मन की बात
प्रधानमंत्री नरेंद्र मोदी ह किहीन हे कि विकसित भारत बर नसा मुक्त युवा अभियान देसभर म सरलग बाढ़त हे। आकाशवाणी ले मन की बात कारीकरम म श्री मोदी ह किहीन कि बड़ अकन मनख्ेा अउ खासकर जवान लइका मन ‘‘नसा मुक्त युवा अउ नसा मुक्त भारत‘‘ अभियान के हिस्सा बनत हे। प्रधानमंत्री ह लोगन मन ले नसा मुक्त भारत बर बढ़िया नारा तियार करे के संगे युवा संगीत कार मन ले अइसन गाना बनाय बर किहीन जउन ह जीवन बर आरो दे। संगे ओमन यहू किहीन कि हमर देस म सुघ्घर कंटेंट क्रिएटर के कमी नइ हे। ओखर मन ले मोर आग्रह हे कि ओमन आने-आने भाखा म अइसन कंटेंट बनाय जेखर ले ए सोज समाज ल मदद मिलय।
प्रधानमंत्री ह किहीन कि पीएम स्वनिधी के योजना के माध्यम ले लाखों नारी प्राणी मन ल नवा सक्ति मिलत हे। संगे श्री मोदी ह किहीन कि आज देस के नोनी मनके सपना के उड़ान ह अंतरिक्ष तक पहुंचत हे। ओमन किहीन कि आप सब ले ए जान के गरभ होही कि भारत ह दुनिया के अइसन सपना देखइया हजारों बेटी ल एक संग जोड़त हे अउ ए प्रयास के नांव हे ‘मिशन सक्ति सेट‘ एखर माध्यम ले एक सौ आठ देस के बारह हजार पढ़इया नोनी मन ल सेटेलाइट टेक्नालाजी सिखे के संगे इनोवेसन के क्षेत्र म आगू बाढ़े के मउका मिलत हे।
मन की बात-मुख्यमंत्री
मुख्यमंत्री विष्णुदेव साय ह आज रईपुर स्थित निरंजन धर्मशाला म प्रधानमंत्री नरेंद्र मोदी के ‘मन की बात‘ कारीकरम ल सुनिन। ए मउका म ओमन किहीन कि प्रधानमंत्री ह मन की बात म अंतरिक्ष विज्ञान ले जुड़े ‘‘मिसन सक्ति सेट‘‘ पहल के उल्लेख करीन, जेमा छत्तीसगढ़ के महिमा राजपूत घलो सामिल हे। मुख्यमंत्री ह महिमा ल बधई देवत किहीन कि प्रदेस के बेटी मन कई ठिन जघा म संहराय के लइक काम करत उपलब्धि हासिल करत हे। मुख्यमंत्री ह बतइन कि मन की बात म बस्तर ओलंपिक मल्हार के जुन्ना ताम्रपत्र अउ काला हिरण संरक्षण असन छत्तीसगढ़ के ए सब प्रयास के उल्लेख ह प्रदेस बर गौरव के बात हे। मुख्यमंत्री ह यहू किहीन कि प्रधानमंत्री ह हर घर तिरंगा अभियान बर देसवासी मनके उछाह के बड़ई मारिन अउ किहीन कि तिरंगा संग आठ करोड़ ले जादा सेल्फी अपलोड होना घलो राष्ट्रप्रेम के चिन्हारी हे।
नीट पीजी-परीक्षा
देसभर म आज कड़ा सुरक्षा अउ निगरानी बीच नीट पीजी-परीक्षा राखे गे रिहीस। राष्ट्रीय चिकित्सा विज्ञान परीक्षा बोर्ड के मुताबिक ए परीक्षा छत्तीस ठिन राज्य अउ केंद्रशासित प्रदेस मनके तीन सौ उनतालीस सहर मन म एक हजार एक सौ ग्यारा ठिन केंद्र म होइसा, जेमा दू लाख पैंसठ हजार ले जादा उम्मीदवार सामिल होइन। फेर जयपुर के सीतापुरा स्थित दू ठिन परीक्षा केंद्र म तकनीकी बाधा के सेति दू हजार चार सौ पंैतालीस झिन उम्मीदवार मन के परीक्षा पूरा नइ हो सकिस। ए उम्मीदवार मन बर पांच सितंबर के जयपुर म पुर्नपरीक्षा राखे जाही।
