न्यायधीश-अधिसूचना
केंद्र सरकार ह छत्तीसगढ़ समेत आठ ठिन हाईकोर्ट बर मुख्य न्यायाधीश के नियुक्ति ले जुड़े अधिसूचना जारी कर देहे। ओडिसा हाईाकोर्ट के बड़का न्यायाधीश जस्टिस कृष्णराम महापात्रा ल छत्तीसगढ़ उच्च न्यायालय के नवा मुख्य न्यायाधीश नियुक्त करे गेहे। न्यायधीश कृष्णराम महापात्रा काली रईपुर स्थित लोकभवन म मुख्य न्यायधीश पद के सपथ लेहे। राज्यपाल रमेन डेका ह ओमन ल सपथ देवाही।
न्यायधीश महापात्रा के जनम अट्ठारा अप्रैल उन्नीस सौ पैंसठ के होय हे। ओमन बीए अउ एलएलबी के पढ़ई करे हे। उनला सिविल, सर्विस, क्रिमीनल अउ संविधान ए सब म काम करे के छब्बीस बछर के लंबा अनुभव हे। ओमन राज्य अउ ओडिसा पब्लिक सर्विस कमीसन बर एडिसनल स्टैंडिंग काउंसिल के तौर म काम करीन। उहें, न्यायधीश महापात्रा ल सत्रह अप्रैल दू हजार पंद्रह के ओडिसा हाईकोर्ट के जज बनाय गे रिहीस।
प्रधानमंत्री-एसआरसीसी शताब्दी
प्रधानमंत्री नरेन्द्र मोदी ह जवान लइका मन ले बड़का सपना देखे के संगे दुनिया के नेतृत्व करे खातिर आरो दीन। नई दिल्ली म एसआरसीसी के सताब्दी समारोह म बोलत प्रधानमंत्री ह किहीन कि जब भारतीय मनखे मन दुनिया के बड़का कंपनी म अगुवा बन सकत हे, त भारतीय कंपनी मन घलो दुनिया के नेतृत्व कर सकत हे। ओमन जवान लइका मन ले यूनिकॉर्न बनई, ड्रोन तकनीक म नवाचार अउ आर्टिफिसियल इंटेलीजेंस एआई के क्षेत्र म नवा समाधान बढ़ाय सोज आगू बढ़े खातिर आरो दीन।
प्रधानमंत्री ह किहीन कि आज दुनिया भारत के तेज आर्थिक वृध्दि अउ नीतिगत बदलाव ल संहराइन। ओमन किहीन कि ग्लोबल चुनौती बीच भारत के सात दसमलव आठ प्रतिसत के तिमाही आर्थिक वृध्दि देस के क्षमता ल दरसाथे।
राज्यपाल-द्रोणाचार्य संगम
राज्यपाल रमेन डेका ह शिक्षक दिवस के मउका म बिलासपुर म राखे गे द्रोणाचार्य संगम म सामिल होइन। ए मउका म ओमन शिक्षा के क्षेत्र म उल्लेखनीय काम करइया शिक्षक मन ल कई ठिन श्रेणी म सम्मानित करीन। कारीकरम म बोलत राज्यपाल ह किहीन कि आज के दउर इंटरनेट अउ तकनीक के हे। उहें, लइका मन तेजी ले एक ठिन अइसन दुनिया म बड़े होवत हे, ंिजंहा ज्ञान अउ सूचना आसानी ले मिलथे। अइसन म नान्हे लइका अउ जवान लइका मन ल बेरा के बने उपयोग करत सही दिसा म आगू बढ़ना चाही। राज्यपाल ह किहीन कि शिक्षक ह विद्यार्थी मन ल पढ़ाय भर के काम नइ करे भलूक समाज ल शिक्षित अउ जागरूक बनाय म घलो बड़का योगदान देथे।
कांग्रेस प्रभारी-नियुक्त
कांग्रेस ह संगठन म फेरबदल करत राजस्थान के पूर्व उपमुख्यमंत्री सचिन पायलट ल पंजाब के प्रभारी बनाय हे। ओमन छत्तीसगढ़ कांग्रेेस के प्रभारी रिहीन। उहें, छत्तीसगढ़ म कांग्रेेस के नवा प्रभारी सुकदेव भगत होही। अइसने, छत्तीसगढ़ के पूर्व मुख्यमंत्री अउ अखिल भारतीय कांग्रेस कमेटी के महासचिव भूपेश बघेल ल असम के प्रभार दे गेहे। एखर ले पहिली श्री बघेल पंजाब के प्रभारी रिहीस। ए.आई.सी.सी. डहार ले जारी आदेस के मुताबिक रणदीप सुरजेवाला ल गुजरात, डॉक्टर सिरिवेला प्रसाद ल महाराष्ट्र अउ पी.वी. मोहन ल आंध्रप्रदेस के प्रभारी बनाय हे।
कांग्रेस पार्टी ह ए बदलाव अवइया बछर होनेवाला विधानसभा चुनाव ल देखत करे हे।
उच्च शिक्षा विभाग-प्रवेश
उच्च शिक्षा विभाग ह पहिली या दूसर सेमेस्टर के एक-दू प्रश्नपत्र म असफल होय के सेति पांचवां सेमेस्टर म एडमिसन ले वंचित होवइया पढ़इया लइका मन ल अब अंतरिम प्रवेस देके घोसना करे हे। ए फइसला राष्ट्रीय शिक्षा नीति के तहत ले गेहे।
