उपराष्ट्रपति-छत्तीसगढ़
उपराष्ट्रपति सीपी राधाकृष्णन काली दू सितंबर के छत्तीसगढ़ के एक दिन के दउरा म रायपुर आही। ओमन रायपुर के अखिल भारतीय आयुर्विज्ञान संस्थान-एम्स के तीसरइया दीक्षांत समारोह म सामिल होही। समारोह म स्नातक, स्नातकोत्तर, सुपर-स्पेशियलिटी, पीएचडी अउ अलाइड हेल्थ साइंसेज प्रोग्राम के स्नातक करइया विद्यार्थी मन ल उपाधि दीहीं।
जीडीपी-वृद्धि
प्रधानमंत्री नरेन्द्र मोदी ह वित्त बछर दू हजार छब्बीस-सत्ताईस के पहली तिमाही म भारत के सात दशमलव आठ प्रतिशत के उत्साहजनक जीडीपी वृद्धि ल बड़े उपलब्धि बताय हे। सोशल मीडिया पोस्ट म प्रधानमंत्री ह कहिन कि तेल के कीमत म उतार-चढ़ाव, आपूर्ति श्रृंखला म व्यवधान अउ वैश्विक अनिश्चितता के बावजूद ए उपलब्धि देस के लोगन मनके सामूहिक शक्ति अउ दृढ़ता ल दर्शाथे।
इही बीच, छत्तीसगढ़ के मुख्यमंत्री विष्णुदेव साय ह किहीन हे कि दुनियाभर म अनिश्चितता के बावजूद भारत के जीडीपी वृद्धि देस के मजबूत अर्थव्यवस्था ल दर्साथे। ओमन किहीन कि छत्तीसगढ़ घलो ए राष्ट्रीय विकास के गति के संग मजबूती ले आगू बाढ़त हे। विकसित भारत के लक्ष्य ल हासिल करे म उद्योग, खनिज, बुनियादी ढांचा अउ समावेशी विकास के माध्यम ले राज्य अपन योगदान देवत रइही।
ईडी कार्रवाई
प्रवर्तन निदेशालाय-ईडी के टीम ह आज छत्तीसगढ़ लोक सेवा आयोग के कथित भर्ती घोटाला मामला म कतकोन जघा म छापामार कार्रवाई करीन। टीम ह आज बिहनिया भिलाई के विश्व बैंक कॉलोनी स्थित पूर्व मुख्यमंत्री भूपेश बघेल के निज सचिव रेहे के.के. चंद्रवंशी के घर म जांच बर पहुंचीन। टीम ह दस्तावेज अउ आने-आने सामान मनके जांच करीन।
उहें, ईडी ह बलरामपुर जिला के अपर कलेक्टर चेतन बोरघरिया ले घलो पूछताछ करीन। फेर पूछताछ के बारे म ईडी कोति ले आधिकारिक जानकारी अभी नइ आय हे। चेतन बोरघरिया कांग्रेस सरकार के दौरान तत्कालीन मुख्यमंत्री भूपेश बघेल के ओएसडी के रूप म सेवा दे चुके हे।
मुख्यमंत्री-दिल्ली
मुख्यमंत्री विष्णुदेव साय काली नई दिल्ली के भारत मंडपम म जल शक्ति मंत्रालय के विभागीय शिखर सम्मेलन म सामिल होही। आज संझा दिल्ली रवाना होय ले पहिली ओमन बतईन कि प्रधानमंत्री नरेन्द्र मोदी के मौजूदगी म ए सम्मेलन म केन्द्र अउ राज्य के बड़का प्रतिनिधि मन देस म जल सुरक्षा ल मजबूत बनाय उपर गोठबात करही।
चीनी जमाखोरी-सरकार
शक्कर के जमाखोरी रोके बर केन्द्र सरकार ह शक्कर के भंडारण के सीमा चार हजार क्विंटल ले घटाके दू हजार क्विंटल कर देहे। ए नवा सीमा ए महीना के पन्द्रह तारीख ले तीस नवंबर तक लागू रइही।
उपभोक्ता मामला, खाद्य अउ सार्वजनिक वितरण मंत्रालय के मुताबिक, संशोधित नियम के तहत कोनो भी व्यापारी स्टॉक मिले के तीस दिन ले जादा समय तक तय सीमा ले जादा शक्कर अपन तीर नइ राख सकही। सरकार ह केहे हे कि देस म शक्कर के कोनों कमी नइ होवन दे जाही।
