राष्ट्रपति-शिक्षक सम्मान
राष्ट्रपति द्रौपदी मुर्मू ह किहीन हे कि गुणवत्तापूर्ण शिक्षा के माध्यम ले ही विकसित भारत के लक्ष्य ल हासिल करे जा सकत हे। शिक्षक दिवस के मउका म आज नई दिल्ली म राष्ट्रीय शिक्षक पुरस्कार समारोह म राष्ट्रपति ह किहीन ह े कि जउन समाज अपन शिक्षक मन के सम्मान करथे, उही समाज ल प्रगतिसील समाज कहे जा सकत हे।
राष्ट्रपति द्रौपदी मुर्मू ह आज राष्ट्रीय शिक्षक पुरस्कार प्रदान करीन। सत्ताईस राज्य, सात ठन केंद्रशासित प्रदेस अउ कंेद्र सरकार के छै ठन संगठन ले चुने गे अड़तालीस स्कूल शिक्षक मन ल ए पुरस्कार दे गीस। ओमन ह उच्च शिक्षण संस्थान अउ पॉलिटेक्निक के इक्कीस झन शिक्षक अउ संकाय सदस्य मन ल घलो राष्ट्रीय शिक्षक पुरस्कार प्रदान करीन। ए मउका म रईपुर के पंडित रविशंकर शुक्ल विश्वविद्यालय म शारीरिक शिक्षा विभाग के प्रोफेसर डॉक्टर राजीव चौधरी ल घलो सम्मानित करे गीस।
उहें, सारंगढ़-बिलाईगढ़ जिला के शासकीय प्राथमिक शाला खिचरी म पदस्थ शिक्षिका सुनीता यादव ल राष्ट्रीय शिक्षक पुरस्कार दे गीस।
प्रधानमंत्री-शिक्षक संवाद
प्रधानमंत्री नरेन्द्र मोदी ह शिक्षक मनले पाठ्य पुस्तक ले आगू बढ़ के विद्यार्थी मनके जीवन ल सुघ्घर बनाय म अउ उंखर बचपन ल सुरक्षित राखे म अपन भूमिका निभाय के आह्वान करीन हे। प्रधानमंत्री ह काली नई दिल्ली म राष्ट्रीय शिक्षक पुरस्कार ले सम्मानित शिक्षक मन संग गोठबात करीन। सोसल मीडिया पोस्ट म भेंट के झलक साझा करत श्री मोदी ह किहीन हे कि शिक्षक मन ल निश्चित करना चाही कि हर विद्यार्थी के अंदर ओखर बचपन बांचे राहय। एखर बर शिक्षक मन ल घलो अपन भीतर के लइका ल जीवित रखना चाही।
प्रधानमंत्री मोदी ह राष्ट्रीय शिक्षा नीति के उल्लेख करत लइका मन ल कक्षा ले बाहिर ले जाय के अउ ओमन ल वास्तविक जीवन के कौशल अउ आने-आने काम ले जोड़े के महत्व बर जोर दीन।
छत्तीसगढ़-शिक्षक सम्मान
उहें, शिक्षक दिवस के मउका म आज रईपुर के लोकभवन के छत्तीसगढ़ मंडपम म राज्य स्तरीय शिक्षक सम्मान समारोह आयोजित कराय गीस। राज्यपाल रमेन डेका अउ मुख्यमंत्री विष्णुदेव साय ह शिक्षा के क्षेत्र म अपन योगदान देवइया तिरसठ झन शिक्षक मन ल सम्मानित करीन अउ चार शिक्षक मन ल राज्य शिक्षक सम्मान स्मृति पुरस्कार ले सम्मानित करे गीस। खैरागढ़-छुईखदान-गंडई जिला के राजेश कुमार प्रजापति ल डॉक्टर पदुमलाल पुन्नालाल बख्शी स्मृति पुरस्कार, कोरबा जिला के कामता प्रसाद जायसवाल ल डॉक्टर बलदेव प्रसाद मिश्र स्मृति पुरस्कार, दुरूग जिला के प्रज्ञा सिंह ल डॉक्टर मुकुटधर पांडे स्मृति पुरस्कार अउ सारंगढ़-बिलाईगढ़ जिला के प्रियंका गोस्वामी ल श्री गजानन माधव मुक्तिबोध स्मृति पुरस्कार प्रदान करे गीस।
