मुख्य न्यायाधीश-सपथ
राज्यपाल रमेन डेका ह न्यायाधिपति कृष्ण राम महापात्र ल आज लोकभवन के छत्तीसगढ़ मंडपम म छत्तीसगढ़ उच्च न्यायालय के मुख्य न्यायाधीश पद के सपथ देवाइन। एखर पहिली कृष्ण राम महापात्र ह ओडिसा हाईकोर्ट के वरिष्ठ जज के पद म काम करत रिहीन। राज्यपाल ह मुख्य न्यायाधीश श्रीमहापात्र ल राष्ट्रपति डहार ले जारी मूल वारंट के कॉपी सौंपिन। श्रीमहापात्र ह छत्तीसगढ़ के सोलहवां मुख्य न्यायधीश बने हे। ए मउका म मुख्यमंत्री विष्णुदेव साय, उपमुख्यमंत्री विजय शर्मा के संगेसंग राज्य सरकार के मंत्री अउ आने जनप्रतिनिधि मन सामिल होइन।
राज्यपाल-कन्या छात्रावास शुभारंभ
राज्यपाल रमेन डेका ह आज कुशाभाऊ ठाकरे पत्रकारिता अउ जनसंचार विश्वविद्यालय म सावित्रीबाई फुले कन्या छात्रावास के सुभारंभ करीन। ए मउका म ओमन मेधा एआई अउ मीडिया शोध केंद्र के उद्घाटन घलो करीन। शिक्षक अउ छात्र मन ल संबोधित करत राज्यपाल ह किहीन कि आज के दिन विश्वविद्यालय बर बड़ महत्व राखथे। सावित्रीबाई फुले के नाव उपर कन्या छात्रावास के नामकरण पढ़इया छात्र मन ल उंखर आदर्स ले प्रेरणा देके मउका देवत हे। ओमन किहीन कि विश्वविद्यालय म बनाय गे मेधा एआई अउ मीडिया शोध केंद्र छात्र मन ल नवा तकनीकी समझे के संगेसंग प्रभावी उपयोग बर तियार करे म बड़का भूमिका निभाही। कारीकरम म विश्वविद्यालय के कुलपति मनोज दयाल घलो सामिल होइन।
प्रबुध्दजन सम्मेलन
केंद्रीय राज्य मंत्री तोखन साहू ह आज रईपुर स्थित पंडित दीनदयाल उपाध्याय ऑडिटोरियम म राखे गे प्रबुध्दजन सम्मेलन अउ भाजपा पिछड़ा वर्ग मोर्चा के संभागीय बइठका म सामिल होइन। ए मउका म ओमन ओबीसी समाज के एकजुटता अउ संगठन के मजबूती उपर जोर दीन। ओमन किहीन कि प्रदेस म अन्य पिछड़ा वर्ग के करीबन सड़सठ जाति हवय। एखर मनके परंपरा, रहन-सहन अउ सांस्कृतिक मूल्य एके हवय। श्री साहू ह किहीन कि दू हजार चौदह म प्रधानमंत्री नरेंद्र मोदी के अगुवई म सरकार बने के बाद सामाजिक न्याय ल लेके कतकोन बड़का फइसला ले गेहे। ओमन किहीन कि संविधान संसोधन के माध्यम ले राष्ट्रीय पिछड़ा वर्ग आयोग ल संवैधानिक दर्जा दे गेहे। केंद्र सरकार ह ओबीसी समाज ल सम्मान, अधिकार अउ मउका देके काम करे हे।
कारीकरम म भाजपा प्रदेस संगठन महामंत्री अजय जामवाल, वित्त मंत्री ओपी चौधरी, प्रदेस ओबीसी मोर्चा प्रभारी लखन साहू अउ पिछड़ा वर्ग मोर्चा के प्रदेस अध्यक्ष अशोक साहू ह आय रिहीन।
सीमांकन-डिजिटल