हाईकोर्ट-मुख्य न्यायाधीश सिफारिश
सुप्रीम कोर्ट कॉलेजियम ह छत्तीसगढ़ उच्च न्यायालय के मुख्य न्यायाधीश बर ओडिशा के हाईकोर्ट के जज न्यायमूर्ति कृष्णा राम मोहपात्रा के नाम के सिफारिश करे हे। उहें, छत्तीसगढ़ हाईकोर्ट के न्यायाधीश संजय के. अग्रवाल ल राजस्थान हाईकोर्ट के मुख्य न्यायाधीश बनाय जाय के अनुशंसा करे गेहे। पाछु छह अगस्त के होय सुप्रीम कोर्ट कॉलेजियम के बइठका म ए फइसला ले गीस। ए सिफारिश वर्तमान मुख्य न्यायाधीश रमेश सिन्हा के चार सितंबर के रिटायर होय के बाद करइया नियुक्ति के संबंध म हवय।
सीजीएसएसबी-परीक्षा कैलेंडर
छत्तीसगढ़ कर्मचारी चयन मंडल ह बछर दू हजार सत्ताईस के परीक्षा कैलेंडर जारी कर देहे। एमा आने-आने विभाग म भर्ती परीक्षा के संगेसंग प्रवेस परीक्षा, सिक्षक पात्रता परीक्षा-टेट अउ राज्य पात्रता परीक्षा-सेट के तारीख घलो घोषित कर गेहे। यूपीएससी के तर्ज म कर्मचारी चयन मंडल ह सलाना कैलेंडर जारी करे के व्यवस्था सुरू करे हे। एखर संगेसंग आने-आने समूह अउ उप समूह के परीक्षा घलो होही। मंडल ह परीक्षा कैलेंडर अपन आधिकारिक वेबसाइट म अपलोड कर देहे।
सीजीपीएससी-परिणाम
छत्तीसगढ़ लोक सेवा आयोग-सीजीपीएससी ह राज्य सेवा परीक्षा-दू हजार पच्चीस के मुख्य लिखित परीक्षा के रिजल्ट जारी कर देहे। मुख्य परीक्षा म पाय होय छह सौ साठ अभ्यर्थी मनके चयन अब प्रक्रिया के अवइया चरण के साक्षात्कार बर करे गेहे। ए भर्ती प्रक्रिया राज्य सासन के आने-आने विभाग म दू सौ पैंसठ पद म नियुक्ति बर चलत हे। मुख्य परीक्षा के परिणाम आयोग के आधिकारिक वेबसाइट म जारी करे गेहे।
राज्यपाल-कुलसचिव बैठक
राज्यपाल रमेन डेका ह आज प्रदेस के आने-आने सरकारी विश्वविद्यालय के कुलसचिव मनके बइठका लीन। ए दउरान ओमन विश्वविद्यालय के सैक्षणिक गुणवत्ता, राष्ट्रीय शिक्षा नीति के क्रियान्वयन अउ नवाचार के संगेसंग स्टार्टअप गतिविधि समेत आने-आने बिसय के समीक्षा करीन। राज्यपाल ह विश्वविद्यालय मन म सीट के अनुपात म विद्यार्थी मनके संख्या बढ़ाय बर करे जावत कोसिस के जानकारी लीन अउ ए दिसा म प्राथमिकता ले काम करे के निरदेस दीन। राज्यपाल ह विश्वविद्यालय म खाली पद मन ल जल्दी भरे बर कहिन।
बइठका म राज्यपाल ह विश्वविद्यालय के नैक अउ एन.आई.आर.एफ रैंकिंग के स्थिति के घलो समीक्षा करीन। ओमन कहिन कि जम्मों विश्वविद्यालय अपन रैंकिंग म सुधार बर रोडमैप तियार करयं।
एनएमआईएमएस कैंपस
देस के प्रतिष्ठित उच्च सिक्षण संस्थान नरसी मोंजी इंस्टीट्यूट ऑफ मैनेजमेंट स्टडीज यानी एन.एम.आई.एम.एस. के कैंपस ल नवा रायपुर अटल नगर म स्थापित करे जाही। मुख्यमंत्री विष्णुदेव साय के मौजूदगी म आज संस्थान के स्थापना बर लीज अनुबंध अउ भूमि रजिस्ट्री के काम पूरा करे गीस। ए संस्थान के बने ले इहां करीबन दस हजार विद्यार्थी मन पढ़ई कर सकही। पहिली सैक्षणिक बैच दू ले तीन बछर के भीतर सुरू करे लक्ष्य राखे गेहे।