समारोह म राज्यपाल रमेन डेका ह आर्टिफिसियल इंटेलीजेंस के दउर म शिक्षक अउ विद्यार्थी मन के नवा तकनीक ले परिचित होना जरूरी हे, फेर तकनीक के उपयोग विवेकपूर्ण अउ मानवीय मूल्य के अनुसार होना चाही। ओमन शिक्षक मनले विद्यार्थी मन म स्वतंत्र चिंतन के संगेच संस्कार अउ संवेदना विकसित करे के आह्वान करीन।
उहें, मुख्यमंत्री विष्णुदेव साय ह किहीन कि शिक्षक मन राष्ट्र अउ नवा पीढ़ी के निर्माता हे। सरकार ह शिक्षा के गुणवत्ता सुधारे अउ हरेक लइका ल पढ़ई-लिखई देवाय बर सरलग परयास करत हे। ओमन बतइन कि प्रदेस म तीन सौ इकचालीस ठन स्कूल के चुनाव पीएमश्री योजना म करे गेहे अउ स्वामी विवेकानंद के नाव म एक सौ पचास स्कूल सुरू करे जावत हे। बस्तर के दुरस्त क्षेत्र म लइका मनके शिक्षा बर ओरछा अउ जगरगुंडा म एजुकेसन सिटी बनाय जावत हे। ए मउका म स्कूल शिक्षा मंत्री गजेन्द्र यादव ह बछर दू हजार छब्बीस-सत्ताईस के राज्य शिक्षक सम्मान बर चयनित चौंसठ झन शिक्षक मन के नांव के घोसना घलो करीन।
हाईकोर्ट-कार्यवाहक मुख्य न्यायाधीश
छत्तीसगढ़ हाईकोर्ट के मुख्य न्यायाधीश जस्टिस रमेश सिन्हा के चार सितंबर के सेवानिवृत्त होय के बाद जस्टिस संजय कुमार अग्रवाल ल हाईकोर्ट के कार्यवाहक मुख्य न्यायाधीश नियुक्त करे गेहे। भारत सरकार के विधि अउ न्याय मंत्रालय के न्याय विभाग ह चार सितंबर के ए संबंध म अधिसूचना जारी कर दे गेहे।
झीरम घाटी-फैसला
झीरम घाटी नक्सली हमला के मामला म राष्ट्रीय जांच एजेंसी-एनआईए के जगदलपुर के बिसेस अदालत ह दस झन आरोपी मन ल सबो धारा म दोषी करार दे हे। ए मामला म कुल ग्यारा झन आरोपी मनके खिलाफ सुनवाई होय रिहीस, जेमा ले एक झन के सुनवाई के दउरान मृत्यु हो गे हवय। अदालत ह ए सबो दस झन आरोपी मन ल सत्ताईस झन के हत्या अउ पंद्रह झन के हत्या के मामला म दोषी पाय हे। आरोपी मन के सजा म फइसला सोलह सितंबर के सुनाय जाही।
खबर के मुताबिक पचीस मई दू हजार तेरह के कांग्रेस के परिवर्तन यात्रा के दउरान झीरम घाटी म नक्सली मन ह कांग्रेस नेता मनके काफिला मन उपर हमला करे रिहीन। ए हमला म वरिष्ठ कांग्रेस नेता विद्याचरण शुक्ल, तत्कालीन प्रदेस कांग्रेस अध्यक्ष नंदकुमार पटेल, उंखर बेटा दिनेश पटेल, पूर्व मंत्री महेन्द्र कर्मा अउ कांग्रेस नेता उदय मुदलियार संघरा बत्तीस झन के मउत हो गे रिहीस। करीब डेढ़ घंटा तक चले गोलीबारी म बहुत झन घायल घलो होय रिहीन। ए मामला के जांच राष्ट्रीय जांच एजेंसी-एनआईए डहार ले करे जावत रिहीस।
मुख्यमंत्री-टेक्सटाइल उद्योग
