प्रधानमंत्री नरेन्द्र मोदी ह ग्रामीण भारत म बदलाव लाय अउ लाखों लोगन ल सशक्त बनाय के ‘स्वामित्व योजना‘ के काली वीडियो कान्फ्रेंसिंग के माध्यम ले सुभारंभ करही। ए योजना के उद्देश्य ग्रामीण क्षेत्र म मकान मालिक ल मकान के अधिकार के रिकार्ड उलपब्ध कराना अउ संपत्ति कार्ड जारी करना हे। ए योजना ह चार बछर के अवधि म समूचा देस म चरणबद्ध रूप ले लागू करे जाही। एखर अंतर्गत करीबन छह लाख बैसठ हजार गांव म संपत्ति कार्ड जारी करे जाही। ए योजना म करीबन एक लाख संपत्ति धारक अपन मोबाइल फोन म एस.एम.एस. लिंक के माध्यम ले संपत्ति कार्ड डाउनलोड कर सकही। एखर बाद संबंधित राज्य सरकार व्यक्तिगत रूप ले संपत्ति कार्ड के वितरण करही। छह राज्य के सात सौ तिरसठ गांव म संपत्ति कार्ड जारी करे के काम काली ले सुरू हो जही। संपत्ति कार्ड होय म ग्रामवासी मन ल ऋण अउ दूसर वित्तीय लाभ लेके रास्ता खुलही।
पासवान अंतिम संस्कार
राष्ट्रीय लोक जनशक्ति पार्टी के संस्थापक नेता अउ केन्द्रीय मंत्री रामविलास पासवान के आज पटना म गंगा किनारे जनार्दन घाट म पूरा राजकीय सम्मान के संग अंतिम संस्कार करे गीस। उंखर बेटा चिराग पासवान ह ओमन ल मुखाग्नि दीन। थल सेना, नौ सेना अउ वायुसेना के जवान मन ह गाॅड आॅफ आॅनर दीन अउ बिहार पुलिस ह घलो सलामी दीन।
ए बेरा म बिहार के मुख्यमंत्री नितिश कुमार, उप मुख्यमंत्री सुशील कुमार मोदी, केन्द्रीय मंत्री रविशंकर प्रसाद, केन्द्रीय राज्यमंत्री नित्यानंद राय के संघरा कतकोन राजनीतिक दल के नेता, कार्यकर्ता अउ पदाधिकारी मन ओमन ल भावभीनी श्रद्धांजलि अर्पित करीन।
काॅलेज-आॅनलाइन कक्षा
प्रदेस के जम्मों महाविद्यालय म अवइया एक नवम्बर ले आॅनलाईन कक्षा सुरू हो जही। उच्च सिक्षा विभाग के सचिव धनंजय देवांगन ह काली वीडियो कान्फ्रेंसिंग के माध्यम ले जम्मों विश्वविद्यालय के कुलपति अउ महाविद्यालय के प्राचार्य मन ले काॅलेज म प्रवेस, आॅनलाइन कक्षा, परीक्षा परिणाम अउ पाठ्यक्रम के संबंध म चर्चा करीन। ए बेरा म ओमन कुलपति मन ले परीक्षा परिणाम समय म जारी करे बर केहे हे।
उच्च सिक्षा सचिव ह कहिन कि काॅलेज म प्रवेस के तिथि बाईस अक्टूबर निर्धारित करे गेहे। ओमन बतईन कि स्नातक स्तर के पाठ्यक्रम ल कम करे बर सुझाव समिति बनाय गेहे अउ जम्मों परीक्षा के परिणाम अक्टूबर के आखिर तक घोषित करे जाही।
राज्य अलंकरण समारोह
कोरोना संक्रमण ल देखत ए दारी छत्तीसगढ़ राज्य स्थापना दिवस म एक नवंबर के राज्य अलंकरण समारोह के वर्चुअल आयोजन करे जाही। मुख्य सचिव आर.पी. मंडल ह जम्मों संबंधित विभाग ल राज्य अलंकरण बर प्रविष्टि, विज्ञापन अउ अलंकरण के जम्मों प्रक्रिया निर्धारित समय-सीमा म पूरा करे के निरदेस देहे। राज्य अलंकरण बर अवइया तेरह अक्टूबर तक विज्ञापन अउ अट्ठारह अक्टूबर तक आॅनलाइन आवेदन प्रस्तुत करे बर तिथि निर्धारित करे गेहे। मुख्य सचिव ह विभाग डहार ले दिए जाने वाले सम्मान बर नोडल अधिकारी घलो नियुक्त करे बर केहे हे।
मुफ्त-नल कनेक्शन
प्रदेस के वनांचल अनुसूचित जाति बाहुल गांव अउ ग्रामीण क्षेत्र म रहइया बयालीस लाख ले जादा परिवार ल नल कनेक्सन देके काम अवइया तीन साल म पूरा करे के लक्ष्य राखे गेहे। जल जीवन मिशन म ए परिवार ल निःशुल्क नल कनेक्शन दे जाही। लोक स्वास्थ्य यांत्रिकी मंत्री गुरू रूद्र कुमार ह बतईन कि प्रदेस म ग्रामीण परिवार ल नल कनेक्शन देके काम तेजी ले पूरा करे बर कार्ययोजना बनाय गेहे। शुद्ध पेयजल के आपूर्ति बर निविदाकार मन ल प्रशासकीय स्वीकृति के आधार म काम दे जावत हे।
इही बीच, पीएचई मंत्री ह दुरूग जिला के ग्राम सगनी म पांच गांव बर नल-जल योजना के भूमिपूजन करीन। ए योजना ले ग्राम सगनी के अलावा परसदा, सेमरिया, बीरेभाट अउ बागडुमर के करीबन चार हजार लोगन ल सुद्ध पेयजल मिलही।
