उपराष्ट्रपति ह एम्स रायपुर के उन्नत चिकित्सा सेवा अउ किडनी, कॉर्नियल के संगेसंग कान प्रत्यारोपण जइसन सफलता के प्रसंसा करीन। उपराष्ट्रपति ह दीक्षांत समारोह म स्नातक छात्र मन ले स्वास्थ्य, शोध अउ सेवा के क्षेत्र म पूरा निष्ठा ले योगदान देके बिनती करीन।
समारोह म आने-आने पाठ्यक्रम मनके छह सौ नवासी छात्र मन ल डिग्री दीन अउ प्रतिभावान छात्र मन ल स्वर्ण पदक दे गीस। ए दउरान छात्र मन ले नशा ले दूर रहि के समाज म जागरूकता फैलाय बर ‘‘से नो टू ड्रग्स‘‘ के शपथ देवईन।
आज के कार्यक्रम म राज्यपाल रमेन डेका, केन्द्रीय राज्यमंत्री अनुप्रिया पटेल अउ स्वास्थ्य मंत्री श्याम बिहारी जायसवाल के संगेसंग कतकोन बड़का लोगन मन सामिल होइन।
प्रधानमंत्री-अपील
प्रधानमंत्री नरेन्द्र मोदी ह एक घांव फेर लोगन मन ले स्वदेशी जिनीस मन ल अपनाय के बात किहीन। संगेसंग अगर जरूरी नइ हे त सोना झन बिसावय अउ विदेस मन म बिहाव के कार्यक्रम घलो टाले के प्रयास करयं। एक ठिन वीडियो संदेस म प्रधानमंत्री ह किहीन कि देश के युवा मन जउन आज कड़ा मेहनत करत हे, ओखर मनके मेहनत जरूर साकार होही।
राष्ट्रीय पोषण माह
महिला अउ बाल विकास विभाग डहार ले प्रदेस म नौवां राष्ट्रीय पोषण माह नौ सितंबर ले राखे जाही। मिशन सक्षम आंगनबाड़ी अउ पोषण टू प्वाइंट जीरो के तहत राखे गे ए अभियान के थीम एसो ‘‘हमारी आंगनबाड़ी, हमारी जिम्मेदारी‘‘ राखे गेहे। अभियान के दउरान आंगनबाड़ी केन्द्र मन म आने-आने गतिविधि के माध्यम ले पोषण के प्रति जागरूकता बढ़ाय के संग स्थानीस संसाधन के बढ़िया प्रयोग ल आगू लाय जाही। उहें, पोषण मेला के माध्यम ले मिलेट्स, मौसमी फल, सब्जी, दाल, दूध ले बने जिनीस, मेवा अउ कतकोन प्रकार के पुसटई वाले खाय-पीये के जिनीस के महत्ता बताय जाही।
इही बीच, राष्ट्रीय पोषण माह के कार्यक्रम ल लेके आज रायपुर म महिला अउ बाल विकास विभाग संचालनालय म अंतरविभागीय बइठका होइस।
शिक्षक-सम्मान
शिक्षक दिवस के मउका म पांच सितंबर के तैंतीस ठिन जिला मनके चौंसठ झिन सिक्षक मन ल राज्य सिक्षक सम्मान अउ चार झिन सिक्षक मन ल आने-आने साहित्यकार मनके नाव उपर दे जाय स्मृति पुरस्कार ले सम्मानित करे जाही। लोक शिक्षण संचालनालय ह चुने गे सिक्षक मनके सूची जारी कर देहे। सम्मान समारोह म रायपुर स्थित लोकभवन के छत्तीसगढ़ मंडपम म राखे जाही। समारोह म राज्यपाल, मुख्यमंत्री अउ स्कूल सिक्षा मंत्री सामिल होही।
स्वास्थ्य मंत्री-समीक्षा
स्वास्थ्य मंत्री श्याम बिहारी जायसवाल ह विभागीय अधिकारी मनके संग बइठका करके स्वास्थ्य सेवा ले जुडे़ मुद्दा उपर गोठबात करके जरूरी दिसा-निरदेस दीन। ओमन सुरक्षित मातृत्व आश्वासन योजना के तहत गर्भवती माईलोगिन मनके बेरा म पहिचान, हाई-रिस्क गर्भावस्था के निगरानी अउ संस्थागत प्रसव बर आंगनबाड़ी अउ मितानिन कार्यकर्ता मनके संग स्वास्थ्य टीम के बीच बने तालमेल रेहे उपर जोर दीन।
स्वास्थ्य मंत्री ह टीबी उन्मूलन अभियान ल प्रभावी बनाय, स्वाइन फ्लू के हर समय निगरानी अउ जांच, उपचार के बने ढंग ले व्यवस्था के निरदेस दीन। बइठका म स्वास्थ्य विभाग के खाली पद ल बेरा म भरे, दूर-दराज वाले जघा म बिसेस डॉक्टर मनके सुविधा पहुंचाय बर टेलीमेडिसीन सेवा ल बने ढंग ले करे के निरदेस दीन।
दुर्घटना
