इसरो-प्रक्षेपण
भारत ह अंतरिक्ष क्षेत्र म एक ठिन अउ बड़का सफलता हासिल करे हवय। भारतीय अंतरिक्ष अनुसंधान संगठन-इसरो ह आज बिहनिया श्रीहरिकोटा ले जी.एस.एल.वी.एफ.-सत्रह रॉकेट के जरिया देस के पहिली पृथ्वी अवलोकन उपग्रह ई.ओ.एस-फाईव के सफल प्रक्षेपण करीन। प्रधानमंत्री नरेंद्र मोदी ह इसरो के ए उपलब्धि म किहीन कि ए ह राष्ट्र बर बड़ गर्व के क्षण हवय। श्री मोदी ह किहीन हे कि ए सफलता भारत के अंतरिक्ष क्षेत्र के उत्कृष्टता, नवाचार अउ बाढ़त क्षमता ल दरसाथे।
उहें, इसरो के अध्यक्ष वी. नारायणन ह किहीन कि ए मिसन भारत के पृथ्वी अवलोकन क्षमता ल अउ मजबूत करही। ओमन बतइन कि ए दरी पृथ्वी अवलोकन उपग्रह-फाईव के चालू हो जाय के बाद, ए ह भू-कक्षा ले भारत के पहिली समर्पित इमेजिंग उपग्रह बन जाही, जउन ह देस खातिर बड़ जरूरी रणनीतिक डेटा प्रदान करही।
शिक्षक-सम्मान
राष्ट्रपति द्रौपदी मुर्मू ह काली पंाच सितंबर के शिक्षक दिवस के मउका म नई दिल्ली के विज्ञान भवन म 48 झिन शिक्षक मन ल राष्ट्रीय शिक्षक पुरस्कार प्रदान करही। एमा छत्तीसगढ़ के सारंगढ़-बिलाईगढ़ जिला के शासकीय प्राथमिक साला, खिचरी म पदस्थ शिक्षिका सुनीता यादव घलो सामिल हवय।
सुनीता यादव ह शिक्षा ल नवाचार, साहित्य अउ तकनीक ल जोड़के पढ़इया लइका मनके सिखे-पढ़े ल सरल अउ रोचक बनाय हवय। ओहा दीक्षा एप, स्टोरीवीवर, ऑडियो बुक, पॉडकास्ट अउ लघु फिल्म के जरिया ले लइका मन ल पढ़ाथे। संगेसंग ओहा लइका मनके पोषण अउ स्वास्थ्य खातिर अपन खर्च ले सरलग दूघ के बेवस्था करथे अउ न्योता भोज खातिर घनो प्रेरित करथे। श्रीमती यादव ल बछर दू हजार चौबीस म राज्य शिक्षक सम्मान अउ बछर दू हजार पच्चीस म पंडित मुकुटधर पांडे स्मृति अलंकरण ले सम्मानित करे जा चुके हवय।
उहें, राष्ट्रपति ह उच्च शिक्षा संस्थान अउ पॉलिटेक्निक के 21 झिन शिक्षक-संकाय सदस्य मन ल घलो राष्ट्रीय पुरस्कार प्रदान करही। एमा रईपुर स्थित पंडित रविशंकर शुक्ल विश्वविद्यालय म शारीरिक शिक्षा विभाग के प्रोफेसर डॉक्टर राजीव चौधरी घलो सामिल हवय।
ऐति, शिक्षक दिवस के मउका म काली रईपुर के लोकभवन के छत्तीसगढ़ मंडप म आयोजित कारीकरम म प्रदेस के 64 झिन शिक्षक मन ल राज्य शिक्षक सम्मान अउ 4 झिन शिक्षक मन ल आने-आने साहित्यकार मनके नाव म दे जाय वाला स्मृति पुरस्कार ले सम्मानित करे जाही। समारोह म राज्यपाल रमेन डेका, मुख्यमंत्री विष्णुदेव साय अउ स्कूल शिक्षा मंत्री गजेन्द्र यादव उपस्थित रइहीं।
मुख्यमंत्री-दिल्ली
मुख्यमंत्री विष्णुदेव साय नई दिल्ली म जल सक्ति मंत्रालय के विभागीय सिखर सम्मेलन म सामिल होय के बाद आज रईपुर लहुटिन। ए दउरान माना विमानतल म पत्रकार मनले गोठबात करत ओमन किहीन कि प्रदेस म जल संचय अउ जल संरक्षण के मुद्दा म सम्मेलन म सार्थक चर्चा करे गीस।
मुख्यमंत्री ह किहीन कि प्रदेस के बस्तर इलाका म माओवाद खतम होय के बाद उंहा विकास कामबूता म तेजी आय हवय। अब बस्तर क्षेत्र ल देस के सबले सुघ्घर संभाग बनाय जाही।
हज-वेबसाइट
अल्पसंख्यक कल्याण मंत्री श्याम बिहारी जायसवाल ह आज छत्तीसगढ़ राज्य हज कमेटी के वेबसाइट ‘‘छत्तीसगढ़ हज डॉट ओआरजी‘‘ के सुभारंभ करीन। ए वेबसाइट के जरिया ले हज यात्री मन ल हज यात्रा ले जुड़े जानकारी अउ सूचना उपलब्ध होही। संगेसंग यात्री मन अपन जरूरी कागजात ल ऑनलाइन अपलोड कर सकही। एखर ले हज यात्री मन ल रईपुर के कमेटी मुख्यालय म अवई-जवई म खर्च होवइया पइसा अउ बेरा के बचत होही। ए मउका म राज्य हज कमेटी के चेयरमेन मिजाऱ् एजाज़ बेग घलो सामिल रिहीन।
पॉलीटेक्निक-काउंसिलिंग
