राष्ट्रीय खेल दिवस
देसभर म आज महान हॉकी खिलाड़ी अउ पद्म भूषण पुरस्कार विजेता, मेजर ध्यानचंद के जयंती ल राष्ट्रीय खेल दिवस मनाय जात हे। ए मउका म प्रधनमंत्री ह मेजर ध्यानचंद ल श्रध्दांजलि अर्पित करीन। सोसल मीडिया पोस्ट म प्रधानमंत्री ह जम्मों खेल प्रेमी मन ल राष्ट्रीय खेल दिवस के सुभकामना देवत किहीन कि इंखर समर्पण अउ संकल्प ह देस ल गौरवान्वित करथे।
राष्ट्रीय खेल दिवस के मउका म प्रदेस म घलो कतकोन करीकरम होवत हे। राजधानी रईपुर के पंडित दीन दयाल उपाध्याय ऑडिटोरियम म होय मुख्य समारोह म मुख्यमंत्री ह एक सौ पच्चीस झिन चुने गे खिलाड़ी, प्रसिक्षक अउ निर्णायक मन ल राज्य खेल अलंकरण ले सम्मानित करीन, जेमा बयासी खिलाड़ी अउ तिरालीस प्रसिक्षक अउ निर्णायक सामिल हे। एमन ल सहीद राजीव पांडेय, सहीद कौशल यादव, वीर हनुमान सिंह पुरस्कार, सहीद पंकज विक्रम सम्मान, सहीद विनोद चैबे सम्मान अउ मुख्यमंत्री ट्रॉफी दे गीस।
नेपाल-हादसा
नेपाल म आय बाढ़ म मृतक मनके संख्या बाढ़के अब छै सौ छब्बीस हो गेहे अउ दू हजार ले जादा लोगन मन लापता हे। इही बीच, भारत ह बाढ़ प्रभावित नेपाल ल मदद देके सरलग काम करत हे। विदेस मंत्रालय ह बतइन कि तीन सौ बीस भारतीय नागरिक मन ले अब तक संपर्क नइ हो पाय हे। इही बीच, बाढ़ म फंसे छत्तीसगढ़ ले जुड़े नौ झिन लोगन मनके जानबा मिले हे। उहें, रईपुर के पांच लोगन मन घलो सुरक्षित हवय। फेर बिलासपुर अउ सरगुजा ले दू झिन लोगन मनके लापता होय के सूचना हे। राज्य सरकार ह नेपाल प्रशासन अउ केंद्रीय एजेंसी मने संग सरलग गोठबात करत हे।
मन की बात
प्रधानमंत्री नरेंद्र मोदी ह काली बिहनिया ग्यारा बजे आकाशवाणी ले ‘मन की बात‘ कारीकरम म देस अउ विदेस के लोगन मन ले अपन बिचार साझा करही। मासिक रेडियो कारीकरम के एहा एक सौ सैंतीसवां कड़ी होही। कारीकरम के प्रसारण आकाशवाणी अउ दूरदर्सन के जम्मों चैनल, आकाशवाणी समाचार के वेबसाइट अउ मोबाइल ऐप म करे जाही। संगेसंग आकाशवाणी समाचार, दूरदर्सन समाचार, प्रधानमंत्री कार्यालय के संगेसंग सूचना अउ प्रसारण मंत्रालय के यूट्यूब चैनल म एखर सोज्झे प्रसारण होही।
भाजपा-कार्यशाला
प्रधाानमंत्री नरेंद्र मोदी के सार्वजनिक सेवा अउ जन-समर्पण के पच्चीस बछर पूरा होय के मउका म आज रईपुर स्थित प्रदेस भाजपा कार्यालय कुशाभाऊ ठाकरे परिसर म राज्य स्तरीय कार्यसाला राखे गीस। कार्यसाला म मुख्यमंत्री , कंेद्रीय राज्य मंत्री तोखन साहू, राष्ट्रीय सह-संगठन महामंत्री शिव प्रकाश, क्षेत्रीय संगठन महामंत्री अजय जमवाल, के संगेसंग प्रदेस संगठन महामंत्री पवन साय अउ पाटी के पदाधिकारी मन सामिल होइन।
