खेलो इंडिया संवाद
राष्ट्रीय खेल दिवस के मउका म काली सत्ताईस अगस्त के देसभर म ‘‘खेलो इंडिया संवाद – खेल की बात, प्रधानमंत्री के संग‘‘ कार्यक्रम राखे जाही। ए दउरान प्रधानमंत्री नरेन्द्र मोदी ह वर्चुअल माध्यम ले देशभर के अलग-अलग जघा मन म मौजूद आठ लाख ले जादा युवा मन ले संवाद करही। ए कार्यक्रम ल हरेक जिला के दू ठन प्रमुख महाविद्यालय मन म राखे जाही। एखर तहत युवा प्रतिभागी मन ल स्थानीय खेल हस्ती, सांसद, विधायक अउ जनप्रतिनिधि मनके संग सोझे गोठबात करे के मउका मिलही। कार्यक्रम के दउरान पन्द्रह मिनट के एक ठन युवा संवाद सत्र घलो राखे जाही, जेखर माध्यम ले युवा अपन विचार, आकांक्षा अउ नीतिगत सुझाव व्यक्त कर सकही।
प्रधानमंत्री-सेवा तीर्थ
प्रधानमंत्री नरेन्द्र मोदी ह सेवा तीर्थ म प्रगति मंच के तिरपनवां बइठका के अध्यक्षता करीन। ओमन किहीन कि परिवहन अउ बुनियादी ढांचा परियोजना के योजना बनात समय, जिहां संभव हो, बिजली, पानी अउ दूसर सेवा बर साझा गलियारा विकसित करे जाना चाही। बइठका म नौ राज्य ले जुड़े रेलवे, सड़क अउ बिजली क्षेत्र के छै ठिन प्रमुख परियोजना के समीक्षा करे गीस, जेखर कुल लागत तीस हजार करोड़ रूपिया ले जादा हरय।
बिलासपुर-यलहंका रेल सेवा
केन्द्रीय आवासन अउ शहरी कार्य राज्यमंत्री तोखन साहू ह आज बिलासपुर रेलवे स्टेसन म राखे गे कार्यक्रम म बिलासपुर-यलहंका साप्ताहिक नियमित रेल सेवा ल हरा झंडा देखाके रवाना करीन। ए मउका म ओमन किहीन कि ए रेल सेवा के नियमित संचालन ले बिलासपुर अउ बेंगलुरू के बीच अवई-जवई अउ जादा सरल होही।
ए ट्रेन हरेक बुधवार के बिलासपुर ले मंझनिया दू बजे रवाना होही अउ अवइया दिन संझा सात बजे यलहंका पहुंचही। लहुटत म ए गाड़़ी हरेक गुरूवार के रतिहा साढ़े नौ बजे यलहंका ले रवाना होही। ए ट्रेन भाटापारा, रायपुर, दुरूग, राजनांदगांव, डोंगरगढ़, गोंदिया, सिकंदराबाद, रायचूर, गंुतकल समेत आने-आने स्टेसन ले होके गुजरही।
रक्षाबंधन-स्पेशल ट्रेन
रक्षाबंधन तिहार के दउरान यात्री मनके सुविधा बर दक्षिण पूर्व मध्य रेलवे के रायपुर मंडल ह स्पेशल ट्रेन चलाय के निर्णय लेहे। एखर तहत दुरूग-रायगढ़-दुरूग के बीच सत्ताईस ले उनतीस अगस्त तक रक्षाबंधन पैंसेजर स्पेशल ट्रेन चलाय जाही। ए ट्रेन म कुल दस आई.सी.एफ. कोच रिही, जेमा आठ जनरल अउ दू ठिन एस.एल.आर.डी. कोच सामिल हे।
शिक्षा मंत्री-समीक्षा
