प्रधानमंत्री-जल सम्मेलन
प्रधानमंत्री नरेन्द्र मोदी ह शहरीकरण ले पैदा होय चुनौती, बाढ़त आबादी अउ भविष्य म पानी के जरूरत उपर सहरी स्थानीय निकाय ल संवेदनशील बनाय के आह्वान करीन हे। ओमन ह एखर बर चिंतन शिविर लगाय के सुझाव दीन। प्रधानमंत्री ह काली जल शक्ति मंत्रालय डहार ले राखे गे दू दिन के राष्ट्रीय विभागीय जल सम्मेलन के समापन सत्र के अध्यक्षता करीन। ओमन ह जल संरक्षण तकनीक ल जादा ले जादा अपनाय उपर जोर दीन।
जल संचय जनभागीदारी अभियान
जल शक्ति मंत्रालय के ‘जल संचय जन भागीदारी‘ अभियान के तीसर चरण म छत्तीसगढ़ ह देस म पहिली स्थान हासिल करे हे। उहें, राज्य के पांच ठन जिला – सूरजपुर, महासमुंद, बालोद, बलौदाबाजार-भाटापारा अउ कबीरधाम ह घलो जल संरक्षण के क्षेत्र म देस के शीर्ष दस ठन जिला म अपन स्थान बनाय हे।
प्रधानमंत्री नरेन्द्र मोदी के मौजूदगी म नई दिल्ली म राखे गे जल शक्ति मंत्रालय के विभागीय शिखर सम्मेलन म मुख्यमंत्री विष्णुदेव साय ह छत्तीसगढ़ म जल संरक्षण बर करे जावत नवाचार अउ अउ जनभागीदारी आधारित प्रयास के जानकारी साझा करीन। ओमन ह कोरिया जिला ले सुरू होय पांच प्रतिशत मॉडल के बारे म बतावत किहीन कि ए मॉडल जल संरक्षण के दिसा म किसान मनके स्वैच्छिक भागीदारी के बने उदाहरण हे। सम्मेलन के कैच द रेन सत्र म उपमुख्यमंत्री अरूण साव ह राज्य म वर्षा जल संचयन, भू-जल पुनर्भरण अउ पेयजल स्त्रोत के संरक्षण बर करे जावत काम के जानकारी दीन। ए सम्मेलन म केन्द्रीय जल शक्ति मंत्री सीआर पाटिल संघरा आने-आने राज्य के जल संसाधन मंत्री अउ वरिष्ठ अधिकारी मौजूद रिहीन।
‘जल संचय जन भागीदारी‘ अभियान के तीसर चरण म छत्तीसगढ़ म उनयासी हजार सात सौ पचहत्तर जल संरचना बनाय जावत हे, जेमा ले ससत्तर हजार सात सौ उन्नीस जल संरचना के काम पूरा होगे हवय।
राज्यपाल-कुलपति बैठक
राज्यपाल रमेन डेका ह आज निजी विश्वविद्यालय के कुलपति मनके बइठका लेके विश्वविद्यालय म सिक्षा अउ सोध के गुणवत्ता संघरा आने-आने बिसय के समीक्षा करीन। ओमन किहीन कि विद्यार्थी मनके कल्याण विश्वविद्यालय के सर्वोच्च प्राथमिकता होना चाही। राज्यपाल ह विश्वविद्यालय ल नैक म बेहतर ग्रेडिंग प्राप्त करे बर जरूरी तैयारी करे के निरदेस दीन। ओमन किहीन कि विद्यार्थी अउ सिक्षक के अनुपात संतुलित होना चाही अउ विश्वविद्यालय म विद्य़ार्थी मनके संख्या बढ़ाय के प्रयास करे जाय।
राज्यपाल-मुलाकात
