राष्ट्रपति-राष्ट्रीय सिक्षक पुरस्कार
राष्ट्रपति द्रौपदी मुर्मु ह पांच सितंबर सिक्षक दिवस के मउका म नई दिल्ली के विज्ञान भवन म उच्च सिक्षा संस्थान अउ पॉजिटेक्निक के इक्कीस झन सिक्षक-संकाय सदस्य मन ल राष्ट्रीय सिक्षक पुरस्कार भेंट करही। एमा रईपुर के पंडित रविशंकर शुक्ल विश्वविद्यालय म सारीरिक शिक्षा विभाग के प्रोफेसर डॉक्टर राजीव चौधरी ल घलो सामिल करे गेहे।
मुख्यमंत्री विष्णुदेव साय ह प्रोफेसर डॉक्टर राजीव चौधरी के चयन म ओमन ल बधाई अउ सुभकामना देहे।
मुख्यमंत्री-स्नेह की डोर कार्यक्रम
राखी तिहार के पहिली रईपुर के बलवीर सिंह जुनेजा इंडोर स्टेडियम म आज ‘‘स्नेह की डोर‘‘ कार्यक्रम के आयोजन करे गीस। कार्यक्रम म केन्द्रीय सुरक्षा बल, सेना अउ पुलिस जवान मनके हाथ म स्कूल म पढ़ईया नोनी, दिव्यांग नोनी, अउ महिला स्व-सहायता समूह के बहिनी मन ह राखी बांधीन। ए कार्यक्रम म मुख्यमंत्री विष्णुदेव साय ह घलो सामिल होइन। ए मउका म बछर दू हजार सत्रह म राखी तिहार के एक दिन पहिली माओवादी घटना म सहीद होय उप निरीक्षक युगल किशोर वर्मा के गोइसईन माधुरी वर्मा ह मुख्यमंत्री ल राखी बांधीन।
कार्यक्रम म मुख्यमंत्री श्री साय ह किहीन कि ए डोरी ह सिरिफ भाई-बहिनी के मया के बंधना नइ हरय, भलूक ए सहीद परिवार के विश्वास अउ मया के चिन्हा हरय।
ए दउरान मुख्यमंत्री ह रईपुर जिला प्रशासन अउ आने-आने विभाग डहार ले तैयार करे गे पांच अभिनव प्रोजेक्ट – ‘हरित पोषण, प्रोजेक्ट निरामय, तिरंगा शक्ति फेस्ट, प्रोजेक्ट अहि गुण्डिक अउ रायपुर अनल्टिर्ड के सुरूआत करीन।
खेलो इंडिया संवाद
राष्ट्रीय खेल दिवस के मउका म सत्ताईस अगस्त के देसभर म ‘‘खेलो इंडिया संवाद – खेल की बात, प्रधानमंत्री के संग‘‘ कार्यक्रम राखे जाही। ए दउरान प्रधानमंत्री नरेन्द्र मोदी ह वर्चुअल माध्यम ले देशभर के अलग-अलग जघा मन म मौजूद आठ लाख ले जादा युवा मन ले संवाद करही। ए कार्यक्रम ल हरेक जिला के दू ठन प्रमुख महाविद्यालय मन म राखे जाही। ए कार्यक्रम ह ‘‘युवा कनेक्ट‘‘ के माध्यम ले स्थानीय स्तर म युवा मन संग गोठबात करे म केन्द्रित हे। एखर अलावा युवा प्रतिभागी मन ल स्थानीय खेल के माध्यम ले सांसद, विधायक अउ जनप्रतिनिधि मनके संग सोझे गोठबात करे के मउका मिलही। कार्यक्रम के दउरान पन्द्रह मिनट के एक ठन युवा संवाद सत्र घलो राखे जाही। एसो ए कार्यक्रम ल युवा भागीदारी, खेल विकास अउ राष्ट्र निर्माण के थीम उपर राखे जाही।
महतारी वंदन योजना-राशि अंतरित