स्कूल सिक्षा मंत्री गजेन्द्र यादव ह किहीन हे कि स्कूल मन म सिक्षक केवल ऑनलाइन उपस्थिति दरज कराय बर ही झन आवय, बल्कि लइका मनके पढ़ई उपर पूरा ध्यान देवय। ओमन किहीन कि लइका मनके पढ़ाई म ध्यान नइ देवय सिक्षक मन उपर कड़ा कार्रवाई करे जाही। काली रईपुर म राखे गे विभागीय समीक्षा बइठका म श्री यादव ह किहीन कि प्रदेस के स्कूल मन म अवइया समय म छात्रा मन बर आठ हजार ले जादा सौचालय के निर्माण कराय जाही। ओमन यहू बतईन कि राज्य म पांच हजार सिक्षक मनके भर्ती करे के प्रक्रिया जारी हरय। बइठका म प्रदेसभर के जिला सिक्षा अधिकारी, विकासखंड सिक्षा अधिकारी के संघरा विभागीय अधिकारी अउ सचिव सामिल होइन।
प्रधानमंत्री-ई बस सेवा
रायपुर, बिलासपुर, दुरूग अउ कोरबा म प्रधानमंत्री ई-बस सेवा योजना के तहत दू सौ चालीस इलेक्ट्रिक्ट बस संचालित करे जाही। नगरीय प्रशासन विभाग के प्रमुख सचिव सोनमणी बोरा अउ केन्द्रीय आवासन अउ सहरी कार्य मंत्रालय के निदेशक भानूप्रताप सिंह भदौरिया ह काली नवा रायपुर म योजना के तियारी के समीक्षा करीन। बइठका म रूट प्लान, बस स्टॉप, डिपो, चार्जिंग इंफ्रास्ट्रक्चर अउ कमांड एंड कंट्रोल सिस्टम ल लेके दिसा-निरदेस दे गीस।
ईद मिलाद-उन-नबी
इस्लाम धर्म के प्रवर्तक पैगम्बर हजरत मोहम्मद के जन्मदिन ईद-मिलाद-उन-नबी आज छत्तीसगढ़ समेत देसभर म श्रद्धा अउ उछाह के संग मनाय जात हे। राष्ट्रपति द्रौपदी मुर्मु, उपराष्ट्रपति सीपी राधाकृष्णन, प्रधानमंत्री नरेन्द्र मोदी, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह ईद-मिलाद-उन-नबी म देसवासी मन ल सुभकामना दीन हे। ए मउका म रायपुर समेत प्रदेस के बहुत अकन जघा ह मुस्लिम समाज ह जुलुस निकालत हे।
नगरीय निकाय महंगाई राहत
नगरीय प्रशासन विभाग ह नगरीय निकाय के पेंशनर मनके महंगाई राहत म बढ़ोतरी करे हे। सातवां वेतनमान के पेंशनर मन ल अब अंठावन प्रतिसत अउ छठवां वेतनमान के दू सौ संतावन प्रतिशत के दर ले महंगाई राहत दे जाही। पेंशनर अउ परिवार पेंशनधारी मन ल एक जनवरी दू हजार छब्बीस ले एखर फायदा मिलही।
बिजली कनेक्शन-ई-केवायसी
प्रदेस म एक सितंबर ले जम्मों श्रेणी के बिजली कनेक्शन के ई-केवायसी के प्रक्रिया सुरू होही। ई-केवायसी बर आधार कार्ड अउ बिजली बिल म दरज नाव के मिलान अनिवार्य होही। उपभोक्ता घर बइठे मोर बिजली ऐप के जरिया अपन ई-केवायसी करा सकही। एखर बर कोनो तरह के सुल्क नइ ले जाही।
आईएमए-एच-वन, एन-वन
भारतीय चिकित्सा संघ-आई.एम.ए. ह इन्फ्लूएंजा-ए (एच-वन, एन-वन) के बाढ़त मामला ल देखत लोगन मन ले सतर्क रेहे के आग्रह करीन हे। आई.एम.ए. के कहना हे कि ज्यादातर संक्रमण हल्का होथे अउ अपने अपन ठीक हो जथे। एखर बर घबराय के कोनो बात नइ हे। आई.एम.ए. ह लोगन मन ल फ्लू के लक्षण बर डॉक्टर के पर्ची के बिना एंटीबायोटिक्स नइ लेके सलाह दीन।
