प्रधानमंत्री जन धन योजना
प्रधानमंत्री जन धन योजना के बारह बछर पूरा हो गेहे। एहा देस म वित्तीय समावेसन के परिदृस्य ल बदले के दिसा म एक अहम पड़ाव हरय। ए योजना के सुरूआत प्रधानमंत्री नरेंद्र मोदी ह बछर दू हजार चैदह म आजे के दिन करे रिहीन। बारह बछर म ए योजना ह बिसेस रूप ले वंचित समुदाय मन बर औपचारिक बैंकिंग, ऋण, बीमा, पेंसन अउ डिजीटल भुगतान तक पहुंच के विस्तार करे हे। प्रधानमंत्री जन धन योजना के तहत अब तक उनसठ करोड़ ले जादा खाता खोले जा चुके हे, जेमा बत्तीस करोड़ बयानवे लाख महिला लाभार्थी हरय।
प्रधानमंत्री नरेंद्र मोदी ह किहीन कि पाछू बारह बछर म जन धन योजना के अभूत पूर्व परिवर्तनकारी परिणाम के प्रभाव बड़ सुघ्घर हे। सोसल मीडिया पोस्ट म श्री मोदी ह किहीन कि जन धन योजना वित्तीय समावेसन ल बढ़ावा दे अउ देस के लोगन मन ल सक्षम बनाय म महत्वपूर्ण भूमिका निभावत हे।
पेपर लीक-एफआईआर
इंदिरा गांधी कृषि विश्वविद्यालय म पेपर लीक के मामला आगू आय के बाद विश्वविद्यालय प्रबंधन ह बीएससी कृषि प्रथम बछर के दूसरा सेमेस्टर के ‘फंडामेंटल्स ऑफ जेनेटिक्स‘ परीक्षा ल निरस्त कर देहे। ए परीक्षा उन्नीस अगस्त के आयोजित होय रिहीस। अब ए परीक्षा सितंबर के दूसर हफ्ता म दूबारा राखे जाही। ए संबंध म विश्वविद्यालय प्रबंधन ह रईपुर स्थित तेलीबांधा थाना म एफआईआर दरज कराय हे।
खनिज ब्लॉक्स-नीलामी
प्रदेस म महत्वपूर्ण अउ रणनीतिक खनिज ब्लॉक्स के नीलामी ल बढ़ावा देबर इकतीस अगस्त के नवा रईपुर म रोड-सो आयोजित करे जाही। भारत सरकार के खान मंत्रालय डहार ले आयोजित ए कारीकरम म मुख्यमंत्री विष्णुदेव साय अउ केंद्र के संघरा राज्य सरकार के वरिष्ठ अधिकारी सामिल होही। केंद्र सरकार ह नीलामी के आठवां किस्त म बीस ठिन खनिज ब्लॉक्स सामिल करे हे। एमा ग्रेफाइट, दुर्लभ मृदा तत्व, वैनेडियम, टाइटेनियम अउ टंगस्टन जइसे खनिज सामिल हे। रोड-सो म निवेस अउ नीलाम प्रक्रिया म चर्चा होही।
बाढ़ लापता सकुशल
नेपाल म बाढ़ अउ भू-स्खलन के बीच लापता रईपुर के मोनिका यादव के सकुशल होय के सूचना हे। प्रशासन के अनुसार महादेव घाट निवासी मोनिका बाईस अगस्त ले नेपाल म रिहीन अउ बाढ़ के बाद ओखर परिजन मन ले संपर्क नइ हो पात रिहीस। राज्य सरकार ह सहायता बर टोल फ्री नंबर-एक सून्य सात सून्य अउ कंट्रोल रूम नंबर-सून्य सात सात एक दू दू दू तीन चार सात एक जारी करे हे।
गौधाम पशु-मौत
