कैबिनेट-रेलवे
केन्द्रीय मंत्रिमंडल ह कुल दस हजार सात सौ करोड़ रूपिया ले जादा के लागत वाले तीन मल्टी ट्रेकिंग रेलवे परियोजना ल मंजूरी देहे। ए परियोजना हे बिलासपुर ले पेंड्रा रोड तीसर लाइन, कटनी ले पेंड्रा रोड चौथा लाइन अउ खड़गपुर ले झारसुगुड़ा चौथा लाइन। केन्द्रीय मंत्रिमंडल के बइठका के बाद पत्रकार मन ल जानकारी देत सूचना अउ प्रसारण मंत्री अश्विनी वैष्णव ह बतईन कि लाइन के क्षमता बाढ़े ले अवई-जवई म सुधार होही, जेखर ले भारतीय रेलवे के क्षमता अउ विश्वसनीयता बाढ़ही।
राज्य मंत्रिपरिषद बैठक
मुख्यमंत्री विष्णुदेव साय के अगुवई म आज मंत्रालय म होय राज्य मंत्रिपरिषद के बइठका म कतकोन महत्वपूर्ण फइसला ले गीस। बइठका म प्रदेस के युवा मन ल रोजगार, कौशल विकास अउ उद्यमिता के नवा मउका देवाय बर ‘‘मुख्यमंत्री स्टार्टअप अउ निपुण मिशन‘‘ ल मंजूरी दे गीस। एमा अवइया पांच बछर म पांच सौ करोड़ रूपिया के प्रावधान करे गेहे। एमा जम्मों तैंतीस जिला म उद्यमिता विकास केन्द्र, सौ इमर्जिंग टैक्नोलॉजी लैब अउ पांच इंडस्ट्री एक्सीलेंस सेंटर बनाय जाही।
मंत्रिपरिषद ह छत्तीसगढ़ निर्यात प्रोत्साहन नीति ल मंजूरी देहे। एमा ई-कॉमर्स, व्यापार मेला अउ प्रदर्सनी ले प्रदेस के उद्यमी अउ निर्यात करइया मन बर अंतर्राष्ट्रीय बाजार म पहुंच बढ़ाय जाही।
एक आने फइसला म मंत्रिपरिषद ह नवा रायपुर अटल नगर म नेशनल स्कील ट्रेनिंग इंस्टीट्यूट के स्थापना बर गांव तेंदुआ म दस एकड़ भूईंया मुफत म म आवंटित करे के प्रस्ताव ल मंजूरी दे देहे। करीबन दू सौ करोड़ रूपिया के लागत ले बनइया ए संस्थान म आधुनिक शैक्षणिक, प्रशासनिक अउ छात्रावास सुभीता दे जाही।
मंत्रिपरिषद ह राज्य शासन के अधीन काम करत स्थायी, अस्थायी, सरकारी सेवक, निगम-मंडल अउ स्वशासी संस्था के कर्मचारी मनके संगेसंग संविदा कर्मचारी अउ नगर सैनिक मन ल आने सरकारी सेवा अउ बड़े पद बर अरजी दे खातिर राहत देत तय अधिकतम आयु सीमा अड़तीस बछर ले बढ़ाके पैंतालीस बछर करे के प्रस्ताव ल मंजूरी देहे।
बइठका म दुरूग जिला न्यायालय के नवा भवन बनाय बर गांव तितुरडीह म बीआईटी कॉलेज तीर चार हेक्टेयर भूईंया देवाय के प्रस्ताव ल मंजूरी दे गेहे।
भाजपा-सेवा संकल्प अभियान
भारतीय जनता पार्टी प्रधानमंत्री नरेन्द्र मोदी के जनसेवा के पच्चीस बछर पूरा होय के मउका म सत्रह सितंबर ले एक महीना के सेवा संकल्प अभियान शुरू करही। नई दिल्ली म एक संवाददाता सम्मेलन म भारतीय जनता पार्टी के राष्ट्रीय अध्यक्ष नितिन नबीन ह बतईन कि प्रधानमंत्री सात अक्टूबर के जन सेवा के पच्चीस बछर पूरा करही। ओमन किहीन कि ए पच्चीस बछर म जन सेवा ले राष्ट्र सेवा के मंत्र के संग सेवा के यात्रा ल सरलग आगू बढ़ाय हे। भाजपा अध्यक्ष ह किहीन कि प्रधानमंत्री के अगुवई म देस विकास तक भर सीमित नइ रेहे हे, भलूक भारत के सांस्कृतिक चिन्हारी अउ विरासत घलो मजबूत होय हे।