राज्यपाल रमेन डेका ह कहिन कि दृष्टिबाधित विद्यार्थी मन ल शिक्षा के मुख्य धारा ले जोड़े बर अउ जादा प्रयास करे जाना चाही। राज्यपाल ह आज लोकभवन म वर्ल्ड ऑडियो बुक टीम छत्तीसगढ़ के सदस्य मन ले भेंट करे के बेरा ए बात ल किहीन। ओमन किहीन कि तकनीक के माध्यम ले दृष्टिबाधित विद्यार्थी मन तक सिक्षा पहुंचाय के वर्ल्ड ऑडियो बुक टीम के प्रयास सराहनीय अउ अनुकरणीय हे। ए मउका म राज्यपाल ह टीम के सदस्य मन ल उंखर उल्लेखनीय योगदान बर प्रशस्ति पत्र प्रदान करीन।
बिजली कनेक्शन ई-केवाईसी
छत्तीसगढ़ म बिजली उपभोक्ता मनके कनेक्शन ल आधार ले लिंक करे बर ई-केवायसी प्रक्रिया सुरू कर दे गेहे। ए सितंबर ले ‘मोर बिजली ऐप‘ के माध्यम ले फेस रीडिंग अउ ओटीपी के माध्यम ले ऑनलाइन केवायसी के सुविधा सुरू करे गेहे। उहें, सात सितंबर ले सबो जोन कार्यालय म थंब इंप्रेशन अउ ओटीपी के माध्यम ले घलो ई-केवायसी कराय जा सकही। बिजली विभाग डहार ले चरणबद्ध तरीका ले ई-केवायसी के प्रक्रिया पूरा कराय जाही। जोन कार्यालय म सुविधा सुरू होय के बाद विभाग के कर्मचारी मन ह घर-घर जाके घलो उपभोक्ता मनके ई-केवाईसी करही।
मुख्य सचिव-बैठक
छत्तीसगढ़ म राष्ट्रीय तकनीकी वस्त्र मिशन-एन.टी.टी.एम. के प्रभावी क्रियान्वयन अउ तकनीकी वस्त्र क्षेत्र म अनुसंधान, नवाचार, उद्योग अउ कौशल विकास ल बढ़ावा दे बर मुख्य सचिव विकासशील के अगुवई म काली मंत्रालय म उच्च स्तरीय बइठका होइस। बइठका म मुख्य सचिव ह तकनीकी शिक्षण संस्थान अउ उद्योग प्रतिनिधि मन ल एके मंच म लाके तकनीकी वस्त्र सम्मेलन करे के निरदेस दीन। पहिली चरण म प्रत्येक तकनीकी संस्थान ले दस-दस विद्यार्थी मन ल उद्योग आधारित प्रसिक्षण के मउका देवाय के प्रयास करे जाही।
पीडब्ल्यूडी सचिव-निर्देश
लोक निर्माण विभाग के सचिव मुकेश कुमार बंसल ह बरसात के बाद निर्माणाधीन पुल-पुलिया अउ राष्ट्रीय राजमार्ग के काम म तेजी लाय के निरदेस दीन हे। ओमन किहीन कि अक्टूबर म सबो निर्माण स्थल म काम होवत दिखना चाही। संगेसंग बरसा ले टूटे पुल के मरम्मत अउ रेलिंग अउ दीवार के पेटिंग के काम तीस नवंबर तक पूरा करे के निरदेस दे गीस। बइठका म श्री बंसल ह केन्द्र सरकार के गति शक्ति पोर्टल म प्रदेस के सबो पुल-पुलिया के जानकारी दस सितंबर तक अपलोड करे बर किहीन।
जन्माष्टमी
भगवान श्रीकृष्ण के जन्मोत्सव के परब जन्माष्टमी काली छत्तीसगढ़ संघरा देस के हरेक भाग म श्रद्धा के संग मनाय जाही। जन्माष्टमी के मउका म रईपुर संघरा प्रदेस के सबो कृष्ण मंदिर मन म बढ़िया सजावट करे जावत हे। मंदिर अउ घर मन म काली रतिहा भगवान श्रीकृष्ण के बिसेस रूप ले पूजा-पाठ करके जन्म उत्सव मनाय जाही।