आई.एम.ए. ह बतईन कि एच-वन, एन-वन म आमतौर म अचानक तेज बुंखार अउ जाड़ लगे, लगातार सूखा खांसी, गला म खराश, मांसपेसी म बड़ पीरा अउ थकान जइसे लक्षण दिखाई देथे। दूसर लक्षण म सर दर्द, नाक बहे या बंद होय के संघरा उल्टी अउ दस्त सामिल हो सकत हे।
सिविल भर्ती-परीक्षा स्थगित
बीस सितंबर के होवइया सिविल जज भर्ती परीक्षा-दू हजार छब्बीस ल अवइया आदेस तक स्थगित कर दे गेहे। बतादन कि सुप्रीम कोर्ट ह राज्य सरकार ल न्यायिक अधिकारी मनके सेवानिवृत्ति के उमर ल साठ बछर ले बढ़ाके बासठ बछर या अंतरिम रूप ले इकसठ बछर करे उपर विचार करे के निरदेस दीन हे। एखर सेती ए परीक्षा अवइया आदेस तक स्थगित करे गेहे।
शिक्षा मंत्री-टेट
छत्तीसगढ़ म सिक्षक पात्रता परीक्षा-टेट के अनिवार्यता के विरोध करत सिक्षक मनके मांग म स्कूल सिक्षा मंत्री गजेन्द्र यादव ह किहीन कि मध्यप्रदेश के जइसे छत्तीसगढ़ म घलो विभागीय परीक्षा लागू करे उपर विचार करे जात हे। ओमन किहीन कि ए सरकार के नहीं, बल्कि ए उच्चतम न्यायालय अउ उच्च न्यायालय के फइसला हरय।
छात्र प्रदर्शन
दुरूग जिला के पेंड्रावन स्थित स्वामी आत्मानंद अंग्रेजी माध्यम स्कूल म सिक्षक मनके कमी ल लेके विद्यार्थी मन खैरागढ़, धमधा मुख्य मार्ग म विरोध-प्रदर्शन करीन। प्रदर्सन के चलत ए रद्दा म अवई-जवई बहुत बेरा तक प्रभावित रिहीस। बाद म स्कूल सिक्षा मंत्री गजेन्द्र यादव ले फोन म आश्वासन मिले के बाद विद्यार्थी मन ह प्रदर्सन खतम करीन।
अउ अब थोरकुन समाचार सार म –
– छत्तीसगढ़ कैडर के भारतीय वन सेवा के अधिकारी वरूण जैन राष्ट्रीय जांच एजेंसी एनआईए म प्रतिनियुक्ति म जाही। उंखर नियुक्ति पुलिस अधीक्षक पद म होही।
– राज्य सरकार ह प्रदेस के आने-आने जिला म सहायक ग्रेड-तीन के सौ ठिन रिक्त पद बर सीधा भर्ती के स्वीकृति दे देहे। राजस्व विभाग ह संबंधित जिला कलेक्टर मन ल भर्ती प्रक्रिया सुरू करे के निरदेस देहे।
– छत्तीसगढ़ म समान नागरिक संहिता लागू करे बर सासन डहार ले गठित उच्च स्तरीय समिति के उपस्थिति म काली रायपुर म बइठका राखे जाही। बइठका म समान नागरिक संहिता के आने-आने प्रावधान, सामाजिक प्रभाव अउ व्यवहारिक पहलु मन उपर चर्चा करे जाही।
अउ
– छत्तीसगढ़ ओड़िशा सीमा ले लगे मल्कानगिरी जिला म सुरक्षा बल ह आज माओवादी मन डहार ले लुकाय गे डंप बरामद करे हे। एमा हथियार, आईईडी, क्लेमोर माइन अउ दूसर माओवादी जिनीस सामिल हे।