मुख्यमंत्री विष्णुदेव साय ह नई दिल्ली म केंद्रीय वस्त्र मंत्री गिरीराज सिंह ले भेंट करके छत्त्तीसगढ़ म वस्त्र उद्योग के विस्तार अउ संभावना उपर चर्चा करीन। केंद्रीय मंत्री ह तकनीक अउ नवाचार के क्षेत्र म हर संभव मदद देके भरोसा देवाइन हे। मुख्यमंत्री ह बतइन कि राज्य के औद्योगिक विकास नीति म वस्त्र उद्योग ल प्रमुख क्षेत्र के दर्जा दे गे हवय। एक हजार ले जादा लोगन ल रोजगार देवइया इकाई बर बिसेस प्रोत्साहन के प्रावधान हे। एखर ले नवा रईपुर म वस्त्र उद्योग इकाई के स्थापना ल गति मिलत हे।
पीएससी-स्पष्टीकरण
छत्तीसगढ़ लोक सेवा आयोग ह राज्य सेवा मुख्य परीक्षा दू हजार पच्चीस के परिणाम के स्थिति ल स्पष्ट करे हे। आयोग के अनुसार साक्षात्कार बर निर्धारित सात सौ पंचानवे के बजाय छै सौ आठ अभ्यर्थी मन ल चिन्हांकित करे गेहे। आयोग ह केहे हे कि ए कोनो गलती के कारण नइ होय हे, फेर कुछेक अभ्यर्थी मन ल निर्धारित न्यूनतम अंक नइ मिले के सेति होय हे। अनारक्षित वर्ग बर हरेक प्रश्नपत्र म तैंतीस अउ आरक्षित वर्ग बर तेईस प्रतिसत अंक जरूरी हे। आयोग ह स्पष्ट करे हे कि पुर्नमूल्यांकन अउ पुर्नगणना के प्रावधान नइ हे। आयोग ह अभ्यर्थी मन ले सोसल मीडिया म प्रसारित भ्रामक जानकारी ले बांचे के अपील करीन हे।
लोकरंग पर्व
छत्तीसगढ़ के समृध्द लोक परंपरा, लोकगाथा अउ पारंपरिक सांस्कृतिक विरासत ल मंच देके उद्देस्य ले संस्कृति विभाग डहार ले तीन दिवसीय लोकरंग पर्व के आयोजन करे जाही। ए सांस्कृतिक आयोजन छै-सात अउ आठ सितंबर के रईपुर के महंत घासीदास संग्रहालय परिसर के मुक्ताकांशी मंच म कराय जाही। ए कारीकरम हर दिन संझा सात बजे ले सुरू होही।
जिले की चिट्ठी
आकासवाणी रईपुर के प्रादेशिक समाचार एकांश, डहार ले प्रस्तुत कार्यक्रम “जिले की चिट्ठी“ के प्रसारण काली संझा छह बजके पांच मिनट ले छह बजके दस मिनट तक करे जाही। ए कार्यक्रम ल छत्तीसगढ़ के सबो आकाशवाणी केन्द्र एके संघरा रिले करही। ए बखत के अंक म ‘‘रायगढ़’’ जिला के गतिविधि के बारे में जानकारी दे जाही।
अउ अब थोरकुन समाचार सार म –
– स्वास्थ्य मंत्री श्याम बिहारी जायसवाल ह मनेंद्रगढ़-चिरमिरी-भरतपुर जिला के दूरस्थ क्षेत्र तक स्वास्थ्य सेवा पहुंचाय के उद्देस्य ले सक्षम एमसीबी सेवा संकल्प अभियान के सुरूआत करीन। ए मउका म ओमन ह किहीन कि सत्रह सितंबर ले सत्रह अक्टूबर तक जिला म स्वास्थ्य सिविर अउ जांच अभियान चलाय जाही।
अउ
– भारतीय खाद्य सुरक्षा अउ मानक प्राधिकरण ह स्वच्छ अउ पौष्टिक भोजन उपलब्ध कराय बर कांकेर जिला अस्पताल के कैंटीन ल ‘ईट राइट कैंपस‘ के रूप म उत्कृष्ट होय के प्रमाण पत्र प्रदान करे हे।