नेट परीक्षा उत्तर कुंजी
राष्ट्रीय परीक्षा एजेंसी-एनटीए ह आज संयुक्त सी.एस.आई.आर-यू.जी.सी. नेट परीक्षा के सबो पांच बिसय के अंतिम उत्तर कंुजी जारी कर देहे। ए परीक्षा म सामिल होय उम्मीदवार मन अपन पहिचान पत्र ले लॉगिन करके अपन बिसय वाले अंतिम उत्तर कंुजी ले देख सकत हे।
मुख्यमंत्री-नारी शक्ति सम्मान
मुख्यमंत्री विष्णुदेव साय आज रईपुर म राखे गे नारी सक्ति सम्मान समारोह म सामिल होइन। ए दउरान ओमन आने-आने क्षेत्र म सुघ्घर योगदान देवइया नारीपरानी मन ल सम्मानित करीन। समारोह म बोलत श्री साय ह किहीन कि नारी के सुरक्षा अउ स्वालंबन से ही समृध्द छत्तीसगढ़ बनही। ओमन यहू किहीन कि राज्य सरकार ह ए बछर ल महतारी गौरव बछर के रूप म मनाय के निरनय लेहे। संगे किहीन कि माईलोगिन मन ल पढ़ई-लिखई, रोजगार, उद्यमिता अउ सुरक्षा खातिर सुघ्घर मउका देके ओमन ल बिकास के मुख्यधारा ले जोड़े जात हे। श्री साय ह किहीन कि प्रदेस म तेरह लाख पचासी हजार ले जादा नारीपरानी मन लखपति दीदी बन गे हवय। उहें, महिला स्व-सहायता समूह ल सहुलियत दे खातिर चार सौ इकयासी ठिन महतारी सदन बनाय जात हे।
भाजपा-किसान मोर्चा बैठक
भारतीय जनता पार्टी किसान मोर्चा के प्रदेस कार्यसमिति के एक दिवसीय बइठका काली इकतीस अगस्त के रईपुर स्थित भाजपा प्रदेस कार्यालय कुशाभाऊ ठाकरे परिसर म राखे जाही। उद्घाटन सत्र के सुभारंभ कृषि मंत्री रामविचार नेताम करही। बइठका प्रदेस संगठन महामंत्री पवन साय अउ केंद्रीय राज्य मंत्री तोखन साहू समेत बड़का नेता अउ कार्यकर्ता मन मार्गदर्सन दिही। समापन बेरा मुख्यमंत्री विष्णुदेव साय सामिल होही।
विस्फोटक सामग्री-बरामद
बस्तर संभाग के सुकमा, नारायणपुर अउ बीजापुर जिला मन म सुरक्षा बल मन माओवादी डहार ले डंप करे गे हथियार अउ बिस्फोटक जिनिस बरामद करे हे।
सुकमा जिला के कोंटा थाना क्षेत्र म आज बेलपोच्चा ले गोमपाड़ रद्दा तीर के जंगल अउ पहाड़ी इलाका म जिला पुलिस बल डीआरजी अउ बस्तर फाइटर्स के जवान मन संघरा सर्चिंग अभियान चलइन। ए दउरान आठ किलो वजनी दू ठिन टिफिन बम समेत चार बंडल कोर्डेक्स वायर, दस ठिन डेटोनेटर, सत्रह ठिन जिलेटिन, फ्यूज वायर अउ बिजली के तार बरामद करे गीस।
उहें, नारायणपुर जिला म जिला पुलिस बल अउ बीएसएफ के संघरा टीम ह काली अदनार के जंगल म सर्चिंग बेरा माओवादी मन डहार ले लुकाके राखे गे डंप मेले दस ठन रायफल, दू बैरल ग्रेनेड लांचर, तेरह ठिन बीजीएल सेल, सोलह ठिन कारतूस अउ करीबन दू किलो बिस्फोटक बरामद करे हे।