गांजा-बरामद
कबीरधाम जिला के चिल्फी पुलिस ह बोडला के तीर एक ठिन गाड़ी ले करीबन साढ़े चार क्विंटल गांजा बरामद करे हे। जब्त गांजा के कीमत करीबन दू करोड़ तेईस लाख रूपिया ले जादा के बताय जावत हे। मामला म पुलिस ह एक झिन आरोपी ल गिरफ्तार करे हे। राजनांदगांव रेंज के पुलिस महानिरीक्षक अजय यादव ह कार्रवाई करइया पुलिसकर्मी मन ल पच्चीस हजार रूपिया के नकद इनाम देहे।
उहें, जशपुर पुलिस ह घलो साठ किलो गांजा के संग एक झिन तस्कर ल गिरफ्तार करे हे। आरोपी चारपहिया गाड़ी के डिक्की म प्लास्टिक टेप म लपेटे साठ पैकेट गांजा ल लेके ओडिशा ले उत्तरप्रदेश जावत रिही
वन मंत्री-प्रेसवार्ता
वन अउ जलवायु परिवर्तन मंत्री केदार कश्यप ह कहिन हे कि राज्य सरकार पर्यावरण संसाधन के सुरक्षा बर प्रतिबद्ध हवय। आज नवा रायपुर म पत्रकार मन ले गोठबात करत श्री कश्यप ह अपन विभाग के काम के जानकारी दीन। एक ठिन सवाल के जवाब म वन मंत्री ह किहिन कि छत्तीसगढ़ म वन्यजीव के तस्करी म आने राज्य अउ अंतर्राष्ट्रीय गिरोह के जुड़े होय के संभावना हे, एखर सेती राज्य सरकार ह एखर जांच सीबीआई ले कराय के प्रस्ताव केन्द्र सरकार ल भेजही। ओमन बतईन कि राज्य म ईको टूरिज्म ल बढ़ावा दे बर विभाग डहार ले दू सौ चालीस प्राकृतिक पर्यटन केन्द्र स्थापित करे गेहे। वन मंत्री ह बतईन कि बछर दू हजार बाईस म राज्य म बाघ मनके संख्या अट्ठारह रिहीस, जउन ह बाढ़के पैंतीस होगे हे।
मुख्यमंत्री-धान खरीदी केन्द्र
मुख्यमंत्री विष्णुदेव साय ह कहिन हे कि किसान मन ल धान खरीदी म जादा सुविधा देवाय बर प्रदेस म तीन सौ चौव्वन धान खरीदी केन्द्र खोले जाही। मुख्यमंत्री ह ए बात काली रायपुर म भाजपा प्रदेस कार्यालय कुशाभाऊ ठाकरे परिसर म राखे गे किसान मोर्चा के प्रदेस कार्यसमिति के बइठका के समापन सत्र म किहीन। श्री साय ह कहिन कि राज्य सरकार ह किसान, गरीब, युवा अउ माईलोगिन मनके हित ल प्राथमिकता देवत प्रदेस के समग्र विकास बर सरलग काम करत हे। ओमन बतईन कि करीबन ग्यारह हजार करोड़ रूपिया के योजना ले जुड़े काम ल अवइया दू बछर म पूरा करे के लक्ष्य राखे गेहे।
ई-रेत संगवारी पोर्टल
मुख्यमंत्री विष्णुदेव साय काली नवा रायपुर म राखे गे कार्यक्रम म प्रधानमंत्री आवास योजना-ग्रामीण के पात्र हितग्राही मन ल निःशुल्क रेती देवाय बर ‘‘ई-रेत संगवारी‘‘ पोर्टल के सुभारंभ करीन। ए पहल के उद्देश्य प्रधानमंत्री आवास योजना म स्वीकृत आवास के निर्माण म हितग्राही मन ल रेती देवाय के संगेसंग उंखर पक्का घर के सपना ल साकार करे म मदद देवाना हे।