ऐति, रायपुर के प्रदेस भाजपा कार्यालय म आज राखे गे कार्यक्रम म बोलत सांसद अउ भाजपा प्रकोष्ठ संकुल के राष्ट्रीय संयोजक वी.डी. शर्मा ह कहिन कि सत्रह सितंबर ले सत्रह अक्टूबर तक देसभर म सेवा संकल्प अभियान चलाय जाही। ए दउरान ‘‘सेवा में मेरा योगदान और राष्ट्रीय इनोवेशन चैलेंज‘‘ कोति ले युवा मन ल सेवा, रचनात्मकता अउ नवाचार ले जोड़े जाही।
ए मउका म पार्टी के क्षेत्रीय संगठन महामंत्री अजय जम्वाल अउ प्रदेस संगठन महामंत्री समेत पार्टी के बड़का पदाधिकारी मौजूद रिहीन।
इही बीच, पत्रकार मन ले गोठबात करत सांसद श्री शर्मा ह बतईन कि सेवा संकल्प अभियान म सत्रह सितंबर ले सात अक्टूबर तक गुजरात के वडनगर ले काशी तक जल, जन अउ सेवा संकल्प यात्रा निकाले जाही। ए दउरान बीस आने-आने रद्दा म भारतीय जनता युवा मोर्चा के कार्यकर्ता बीस दिवसीय यात्रा निकालही।
आबकारी अभियान
मध्यप्रदेश के सागर म जहरीला सराब पीये ले बड़ संख्या म लोगन के मउत के घटना ल गंभीरता ले लेवत छत्तीसगढ़ म आबकारी विभाग ह अवैध अउ जहरीला सराब उपर नियंत्रण राखे बर प्रदेसभर म सघन जांच अभियान सुरू करे हे। एमा रेलवे स्टेसन, बस स्टैंड, चेक पोस्ट अउ संदिग्ध ठिकाना मन म सघन गश्त अउ जांच करे के निरदेस दे गेहे। जेखर ले बाहिरी राज्य ले अवइया अवैध सराब के तस्करी ल रोके जा सकय। हरेक जिला म उड़नदस्ता के संगेसंग बिसेस टीम बनाय गेहे। अभियान म देसी, विदेसी सराब दुकान अउ ढाबा के घलो जांच करे जात हे।
केन्द्रीय राज्यमंत्री-छत्तीसगढ़
केन्द्रीय सामाजिक न्याय अउ अधिकारिता राज्यमंत्री रामदास अठावले ह आज अपन छत्तीसगढ़ प्रवास के दउरान रईपुर म सामाजिक कल्याण कार्यक्रम के कार्यान्वयन अउ अनुसूचित जाति-अनुसूचित जनजाति बैकलॉग भर्ती के प्रगति के आंकलन करे बर छत्तीसगढ़ सरकार अउ रायपुर नगर निगम के बड़का अधिकारी मनके संग एक उच्च स्तरीय समीक्षा बइठका के अध्यक्षता करीन।
एखर बाद मीडिया ले गोठबात करत केन्द्रीय राज्यमंत्री ह बतईन कि केन्द्र सरकार ह वंचित वर्ग के कल्याण बर कतकोन पहल करे हे। छत्तीसगढ़ म पांच नशामुक्ति केन्द्र अउ तीन वृद्धा आश्रम बर पइसा प्रदान करे जाही।
राष्ट्रीय पोषण माह
उत्तरप्रदेश के वाराणसी म आज नौवां राष्ट्रीय पोषण माह के सुभारंभ करे गीस। केन्द्रीय महिला अउ बाल विकास मंत्री अन्नपूर्णा देवी ह कार्यक्रम के उद्घाटन करीन। ए बेरा म केन्द्रीय मंत्री ह किहीन कि राष्ट्रीय पोषण माह स्वस्थ अउ सशक्त भारत के संकलप ल आगू बढ़ाय के अभियान हरय। ओमन किहीन कि ए अभियान हरेक महतारी अउ लइका के स्वास्थ्य, पोषण अउ परिवार के खुशहाली ले जुड़े हे। एसो पोषण माह के बिसय हरय – ‘‘हमारी आंगनबाड़ी-हमारी जिम्मेदारी‘‘।