जानबा के मुतबिक प्रधानमंत्री के जनम दिन के मउका म भाजपा ह सत्रह सितंबर ले अट्ठारा अक्टूबर तक सेवा संकल्प अभियान चलाही। ए दउरान प्रदेस भर म पार्टी कोति ले कतकोन सेवा गतिविधि के कारीकरम करे जाही।
केंद्र-चीनी आवंटन
केंद्र सरकार ह शक्कर ल बेरा म देवाय बर अभी के मासिक कोटा प्रणाली के जघा म अवइया महिना ले पखवाड़ा के आधार म सक्कर आवंटन प्रणाली सुरू करे के फइसला लेहे। एमा चीनी मिल मन ल पहिली हफ्ता म कम ले कम चालीस प्रतिसत आवंटन अउ बांचे मात्रा ल अगला हफ्ता म बेचना होही।
परीक्षा सुधार समिति
केंद्र सरकार डहार ले सार्वजनिक परीक्षा सुधार मन बर बनाय गे उच्च स्तरीय कार्यबल ह छात्र, पालक अउ शिक्षक मनके संगेसंग जम्मों हितधारक मनले सुझाव मंगाय हे। सुझाव तेरह सितंबर तक वेबसाइट, व्हॉटसअप या फोन नंबर-एक आठ सून्य सून्य-एक आठ सून्य-चार सात चार सात के माध्यम ले भेजे जा सकथे। ए सुझाव ई-मेल के माध्यम ले घलो भेजे जा सकथे। राष्ट्रीय परीक्षा एजेंसी-एनटीए डहार ले राखे गे परीक्षा के संगेसंग सार्वजनिक परीक्षा मन के संचालन सुरक्षा, डिजाइन अउ प्रशासन ले जुड़े बड़का सुधार के जांच अउ सिफारिस बर जानेमाने प्रौद्योगिकी बिसेसज्ञ नंदन निलेकणी के अध्यक्षता म कार्य बल के गठन करे गेहे।
राष्ट्रीय पात्रता परीक्षा-परिणाम
विश्वविद्यालय अनुदान आयोग के राष्ट्रीय पात्रता परीक्षा के चैरासी ठिन बिसय मनके परिणाम घोसित कर दे गेहे। राष्ट्रीय परीक्षा एजेंसी ह एसो जून म होय अंग्रेजी, वाणिज्य अउ समाज शास्त्र बिसय के परीक्षा ल एक घांव फेर करवाय के घोसना करे हे। बिसेसज्ञ समिति के प्रश्नपत्र म टाइपिंग, अनुवाद अउ भाषा ले जुड़े गलती पाय जाय के बाद ए फइसला ले गेहे। सोलह अगस्त के समाज शास्त्र, वाणिज्य अउ अंग्रेजी बिसय के उत्तर कुंजी जारी करे के बाद तीनों परीक्षा एसो सितंबर म एक घांव फेर कराय के घोसना करे गेहे। ए परीक्षा नौ अउ दस सितंबर के होही।
राज्यपाल-बलौदाबाजार
राज्यपाल रमेन डेका ह आज बलौदाबाजार भाटापारा जिला के चांपा स्थित शासकीय उच्चतर माध्यमिक विद्यालय म राखे गे सम्मान समारोह म सामिल होइन। ए मउका म राज्यपाल ह वरिष्ठ शिक्षक अउ कक्षा दसवीं-बारहवीं के हुसियार लइका मन ल सम्मानित करीन अउ संगेसंग स्कूल म नवा बने सभाकक्ष के लोकार्पण करीन।
साइबर जागृति अभियान
छत्तीसगढ़ पुलिस डहार ले पंद्रह अगस्त ले सुरू करे गे ‘‘साइबर जागृति अभियान‘‘ के तीसर हफ्ता काली ले सुरू होही। सहायक पुलिस महानिरीक्षक रोहित झा ह बतइन कि ए अभियान के दउरान वरिष्ठ नागरिक मन ल डिजिटल अरेस्ट ले बचाव के जानबा के देके संगेसंग पुलिस अधिकारी बनके करे जाय फर्जी काल के माध्यम ले धमकी जइसन खतरा ले बांचे के उपाय बताय जाही। संगेसंग बैंकिंग ले जुड़े जानबा ल साझा करे के जोखिम अउ साइबर ठगी ले बचाव के उपाय के बारे म लोगन मन ल जागरूक करे बर अभियान चलाय जाही।