राज्य सरकार ह राजस्व अउ भू-अभिलेख विभाग के अंतर्गत आम लोगन मन ल बड़का राहत देवत भुईया मनके सीमांकन के काम ल सरल, पारदर्सी अउ डिजीटल बना देहे। अब जमीन के मालिक मन ल नापजोक के सीमांकन बर सरकारी दफ्तर के चक्कर काटे बर नइ पड़य।
नवा डिजीटल सिस्टम म सीमांकन अर्जी बर लोकसेवा कंेंद्र अउ राजस्व विभाग के ऑनलाइन सिटीजन पोर्टल या सेवा सेतु के माध्यम ले अर्जी जमा करे जा सकही। ए अर्जी ह सोज्झे एखर ले जुड़े तहसीलदार के आईडी म ट्रांसफर हो जही। राजस्व निरीक्षक डहार ले घलो अपन रिपोर्ट ऑनलाइन जमा करे के नियम घलो करे जात हे। नवा व्यवस्था के पूरा काम ऑनलाइन अउ डिजीटल मैपिंग ले पूरा होही। विवाद वाले सीमांकन म ही अर्जी करइया ल एकाध बार तहसील ऑफिस जाय बर पड़ही।
नमस्ते-योजना
केंद्र सरकार के नेशनल एक्शन फॉर मैकेनाइज्ड सैनिटेशन इकोसिस्टम-‘नमस्ते‘ योजना के कामकाज म छत्तीसगढ़ ल संयुक्त रूप ले पहिली स्थान मिले हे। छत्तीसगढ़ के संगेसंग आंध्र प्रदेस, ओडिसा, त्रिपुरा, उत्तर प्रदेस अउ पुदुचेरी ल घलो संयुक्त रूप ले पहिली स्थान म राखे गेहे। ए योजना सीवर अउ सेप्टिक टैंक कर्मी मनके सुरक्षा के संगेसंग साफ-सफाई वाले काम म मसीनीकरण ल बढ़ावा देके उद्देस्य ले चलाय जात हे।
उपमुख्यमंत्री अरूण साव ह ए सफलता उपर नगरीय निकाय अउ विभागीय अधिकारी-कर्मचारी मन ल बधई दे हवय।
प्रधानमंत्री-ग्लोबल फिनटेक फेस्ट
प्रधानमंत्री ह काली संझा मुंबई म ग्लोबल फिनटेक फेस्ट-जी.एफ.एफ. के सुभारंभ करही। दुनिया के सबले बड़का अउ प्रभावसाली सालाना फिनटेक सम्मेलन म एक, जी.एफ.एफ. के ए बार के बिसय हे-‘पोटेंशियल टू इम्पैक्ट-एजेंटिक एआई, टोकनाइजेशन, क्वांटम-कनेक्टेड, ग्लोबल सिस्टम फॉर इन्क्लूसिव फाइनेंस।
नक्सली डंप-बरामद
बीजापुर, कोंडागांव अउ सुकमा जिला म सर्चिंग के दउरान सुरक्षा बल मन ह नक्सली डंप बरामद करे हे। बीजापुर जिला म सीआरपीएफ के जवान मन ह पीडिया अउ कुप्पागुड़ा क्षेत्र के जंगल म नक्सली मन डहार ले लुकाय गे चौदह ठिन नक्सली डंप बरामद करे हे, जेमा एक नग तीन सौ तीन बोल्ट एक्शन रायफल, पांच नग भरमार रायफल अउ एक नग देसी बारह बोर रायफल सामिल हे। एखर अलावा आईडी, डेटोनेटर, कोडेक्स वायर, वायरलेस सेट, प्लास्टिक अउ स्टील कंटेनर के संगेसंग इलेक्ट्रिक जिनिस अउ वर्दी बरामद करे गेहे।
उहें, सुकमा के चिंतलनार थाना क्षेत्र के चिन्नाबोड़ के गांव के पहाड़ी अउ जंगली जघा म सुरक्षा बल मन ह माओवादी मन डहार ले लुकाके राखे गे पुराना डंप बरामद करे हे।
ऐति, कोंडागांव जिला के पुष्पपाल जघा म घलो जवान मन ह पिस्टल, छै ठिन वॉकी-टॉकी, बम बनाय म परयोग होवइया वायर के संगेसंग बारूद अउ बिस्फोटक जिनिस बरामद करे हे।