जन्माष्टमी के मउका म काली चार सितंबर ल छत्तीसगढ़ म शुष्क दिवस घोषित करे गेहे। ए दिन प्रदेस के सबो शराब दुकान, बार, होटल-बार, क्लब संघरा सराब बेचइया सबो लाइसेंसी दुकान मन बंद रइही अउ मांस बेचे म घलो प्रतिबंध रइही।
अंतर्राष्ट्रीय लैक्रॉस टूर्नामेंट-कांस्य पदक
मलेशिया के कुआलालंपुर म होय अंतर्राष्ट्रीय लैक्रॉस टूर्नामेंट म भारतीय महिला टीम ह सिंगापुर के टीम ल हराके कांस्य पदक जीते हे। ए टीम म छत्तीसगढ़ के रायगढ़ जिला के महलोई क्षेत्र के तीन खिलाड़ी – सोनम बंजारा, शांति प्रधान अउ मानसी भूमिया घलो सामिल हे।
ए उपलब्धि बर वित्त मंत्री ओपी चौधरी ह किहीन हे कि रायगढ़ के बेटी मन ह अंतर्राष्ट्रीय मंच म सानदार प्रदर्सन करके देस अउ छत्तीसगढ़ के मान बढ़ईन हे।
प्लास्टिक इंजीनियरिंग-काउंसिलिंग
रायपुर के सिपेट स्थित केन्द्रीय पेट्रोरसायन अभियांत्रिकी अउ प्रौद्योगिकी संस्थान म बी.टेक – प्लास्टिक्स इंजीनियरिंग म दाखिला बर आखिरी दौर के काउंसलिंग के तारीख घोषित कर दे गेहे। इच्छुक विद्यार्थी मन ह पांच ले आठ सितंबर तक अपन पंजीयन कराके दस सितंबर तक प्रवेस ले सकत हे। जादा विवरण तकनीकी सिक्षा संचालनालय के वेबसाइट के माध्यम ले जा सकत हे।
अउ अब थोरकुन समाचार सार म –
– छत्तीसगढ़ उच्च न्यायालय के मुख्य न्यायाधीश रमेश सिन्हा के सेवानिवृत्त होय म आज बिलासपुर म विदाई समारोह आयोजित करे गीस। समारोह म हाईकोर्ट के न्यायाधीश, न्यायिक अधिकारी अउ वकील मन सामिल होइन। न्यायाधीश रमेश सिन्हा उनतीस मार्च दू हजार तेईस के छत्तीसगढ़ होईकोर्ट के मुख्य न्यायाधीश के शपथ ले रिहीन।
– सामान्य प्रशासन विभाग ह छत्तीसगढ़ राज्य योग आयोग के अध्यक्ष संजय अग्रवाल, छत्तीसगढ़ राज्य आदिवासी स्थानीय स्वास्थ्य परंपरा अउ औषधि पादप बोर्ड के उपाध्यक्ष अंजय शुक्ला अउ इंद्रावती बेसिन विकास प्राधिकरण के उपाध्यक्ष शरद अवस्थी ल राज्यमंत्री के दर्जा देहे।
– बीजापुर जिला के भोपालपट्टनम थाना क्षेत्र के नीलमडगु के जंगल ले सुरक्षा बल ह माओवादी मन डहार ले लुका के राखे हथियार अउ गोलाबारूद बरामद करे हे। एमा बारह बोर के बंदूक, टूटे बीजीएल रायफल, बीजीएल सेल अउ जिंदा कारतूस सामिल हे।
अउ
– एंटी करप्शन ब्यूरो-एसीबी के टीम ह जांजगीर-चांपा जिला के किरारी के सरकारी स्कूल के महिला प्रिंसिपल अउ लिपिक ल दस हजार रूपिया के रिश्वत लेवत रंगेहाथ गिरफ्तार करे हे। आरोप हे कि ए मन ह स्कूलेच के एक झिन दूसर लिपिक ले एरियर्स निकाले के बदला रिश्वत के मांग करे रिहीन।