छत्तीसगढ़ म घलो आज ले राष्ट्रीय पोषण माह सुरू होगे। पोषण माह के दउरान आंगनबाड़ी केन्द्र मन म तीन ले छह बछर के आयु वरग के लइका मन ल देवइया गरम पके भोजन के गुणवत्ता, साफ-सफई म निगरानी राखे जाही। उहें, पोषण मेला ले मिलेट्स, मौसमी फल-फूल, साग-भाजी, दाल, दूध ले बने जिनीस, मेवा अउ आने-आने किसम के बीज जइसन पुष्टई जिनीस के उपयोगिता बताय जाही। पोषण माह के दउरान प्रधानमंत्री मातृ वंदना योजना म हरेक पात्र गर्भवती अउ धात्री माईलोगिन मन ल योजना ले जोड़े बर बिसेस अभियान चलाय जाही।
चावल-वितरण
छत्तीसगढ़ म सार्वजनिक वितरण प्रणाली म सितंबर अउ अक्टूबर महीना के चाउर बांटे के काम चलत हे। प्रदेस के चौदह हजार एक सौ छियासी उचित मूल्य दुकान म ले नौ हजार तीन सौ छप्पन दुकान म खाद्यान्न के भंडारण होगे हे। उहें, अभी तक दू लाख बासठ हजार रासन कारड धारी मन चाउर ले लेहे। जिखर तीर रासन कारड हे, ओमन तीस सितंबर तक कोनों भी उचित मूल्य दुकान ले दू महीना के चाउर ले सकत हे।
पोरा
छत्तीसगढ़ के लोक परब ‘‘पोरा‘‘ काली प्रदेसभर म पारंपरिक उछाह के संग मनाय जाही। ए तिहार म किसान बने फसल के मानता मानत अपन किसान के औजार, हल, बइला, पशुधन के पूजा करथे। उहें, लइका मन माटी के बने बइला अउ पोरा बिसाके पूजापाठ करके घरौंदा खेलथे अउ ठेठरी-खुरमी के प्रसाद लगाथे। ए दिन बइला ल सजा-धजा के तियार करे जाथे। जघा-जघा बइला के दउड़ प्रतियोगिता होथे। पोरा तिहार कृषि संस्कृति म पशुधन के महत्ता ल बताथे।
गांजा-बरामद
डायरेक्टोरेट ऑफ रेवेन्यू इंटेलिजेंस-डी.आर.आई. के टीम ह काली जुन्ना ध्धमतरी रोड म दू ठन ट्रक ल पकड़े हे। ट्रक के तलाशी म करीबन सात सौ किलो गांजा बरामद करे गीस। ट्रक म रखे सरिया अउ लोहा के सामान के तरी गांजा लुका के लेगत रिहीन हे। मुखबिर के सूचना म होय कार्रवाई म चार झिन तस्कर ल हिरासत म ले गेहे। सुरूआती जांच म गांजा आंध्रप्रदेश ले लाके छत्तीसगढ़ होवत महाराष्ट्र ले जाय के बात आगू आय हे। जब्त करे गे गांजा के कीमत करोड़ों म आंके गेहे।
लकड़ी-बरामद
महासमुंद पुलिस ह खैर लकड़ी के तस्करी के मामला म मुख्य आरोपी मनीष अग्रवाल के घर ले इक्यासी लाख रूपिया नगदी बरामद करे हे। वन विभाग अउ पुलिस के संयुक्त कार्रवाई म बड़ मात्रा म खैर, तेंदू लकड़ी, कटर मसीन अउ आने उपकरण जब्त करे गेहे।
ट्रेन-संशोधित समय
रेलवे ह विदर्भ अउ गीतांजलि एक्सप्रेस के बेरा म फेरबदल करे हे। दक्षिण पूर्व मध्य रेलवे ले गुजरइया ए ट्रेन के बदले गे बेरा काली आठ सितंबर ले लागू होगे हे। गोंदिया-मुंबई विदर्भ एक्सप्रेस अब मंुबई छत्रपति शिवाजी महाराज टर्मिनल म बिहनिया सात बजे पहुंचही। उहें, हावड़ा-मुंबई गीतांजलि एक्सप्रेस रतिहा दस बजके पैंतालीस मिनट म पहुंचही।