उच्च शिक्षा मंत्री टंकराम वर्मा ह स्पष्ट करे हे कि एनईपी दू हजार बीस ल लागू करे म आवत कोनो भी व्यवहारिक अड़चन ल दूरिहाय बर सरकार ह पूरा तरह ले संकल्पबध्द हे। ओमन किहीन कि पढ़इया लइका मनके संपूर्ण हित ल धियान म राखत संबंधित अध्यादेस म जरूरी संसोधन घलो करे जाही। ए निरनय ले हजारों पढ़इया लइका मनके साल ह खराब होय ले बांचहीा, जउन मन एकात दू बिसय म पास नइ होय के सेति पांचवां सेमेस्टर म एडमिसन नइ हो सकय।
स्वाइन फ्लू
दुरूग जिला म काली स्वाइन फ्लू के सात झिन नवा मरीज मिले हे। सबो मरीज मन के निजी अस्पताल मन म इलाज चलत हे। स्वास्थ्य विभाग के मुताबिक पांच सितंबर तक जिला म स्वाइन फ्लू के कुल तैंतीस ठिन मामला आगू आय हे, जेमा ले ए बेरा नौ झिन ए मरीज अस्पताल म भर्ती हे। उहें, सात झिन मरीज होम आइसोलेसन म हे। सबो एक्टिव मरीज के हालत सामान्य हे। स्वास्थ्य विभाग ह लोगन मन ले स्वाइन फ्लू के लक्षण दिखाय दे उपर बेरा म मेडिकल सलाह लेके संगे संक्रमण ले बांचे बर जरूरी सावधानी बरते के अपील करे हे।
लोकरंग पर्व
छत्तीसगढ़ के समृध्द लोक परंपरा लोकगाथा अउ पारंपरिक सांस्कृतिक विरासत ल मंच दे खातिर संस्कृति विभाग डहार ले आज ले रईपुर म लोकरंग परब के आयोजन होवत हे। तीन दिन वाले ए कारीकरम ह महंत घासीदास संग्रहालय परिसर के मुक्ताकासी मंच म होही। ए कारीकरम ह रोजिना संझा सात बजे ले सुरू होही, जेमा भरथरी, पंडवानी, लोरिकचंदा, नाचा अउ गम्मत के प्रस्तुति बिसेस आकर्षण के केंद्र रइही। एखर संगे सुआ, करमा अउ पंथी जइसन पांरपरिक लोकनृत्य के प्रस्तुति घलो होही। उहें, बांसगीत, देवारगीत, ददरिया अउ जसगीत के जरिया प्रदेस के लोक गायन के झलक देखे ल मिलही।
कृषि विवि-परीक्षा
इंदिरा गांधी कृषि विश्वविद्यालय के केंसल होय तीन ठिन बिसय के परीक्षा अब सात-आठ अउ नौ सितंबर के होही। यूनिवर्सिटी प्रशासन ह परीक्षा व्यवस्था म बदलाव करे के निरनय लेहे। ए बखत सबो कालेज के क्वेश्चन पेपर ल पैकेट ले पठोय के जघा ई-मेल के जरिया पठोय जाही। ए क्वेश्चन पेपर के पासवर्ड प्रोटेक्टेड ई-मेल के जरिया पठोय जाही। उहें, परीक्षा चालू होय के कुछेक देर पहिली ही कालेज प्रबंधन ल पासवर्ड बताय जाही।
माइनिंग लीज रद्द
छत्तीसगढ़ उच्च न्यायालय के निर्देस के बाद रईपुर जिला के आरंग के निस्दा गांव के सबो माइनिंग लीज ल कैंसल कर दे गेहे। गैर कानूनी ढंग ले खनई अउ महानदी म मलबा डम्प करे के मामला म होईकोर्ट ह नाराजगी जताय रिहीस। ए जनहित याचिका उपर राज्य सरकार डहार ले बताय गेहे कि मामला म दोषी पाय गे सबो पट्टा वाले मनके माइनिंग लीज रद्द कर दे गेहे। कोर्ट ह राज्य के अधिकारी अउ पर्यावरण संरक्षण मंडल ल कड़ा निगरानी राखे के सख्त निरदेस देहे।
गबन
सक्ति जिला म एक ठिन प्राइवेट बैंक ले लेगे लोन के रासि म धोखाधड़ी अउ गबन के मामला आगू आय हे। आरोपी मन जियत माईलोगिन ल मउत होय बता के बीमा के पइसा ल घलो हड़प लीस। पुलिस ह ए मामला म फरार चलत तत्कालीन बैंक मैनेजर अउ एक झिन कर्मचारी ल गिरफ्तार करे हे। पुलिस के मुताबिक दूनो आरोपी मन मिलके लोन के पइसा ल खुदे बांट डरिन अउ गिराहिक ल फर्जी रसीद ल धरा दीन।
दुर्घटना
दुरूग जिला म सुपेला थाना क्षेत्र के कोसानाला तीर आज बड़े फजर एक ठिन तेज रफ्तार चारपहिया गाड़ी ह अंतेतंते होके रूख म झपा गे। ए हादसा म ड्राइवर के मउकच म मउत होगे। उहें, एक झिन जवान लइका ह अस्पताल म दम तोड़ दीस।
ओति, कोंडागांव जिला म केसकाल थाना क्षेत्र म होय आने-आने रोड एक्सीडेंट म दू झिन मनखे के मउत होगे। उहें, सात झिन मन घायल हो गेहे। पहिली घटना, कुएंमारी जलप्रपात रद्दा तीर होइस, जेमा एक झिन जवान लइका अउ जवान नोनी के मउकच म मउत होगे अउ चार झिन मनखे गंभीर रूप ले घायल होगे। उहें, होनहोड़ जलप्रपात रद्दा तीर होय एक्सीडेंट म तीन झिन मनखे गंभीर रूप ले घायल होगे।