राजनांदगांव जिला के छुरिया थाना क्षेत्र म स्कॉर्पियो अउ फटफटी के बीच होय टक्कर म चार झिन लोगन के मउत होगे। ए घटना गांव भोलापुर अउ शिकारी महका मोड़ के तीर होइस। पुलिस के मुताबिक फटफटी म बइठे तीन झिन लोगन म दू झिन के मउकाच म परान छूट गे अउ एक झिन गंभीर रूप ले घायल माईलोगिन के अस्पताल म इलाज के दउरान मउत होगे। उहें, स्कॉर्पियो म बइठे एक झिन सियनहा के घलो इलाज के दउरान मउत होगे।
आरटीई-आवेदन
शिक्षा के अधिकार अधिनियम-आरटीई के तहत प्रदेश के प्राईवेट स्कूल मन म सत्र दू हजार सत्ताईस-अट्ठाईस के दाखिला के कार्यक्रम जारी कर दे गेहे। पालक मन एक ले इकतीस दिसंबर तक ऑनलाइन अरजी कर सकही। जेखर बाद बाद अरजी मनके जांच होही अउ राज्य स्तर म जिलावार लॉटरी के माध्यम ले लइका मन ल चुने जाही।
जानबा के मुताबिक राज्य सरकार ह फइसला लेहे कि प्रदेस म घलो आने सिक्षा बोर्ड अउ मंडल जइसन सिक्षा सत्र एक अप्रैल ले इकतीस मार्च तक चलही।
नशामुक्त संकल्प अभियान
सूचना अउ प्रसारण मंत्रालय के केन्द्रीय संचार ब्यूरो, रायपुर डहार ले धमतरी के स्वर्गीय छोटेलाल श्रीवास्तव स्नातकोत्तर महाविद्यालय म ‘‘नशामुक्त युवा फॉर विकसित भारत‘‘ अभियान के तहत जन-जागरूकता कार्यक्रम होइस। ए मउका म नशामुक्ति, पोषण अउ साफ-सफई के संदेस दे बर रंगोली अउ चित्रकला प्रतियोगिता राखे गीस, जेमा युवा मन ह अपन कला के बढ़िया प्रस्तुति दीन। कार्यक्रम म सामिल छात्र अउ लोगन मन ल जिनगी भर नशा ले दूर रेहे अउ समाज म नशामुक्त बनाय के सपथ देवाय गीस।
हलषष्ठी
लइका मनके लंबा उमर के कामना ले जुड़े हलषष्ठी माने कमरछठ के परब आज प्रदेस म भक्तिभाव के संग मनाय जात हे। ए मउका म माता मन ह उपास राख के पूजा-पाठ करीन। पूजा के रूप म महुआ, लाई अउ परसहर चाउर ल बिसेस रूप ले बनाय गे सगरी म चढ़ईन।
रंग-तरंग
रायपुर के महंत घासीदास संग्रहालय परिसर म काली ले लोकवाद्य अउ लोकधुन उपर आधारित ‘‘रंग-तरंग‘‘ कार्यक्रम चलत हे। पहिली दिन काली वाद्य अउ संगीत के संग फ्यूजन, पियानो, तबला अउ बांसुरी वादन के अलग-अलग प्रस्तुति दे गीस। कार्यक्रम के उद्देश्य छत्तीसगढ़ के समृद्ध लोक संगीत परंपरा, पारंपरिक वाद्य यंत्र अउ अभी के संगीत के सुर ल मंच देवाना हे।
संस्कृति अउ पुरातत्व विभाग के संचालक डॉक्टर संजय कन्नौजे ह किहीन कि छत्तीसगढ़ के पहिचान उंखर समृद्ध लोक संस्कृति अउ संगीत परंपरा ले हे।
मौसम विभाग ह काली ले पूरा प्रदेस म बरसा म कमी आय के संभावना जताय हे। फेर, काली अउ आज प्रदेस के कोनों-कोनों जघा म भारी बरसा होय के समाचार मिले हे। मौसम विज्ञानी डॉक्टर गायत्री वाणी ह आकाशवाणी समाचार ल बतईन कि झारखंड म बने कम दबाव के क्षेत्र के सेती प्रदेस के उत्तरी भाग म बरसा हो सकत हे।
अउ अब थोरकुन समाचार सार म –
– केन्द्रीय कृषि मंत्री शिवराज सिंह चौहान ह काली नई दिल्ली म राखे गे एक ठिन बइठका म प्रधानमंत्री धन-धान्य कृषि योजना के समीक्षा करीन।
– भारतीय जनता पार्टी के प्रदेस इकाई ह आने-आने प्रकोष्ठ मन बर संयोजक-सह संयोजक अउ प्रभारी मनके नियुक्ति करे हे। चुन्नीलाल साहू प्रकोष्ठ संकुल संयोजक अउ लाभचंद बाफना ल प्रकोष्ठ संकुल सहसंयोजक बनाय गेहे।
– राज्य शासन ह लोक निर्माण विभाग म छप्पन झिन कार्यपालन अभियंता मनके ट्रांसफर करे हे।
अउ
– एंटी करप्शन ब्यूरो-एसीबी के टीम ह सुकमा जिला के कोंटा म पदस्थ खंड सिक्षा अधिकारी ल सिक्षक मनके एरियर्स के पइसा के नाव उपर दस हजार रूपिया के रिश्वत लेवत गिरफ्तार करे हे।