अइसने, बीजापुर जिला म सुरक्षा बल मन काली थाना बासागुड़ा डीआरजी के संघरा टीम ह गांव तेगड़ापल्ली के जंगल क्षेत्र ले माओवादी मन डहार ले लुकाके राखे गे भारी मात्रा म बिस्फोटक जिनिस बरामद करे हे। उहें, कारवाई बेरा एक झिन संदिग्ध माओवादी सदस्य ल घलो गिरफ्तार करे गेहे।
नेपाल-बाढ़
नेपाल म हुरहा आय बाढ़ ले मउत होय मनखे मनके संख्या ह बाढ़के सात सौ अड़सठ हो गेहे। आपदा के पांचवां दिन घलो ढाई हजार ले जादा मनखे लापता हे।
उहें, छत्तीसगढ़ सरकार ह नेपाल म आय विनासकारी बाढ़के बाद लापता इंहा के मनखे मन ल सुरक्षित वापिस लाय बर विदेस मंत्रालय अउ भारतीय दूतावास ले संपर्क म हे।
‘प्रति बूंद अधिक फसल‘
केंद्र सरकार ह किहीन हे कि ए बछर जुलाई तक ‘‘प्रति बंूद अधिक फसल‘‘ योजना के चलत एक सौ पंद्रह लाख हेक्टेयर खेतिहा भुंईया ल लघु सिंचाई सिस्टम म लगाय गेहे। ए योजना के उद्देस्य खेत स्तर म पानी के बउरई ल सुघ्घर बनाना अउ सुधार करना हे। ए योजना ल जनवरी दू हजार छै म केंद्र सरकार ह लघु सिंचाई बर सुरू करे रिहीस।
अउ अब सुनव मौसम के हाल….
राजधानी रईपुर समेत कतकोन जघा म रहिके-रहिके पानी गिरत हे। जेखर ले नरवा-नंदिया उफनावत हे।इही बीच, मौसम विभाग ह अवइया चार दिन तक प्रदेस के कोनो-कोनो जघा म जोरदरहा बरसा होय के चेतावनी देहे। मौसम विभाग के मुताबिक उत्तर-पश्चिम बंगाल के खाड़ी अउ ओखर ले लगे पश्चिम बंगाल उत्तरी ओडिसा के तट म कमती दबाव के क्षेत्र बने हे। एखर असर ले प्रदेस म बादर पानी के स्थिति बने हुए हे। विभाग ह अवइया चैबीस घंटा के दउरान रईपुर, दुरूग, धमतरी, बेमेतरा, बालोद, महासमुंद, गरियाबंद, बलौदाबाजार, जांजगीर-चांपा, सक्ति, सारंगढ़-बिलाईगढ़, रायगढ़ अउ जशपुर जिला बर यलो अलर्ट जारी करे हे।
‘रंग तरंग‘
प्रदेस के लोक संस्कृति, पारंपरिक संगीत अउ आधुनिक सुर तान के अनोखा संगम ल मंच देके उद्देस्य ले अवइया एक ले तीन सितंबर तक रईपुर म ‘‘रंग तरंग‘‘ कारीकरम राखे जाही। संस्कृति विभाग डहार ले होवइया ए कारीकरम रोजिना संझा सात बजे ले महंत घासी दास संग्रहालय परिसर सिविल लाइन म होही।
‘‘साइबर जागृति अभियान‘‘
छत्तीसगढ़ पुलिस डहार ले पंद्रह अगस्त ले सुरू करे गे साइबर जागृति अभियान के तीसर हफ्ता आज ले सुरू हो गेहे। अभियान बेरा बड़का नागरिक मन ल डिजीटल अरेस्ट ले बांचे के जानकारी देके संगे पुलिस अधिकारी बनके होवइया फर्जी काल के माध्यम ले धमकी वाले जोखिम ले बांचे के उदिम सोज लोगन मन ल जागरूक करे बर अभियान चलाय जाही।