बिलासपुर जिला के मस्तुरी विकासखंड के ओखर गौधाम म पाछू तीन दिन म छै जानवर मनके मउत होय हे। पशु चिकित्सा विभाग के जांच रिपोर्ट के अनुसार एमा चार पशु के मउत वृध्दावस्था अउ दू झिन के दूसर कारण से होय हे। कलेक्टर संजय अग्रवाल के निरदेस म पशु चिकित्सा विभाग के टीम ह गौधाम के निरीक्षण करके मृत पशु मनके पोस्टमार्टम करीस। जांच म हाल के बहुत जादा बरसा के सेति गौधाम परिसर म जल भराव के स्थिति आगू आइस। गौधाम म करीबन तीन सौ पशु मौजूद हे। जम्मो पशु मन ल सुरक्षित जघा म स्थानांनतरित करे के निरदेस दे गेहे।
भर्ती विज्ञापन
डाक विभाग ह ग्रामीण डाक सेवक भर्ती के नोटिफिकेशन जारी करे हे। एमा ब्रांच पोस्टमास्टर, असिस्टेंट ब्रांच पोस्ट मास्टर अउ डाक सेवक के पद सामिल हेे। विभाग डहार ले पचीस हजार ले जादा पद उपर भर्ती करे जाही। वन टाइम रजिस्ट्रेसन इकतीस अगस्त ले उन्नीस सितंबर अउ आवेदन फीस भुगतान दू ले इक्कीस सितंबर तक होही।
ऐति, छत्तीसगढ़ वन विभाग म वन रक्षक मनके चैदह सौ ले जादा रिक्त पद म भर्ती के प्रक्रिया सुरू हो गेहे। लिखित परीक्षा तेरह दिसंबर के राखे जाीह। उहें, सारिरीक मापदंड अउ सारीरिक दक्षता परीक्षा म सफल अभ्यर्थी लिखित परीक्षा म सामिल होही।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ ए दारी ‘छत्तीसगढ़ पुलिस कोति ले चलाय जात साइबर जागृति अभियान‘ उपर केन्द्रित रइही। एखर तहत सहायक पुलिस महानिरीक्षक रोहित झा ले लेगे भेंटवार्ता के प्रसारण करे जाही। एखर प्रसारण काली उनतीस अगस्त के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। जेला छत्तीसगढ़ के जम्मो आकाशवाणी केंद्र एके संघरा रिले करहीं।
कैबिनेट मंत्री-दर्जा
राज्य सरकार ह अलग-अलग निगम बोर्ड अउ आयोग के अध्यक्ष अउ उपाध्यक्ष मन ल कैबिनेट मंत्री अउ राज्य मंत्री के दर्जा दे हे। सामान्य प्रशासन विभाग कोति ले जारी आदेस के अनुसार अट्ठारा पदाधिकारी मन ल मंत्री के दर्जा दे गेहे। एमा तीन झन ल कैबिनेट अउ पंद्रह झन ल राज्य मंत्री के दर्जा दे गेहे।
रक्षाबंधन
भाई-बहिनी के पवित्र सनेह के प्रतीक रक्षाबंधन के तिहार आज छत्तीसगढ़ समेत देसभर म उछाह अउ उमंग के संग मनाय जात हे। आज के दिन बहिनी अपन भाई के हाथ म रक्षा सूत्र बांधथे अउ ओखर लंबा उमर के कामना करथे। राष्ट्रपति द्रौपदी मुर्मू, प्रधानमंत्री नरेंद्र मोदी ह रक्षाबंधन के मउका म लोगन मन ल बधई दीन हे।
इही बीच, राज्यपाल रमेन डेका ह आज रईपुर के गायत्री नगर स्थित जगन्नाथ मंदिर पहुंच के भगवान जगन्नाथ के दर्शन अउ पूजापाठ करके रक्षा सूत्र बंाधिन। राज्यपाल ह ए मउका म प्रदेसवासी मनके सुख समृध्दि अउ खुसहाली के कामना करीन।