दुरूग जिला के शासकीय पॉलीटेक्निक कालेज म सैक्षणिक सत्र दू हजार 26-27 के पहिली बछर के आने-आने डिप्लोमा पाठ्यक्रम म खाली 5 ठिन सीट म संस्था स्तर के काउंसिलिंग 8 सितंबर के आयोजित करे जाही। पात्र अउ इच्छुक अभ्यर्थी बिहनिया 10 बजे उपस्थित होके प्रवेस प्रक्रिया म भाग ले सकत हवय। खाली सीट मन म मेकेनिकल इंजीनियरिंग, विद्युत इंजीनियरिंग अउ कम्प्यूटर सांईंस के एक-एक अउ मॉडर्न ऑफिस मैनेजमेंट के दू ठिन सीट सामिल हवय।
जन्माष्टमी
भगवान श्रीकृष्ण के जन्मोत्सव के परब जन्माष्टमी आज छत्तीसगढ़ समेत देस के आने-आने जघा मन म श्रध्दा अउ आस्था के संग मनाय जावत हे। ए मउका म प्रदेस के कृष्ण मंदिर मन म आकर्षक साज-सज्जा करे गेहे। मंदिर अउ घर मन म आज रतिहा भगवान श्रीकृष्ण के बिसेस रूप ले पूजा-अर्चना कर जन्मोत्सव मनाय जाही। भगवान श्रीकृष्ण ल माखन मिश्री के अलावा आने-आने भोग लगाय जाही।
इही बीच, राजधानी रईपुर म घलो कृष्ण मंदिर के बिसेस साज-सज्जा करे गे हवय। मंदिर मन ल रंग-बिरंगी रोसनी ले सजाय गे हवय। ए मउका म श्रीकृष्ण के बाल-गोपाल रूप के श्रृंगार कर बिसेस पोसाक पहराय जाही। राजधनी म टाटीबंध के इस्कॉन मंदिर, समता कालोनी के राधाकृष्ण मंदिर, सदर बाजार के गोकुल चंद्रमा मंदिर अउ मठपारा के दूधाधारी मठ म बिहनिया ले श्रध्दालु मन के भीड़ लगे हे।
राष्ट्रपति द्रौपदी मुर्मू, प्रधानमंत्री नरेंद्र मोदी, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह लोगन मन ल जन्माष्टमी के सुभकामना दीन हे।
मुख्य सचिव-निर्देश
मुख्य सचिव विकासशील ह काली मंत्रालय म जम्मो विभाग के भारसाधक सचिव मनके समीक्षा बइठका लीन। बइठका म ओमन खाली पद के भर्ती बर भर्ती प्रक्रिया म तेजी लाय, भर्ती नियम ल अपडेट करय अउ बछर दू हजार सत्ताईस बर पद मनके जरूरी प्रक्रिया ल बेरा म पूरा करे के निरदेस दीन।
आरोपी-गिरफ्तार
गौरेला-पेंड्रा-मरवाही जिला म वन विभाग ह मृत भालू के नाखून ल काटके ले जाय के मामला म दू झिन आरोपी मन ल गिरफ्तार करीन हवय। ए आरोपी मन के कब्जा ले भालू के नाखून बरामद करे गे हवय। जानबा के मुताबिक वन परिक्षेत्र मरवाही के उसाढ़ परिसर म पाछू 3 सितंबर के एक ठिन भालू मृत अवस्था मिले रिहीस। ए दउरान भालू के पाछू गोड़ के दायां पंजा के चार ठिन नाखून गायब रिहीस।
वन तस्करी-गिरफ्तार
रायगढ़ जिला के धरमजयगढ़, घरघोड़ा अउ तमनार वन क्षेत्र ले खैर अउ तेंदू प्रजाति के लकड़ी के अवैध कटाई, भंडारण अउ अंतरराज्यीय तस्करी के एक ठिन बड़का गिरोह के वन विभाग अउ पुलिस ह खुलासा करीन हवय। ए मामला म 3 झिन आरोपी मन ल गिरफ्तार करे गे हवय। उहें, एक झन आने आरोपी फरार हवय। मिले जानबा के मुताबिक ए आरोपी मन गांव वाला मन ल पइसा के लालच देके जंगल ले पेड़ कटवाय अउ ए लकड़ी मन ल दूसर राज्य म अवैध तरीका ले भेजत रिहीन।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ ए दारी ‘शिशु संरक्षण माह उपर केन्द्रित रइही। एखर तहत उप संचालक शिशु स्वास्थ्य अउ राज्य टीकाकरण अधिकारी वी.आर. भगत ले लेगे भेंटवार्ता के प्रसारण करे जाही। एखर प्रसारण काली पांच सितंबर के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया 9 बजे ले करे जाही। जेला छत्तीसगढ़ के जम्मो आकाशवाणी केंद्र मन एके संघरा रिले करहीं।
अउ अब पेस हे मौसम के हाल…
प्रदेस म आज ले बरसा म कमी आय के संभावना हवय। मौसम विज्ञानी डॉक्टर गायत्री वाणी ह बतइन कि एक ठिन द्रोणिका दक्षिण गुजरात ले झारखंड अउ उत्तर छत्तीसगढ़ तक स्थित हवय। एखर प्रभाव ले अवइया 24 घंटा के दउरान उत्तर छत्तीसगढ़ के कुछेक जघा मन म हल्का ले मध्यम बरसा हो सकत हे। उहें, मध्य अउ दक्षिण छत्तीसगढ़ म बरसा म कमी आही। अवइया दू दिन म तापमान म बाढ़े के संभावना घलो हवय।