषि अनुसंधान परिषद के राष्ट्रीय कृषि शिक्षा अधिमान्यता बोर्ड ह ‘‘ए ग्रेड‘‘ के अधिमान्यता दे हवय। विश्वविद्यालय अउ एखर ले जुड़े आने-आने महाविद्यालय के संगेसंग स्नातक, स्नातकोत्तर अउ सोध कार्यक्रम मन ल मार्च दू हजार चौबीस ले मार्च दू हजार उनतीस तक बर ए अधिमान्यता मिले हवय। परिषद के अधिमान्यता सूची म विश्वविद्यालय ल देस के सुघ्घर कृषि विश्वविद्यालय म जघा मिले हे।
इही बीच, राज्यपाल रमेन डेका ले लोकभवन म इंदिरा गांधी कृषि विश्वविद्यालय के कुलपति डॉक्टर गिरीश चंदेल ह मिलीन।
राष्ट्रीय लोक अदालत
प्रदेस के जम्मों जिला अउ व्यवहार न्यायालय मन म सन्निचर बारह सितंबर के राष्ट्रीय लोक अदालत राखे जाही। लोक अदालत के माध्यम ले बैंक ले जुड़े प्रकरण, बिजली बिल, टेलीफोन बिल विवाद, मोटर दुर्घटना दावा प्रकरण, पारिवारिक अउ वैवाहिक विवाद, चेक बाउंस प्रकरण के संगेसंग सिविल अउ आने प्रकरण मनके आपसी सहमति ले निपटारा करे जाही।
पोरा तिहार
छत्तीसगढ़ के लोकपरब तिहार पोरा आज प्रदेस म उछाह के संग मनाय जात हे। ए मउका म किसान मन ह बने फसल के कामना के संग हल अउ बइला के पूजापाठ करथे। मुख्यमंत्री ह छत्तीसगढ़ के समृध्द संस्कृति अउ परंपरा के चिन्हा लोक परब पोरा तिहार के प्रदेस के लोगन मनल बधई दे हवय।
भूजल संसाधन आंकलन
पानी ल बचाय अउ भूजल प्रबंधन के क्षेत्र म छत्तीसगढ़ ल बड़का सफलता मिले हे। भूजल संसाधन आंकलन के मुताबिक प्रदेस के अब कोनों भी विकासखंड म भूजल दोहन ‘क्रिटिकल‘ श्रेणी म नइ हे। बछर दू हजार बीस म नौ ठिन विकासखंड ए श्रेणी म रिहीस अउ दू हजार पच्चीस म एखर संख्या बाढ़के पांच होगे रिहीस। ए आंकलन म बारह ठिन विकासखंड मनके भूजल स्थिति म सुधार दरज करे गेेहे। प्रदेस म सुरक्षित विकासखंड मनके संख्या बाढ़के अब एक सौ सत्ताईस होगे हे।
यूसीसी-समिति-बैठक
राज्य शासन डहार ले बनाय गे यूसीसी समिति के बइठका काली राजनांदगांव म होइस। बइठका म यूसीसी समिति के सदस्य रिटायर आई.ए.एस. अधिकारी एम.के. राउत, बड़का वकील मोहन पवार अउ रिटायर प्राचार्या डॉक्टर ज्योति रानी सिंह शामिल होइन। ए दउरान आने-आने सामाजिक संगठन मन ह जम्मों लोगन मन बर धर्म, जाति, या लिंग के भेदभाव के बिना बिहाव, तलाक, बच्चा गोद ले अउ संपत्ति के उत्तराधिकार जइसन मामला म एके जइसे कानून बनाय जाय के वकालत करीन।
अरूण साव-समीक्षा
उपमुख्यमंत्री अउ नगरीय प्रशासन मंत्री अरूण साव ह राज्य के जम्मों नगर निगम अउ जिला मुख्यालय वाले नगर पालिका मनके कामकाज के समीक्षा करीन। ए दउरान ओमन अधिकारी मन ल किहीन कि अधिकारी मन बिहनिया सहर म निकले अउ कामकाज के सही ढंग ले जांच करयं। संगेसंग संपित्त कर के भुगतान बर निकाय मन म ऑनलाइन व्यवस्था बनाय के निरदेस दीन।
मौसम
मौसम विभाग के मुताबिक बंगाल के खाड़ी म एक ठिन कम दबाव के क्षेत्र बन गेहे, जेखर प्रभाव ले अवइया चौबीस घंटा के दउरान दक्षिण अउ मध्य छत्तीसगढ़ के कोनो-कोनो जघा भारी बरसा होय के संभावना हे। मौसम विभाग ह गरियाबंद, कोंडागांव, बस्तर, दंतेवाड़ा अउ सुकमा जिला म ऑरेंज अलर्ट जारी करे गेहे।