उहें, मुख्यमंत्री विष्णुदेव साय ह अपन रईपुर स्थित निवास म रक्षाबंधन के परब मनाइन। ए मउका म मुख्यमंत्री ल आने-आने स्कूल के छात्रा, सामाजिक कार्यकर्ता अउ भाजपा महिला मोर्चा के कार्यकर्ता मन रक्षा सूत्र बांधिन अउ ओखर लंबा उम्र के कामना करीन। ए मउका म मुख्यमंत्री ह प्रदेसवासी मन ल बधई अउ सुभकामना दीन।
उहें, रईपुर समेत प्रदेस के पांच कंेंद्रीय, बाईस जिला अउ छै ठिन उप जेल म रक्षा बंधन के तिहार आज उछाह अउ सदभाव के संग मनाय गीस। रईपुर सेंट्रल जेल म आज बिहनिया आठ बजे ले मंझनिया तीन बजे तक बहिनी मन ल बंदी मन ले मिले अउ ओमन ल राखी बांधे के अनुमति दे गे रिहीस, जेल अधीक्षक योगेश सिंह क्षत्री ह बतइन कि सुरक्षा ल व्यवस्था ले धियान म राखत एक झन बंदी ल राखी बांधे बर तीन बहिनी मन ल ही परवेस दे गीस।
अइसने, केंद्रीय जेल परिसर दुरूग म बंदी मन ले मिले अउ ओमन ल राखी बांधे पहुंचे बहिनी मनके सुरक्षा व्यवस्था के संग दुरूग पुलिस ह साइबर जागृति अभियान चलाइन। ए दउरान साइबर टीम ह मौजूद लोगन मनले ऑनलाइन ठगी, फर्जी काल, संदिग्ध लिंक, ओटीपी अउ डिजीटल धोखाधड़ी ले बांचे के उपाय बतइस।
ओति, बीजापुर म केंद्रीय रिजर्व पुलिस बल के जवान मन बालिका बाल गृह छात्रावास के छात्रा मन संग राखी तिहार मनाइन। छात्रा मन अधिकारी अउ जवान मन ल राखी बंाधिन अउ संघरा भाई-बहिनी के सनेह के संदेस दीन।
उहें, कांकेर जिला म भानूप्रतापपुर क्षेत्र के ग्राम चैगेल म आत्मसमर्पित माओवादी मन जिला रिजर्व गार्ड-डीआरजी के जवान मन ल राखी बांध के रक्षा बंधन के परब मनाइन। ए मउका म आत्मसमर्पित महिला माओवादी मन बतइन कि ओमन पहिली घांव रक्षाबंधन के तिहार मनावत हे। ओमन किहीन कि मुख्यमंत्री कौशल विकास प्रसिक्षण के माध्यम ले ओमन राखी बनाय बर सिखिन अउ आज इही राखी पुलिस जवान मनके कलाई म बांधना खास अउ भावुक अनुभव हरय।
राष्ट्रीय खेल दिवस
राष्ट्रीय खेल दिवस के मउका म काली मुख्यमंत्री विष्णुदेव साय रईपुर के पंडित दीनदयाल उपाध्याय ऑडिटोरियम म आयोजित होवइया समारोह म खेल अलंकरण बर चयनित खिलाड़ी प्रसिक्षक अउ निर्णायक मन ल राज्य अलंकरण ले सम्मानित करही। पुरस्कार खातिर पाछू तीन बछर बर कुल बयासी खिलाड़ी मन के चयन करे गेहे। उहें, मुख्यमंत्री ट्रॉफी बर पांच दल के तैंतालीस खिलाड़ी अउ प्रसिक्षक मन ल चुने गेहे।
अउ अब पेस हे मौसम के हाल…
मौसम विभाग ह प्रदेस म अवइया चैबीस घंटा के दउरान एक-दू जघा म भारी बरसा होय अउ गाज गिरे के चेतावनी देहे। मौसम विज्ञानी डॉ. गायत्रीवाणी ह बतइन हे कि उत्तर प्रदेस अउ ओखर लगे जिला म एक ठिन निम्नदाब के क्षेत्र बने होय हे। एखर असर ले प्रदेस म अवइया छै दिन तक बारिस के गतिविधि म बढ़ोत्तरी होय के संभावना हे।