पटवारी-भर्ती
राजस्व अउ आपदा प्रबंधन विभाग ह प्रदेस म पटवारी के दू सौ खाली पद ल भरे बर सीधी भर्ती ल मंजूरी दे देहे। राज्य शासन कोति ले जारी आदेस के मुताबिक, जिला म मंजूर रिक्त पद ल सेवा भर्ती नियम के मुताबिक करे जाही। पटवारी भर्ती परीक्षा छत्तीसगढ़ कर्मचारी चयन मंडल डहार ले ले जाही। विज्ञापन जारी होय के बाद ऑनलाइन अर्जी के काम मंडल के पोर्टल म सुरू होही।
कृषि विवि -परीक्षा
इंदिरा गांधी कृषि विश्वविद्यालय राईपुर डहार ले स्थगित करे गे तीन बिसय के परीक्षा आज ले सुरू हो गेहे। बांचे दू ठिन बिसय के परीक्षा आठ अउ नौ सितंबर के होही। विश्वविद्यालय डहार ले ए बार जम्मो कालेज मन ल ई-मेल के माध्यम ले प्रश्न पत्र भेजे जावत हे। परीक्षा सुरू होय के थोरिक देर पहिलीच कालेज प्रबंधन ल पासवर्ड दे जात हे।
एशिया कप टूर्नामेंट
चीन के मोकी म पाछू चार सितंबर ले तेरह सितंबर तक महिला जूनियर एशिया कप हॉकी टूर्नामेंट चलही। टूर्नामेंट के पहिली दू मैच म भारतीय टीम ह बढ़िया प्रदर्सन करत जीत दरज करे हे। टीम म सामिल छत्तीसगढ़ के मधु सिदार अउ गीता यादव ह घलो कुल तीन गोल दागिन। ए पहिली बार हरय कि जूनियर टीम म प्रदेस के दू झिन खिलाड़ी मन ल खेले के मउका मिले हे।
अउ अब पेस हे मौसम के हाल…
मौसम विभाग ह प्रदेस के कतकोन जघा म नौ सितंबर ले बरसा होय के संभावना जताय हे। उहें, उत्तरी भाग के एक-दू जघा म भारी बरसा होय के चेतावनी घलो दे गेहे। मौसम विज्ञानी डॉक्टर गायत्री वाणी ह बतइन कि दस अउ ग्यारा सितंबर के बाद छत्तीसगढ़ के दक्षिणी भाग म घलो बने बरसा हो सकथे।
अउ अब थोरकुन समाचार सार म –
– मुख्यमंत्री के अगुवई म नौ सितंबर के बिहनिया साढ़े ग्यारा बजे ले मंत्रालय म मंत्रिपरिषद के बइठका राखे गेहे।
– कांकेर जिला म एक ठिन कंपनी म निवेस के नांव उपर करीबन पांच सौ लोगन मनले करीबन सत्तर करोड़ रूपिया के ठगी करे के मामला आगू आय हे। ए मामला म अंतागढ़ पुलिस ह दू झिन आरोपी मन ल गिरफ्तार करे हे।
– दंतेवाड़ा जिला म सिकार करे बर लगाय गे जीआई तार के चपेट म आय ले एक झिन मनखे के मउत होगे।
– बिलासपुर-रईपुर राष्ट्रीय राजमार्ग क्रमांक-एक सौ तीस उपर काली मंझनिया होय सड़क दुर्घटना म फटफटी म बइठे दूनों मनखे के मउत होगे अउ एक झिन मनखे ह गंभीर रूप ले घायल हो गेहे। घटना मंुगेली जिला के सरगांव थाना क्षेत्र के हरय।
अउ
– सुकमा जिला के कोंटा स्थित वजामगुड़ा गांव म ईतवार के मंझनिया गाज गिरे ले एखर चपेट म आय ले दस झिन मवेसी के मउत होगे।