मुख्यमंत्री विष्णुदेव साय ह आज बालोद जिला के डौंडीलोहारा म राखे गे एक ठन कार्यक्रम म महतारी वंदन योजना के एकतीसवां किस्त के रासि ल जारी करीन। ओमन माईलोगिन मनके खाता म छह सौ इकतीस करोड ले जादा के रासि ल ट्रांसफर करे गेहे। ए मउका म मुख्यमंत्री ह किहीन कि राखी तिहार के पहिली बहिनी मनके जिनगी म खुशहाली पहुंचाय के मउका मिले हे।
यूसीसी-बैठक
छत्तीसगढ़ म समान नागरिक संहिता लागू करे बर राज्य सरकार डहार ले बनाय गे उच्च स्तरीय समिति के मौजूदगी म परन दिन सत्ताईस अगस्त के राजधानी रईपुर म बइठका राखे जाही। खबर के मुताबिक बिषय उपर बने विचार-विमर्श करे खातिर अलग-अलग क्षेत्र के करीबन दू सौ मनखे मन ल आमंत्रित करे गेहे। एमा आयोग, निगम, मंडल, सामाजिक संगठन, समाज के मुखिया, विकास प्राधिकरण के पदाधिकारी अउ जनप्रतिनिधि मन ल बलाय गेहे। ए दउरान समान नागरिक संहिता के प्रावधान, सामाजिक प्रभाव अउ कई ठिन पहलु उपर गोठबात करे जाही।
यूपीआई-दस वर्ष
यूनिफाइड पेमेंट्स इंटरफेस-यूपीआई ह डिजिटल भुगतान के क्षेत्र म बदलाव लावत आज दस बछर पूरा कर लेहे। प्रधानमंत्री नरेन्द्र मोदी ह सोशल मीडिया पोस्ट म कहिन कि राष्ट्र के ए डिजिटल क्रांति म हम जम्मों झन भारतवासी मन ल गरब करना चाही। ओमन किहीन कि यूपीआई प्रणाली के सुरूआत ह भारत के डिजिटल भुगतान ह देस के सबले बड़े फैसला रिहीन हे।
माशिमं-प्रवेश राहत
छत्तीसगढ़ माध्यमिक सिक्षा मंडल ह एसो हाईस्कूल अउ हायर सेकेंडरी द्वितीय मुख्य परीक्षा म सामिल विद्यार्थी मन ल स्कूल म दाखिला दे म सहुलियत देहे। मंडल डहार ले जारी आदेस के मुताबिक, हाईस्कूल अउ हायर सेकेंडरी स्कूल म पास अउ फेल होय विद्यार्थी मन ल तय करे गे पात्रता के आधार म सत्ताईस अगस्त तक स्कूल मन म दाखिला दे जाही। मंडल ह जम्मों मान्यता प्राप्त स्कूल के प्राचार्य मन ल निरदेस देहे कि दाखिला के पहिली विद्यार्थी मनके पात्रता के जांच जरूर करयं।
विद्यार्थी-विशेष पाठ्य सामग्री
राज्य म कक्षा छठवीं ले बारहवीं तक के पढ़ईया लइका मन ल प्रदेश के कला, संस्कृति, इतिहास अउ लोक परंपरा मनके जानकारी देवाय खातिर विशेष पाठ्य तियार करे जात हे। खबर के मुताबिक राज्य सैक्षणिक अनुसंधान अउ प्रसिक्षण परिषद डहार ले राजधानी रईपुर म चौबीस ले छब्बीस अगस्त तक तीन दिन के कार्यशाला राखे गेहे। एमा साहित्यकार, संस्कृति के जानकार, सोधकर्ता अउ विशेषज्ञ मन ह सामिल होके छत्तीसगढ़ के कला अउ संस्कृति उपर आधारित एक ठन कार्ययोजना तैयार करे जात हे।
हॉकी लीग