जशपुर शतरंज-प्रतियोगिता
जशपुर म पहिली घांव ‘चेकमेट एट जशपुर-अखिल भारतीय ओपन फिडे ेरेटेड शतरंज प्रतियोगिता‘ आज ले सुरू हो गेहे। प्रतियोगिता के सुभारंभ उप मुख्यमंत्री अउ खेल मंत्री अरूण साव ह करीन। एक सितंबर तक चलइया ए प्रतियोगिता म बारह राज्य के एक सौ पचहत्तर खिलाड़ी अउ कोच भाग लेवत हे। प्रतियोगिता आठ चक्र म फिडे स्विस प्रणाली के मुताबिक होवत हे।
दुर्घटना
बिलासपुर जिला म आज ट्रक के टक्कर ले फटफटी म बइठे तीन झिन मनखे के मउत होगे। घटना के बाद आरोपी चालक ट्रक छोड़के भाग गे। ए घटना जुनापारा चैकी थाना क्षेत्र के हरय। पुलिस के मुताबिक तीन झिन मनखे मन फटफटी म बइठ के जात रिहीन दउरान ट्रक ले एखर गाड़ी टकरागे। ए घटना म तीनों झिन मनखे मनके मउकच म परान छूटगे।
ओति, कांकेर जिला के भानूप्रतापपुर क्षेत्र म आज बिहनिया गांव किनारी के तीर एक ठिन रफ्तार फटफटी चलइया ह ट्रक ले टकरागे। ए घटना म एक झिन मनखे के मउत होेगे अउ दू झिन आने मनखे मन गंभीर रूप ले घायल हो गेहे।
अउ अब पेस हे मौसम के हाल….
राजधानी रईपुर के संगेसंग प्रदेस के कतकोन जघा म आज हल्का ले मध्यम बरसा होवत हे। मौसम विभाग के मुताबिक बंगाल के खाड़ी म एक ठिन नवा सिस्टम बने हे। उत्तर पूर्वी उत्तर प्रदेस अउ आसपास निम्नदाब के क्षेत्र सक्रिय हे। उहें, पश्चिम बंगाल बांग्ला देस के तट उपर उपरी हवा के एक ठिन चक्रवाती घेरा बने हे। एखर असर ले प्रदेस म बदली बारिस के स्थिति बने हवय। मौसम विभाग ह अवइया चैबीस घंटा के दउरान रईपुर, दुरूग, धमतरी, बेमेतरा, बालोद, महासमुंद, गरियाबंद, बलौदाबाजार, जांजगीर-चांपा, सक्ति, सारंगढ़-बिलाईगढ़, रायगढ़ अउ जशपुर जिला बर यलो अलर्ट जारी करे हे। त उहें, एक-दू जघा म भारी बरसा होय के चेतावनी घलो दे गेहे।
अउ अब थोरकुन समाचार सार म –
– राज्य शासन ह भारतीय वन सेवा के अधिकारी विवेक आचार्य ल छत्तीसगढ़ राज्य वन विकास निगम लिमिटेड के कार्यकारी संचालक के पद म पदस्थ करे हे।
– उपमुख्यमंत्री अरूण साव ह आज जशपुर म तिरानवे करोड़ रूपिया के आने-आने विकास काम के लोकार्पण अउ भूमिपूजन करीन।
अउ
– सुकमा जिला के पोलमपल्ली स्थित बालिका पोटाकेबिन म पादू दू दिन म सैंतालीस झिन छात्रा मन ह बीमार होगे। ओमन ल दोरनापाल स्वास्थ्य केंद्र म भर्ती कराय गेहे। संसो जताय गेहे कि फूड प्वॉइजिंग के सेति छात्रा मनके तबियत बिगड़े हे।