सारंगढ़-बिलाईगढ़ जिला म रायगढ़ रोड स्थित कुशल नगर के तीर आज ट्रक ले पिकअप गाड़ी ह टकरागे। ए घटना म दू झिन लोगन के मउकच म परान छूट गे अउ बारह झिन ले जादा यात्री मन घायल हो गेहे। घायल मन ल अस्पताल म भर्ती कराय गेहे। गाड़ी म पच्चीस ले जादा लोगन मन बइठे रिहीन।
‘‘रंग तरंग‘‘
प्रदेस के लोक संस्कृति, पारंपरिक संगीत अउ आधुनिक सुर के अनूठा संगम ल मंच देवाय के उद्देस्य ले काली एक सितंबर ले रईपुर म ‘रंग तरंग‘ कारीकरम सुरू करे जाही। संस्कृति विभाग डहार ले होवइया ए कारीकरम रोजे संझा सात बजे ले महंत घासीदास संग्रहालय परिसर सिविल लाइंस म होही। कारीकरम के दउरान प्रदेस के पारंपरिक लोक वाद्ययंत्र के प्रस्तुति के संगेसंग अभी के संगीत मन के प्रस्तुति दे जाही। ए कारीकरम तीन सितंबर तक चलही।
अउ अब पेस हे मौसम के हाल…
मौसम विभाग ह अवइया चौबीस घंटा के दउरान प्रदेस के उत्तर छत्तीसगढ़ बर रेड अलर्ट जारी करे हे। ए दउरान बलरामपुर अउ सूरजपुर के संगेसंग एखर ले लगे जिला म अतिभारी बरसा होय के चेतावनी दे गेहे। मौसम विज्ञानी डॉक्टर गायत्री वाणी ह बतइन कि पश्चिम बंगाल अउ ओखर ले लगे उत्तर ओडिसा म एक ठिन निम्नदाब के क्षेत्र बने हे, जेखर असर ले प्रदेस म मानसून के गतिविधि बने हे। ओमन बतइन कि रईपुर के संगेसंग मध्य छत्तीसगढ़ के कोनो-कोनो जिला बर यलो अलर्ट जारी करे गेहे।
इही बीच, पाछू तीन दिन ले सरलग होवत बरसा ले प्रदेस के नदिया-नरवा म बाढ़ आ गेहे। आज घलो राजधानी रईपुर के संगेसंग प्रदेस के कतकोन जघा म हल्का ले मध्यम बरसा होय के समाचार मिले हे।
– छत्तीसगढ़ मानवाधिकार आयोग के संयुक्त सचिव मनीष कुमार ठाकुर ल प्रतिनियुक्ति म विधि अउ विधायी कार्य विभाग म प्रमुख सचिव के पद म पदस्थ करे गेहे। ए बारे म सामान्य प्रशासन विभाग डहार ले आदेस जारी कर दे गेहे।
अउ
– राष्ट्रीय लोक अदालत बारह सितंबर के राखे जाही। छत्तीसगढ़ उच्च न्यायालय के मुख्य न्यायधीश रमेश सिन्हा ह आज लोक अदालत के तियारी ल लेके वर्चुअल बइठका लीन।