खेल अउ युवा कल्याण विभाग डहार ले अवइया अक्टूबर महीना म रईपुर के सरदार वल्लभ भाई पटेल अंतर्राष्ट्रीय हॉकी स्टेडियम म छत्तीसगढ़ हॉकी लीग के पहिली सीजन के आयोजन करे जाही। उपमुख्यमंत्री अउ खेल मंत्री अरूण साव ह आज रईपुर म पत्रकार मन ले गोठबात करत बतईन कि ए लीग म राज्य के आने-आने क्षेत्र के छह टीम ह भाग लीहीं। एमा राजधानी रॉयल्स, चित्रकूट चैलेजर्स, संस्कारधानी स्ट्राइकर्स, चक्रधर चैंपियंस, न्यायाधानी नाइट्स अउ मैनपाट टाइटन्स सामिल हे।
ओमन बतईन कि ए ह देस के कोनों भी राज्य म होवइया पहिली राज्य स्तरीय हॉकी लीग हरय, जेला हॉकी इंडिया लीग के तर्ज म खेले जाही। श्री साव ह बतईन कि हॉकी लीग के लोगो, छत्तीसगढ़ के मानचित्र म आधारित हे। उहें, लीग के टैगलाइन ‘‘ चलव रे संगी, हॉकी खेलबो‘‘ राखे गेहे। लीग के आधिकारिक शुभंकर ‘‘बघवा‘‘ हवय, जउन ह छत्तीसगढ़ के समृद्ध वन्य जीवन विरासत के प्रतीक हरय। हॉकी लीग के मुकाबला दर्सक मन बर निःशुल्क रइही।
नशामुक्ति संकल्प अभियान
सूचना अउ प्रसारण मंत्रालय के केन्द्रीय संचार ब्यूरो रायपुर डहार ले राजनांदगांव के सरकारी दिग्विजय स्वशाही महाविद्यालय म ‘‘नशामुक्त युवा फॉर विकसित भारत – संकल्प अभियान‘‘ के तहत फोटू प्रदर्शनी अउ जनजागरूकता कार्यक्रम के आयोजन करे गीस। महाविद्यालय के प्राचार्य सुचित्रा गुप्ता ह कार्यक्रम के उद्घाटन करीन। ए मउका ओमन विद्यार्थी मन ल नशा ले दूरिहा रेहे के सपथ देवईन।
उप अभियंता-नियुक्ति
लोक स्वास्थ्य यांत्रिकी विभाग डहार ले एक सौ ग्यारह उप अभियंता मनके नियुक्ति आदेस जारी करे गेहे। एमा एक सौ एक झन सिविल अउ दस झन विद्युत यांत्रिक अभियंता सामिल हे। नियुक्ति के संगेसंग चुने गे जम्मों झन अभियंता मन ल पदभार सौंप दे गेहे। चुने गे अभ्यर्थी मन ल नियुक्ति आदेस जारी होय के पन्द्रह दिन के भीतर कार्यालय म पदभार संभाले के निरदेस दे गेहे।
उपमुख्यमंत्री अउ लोक स्वास्थ्य यांत्रिकी मंत्री अरूण साव ह किहीन हे कि बड़ संख्या म युवा इंजीनियर मनके नियुक्ति होय ले विभाग के काम म तेजी आही।
एशिया कप-राजेश दवे
छत्तीसगढ़ स्टेट क्रिकेट संघ के पूर्व सचिव अउ रणजी खिलाड़ी राजेश दवे ल अवइया महिला टी-ट्वेंटी एशिया कप दू हजार छब्बीस बर भारतीय महिला क्रिकेट टीम के मैनेजर बनाय गेहे। भारतीय क्रिकेट कंट्रोल बोर्ड डहार ले श्री दवे ल ए जिम्मेवारी सौंपे गेहे।
अउ अब थोरकुन समाचार सार म –
– केन्द्र सरकार ह गेहूं के आटा अउ एखर ले जुड़े उत्पाद म लगे निर्यात प्रतिबंध ल हटा देहे, जेखर ले आटा, मैदा, सूजी अउ आने-आने गहूं आधारित उत्पाद के विदेसी निर्यात के रास्ता खुल गेहे।
– जांजगीर-चांपा जिला के बोड़सरा गांव म करंेट के चपेट म आय ले तीन साल के एक झिन नोनी के मउत होगे।
अउ
– राजधानी रईपुर केअउ डीडी नगर थाना क्षेत्र म एक ठिन गाड़ी ले करीबन पांच क्विंटल गांजा बरामद करे गेहे।