अनुज शर्मा-कोरोना सावधानी अपील
छत्तीसगढ़ी फिल्म अभिनेता पद्मश्री अनुज शर्मा ह लोगन मन ले कोरोना संक्रमण ले बचाव बर जरूरी सावधानी बरते के अपील करे हे।
लोकवाणी
मुख्यमंत्री भूपेश बघेल के मासिक रेडियो वार्ता ‘‘लोकवाणी‘‘ के ग्यारहवीं कड़ी के प्रसारण काली ग्यारह अक्टूबर रविवार के होही। मुख्यमंत्री लोकवाणी म ए दारी ‘‘नवा छत्तीसगढ़-हमर विकास-मोर कहानी‘‘ बिसय म प्रदेसवासी मन ले बात करही। ‘‘लोकवाणी‘‘ के प्रसारण छत्तीसगढ़ के जम्मों आकाशवाणी केन्द्र, एफ.एम. रेडियो अउ क्षेत्रीय समाचार चैनल म बिहनिया साढ़े दस बजे ले होही।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह काली रतिहा साढ़े सात बजे आकाशवाणी रायपुर ले प्रसारित बिसेेष कार्यक्रम ‘‘हमर ग्राम सभा‘‘ म दूरस्थ अंचल म बैंकिंग सुविधा उपलब्ध करइया बैंक सखी मनके बारे म विस्तार ले जानकारी दीही। ए कारीकरम ल मीडियम वेब नौ सौ इक्यासी किलोहटर््ज म सुने जा सकत हे। ए कारीकरम ल प्रदेस के जम्मों आकाशवाणी केन्द्र एक संघरा रिले करही।
विजय बघेल-किसान चैपाल
दुर्ग सांसद विजय बघेल ह आज पाटन विधानसभा क्षेत्र के ग्राम रानीतराई म किसान चैपाल अभियान के समापन बेरा म किहीन कि केन्द्र सरकार डहार ले पारित कृषि संशोधन विधेयक ह किसान मन बर लाभदायी अउ हितकारी हे। ओमन आरोप लगाईन हे कि राज्य सरकार अउ कांग्रेस नेता मन डहार ले कृषि विधेयक ल लेके किसान मन ल गुमराह करे के प्रयास करे जावत हे। संगेसंग ओमन किसान अउ भाजपा कार्यकर्ता मन ले प्रधानमंत्री नरेन्द्र मोदी ल कृषि संशोधन विधेयक पारित कराय बर धन्यवाद पत्र प्रेषित करे के घलो आह्वान करे हे।
दूसर कोति, छत्तीसगढ़ प्रदेश कांग्रेस कमेटी डहार ले कृषि संशोधन बिल के विरोध म जम्मों जिला अउ ब्लाॅक मुख्यालय म वर्चुअल रैली के आयोजन करे जात हे। आज धमतरी म वर्चुअल रैली के आयोजन करे गीस।
सामुदायिक सर्वे
छत्तीसगढ़ म कोरोना संक्रमण के श्रृंखला ल तोड़े बर अभी ‘‘कोरोना सघन सामुदायिक सर्वें अभियान‘‘ चलाय जात हे। इही कड़ी म मुंगेली जिला म घलो सर्वें के काम शुरू होगे हे, जे ह बारह अक्टूबर तक चलही। कलेक्टर पी.एस. एल्मा ह लोगन ले सही जानकारी देके संघरा सर्वे टीम के सहयोग करे बर केहे हे।
उहें, राष्ट्रीय शहरी स्वास्थ्य मिशन के संचालक डाॅक्टर प्रियंका शुक्ला ह रायगढ़ म चलत सर्वें के निरीक्षण करीन।
ऐति, धमतरी जिला के ग्राम पोटियाडीह म लोगन ल कोरोना के प्रति जागरूक करे बर इंडियन रेडक्राॅस सोसायटी ह नुक्कड़ नाटक के मंचन करीन।
माओवादी-गिरफ्तार-आईईडी
बीजापुर जिला म बासागुड़ा थाना क्षेत्र म सीआरपीएफ अउ डीआरजी के संयुक्त टीम ह सर्चिंग के बेरा कतकोन हिंसक वारदात म सामिल दू माओवादी ल गिरफ्तार करे हे।
उहें, राजनांदगांव जिला के बकरकट्टा थाना क्षेत्र म डीआरजी, जिला पुलिस बल, आईटीबीपी अउ छत्तीसगढ़ सशस्त्र बल के संयुक्त टीम ह कौरूआ पहाड़ी जंगल अउ दूतागढ़ म गश्त के बेरा पांच किलो वजन के आईईडी बरामद करे हे, जेला बाद म बम निरोधक दस्ता ह निष्क्रिय करीस।
मानसिक-स्वास्थ्य दिवस
आज विश्व मानसिक स्वास्थ्य दिवस हरय। हर बछर दस अक्टूबर के मानसिक स्वास्थ्य के बारे म जागरूकता बढ़ाय अउ मानसिक उपचार के बारे म जानकारी दे बर ए दिन मनाय जाथे। केन्द्रीय स्वास्थ्य मंत्री डाॅक्टर हर्षवर्धन ह केहे हे कि जागरूकता के अभाव म मानसिक स्वास्थ्य संबंधी मामला म लोगन बात करे ले हिचकथे अउ चिकित्सा मदद ले म घलो संकोच करथे। डाॅक्टर हर्षवर्धन ह लोगन ले उपलब्ध मानसिक स्वास्थ्य सेवा के उपयोग करे के अपील करे हे।